اليَهُود شالوا التار
1 فِي يَوْم 13 هَنَا شَهْرِي 12 الْأُسْمَهْ أَدَارْ، فِي الْيَوْم دَا بَسْ، وَاجِبْ يِطَبُّقُوا قَرَارْ الْمَلِكْ وَ قَانُونَهْ وَ عُدْوَانْ الْيَهُودْ يَحْسُبُوا يِنَّصُرُوا فَوْقهُمْ. وَ لَاكِنْ الشَّيّءْ دَا بِقِي بِالْعَكْس، الْيَهُودْ أَنَّصَرَوْا فِي النَّاسْ الْكِرْهَوْهُمْ. 2 وَ الْيَهُودْ لَمَّوْا فِي حِلَّالْهُمْ وَ فِي كُلَّ وُلَايَاتْ الْمَلِكْ أَشَوِرُوشْ لِيُقُمُّوا ضِدّ النَّاسْ الدَّوَّرَوْا يِسَوُّوا لَيْهُمْ الْفَسِلْ. وَ نَادُمْ مَا قِدِرْ يَقِيفْ قِدَّامْهُمْ أَشَانْ كُلَّ الشَّعَبْ خَايْفِينْ مِنْ الْيَهُودْ. 3 وَ كُلَّ مَسَائِيلْ الْوُلَايَاتْ وَ الْمُحَافِظِينْ وَ الْحُكَّامْ وَ خَدَّامِينْ الْمَلِكْ وَقَفَوْا وَرَاءْ الْيَهُودْ أَشَانْ خَايْفِينْ مِنْ مَرْدَكَايْ 4 فِي شَانْ مَرْدَكَايْ بِقِي نَادُمْ مُهِمّ فِي قَصِرْ الْمَلِكْ وَ أُسْمَهْ بِقِي طَالِعْ فِي كُلَّ الْوُلَايَاتْ. وَ مَرْدَكَايْ قَاعِدْ دَايْماً يَبْقَى نَادُمْ شَدِيدْ بِزِيَادَةْ.
5 وَ الْيَهُودْ ضَرَبَوْا كُلَّ عُدْوَانْهُمْ بِالْسَّيْف وَ كَتَلَوْهُمْ وَ دَمَّرَوْهُمْ. وَ لِلنَّاسْ الْكِرْهَوْهُمْ، هُمَّنْ سَوَّوْا فَوْقهُمْ مِثِلْ يِدَوْرُوهْ. 6 وَ فِي مَدِينَةْ شُوشَةْ الْقَوِيَّةْ، الْيَهُودْ كَتَلَوْا وَ دَمَّرَوْا 500 رَاجِلْ. 7 وَ كَتَلَوْا فَرْشَنْدَاتَا وَ دَلْفُونْ وَ أَسْفَاتَا 8 وَ فُرَاتَا وَ أَدَلْيَا وَ أَرِدَاتَا 9 وَ فَرْمَشْتَا وَ أَرِسَايْ وَ أَرِدَايْ وَ وَيْزَاتَا. 10 دَوْل الْأَوْلَادْ الْعَشَرَةْ هَنَا هَمَانْ وِلَيْد هَمْدَاتَا عَدُو الْيَهُودْ وَ هُمَّنْ كَتَلَوْهُمْ وَ لَاكِنْ مَا شَالَوْا خُمَامْهُمْ مِثِلْ غَنِيمَةْ. 11 وَ فِي نَفْس الْيَوْم دَا، خَبَّرَوْا الْمَلِكْ بِعَدَدْ النَّاسْ الْمَاتَوْا فِي مَدِينَةْ شُوشَةْ الْقَوِيَّةْ.
12 وَ الْمَلِكْ قَالْ لِأَسْتِيرْ الْمَلِكَةْ: «فِي مَدِينَةْ شُوشَةْ الْقَوِيَّةْ، الْيَهُودْ كَتَلَوْا وَ دَمَّرَوْا 500 رَاجِلْ وَ زِيَادَةْ مِنْ دَا، كَتَلَوْا الْأَوْلَادْ الْعَشَرَةْ هَنَا هَمَانْ. وَ شُنُو الْمَا سَوَّوْه فِي الْوُلَايَاتْ الْآخَرِينْ هَنَا الْمَمْلَكَةْ؟ وَ بَتَّانْ شُنُو طَلَبْكِ؟ أَشَانْ يِنَّفَّذْ! وَ بَتَّانْ شُنُو مُنَاكِ؟ أَشَانْ يِلْحَقَّقْ!» 13 وَ أَسْتِيرْ رَدَّتْ وَ قَالَتْ لَيَّهْ: «كَنْ بِقِي لَيْك عَدِيلْ، يَا الْمَلِكْ، خَلِّي الْيَهُودْ الْفِي شُوشَةْ يَلْقَوْا إِذِنْ يِسَوُّوا أَمْبَاكِرْ كُلَ نَفْس الشَّيّءْ حَسَبْ الْقَانُونْ مِثِلْ سَوَّوْه الْيَوْم. وَ خَلِّي يِعَلُّقُوا الْأَوْلَادْ الْعَشَرَةْ هَنَا هَمَانْ فِي الْعِيدَانْ.» 14 وَ الْمَلِكْ أَمَرْ وَ قَالْ: «خَلِّي يِسَوُّوا مِثِلْ دَا.»
