الأعْياد التلاتة
1 فَكُّرُوا فِي شَهَرْ الْقَنَادِيلْ وَ عَيُّدُوا عِيدْ الْفِصْحَ لِلّٰهْ إِلٰـهْكُو أَشَانْ فِي شَهَرْ الْقَنَادِيلْ بَسْ اللّٰهْ إِلٰـهْكُو مَرَقَاكُو مِنْ بَلَدْ مَصِرْ بِاللَّيْل. 2 وَ قَدُّمُوا مِنْ غَنَمْكُو وَ بَقَرْكُو ضَحِيَّةْ عِيدْ الْفِصْحَ لِلّٰهْ إِلٰـهْكُو وَ دَا فِي الْبَكَانْ الْيَعَزِلَهْ اللّٰهْ لِيُخُطّ فَوْقَهْ أُسْمَهْ. 3 وَ مَعَ أَكِلْ الْعِيدْ، مَا تَاكُلُوا خُبْزَةْ الْعِنْدَهَا تَوَّارَةْ. وَ لَاكِنْ سَبْعَةْ يَوْم، آكُلُوا خُبْزَةْ بَلَا تَوَّارَةْ وَ دِي خُبْزَةْ التَّعَبْ. أَشَانْ إِنْتُو مَرَقْتُوا مِنْ بَلَدْ مَصِرْ مُسَّعْجِلِينْ وَ بَيْدَا، فِي كُلَّ مُدَّةْ حَيَاتْكُو تِذَّكَّرَوْا الْيَوْم الْمَرَقْتُوا بَيَّهْ مِنْ بَلَدْ مَصِرْ. 4 وَ فِي الْأَيَّامْ السَّبْعَةْ دَوْل، أَبَداً مَا تِخَلُّوا تَوَّارَةْ فِي بُيُوتْكُو وَ فِي كُلَّ بَلَدْكُو. وَ لَحَمْ الضَّحِيَّةْ الدَّبَحْتُوهَا فِي أَوَّلْ يَوْم بِعَشِيَّةْ، مَا تِخَلُّوهْ يَرْقُدْ لَحَدِّي فَجُرْ.
5 وَ مَا تَدْبَحَوْا ضَحِيَّةْ عِيدْ الْفِصْحَ فِي أَيِّ مَدِينَةْ الْيَنْطِيهَا لَيْكُو اللّٰهْ إِلٰـهْكُو. 6 وَ لَاكِنْ أَدْبَحَوْا ضَحِيَّةْ عِيدْ الْفِصْحَ فِي الْبَكَانْ الْيَعَزِلَهْ اللّٰهْ إِلٰـهْكُو لِيُخُطّ فَوْقَهْ أُسْمَهْ وَ دَا فِي وَقُوعْ الْحَرَّايْ، فِي الْوَكِتْ الْإِنْتُو مَرَقْتُوا فَوْقَهْ مِنْ بَلَدْ مَصِرْ. 7 رَكُّبُوا لَحَمْ الضَّحِيَّةْ دَا وَ آكُلُوهْ فِي الْبَكَانْ الْيَعَزِلَهْ اللّٰهْ إِلٰـهْكُو. وَ بِفَجُرْ، قَبُّلُوا وَ أَمْشُوا بُيُوتْكُو. 8 وَ فِي مُدَّةْ سِتَّةْ يَوْم، آكُلُوا خُبْزَةْ بَلَا تَوَّارَةْ. وَ فِي الْيَوْم السَّابِعْ، خَلَاصْ تِسَوُّوا حَفْلَةْ هَنَا كُمَالَةْ الْعِيدْ لِلّٰهْ إِلٰـهْكُو وَ فِي الْيَوْم دَا، مَا تِسَوُّوا أَيِّ خِدْمَةْ.
9 وَ أَحْسُبُوا سَبْعَةْ سُبُوعْ وَ أَبْدَوْا حِسَابْهُمْ مِنْ يَوْم تِدِسُّوا الْخَنْجَرْ فِي قَطِعْ الْقَمَحْ. 10 وَ بَعَدْ دَا، عَيُّدُوا عِيدْ الْقَطِعْ لِلّٰهْ إِلٰـهْكُو وَ أَنْطُوا هَدَايَا بِنِيِّتْكُو حَسَبْ الْبَرَكَةْ الْأَنْطَاهَا لَيْكُو اللّٰهْ إِلٰـهْكُو. 11 وَ أَفْرَحَوْا قِدَّامْ اللّٰهْ إِلٰـهْكُو فِي الْبَكَانْ الْهُو يَعَزِلَهْ لِيُخُطّ فَوْقَهْ أُسْمَهْ، إِنْتُو وَ عِيَالْكُو وَ بَنَاتْكُو وَ عَبِيدْكُو وَ خَدِيمْكُو وَ اللَّاوِيِّينْ السَّاكْنِينْ فِي حِلَّالْكُو وَ الْأَجَانِبْ وَ الْأَتَامَا وَ الْأَرَامِلْ الْقَاعِدِينْ فِي أُسُطْكُو. 12 وَ أَذَّكَّرَوْا كَدَرْ إِنْتُو بِقِيتُوا عَبِيدْ فِي بَلَدْ مَصِرْ وَ هَسَّعْ أَحْفَضَوْا الشُّرُوطْ دَوْل وَ طَبُّقُوهُمْ.
