شَاوُول قمّ تعّب المسيحيّين
1 وَ شَاوُولْ مُوَافِقْ بِكَتِلْ إِسْتِفَانْ. وَ فِي نَفْس الْيَوْم بَسْ، النَّاسْ قَمَّوْا يِتَعُّبُوا أُمَّةْ الْمَسِيحْ فِي مَدِينَةْ الْقُدُسْ تَعَبْ شَدِيدْ. وَ كُلَّ الْأَخْوَانْ جَرَوْا مِنْ الْمَدِينَةْ وَ شَتَّوْا فِي الْكَدَادَةْ هَنَا دَارْ الْيَهُودِيَّةْ وَ دَارْ السَّامِرَةْ. وَ إِلَّا الرُّسُلْ فَضَّلَوْا فِي الْمَدِينَةْ. 2 وَ رُجَالْ تَقِيِّينْ شَالَوْا إِسْتِفَانْ وَ دَفَنَوْه. وَ حِزْنَوْا لَيَّهْ كَتِيرْ وَ فَرَشَوْا لَيَّهْ. 3 وَ لَاكِنْ شَاوُولْ دَوَّرْ يِدَمِّرْ أُمَّةْ الْمَسِيحْ مَرَّةْ وَاحِدْ وَ قَمَّ أَنْدَسَّ بَيْت لِبَيْت أَشَانْ يَكْرُبْ رُجَالْ وَ عَوِينْ وَ يِدِسُّهُمْ فِي السِّجِنْ.
فِلِبُّس في السَامِرَة
4 وَ الْمُؤمِنِينْ الشَّتَّوْا فِي أَيِّ بَكَانْ قَاعِدِينْ يِبَلُّغُوا الْبِشَارَةْ لِكُلَّ النَّاسْ. 5 وَ فِلِبُّسْ مَشَى فِي حِلَّةْ كَبِيرَةْ فِي دَارْ السَّامِرَةْ وَ قَمَّ يِبَلِّغْ لِلنَّاسْ بِبِشَارَةْ الْمَسِيحْ. 6 وَ نَاسْ كَتِيرِينْ لَمَّوْا بِنِيَّةْ وَاحِدَةْ لِيَسْمَعَوْا كَلَامَهْ أَشَانْ وَاحِدِينْ مِنْهُمْ سِمْعَوْا بِالْعَجَايِبْ وَ وَاحِدِينْ مِنْهُمْ شَافَوْهُمْ بِعُيُونْهُمْ. 7 وَ فِلِبُّسْ قَاعِدْ يَامُرْ الشَّوَاطِينْ أَشَانْ يَمُرْقُوا مِنْ النَّاسْ وَ الشَّوَاطِينْ يَصْرَخَوْا بِحِسّ شَدِيدْ وَ يَمُرْقُوا مِنْهُمْ. وَ قَاعِدْ يِدَاوِي نَاسْ مَعْضُورِينْ كَتِيرِينْ وَ مِنْهُمْ الْمُكَرْسَحِينْ وَ الْعُرُجْ. 8 وَ كُلَّ نَاسْ الْحِلَّةْ فِرْحَوْا بِلْحَيْن.
9 وَ فِي الْحِلَّةْ دِي، فِيَّهْ نَادُمْ وَاحِدْ أُسْمَهْ سِيمُونْ وَ هُو سَحَّارِي. وَ مِنْ وَكِتْ طَوِيلْ، نَاسْ السَّامِرَةْ قَاعِدِينْ يِلْعَجَّبَوْا فَوْقَهْ. وَ هُو قَاعِدْ يُقُولْ لَيْهُمْ هُو نَادُمْ مُهِمّ بِلْحَيْن. 10 وَ كُلَّ النَّاسْ، الصُّغَارْ وَ الْكُبَارْ، يَسْمَعَوْا كَلَامَهْ وَ يُقُولُوا: «هُو قُدْرَةْ اللّٰهْ الْعَظِيمْ.» 11 وَ يَسْمَعَوْا كُلَّ كَلَامَهْ أَشَانْ مِنْ زَمَانْ هُمَّنْ يِلْعَجَّبَوْا فَوْقَهْ بِلْحَيْن مِنْ السِّحِرْ الْهُو يِسَوِّيهْ.
12 وَ فِلِبُّسْ بَشَّرَاهُمْ بِعِيسَى الْمَسِيحْ وَ مَمْلَكَةْ اللّٰهْ وَ السَّامِرِيِّينْ آمَنَوْا بِكَلَامَهْ. وَ هُمَّنْ جَوْا لِفِلِبُّسْ، رُجَالْ وَ عَوِينْ، أَشَانْ هُو يِغَطِّسْهُمْ. 13 وَ سِيمُونْ كُلَ آمَنْ وَ فِلِبُّسْ غَطَّسَهْ. وَ أَيِّ بَكَانْ الْفِلِبُّسْ يَمْشِي فَوْقَهْ، سِيمُونْ يَمْشِي مَعَايَهْ وَ هُو شَافْ الْعَجَايِبْ وَ الْعَلَامَاتْ الْفِلِبُّسْ قَاعِدْ يِسَوِّيهُمْ وَ هُو أَلْعَجَّبْ مَرَّةْ وَاحِدْ.