وَ مَرَقَوْا قَرَارْ فِي شُوشَةْ وَ عَلَّقَوْهُمْ لِلْأَوْلَادْ الْعَشَرَةْ هَنَا هَمَانْ. 15 وَ الْيَهُودْ الْقَاعِدِينْ فِي شُوشَةْ لَمَّوْا بَتَّانْ فِي يَوْم 14 هَنَا الشَّهَرْ أَدَارْ وَ كَتَلَوْا 300 رَاجِلْ فِي شُوشَةْ وَ لَاكِنْ مَا شَالَوْا خُمَامْهُمْ مِثِلْ غَنِيمَةْ.
16 وَ لَاكِنْ قَبُلْ دَا، الْيَهُودْ الْآخَرِينْ الْقَاعِدِينْ فِي وُلَايَاتْ الْمَمْلَكَةْ لَمَّوْا لِيِدَافُعُوا لِنُفُوسْهُمْ مِنْ عُدْوَانْهُمْ لِيَلْقَوْا الْجُمَّةْ. وَ كَتَلَوْا 75 000 مِنْ النَّاسْ الْكِرْهَوْهُمْ وَ لَاكِنْ مَا شَالَوْا خُمَامْهُمْ مِثِلْ غَنِيمَةْ. 17 وَ دَا بِقِي فِي يَوْم 13 هَنَا الشَّهَرْ الْأُسْمَهْ أَدَارْ. وَ هُمَّنْ أَنْجَمَّوْا فِي يَوْم 14 وَ سَوَّوْا الْيَوْم دَا، يَوْم هَنَا عِيدْ وَ فَرْحَةْ. 18 وَ كَنْ لِلْيَهُودْ الْفِي شُوشَةْ اللَّمَّوْا فِي يَوْم 13 وَ 14، هُمَّنْ أَنْجَمَّوْا يَوْم 15 وَ سَوَّوْا الْيَوْم دَا، يَوْم هَنَا عِيدْ وَ فَرْحَةْ. 19 وَ فِي شَانْ دَا بَسْ، الْيَهُودْ السَّاكْنِينْ بَرَّا فِي الْحِلَّالْ يِسَوُّوا يَوْم 14 هَنَا الشَّهَرْ أَدَارْ يَوْم هَنَا فَرْحَةْ وَ عِيدْ وَ يَوْم حَلُو وَ أَيِّ وَاحِدْ يِقَدِّمْ هَدِيَّةْ لِجَارَهْ.
مَرْدَكَاي أسّس عيد
20 وَ مَرْدَكَايْ كَتَبْ كُلَّ الْكَلَامْ دَا وَ رَسَّلْ جَوَابَاتْ لِكُلَّ الْيَهُودْ الْفِي كُلَّ وُلَايَاتْ الْمَلِكْ أَشَوِرُوشْ الْقَاعِدِينْ قَرِيبْ أَوْ بَعِيدْ 21 أَشَانْ يِأَسُّسُوا لَيْهُمْ عِيدْ الْيِعَيُّدُوهْ كُلِّ سَنَةْ فِي يَوْم 14 وَ 15 هَنَا الشَّهَرْ الْأُسْمَهْ أَدَارْ. 22 أَشَانْ دَوْل الْأَيَّامْ الْيَهُودْ لِقَوْا فَوْقهُمْ الْجُمَّةْ مِنْ عُدْوَانْهُمْ وَ دَا الشَّهَرْ الْفَوْقَهْ حَالِتْهُمْ أَلْبَدَّلَتْ، الضِّيقَةْ بِالْفَرْحَةْ وَ الْحِزِنْ بِالْعِيدْ. وَ وَاجِبْ يِعَيُّدُوا الْأَيَّامْ دَوْل بِفَرْحَةْ وَ يِقَدُّمُوا هَدَايَا أَمْبَيْنَاتْهُمْ وَ يَنْطُوا هَدَايَا لِلْمَسَاكِينْ. 23 وَ الْيَهُودْ قَصَّدَوْا بِكَلَامْ مَرْدَكَايْ وَ بَدَوْا يِعَيُّدُوا الْعِيدْ وَ دَا بِقِي لَيْهُمْ عَادَةْ. 24 وَ مَرْدَكَايْ ذَكَّرَاهُمْ كَدَرْ هَمَانْ وِلَيْد هَمْدَاتَا الْمِنْ ذُرِّيَّةْ أَقَاقْ الْعَدُو هَنَا كُلَّ الْيَهُودْ خَطَّطْ لِيِدَمِّرْ الْيَهُودْ. وَ هُو سَوَّى أَمْ عِيَيْدَاتْ الْأُسُمْهَا فُورِيمْ لِيِبَرْجِلْهُمْ وَ يِدَمِّرْهُمْ. 25 وَ لَاكِنْ وَكِتْ الْكَلَامْ دَا وَصَّلْ بَكَانْ الْمَلِكْ، هُو كَتَبْ قَرَارْ كَدَرْ الْخِطَّةْ الْفَسْلَةْ الْهَمَانْ دَوَّرْ يِسَوِّيهَا فِي الْيَهُودْ تِقَبِّلْ فِي رَاسَهْ وَ خَلِّي يِعَلُّقُوهْ فِي عُودْ، هُو وَ أَوْلَادَهْ.
