قِدْعُون أنّصر في المِدْيانيّين
1 وَ بِفَجُرْ بَدْرِي، يَرْبَعْل وَ هُو قِدْعُونْ قَمَّ، هُو وَ كُلَّ الشَّعَبْ الْمَعَايَهْ وَ نَزَلَوْا قَرِيبْ لِعَيْن حَرُودْ. وَ مُعَسْكَرْ الْمِدْيَانِيِّينْ كَمَانْ قَاعِدْ مُنْشَاقْ فِي الْوَادِي عَلَيْ جَبَلْ مَوْرَةْ.
2 وَ اللّٰهْ قَالْ لِقِدْعُونْ: «الشَّعَبْ الْمَعَاكْ دَوْل كَتِيرِينْ مَرَّةْ وَاحِدْ. وَ كَنْ أَنَا نِسَلِّمْ لَيْهُمْ الْمِدْيَانِيِّينْ فِي إِيدَيْهُمْ، بَنِي إِسْرَائِيلْ يِفْشُرُوا بِنُفُوسْهُمْ وَ يُقُولُوا: ‹بِدُرَاعْنَا بَسْ نَجَّيْنَا نُفُوسْنَا.› 3 وَ هَسَّعْ، قُولْ لِشَعَبَكْ: ‹أَيِّ نَادُمْ الْخَافْ وَ قَاعِدْ يَرْجِفْ، خَلِّي يِقَبِّلْ مِنْ جِبَالْ قِلْعَادْ.›» وَ خَلَاصْ، 22 000 رَاجِلْ مِنْ الشَّعَبْ قَبَّلَوْا وَ فَضَّلَوْا 10 000 رَاجِلْ.
4 وَ اللّٰهْ قَالْ لِقِدْعُونْ: «يَا هَسَّعْ كُلَ، الشَّعَبْ دَوْل كَتِيرِينْ زِيَادَةْ. دَلِّيهُمْ فِي خَشُمْ الْأَلْمِي وَ هِنَاكْ، أَنَا نِجَرِّبْهُمْ لَيْك. وَ أَيِّ نَادُمْ النُّقُولْ لَيْك: ‹خَلِّي يَمْشِي مَعَاكْ›، هُو دَا يَمْشِي مَعَاكْ. وَ النَّادُمْ النُّقُولْ لَيْك: ‹مَا يَمْشِي مَعَاكْ›، هُو دَا خَلِّي مَا يَمْشِي مَعَاكْ.»
5 وَ خَلَاصْ، قِدْعُونْ وَدَّى الشَّعَبْ فِي خَشُمْ الْأَلْمِي. وَ اللّٰهْ قَالْ لَيَّهْ: «أَيِّ نَادُمْ الْيَغْرِفْ أَلْمِي بِإِيدَيْنَهْ وَ يُلُقَّهْ مِثِلْ كَلِبْ، خُطَّهْ شِقْ. وَ الْيَبْرُكْ وَ يَشْرَبْ كُلَ، خُطَّهْ شِقْ.» 6 وَ النَّاسْ الْغَرَفَوْا أَلْمِي بِإِيدَيْهُمْ وَ لَقَّوْه مِثِلْ كُلابْ، عَدَدْهُمْ بِقِي تُلْتُمِيَةْ. وَ لَاكِنْ الْبَاقِي مِنْ الشَّعَبْ، كُلُّهُمْ بَرَكَوْا وَ شِرْبَوْا أَلْمِي. 7 وَ اللّٰهْ قَالْ لِقِدْعُونْ: «بِالتُّلْتُمِيَةْ رُجَالْ اللَّقَّوْا أَلْمِي مِثِلْ كُلابْ دَوْل بَسْ، أَنَا نِنَجِّيكُو وَ نِسَلِّمْ لَيْكُو الْمِدْيَانِيِّينْ فِي إِيدَيْكُو. وَ خَلَاصْ، خَلِّي كُلَّ الْبَاقِي مِنْ الشَّعَبْ يَمْشُوا بُيُوتْهُمْ.»
8 وَ خَلَاصْ، الرُّجَالْ التُّلْتُمِيَةْ شَالَوْا زَادْ الْبَاقِي مِنْ الشَّعَبْ وَ بُوَقَاهُمْ. وَ قِدْعُونْ قَالْ لِلْبَاقِي مِنْ شَعَبْ بَنِي إِسْرَائِيلْ خَلِّي أَيِّ وَاحِدْ يِقَبِّلْ بَيْتَهْ. وَ هُو خَطَّ التُّلْتُمِيَةْ نَاسْ دَوْل مَعَايَهْ. وَ مُعَسْكَرْ الْمِدْيَانِيِّينْ قَاعِدْ تِحِتْهُمْ فِي الْوَادِي.
