بَابِل تقع
1 مُحَاكَمَةْ الصَّحَرَاء الْجَنْب الْبَحَرْ.
الْعَدُو يَجِي مِنْ الصَّحَرَاء،
مِنْ بَلَدْ مُخِيفَةْ
مِثِلْ الزَّوْبَعَانَةْ الْجَايَةْ
مِنْ صَحَرَاء النَّقَبْ.
2 رُؤْيَةْ مُخِيفَةْ بَانَتْ لَيِّ.
نِشِيفْ الْخَايِنْ يُخُونْ
وَ الْمُدَمِّرْ يِدَمِّرْ.
وَ اللّٰهْ قَالْ:
«يَلَّا أَهْجُمُوا الْمَدِينَةْ، يَا نَاسْ عِلَامْ!
وَ حَاصُرُوهَا، يَا نَاسْ مَادِي!
أَنَا نِوَقِّفْ كُلَّ الْقَنِتِينْ
الْهِي ثَبَّتَتَهْ.»
3 وَ بِسَبَبْ دَا،
صُلْبِي قَاعِدْ يَرْجِفْ مِنْ التَّعَبْ
وَ وَجَعْ شَدِيدْ كَرَبَانِي
مِثِلْ وَجَعْ هَنَا الْمَرَةْ
الْقَاعِدَةْ تِطَالِقْ.
مِنْ شِدَّةْ الْوَجَعْ، مَا نَسْمَعْ
وَ مِنْ شِدَّةْ الْخَوْف، مَا نِشِيفْ.
4 فِكْرِي وَدَّرْ
وَ خَوْف شَدِيدْ كَرَبَانِي.
اللَّيْل الْقَاعِدْ نَرْجَاهْ
جَابْ لَيِّ الرُّعُبْ.
5 جَابَوْا الْأَكِلْ فِي الدَّبَلَايْ
وَ فَرَّشَوْا الْبِرِشْ
وَ أَكَلَوْا وَ شِرْبَوْا.
لَاكِنْ طَوَّالِي، فِي حِسّ قَالْ:
«قُمُّوا، يَا قُيَّادْ!
زَيُّدُوا دُرُوعْكُو.»
6 أَشَانْ دَاهُو الرَّبّ قَالْ لَيِّ:
«أَمْشِي وَ خُطّ حَرَسْ
وَ خَلِّي يِحَجِّي بِالْيِشِيفَهْ.
7 وَ كَنْ شَافْ عَرَبَاتْ حَرِبْ
الْيُكُرُّوهُمْ خَيْل إِتْنَيْن
وَ كَنْ شَافْ نَاسْ رَاكْبِينْ فِي حَمِيرْ
وَ نَاسْ آخَرِينْ رَاكْبِينْ فِي جُمَالْ،
خَلَاصْ خَلِّي يُخُطّ بَالَهْ وَ يِنْقَرِعْ.»
8 وَ الْحَرَسْ صَرَخْ وَ قَالْ:
«يَا سَيِّدِي! أَنَا وَاقِفْ كُلَّ يَوْم
فِي بَكَانْ الْحَرَاسَةْ.
وَ وَاقِفْ كُلَّ اللَّيْل
فِي بَكَانْ الْمُرَاقَبَةْ.
9 وَ دَاهُو! نَادُمْ رَاكِبْ فِي عَرَبَةْ
الْيُكُرُّوهَا خَيْل إِتْنَيْن
جَايِ وَ يُقُولْ:
‹وَقَعَتْ! بَابِلْ وَقَعَتْ!
وَ كُلَّ أَصْنَامْ إِلٰـهَاتْهَا
كَسَّرَوْهُمْ فِي التُّرَابْ!›»
10 يَا شَعَبِي!
إِنْتُو الْاللّٰهْ دَقَّاكُو
مِثِلْ غَلَّةْ فِي مَدَقَّهْ!
الشَّيّءْ السِّمِعْتَهْ
مِنْ اللّٰهْ الْقَادِرْ إِلٰـهْ بَنِي إِسْرَائِيلْ،
دَا بَسْ أَنَا قُلْتَهْ لَيْكُو.
الكلام ضِدّ بلد أَدَوْم
11 مُحَاكَمَةْ بَلَدْ دُومَا.
عَاطَوْا لَيِّ مِنْ سَعِيرْ وَ قَالَوْا:
«يَا الْحَرَسْ! شُنُو كَانْ فِي اللَّيْل؟
يَا الْحَرَسْ! شُنُو كَانْ فِي اللَّيْل؟»
12 وَ الْحَرَسْ رَدَّ وَ قَالْ:
«الصَّبَاحْ جَاءْ
وَ اللَّيْل كُلَ مَعَايَهْ.
كَنْ تِدَوْرُوا تِوَجُّهُوا سُؤَالْ، أَسْأَلَوْا!
قَبُّلُوا وَ تَعَالُوا بَتَّانْ.»
الكلام ضِدّ بلد العرب
13 مُحَاكَمَةْ بَلَدْ الْعَرَبْ.
يَا نَاسْ دَدَانْ الرُّحَّلْ!
إِنْتُو تُنُومُوا فِي غَابَةْ بَلَدْ الْعَرَبْ.
14 يَا سُكَّانْ بَلَدْ تِيمَا!
أَنْطُوا أَلْمِي لِنَاسْ دَدَانْ الْعَطْشَانِينْ
وَ وَدُّوا لَيْهُمْ أَكِلْ،
هُمَّنْ الْمُعَرِّدِينْ.
15 أَشَانْ هُمَّنْ مُعَرِّدِينْ مِنْ السُّيُوفْ
أَيْوَى، مِنْ السُّيُوفْ الْمَرْفُوعِينْ
وَ مِنْ النُّبَّالْ الْمَجْبُودْ
وَ مِنْ شِدَّةْ الْحَرِبْ.
16 دَاهُو الرَّبّ قَالْ لَيِّ:
«بَعَدْ سَنَةْ وَاحِدَةْ سَوَا سَوَا،
كُلَّ شَرَفْ بَلَدْ قِدَارْ يَبْقَى مَا فِيهْ.
17 وَ يِفَضُّلُوا شِيَّةْ بَسْ فِي قِدَارْ
مِنْ الرُّجَالْ الْفَحَلِينْ سِيَادْ النُّبَّالْ.»
وَ دَا كَلَامْ اللّٰهْ إِلٰـهْ بَنِي إِسْرَائِيلْ الْهُو قَالَهْ.
© La Bible en arabe tchadien © Alliance biblique du Tchad, 2019