13 وَ عَيُّدُوا عِيدْ اللَّقَادِيبْ لِمُدَّةْ سَبْعَةْ يَوْم وَ دَا وَكِتْ لَمَّيْتُوا إِنْتَاجْكُو مِنْ الْمَدَقّ وَ عَصَّارَةْ الْعِنَبْ. 14 وَ أَفْرَحَوْا بِمُنَاسَبَةْ الْعِيدْ دَا، إِنْتُو وَ أَوْلَادْكُو وَ بَنَاتْكُو وَ عَبِيدْكُو وَ خَدِيمْكُو وَ اللَّاوِيِّينْ وَ الْأَجَانِبْ وَ الْأَتَامَا وَ الْأَرَامِلْ الْقَاعِدِينْ فِي حِلَّالْكُو. 15 وَ عَيُّدُوا الْعِيدْ دَا لِمُدَّةْ سَبْعَةْ يَوْم لِلّٰهْ إِلٰـهْكُو فِي الْبَكَانْ الْهُو يَعَزِلَهْ. أَيْوَى أَفْرَحَوْا كَتِيرْ أَشَانْ اللّٰهْ إِلٰـهْكُو بَارَكْ كُلَّ مَعَاشْ زِرَاعِتْكُو وَ خِدْمَةْ إِيدَيْكُو.
16 تَلَاتَةْ مَرَّاتْ فِي السَّنَةْ، أَيِّ دَكَرْ مِنْكُو يَجِي قِدَّامْ اللّٰهْ إِلٰـهْكُو فِي الْبَكَانْ الْهُو يَعَزِلَهْ. وَ دَا، فِي وَكِتْ عِيدْ الْخُبْزَةْ بَلَا تَوَّارَةْ وَ عِيدْ الْقَطِعْ وَ عِيدْ اللَّقَادِيبْ. وَ أَبَداً مَا تَجُوا قِدَّامْ اللّٰهْ إِلٰـهْكُو إِيدَيْكُو يَابْسِينْ. 17 وَ أَيِّ نَادُمْ يَنْطِي هَدِيَّةْ الْيَقْدَرْ يَنْطِيهَا حَسَبْ بَرَكَةْ اللّٰهْ إِلٰـهَهْ الْأَنْطَاهَا لَيَّهْ.
خطّين القُضياء
18 وَ خُطُّوا لَيْكُو قُضْيَاءْ وَ مُرَاقِبِينْ فِي كُلَّ الْمُدُنْ الْيَنْطِيهُمْ لَيْكُو اللّٰهْ إِلٰـهْكُو حَسَبْ قَبَايِلْكُو، لِيَحْكُمُوا بَيْن الشَّعَبْ بِالْحَقّ.
19 وَ أَبَداً مَا تِدَنْقُسُوا الشَّرِيعَةْ وَ مَا تِشِيفُوا نَادُمْ أَحْسَنْ مِنْ نَادُمْ وَ مَا تَقْبَلْ رَشْوَةْ أَشَانْ هِي تَعَمِي عُيُونْ الْحَكِيمْ وَ تِعَوِّجْ كَلَامْ الصَّالِحِينْ. 20 وَ فَتُّشُوا دَرِبْ الْعَدَالَةْ أَشَانْ تَحْيَوْا وَ تِشِيلُوا الْبَلَدْ الْيَنْطِيهَا لَيْكُو اللّٰهْ إِلٰـهْكُو.
العِبادة الممْنوعة
21 وَ مَا تُغُزُّوا عُودْ لِعِبَادَةْ أَشِيرَةْ جَنْب الْمَدْبَحْ الْبَنَيْتُوهْ لِلّٰهْ إِلٰـهَكْ. 22 وَ مَا تُغُزُّوا حُجَارْ لِلْعِبَادَةْ أَشَانْ دَا اللّٰهْ إِلٰـهْكُو يَكْرَهَهْ.
© La Bible en arabe tchadien © Alliance biblique du Tchad, 2019