14 وَ الرُّسُلْ فِي مَدِينَةْ الْقُدُسْ سِمْعَوْا كَدَرْ نَاسْ السَّامِرَةْ آمَنَوْا بِكَلَامْ اللّٰهْ وَ رَسَّلَوْا لَيْهُمْ بُطْرُسْ وَ يُوحَنَّا. 15 وَ وَكِتْ وِصْلَوْا فِي السَّامِرَةْ، سَأَلَوْا اللّٰهْ أَشَانْ الرُّوحْ الْقُدُّوسْ يَنْزِلْ فِي الْمُؤمِنِينْ. 16 وَ الرُّوحْ الْقُدُّوسْ لِسَّاعْ مَا نَزَلْ فَوْقهُمْ أَشَانْ غَطَّسَوْهُمْ بِأُسُمْ الرَّبّ عِيسَى بَسْ. 17 وَ خَلَاصْ، وَكِتْ الرُّسُلْ خَطَّوْا إِيدَيْهُمْ فِي الْمُؤمِنِينْ، الرُّوحْ الْقُدُّوسْ نَزَلْ فَوْقهُمْ.
18 وَكِتْ سِيمُونْ شَافْ الرُّسُلْ خَطَّوْا إِيدَيْهُمْ فِي النَّاسْ وَ الرُّوحْ الْقُدُّوسْ نَزَلْ فَوْقهُمْ، هُو جَاءْ لِلرُّسُلْ أَشَانْ يَنْطِيهُمْ قُرُسْ. 19 وَ سِيمُونْ قَالْ لَيْهُمْ: «لَيِّ أَنَا كُلَ أَنْطُونِي قُدْرَةْ أَشَانْ الرُّوحْ الْقُدُّوسْ يَنْزِلْ فِي أَيِّ نَادُمْ النُّخُطّ إِيدَيْنِي فَوْقَهْ.»
20 وَ بُطْرُسْ رَدَّ لَيَّهْ وَ قَالْ: «إِنْتَ وَ قُرْسَكْ كُلَ حَطَبْ النَّارْ أَشَانْ إِنْتَ فَكَّرْت تَقْدَرْ تَشْرِي بِقُرْسَكْ بَرَكَةْ اللّٰهْ! 21 إِنْتَ مَا تَقْدَرْ تِشَارِكْ فِي الْخِدْمَةْ دِي وَ لَا عِنْدَكْ حَقّ أَشَانْ قَلْبَكْ مَا مُخْلِصْ قِدَّامْ اللّٰهْ. 22 تُوبْ مِنْ فَسَالْتَكْ دِي وَ أَسْأَلْ رَبِّنَا. أَكُونْ يَغْفِرْ لَيْك فِكْرَكْ الْفَسِلْ دَا. 23 نَعَرِفْ كَدَرْ إِنْتَ مَلَانْ بِالشَّرّ وَ مُقَيَّدْ فِي الذُّنُوبْ.» 24 وَ سِيمُونْ قَالْ: «أَسْأَلَوْا لَيِّ رَبِّنَا أَشَانْ الشَّيّءْ الْقُلْتُوهْ مَا يَجِي فَوْقِي.»
25 وَ بُطْرُسْ وَ يُوحَنَّا بَلَّغَوْا بِشَارَةْ الرَّبّ لِنَاسْ السَّامِرَةْ وَ شَهَدَوْا لِلْمَسِيحْ. وَ بَعَدْ دَا، قَبَّلَوْا فِي مَدِينَةْ الْقُدُسْ. وَ وَكِتْ هُمَّنْ مَاشِينْ فِي دَرِبْهُمْ، بَلَّغَوْا الْبِشَارَةْ فِي حِلَّالْ كَتِيرِينْ هَنَا دَارْ السَّامِرَةْ.
فِلِبُّس و الحَبَشِي
26 وَ بَعَدْ دَا، وَاحِدْ مِنْ مَلَائِكَةْ اللّٰهْ جَاءْ لِفِلِبُّسْ وَ قَالْ: «قُمّ أَمْشِي عَلَيْ جِيهَةْ الْوَطِي وَ شِيلْ الدَّرِبْ الْيُشُقّ الْكَدَادَةْ مِنْ مَدِينَةْ الْقُدُسْ لَحَدِّي حِلَّةْ غَزَّةْ.» 27 وَ فِلِبُّسْ قَمَّ مَشَى وَ لِقِي نَادُمْ وَاحِدْ خَصِي مِنْ الْحَبَشَةْ. هُو خَدَّامْ هَنَا كَنْدَاكَةْ مَلِكَةْ الْحَبَشَةْ وَ هُو وَزِيرْ الْمَالْ. وَ الْخَدَّامْ دَا مَشَى مَدِينَةْ الْقُدُسْ أَشَانْ يَعَبُدْ اللّٰهْ. 28 وَ وَكِتْ مُقَبِّلْ فِي بَلَدَهْ، هُو رَاكِبْ فِي عَرَبَتَهْ وَ قَاعِدْ يَقْرِي فِي كِتَابْ النَّبِي إِشَعْيَا. 29 وَ الرُّوحْ الْقُدُّوسْ كَلَّمْ لِفِلِبُّسْ وَ قَالْ: «أَمْشِي قِدَّامْ وَ رُوغْ جَنْب الْعَرَبِيَّةْ.»
