1 وَ اللّٰهْ حَجَّى بَتَّانْ لِأَيُّوبْ وَ قَالْ:
2 الْيِخَاصِمْ
يِشَارِعْ مَعَ الْقَادِرْ وَلَّا؟
وَ الْيَشْكِي الرَّبّ
يُقُولْ لَيَّهْ شُنُو؟
أيُّوب يرُدّ للّه
3 وَ أَيُّوبْ رَدَّ لِلّٰهْ وَ قَالْ:
4 أَنَا الْمَا نِسَاوِي شَيّءْ،
نَقْدَرْ نُرُدّ لَيْك وَلَّا؟
لَا! نِسِدّ خَشْمِي.
5 أَنَا حَجَّيْت مَرَّةْ،
بَتَّانْ مَا نُرُدّ.
حَجَّيْت مَرَّتَيْن
وَ مَا نِزِيدْ شَيّءْ.
اللّه يسْأل أيُّوب
6 وَ اللّٰهْ حَجَّى بَتَّانْ لِأَيُّوبْ مِنْ لُبّ الرِّيحْ الشَّدِيدَةْ وَ قَالْ:
7 أَرْبُطْ صُلْبَكْ مِثِلْ رَاجِلْ فَحَلْ!
أَنَا نَسْأَلَكْ وَ إِنْتَ، تُرُدّ لَيِّ.
8 إِنْتَ تِدَوْر تِبَطِّلْ شَرِيعْتِي وَلَّا؟
وَ تِدَوْر تِسَوِّينِي خَاطِي أَشَانْ تِبَرِّي نَفْسَكْ وَلَّا؟
9 إِنْتَ عِنْدَكْ قُدْرَةْ مِثِلْ قُدُرْتِي أَنَا الرَّبّ وَلَّا؟
وَ حِسَّكْ مِثِلْ رَعَدْ يِشَابِهْ حِسِّي وَلَّا؟
10 كَنْ مِثِلْ دَا، جَمِّلْ نَفْسَكْ بِمَجْد وَ كِبْرِيَاءْ
وَ أَلْبَسْ الْعَظَمَةْ وَ الشَّرَفْ.
11 بِمَوْج غَضَبَكْ، غَطِّي كُلَّ النَّاسْ
وَ بِنَظْرَةْ وَاحِدَةْ، نَزِّلْ الْمُسْتَكْبِرِينْ!
12 شِيفْ كُلَّ الْمُسْتَكْبِرِينْ وَ دَنْقِرْهُمْ
وَ فِي بَكَانْهُمْ دَا بَسْ، دَمِّرْهُمْ!
13 أَدْفِنْهُمْ كُلُّهُمْ فِي التُّرَابْ
وَ أَسْجِنْهُمْ فِي الْقُبُورْ!
14 وَ بَيْدَا، خَلَاصْ أَنَا ذَاتِي نَفْرَحْ بَيْك
أَشَانْ إِيدَكْ الزَّيْنَةْ نَجَّتَكْ!
الغول بَهِمُوت المِثِل قِرِنْتي
15 دَاهُو بَهِمُوتْ الْأَنَا خَلَقْتَهْ مِثِلْ خَلَقْتَكْ إِنْتَ.
هُو يَاكُلْ قَشّ مِثِلْ تَوْر.
16 قُدُرْتَهْ فِي صُلْبَهْ
وَ قُوَّتَهْ فِي عَصَبْ بَطْنَهْ.
17 هُو يِوَقِّفْ دَنَبَهْ فَوْق مِثِلْ عُودْ الْأَرْز
وَ عَصَبْ دَوَارْجَهْ مَضْفُورْ.
18 عُضَامَهْ مِثِلْ حَوَادِرْ هَنَا نَحَاسْ
وَ صُفَافَهْ مِثِلْ حَدِيدْ.
19 هُو عَمَلْ الْمُهِمّ
السَّوَّاهْ الرَّبّ
وَ مَا فِي الْيِنَّصِرْ فَوْقَهْ
إِلَّا هُو الْخَلَقَهْ.
20 وَ مَعَاشَهْ يَجِي لَيَّهْ مِنْ الْجِبَالْ
وَ دَا الْبَكَانْ الْيِلِمُّوا فَوْقَهْ
كُلَّ حَيْوَانَاتْ الْكَدَادَةْ.
21 بَهِمُوتْ دَا يَرْقُدْ تِحِتْ التِّبِنْ
وَ يِلَّبَّدْ تِحِتْ عَقَيْق مَرْقَدْ أَلْمِي.
22 التِّبِنْ يِغَطِّيهْ بِضُلَّهْ
وَ قَنَ الْوُدْيَانْ يِحَوِّقَهْ.
23 كَنْ أَلْمِي جَارِي شَدِيدْ كُلَ،
مَا يِخَوِّفَهْ
وَ كَنْ بَحَرْ الْأُرْدُنْ يَجْرِي بِشِدَّةْ فِي خَشْمَهْ كُلَ،
هُو مَا لَمَّاهْ.
24 هَلْ نَادُمْ يَقْدَرْ يَكُرْبَهْ
مِنْ قِدَّامْ وَلَّا؟
أَوْ يَرْمِيهْ فِي الشَّرَكْ
وَ يِقِدّ مُنْخَرَهْ وَلَّا؟
© La Bible en arabe tchadien © Alliance biblique du Tchad, 2019
