1 قَبِيلَةْ أَفْرَايِمْ تَرْوَى بِرِيحْ
وَ تَجْرِي وَرَاءْ رِيحْ الصَّبَاحْ.
كُلَّ يَوْم هِي تِكَتِّرْ الْكِدِبْ
وَ الدَّمَارْ.
تِسَوِّي عَلَاقَةْ مَعَ أَشُورْ
وَ تَنْطِيهْ دِهِنْ لِمَصِرْ فِي بَدَلْ السَّلَامْ.
يَعْقُوب الجِدّ الغشّاش
2 اللّٰهْ يِجِيبْ بَنِي يَهُوذَا فِي الشَّرِيعَةْ
أَشَانْ يِعَاقِبْ ذُرِّيَّةْ يَعْقُوبْ حَسَبْ دَرِبْهُمْ
وَ يِكَافِيهُمْ حَسَبْ عَمَلْهُمْ.
3 حَتَّى فِي بَطُنْ أَمَّهْ كُلَ،
يَعْقُوبْ غَشَّ شِقْ تَوْمَهْ.
وَ وَكِتْ بِقِي رَاجِلْ،
هُو صَارَعْ مَعَ الرَّبّ.
4 أَيْوَى، يَعْقُوبْ صَارَعْ مَعَ مَلَكْ الرَّبّ
وَ قِدِرْ فَوْقَهْ.
وَ بَعَدْ دَا، هُو بَكَى
وَ شَحَدْ الْمَلَكْ لِيِحِنّ فَوْقَهْ.
أَيْوَى، فِي بَيْت إِيلْ
هُو لِقِي اللّٰهْ
وَ فِي الْبَكَانْ دَا بَسْ،
اللّٰهْ حَجَّى لَيَّهْ.
5 وَ دَا اللّٰهْ الْإِلٰـهْ الْقَادِرْ،
اللّٰهْ هُو أُسْمَهْ الْبَيَّهْ نَذْكُرُوهْ!
6 وَ إِنْتُو ذُرِّيَّةْ يَعْقُوبْ،
وَاجِبْ تِقَبُّلُوا لِإِلٰـهْكُو
وَ تَحْفَضَوْا الرَّحْمَةْ وَ الْعَدَالَةْ
وَ دَايْماً تُخُطُّوا عَشَمْكُو فِي إِلٰـهْكُو.
7 وَ قَبِيلَةْ أَفْرَايِمْ مِثِلْ التَّاجِرْ
الْعِنْدَهْ فِي إِيدَهْ مِيزَانْ مَغْشُوشْ
وَ يِحِبّ يَظْلُمْ الْآخَرِينْ.
8 وَ نَاسْ أَفْرَايِمْ قَالَوْا:
«بِصَحِيحْ، أَنِحْنَ بِقِينَا غَنِيِّينْ
وَ لِقِينَا مَالْ كَتِيرْ بِخِدْمَةْ دُرَاعْنَا بَسْ.
وَ مَا يَلْقَوْا فَوْقنَا
أَيِّ خَطَا الْيَبْقَى ذَنِبْ.»
9 «وَ أَنَا اللّٰهْ إِلٰـهْكُو
مِنْ مَرَقْتُكُو مِنْ بَلَدْ مَصِرْ.
نِسَكِّنْكُو بَتَّانْ فِي خِيَمْ
مِثِلْ فِي أَيَّامْ خَيْمَةْ الْإِجْتِمَاعْ.
10 وَ فِي الْوَكِتْ دَاكْ، أَنَا كَلَّمْت لِلْأَنْبِيَاء
وَ كَتَّرْت لَيْهُمْ الرُّؤْيَةْ.
وَ هَسَّعْ بِوَاسِطَةْ الْأَنْبِيَاء،
نِكَلِّمْ لَيْهُمْ بِمَثَلْ.»
11 أَكِيدْ، شَعَبْ قِلْعَادْ فَسْلِينْ
وَ مَا عِنْدُهُمْ فَايْدَةْ
أَشَانْ يِقَدُّمُوا تِيرَانْ ضَحَايَا فِي قِلْقَالْ.
وَ بَيْدَا، مَدَابِحْهُمْ يِلْهَدَّمَوْا
وَ يَبْقَوْا كَوْم هَنَا تُرَابْ
فِي الزَّرَعْ الْمَحْرُوتْ.
12 زَمَانْ، جِدِّنَا يَعْقُوبْ عَرَّدْ
لِبَلَدْ أَرَامْ.
أَيْوَى، جِدِّنَا إِسْرَائِيلْ بِقِي خَدَّامْ
لِيَلْقَى مَرَةْ.
لِيَلْقَى مَرَةْ،
بِقِي رَاعِي هَنَا غَنَمْ.
13 وَ بَعَدَيْن بِوَاسِطَةْ نَبِي،
اللّٰهْ مَرَقْ بَنِي إِسْرَائِيلْ مِنْ مَصِرْ.
وَ بِوَاسِطَةْ نَبِي،
هُو حَفَضَاهُمْ.
14 وَ لَاكِنْ نَاسْ أَفْرَايِمْ
غَضَّبَوْا اللّٰهْ غَضَبْ شَدِيدْ.
وَ خَلَاصْ، إِلٰـهُّمْ يَرْمِي فِي رَاسْهُمْ
الدَّمّ الْهُمَّنْ دَفَّقَوْه
وَ يِقَبِّلْ فَوْقهُمْ كُلَّ عَيْبهُمْ.
© La Bible en arabe tchadien © Alliance biblique du Tchad, 2019