30 وَ فِلِبُّسْ مَشَى عَجَلَةْ وَ لِحِقْ الْعَرَبِيَّةْ وَ سِمِعْ الْكَلَامْ الْهُو يَقْرِيهْ الْقَاعِدْ فِي كِتَابْ النَّبِي إِشَعْيَا. وَ فِلِبُّسْ سَأَلَهْ وَ قَالْ: «إِنْتَ تَفْهَمْ الْكَلَامْ الْقَاعِدْ تَقْرِيهْ وَلَّا؟» 31 وَ الْحَبَشِي رَدَّ لَيَّهْ وَ قَالْ: «كِكَّيْف نَفْهَمْ الْكَلَامْ دَا كَنْ نَادُمْ مَا يِفَسِّرَهْ لَيِّ؟» وَ هُو عَزَمْ فِلِبُّسْ أَشَانْ يَرْكَبْ فِي الْعَرَبِيَّةْ وَ يَقْعُدْ مَعَايَهْ. 32 وَ فِي الْكِتَابْ الْقَاعِدْ يَقْرِيهْ، هُو لِحِقْ الْآيَةْ التُّقُولْ:
<مِثِلْ حَمَلْ الْيِوَدُّوهْ لِلدَّبِحْ
وَ مِثِلْ نَعَجَةْ سَاكْتَةْ وَكِتْ يِقَصُّصُوا صُوفْهَا،
هُو كُلَ مَا فَكَّ خَشْمَهْ.
33 نَاسْ عَيَّبَوْه
وَ مَا أَنْطَوْه الْحَقّ فِي الشَّرِيعَةْ.
وَ يَاتُو يِحَجِّي بِذُرِّيّتَهْ؟
أَشَانْ فَصَلَوْه مِنْ الْحَيِّينْ فِي الْأَرْض.>
34 وَ الْخَصِي سَأَلْ فِلِبُّسْ وَ قَالْ: «فِي الْكَلَامْ دَا، النَّبِي يِحَجِّي بِيَاتُو؟ يِحَجِّي بِنَفْسَهْ وَلَّا بِنَادُمْ آخَرْ؟» 35 وَ فِلِبُّسْ حَجَّى لَيَّهْ وَ بَدَا بِكَلَامْ الْكِتَابْ دَا وَ بَلَّغْ لَيَّهْ بِشَارَةْ عِيسَى.
36 وَ وَكِتْ هُمَّنْ مَاشِينْ فِي الدَّرِبْ، وِصْلَوْا فِي بَكَانْ عِنْدَهْ أَلْمِي وَ الْحَبَشِي قَالْ: «شِيفْ، دَاهُو أَلْمِي. شُنُو الْيَدْحَرْنِي مَا تِغَطِّسْنِي؟» 37 وَ فِلِبُّسْ رَدَّ لَيَّهْ وَ قَالْ: «نِغَطِّسَكْ كَنْ آمَنْت بِكُلَّ قَلْبَكْ.» وَ هُو قَالْ: «أَنَا مُؤمِنْ بِعِيسَى الْمَسِيحْ. هُو إِبْن اللّٰهْ.» 38 وَ الْحَبَشِي وَقَّفْ الْعَرَبِيَّةْ وَ نَزَلَوْا مِنْهَا وَ دَخَلَوْا فِي الْأَلْمِي وَ فِلِبُّسْ غَطَّسَهْ.
39 وَ وَكِتْ مَرَقَوْا مِنْ الْأَلْمِي، طَوَّالِي رُوحْ اللّٰهْ خَطَفْ فِلِبُّسْ وَ الْخَصِي مَا شَافَهْ بَتَّانْ. وَ قَمَّ شَالْ دَرْبَهْ فَرْحَانْ بِلْحَيْن. 40 وَ فِلِبُّسْ دَا، هُو أَنْشَافْ فِي حِلَّةْ أَشْدُودْ وَ مَشَى يِبَلِّغْ الْبِشَارَةْ فِي كُلَّ الْحِلَّالْ لَحَدِّي وِصِلْ فِي حِلَّةْ قَيْصَرِيَّةْ.
© La Bible en arabe tchadien © Alliance biblique du Tchad, 2019