26 وَ بِسَبَبْ دَا بَسْ، الْأَيَّامْ دَوْل سَمَّوْهُمْ أَيَّامْ فُورِيمْ مَعَنَاتَهْ أَمْ عِيَيْدَاتْ. وَ بَيْدَا بَسْ، الْيَهُودْ عِرْفَوْا وَ فِهْمَوْا جَوَابْ مَرْدَكَايْ وَ كُلَّ شَيّءْ الشَّافَوْه وَ الْحَصَلْ فَوْقهُمْ. 27 وَ الْيَهُودْ قَصَّدَوْا وَ أَسَّسَوْا لَيْهُمْ عَادَةْ الْمَا تِلْخَلَّى لَيْهُمْ هُمَّنْ وَ لِذُرِّيِّتْهُمْ وَ لِلنَّاسْ السَّوَّوْا نُفُوسْهُمْ يَهُودْ. وَ هُمَّنْ يِعَيُّدُوا الْيَوْمَيْن دَوْل كُلِّ سَنَةْ فِي الْوَكِتْ الْمُحَدَّدْ مِثِلْ مَكْتُوبْ. 28 وَ الْأَيَّامْ دَوْل، يِذَّكَّرَوْهُمْ وَ يِعَيُّدُوهُمْ مِنْ ذُرِّيَّةْ لِذُرِّيَّةْ فِي أَيِّ عَايِلَةْ وَ أَيِّ وُلَايَةْ وَ أَيِّ مَدِينَةْ. وَ أَيَّامْ الْفُورِيمْ دَوْل مَا بِنْقَشَّوْا لِلْيَهُودْ وَ الذِّكْرَةْ دِي مَا تِوَدِّرْ مِنْ ذُرِّيِّتْهُمْ.
29 وَ الْمَلِكَةْ أَسْتِيرْ بِنَيَّةْ أَبِحَايِلْ وَ مَرْدَكَايْ الْيَهُودِي كَتَبَوْا بِكُلَّ إِذِنْهُمْ لِيِحَقِّقُوا الْجَوَابْ الْبُخُصّ عِيدْ الْفُورِيمْ. 30 وَ رَسَّلَوْا جَوَابَاتْ السَّلَامَةْ وَ الْأَمَانْ لِكُلَّ الْيَهُودْ الْقَاعِدِينْ فِي 127 وُلَايَةْ هَنَا مَمْلَكَةْ الْمَلِكْ أَشَوِرُوشْ. 31 وَ الْجَوَابَاتْ دَوْل يَطُلْبُوا مِنْ الْيَهُودْ يِعَيُّدُوا عِيدْ الْفُورِيمْ فِي الْوَكِتْ الْمُحَدَّدْ لَيَّهْ حَسَبْ الْأَمُرْ الْأَنْطَوْه مَرْدَكَايْ الْيَهُودِي وَ الْمَلِكَةْ أَسْتِيرْ لِكُلَّ الْيَهُودْ وَ ذُرِّيِّتْهُمْ. وَ دَا بُخُصّ قَرَارْ الصِّيَامْ وَ الْحِزِنْ كُلَ. 32 وَ أَمُرْ أَسْتِيرْ حَقَّقْ عِيدْ الْفُورِيمْ. وَ كُلَّ الشَّيّءْ دَا، كَتَبَوْه فِي الْكِتَابْ.
© La Bible en arabe tchadien © Alliance biblique du Tchad, 2019