قِدْعُون خبّروه بالنصُر
9 وَ فِي اللَّيْلَةْ دِي، اللّٰهْ قَالْ لِقِدْعُونْ: «قُمّ أَنْزِلْ وَ أَهْجِمْ مُعَسْكَرْ الْمِدْيَانِيِّينْ. أَنَا سَلَّمْتَهْ لَيْك! 10 وَ لَاكِنْ كَنْ خُفْت مَا تَنْزِلْ وَ تَهْجِمْ، دَلِّي شِيفْ عَلَيْ الْمُعَسْكَرْ مَعَ خَدَّامَكْ فُورَا. 11 وَ تَسْمَعْ كَلَامْهُمْ وَ خَلَاصْ، تَلْقَى قُدْرَةْ وَ تَهْجِمْ الْمُعَسْكَرْ.» وَ هُو دَلَّى مَعَ فُورَا خَدَّامَهْ لَحَدِّي قَرِيبْ لِخَشُمْ الْمُعَسْكَرْ.
12 وَ الْمِدْيَانِيِّينْ وَ الْعَمَالِقْ وَ كُلَّ قَبَايِلْ الصَّبَاحْ مُشَتَّتِينْ فِي الْوَادِي مِثِلْ سَارْ اللَّيْل وَ جُمَالْهُمْ كَتِيرِينْ مِثِلْ رَمْلَةْ هَنَا خَشُمْ الْبَحَرْ. 13 وَ وَكِتْ قِدْعُونْ دَلَّى، هُو سِمِعْ وَاحِدْ مِنْ الْعَسْكَرْ قَاعِدْ يِحَجِّي لِرَفِيقَهْ بِرُؤْيَةْ. وَ قَالْ: «أَنَا رِئِيتْ وَ دِي هِي الرُّؤْيَةْ الْأَنَا شِفْتَهَا. أَنَا شِفْت خُبْزَةْ وَاحِدَةْ هِنْت قَمَحْ أَبْيَضْ قَاعِدْ يِدَّرْقَسْ فِي مُعَسْكَرْنَا. وَ الْخُبْزَةْ دِي جَاتْ لَحَدِّي خَيْمَةْ وَاحِدَةْ وَ ضَرَبَاهَا وَ الْخَيْمَةْ دِي أَشَّقْلَبَتْ وَ وَقَعَتْ مَرَّةْ وَاحِدْ.» 14 وَ رَفِيقَهْ قَالْ لَيَّهْ: «دَا بَسْ يَبْقَى سَيْف قِدْعُونْ وِلَيْد يُوَاشْ الْمِنْ إِسْرَائِيلْ. الرَّبّ سَلَّمْ لَيَّهْ مِدْيَانْ وَ كُلَّ مُعَسْكَرْنَا.»
15 وَ مِنْ قِدْعُونْ سِمِعْ الرُّؤْيَةْ وَ تَفْسِيرْهَا، قَمَّ سَجَدْ. وَ قَبَّلْ لِمُعَسْكَرْ بَنِي إِسْرَائِيلْ وَ قَالْ: «قُمُّوا أَشَانْ اللّٰهْ سَلَّمْ مُعَسْكَرْ مِدْيَانْ فِي إِيدَيْكُو!»
قِدْعُون طرد المِدْيانيّين
16 وَ قِدْعُونْ قَسَّمْ التُّلْتُمِيَةْ رُجَالْ عَلَيْ تَلَاتَةْ مَجْمُوعَاتْ وَ أَنْطَى أَيِّ رَاجِلْ بُوقْ وَ جَرّ فَاضِي وَ فِي أَيِّ جَرّ فِي ضَيّ. 17 وَ قَالْ لَيْهُمْ: «شِيفُوا عَلَيِّ وَ سَوُّوا مِثْلِي. وَ وَكِتْ نِوَصِّلْ فِي خَشُمْ الْمُعَسْكَرْ، الشَّيّءْ الْأَنَا نِسَوِّيهْ، إِنْتُو كُلَ سَوُّوهْ. 18 وَكِتْ أَنَا وَ النَّاسْ الْمَعَايِ نَضُرْبُوا الْبُوقْ، إِنْتُو كُلَ حَوُّقُوا الْمُعَسْكَرْ وَ أَضُرْبُوا بُوَقَاكُو وَ قُولُوا: ‹لِلّٰهْ وَ لِقِدْعُونْ!›»
19 وَ قُبَّالْ اللَّيْل مَا يِنْقَسِمْ قِدْعُونْ وَ الْمِيَةْ نَاسْ الْمَعَايَهْ جَوْا فِي خَشُمْ الْمُعَسْكَرْ وَ دَا وَكِتْ بَدَّلَوْا الْحَرَاسَةْ. هُمَّنْ ضَرَبَوْا الْبُوقْ وَ كَسَّرَوْا الْجِرَارْ الْفِي إِيدَيْهُمْ. 20 وَ التَّلَاتَةْ مَجْمُوعَاتْ كُلُّهُمْ ضَرَبَوْا الْبُوقْ وَ كَسَّرَوْا جِرَارْهُمْ. أَيِّ رَاجِلْ بِإِيدَهْ الْإِسْرَةْ، كَارِبْ الضَّيّ وَ بِإِيدَهْ الزَّيْنَةْ، كَارِبْ الْبُوقْ الْقَاعِدْ يَضُرْبَهْ. وَ قَالَوْا: «السَّيْف لِلّٰهْ وَ لِقِدْعُونْ!»
21 وَ هُمَّنْ حَوَّقَوْا الْمُعَسْكَرْ أَيِّ وَاحِدْ وَاقِفْ فِي بَكَانَهْ. وَ خَلَاصْ، كُلَّ رُجَالْ فِي مُعَسْكَرْ الْمِدْيَانِيِّينْ قَمَّوْا بَرْجَلَوْا وَ كَوْرَكَوْا وَ عَرَّدَوْا. 22 وَ وَكِتْ التُّلْتُمِيَةْ نَاسْ ضَرَبَوْا الْبُوَقَا، اللّٰهْ سَوَّى فِي لُبّ الْمُعَسْكَرْ كَدَرْ أَيِّ رَاجِلْ يَكْتُلْ رَفِيقَهْ بِسَيْفَهْ. وَ كُلَّ الْعَسْكَرْ عَرَّدَوْا لَحَدِّي بَيْت شِطَّةْ عَلَيْ صَرِيرَةْ وَ لَحَدِّي خَشُمْ آبِلْ مَحُولَى قَرِيبْ لِطَبَّتْ.
23 وَ بَنِي إِسْرَائِيلْ لَمَّوْا رُجَالْ قَبَايِلْ نَفْتَالِي وَ أَشِيرْ وَ كُلَّ قَبِيلَةْ مَنَسَّى وَ طَارَدَوْا الْمِدْيَانِيِّينْ. 24 وَ قِدْعُونْ رَسَّلْ نَاسْ لِكُلَّ جِبَالْ أَفْرَايِمْ لِيُقُولُوا: «أَنْزُلُوا وَ أَهْجُمُوا الْمِدْيَانِيِّينْ. أَكُرْبُوا قِدَّامْهُمْ أَيِّ مَعَدّ فِي بَحَرْ الْأُرْدُنْ لَحَدِّي بَيْت بَرَةْ.» وَ بَيْدَا، كُلَّ رُجَالْ أَفْرَايِمْ كَرَبَوْا أَيِّ مَعَدّ فِي بَحَرْ الْأُرْدُنْ لَحَدِّي بَيْت بَرَةْ. 25 وَ كَرَبَوْا إِتْنَيْن مِنْ قُيَّادْ الْمِدْيَانِيِّينْ وَ هُمَّنْ عُرِيبْ وَ زِيبْ. وَ كَتَلَوْا عُرِيبْ فِي حَجَرْ هَنَا عُرِيبْ وَ زِيبْ فِي عَصَّارَةْ زِيبْ. وَ هُمَّنْ طَارَدَوْا الْمِدْيَانِيِّينْ لَحَدِّي تُرَابْ مِدْيَانْ. وَ بَعَدْ دَا، جَابَوْا رُوسَيْ عُرِيبْ وَ زِيبْ لِقِدْعُونْ غَادِي لِبَحَرْ الْأُرْدُنْ.
© La Bible en arabe tchadien © Alliance biblique du Tchad, 2019
