النجاسة التمْرُق من فرْج الراجِل
1 وَ اللّٰهْ حَجَّى لِمُوسَى وَ هَارُونْ وَ قَالْ: 2 حَجُّوا لِبَنِي إِسْرَائِيلْ وَ قُولُوا لَيْهُمْ: «أَيِّ رَاجِلْ الْعِنْدَهْ بَجَلْ، هُو نِجِسْ. 3 وَ الْبَجَلْ دَا، كَنْ يِسِيلْ أَوْ مَا يِسِيلْ كُلَ، النَّادُمْ دَا نِجِسْ. 4 أَيِّ سَرِيرْ الْيَرْقُدْ فَوْقَهْ الرَّاجِلْ الْمُبَجِّلْ نِجِسْ وَ أَيِّ شَيّءْ الْيَقْعُدْ فَوْقَهْ كُلَ نِجِسْ. 5 وَ النَّادُمْ الْيَلْمَسْ سَرِيرَهْ، وَاجِبْ يِغَسِّلْ خُلْقَانَهْ وَ يِلْبَرَّدْ. وَ بَيْدَا كُلَ، يُكُونْ نِجِسْ لَحَدِّي الْعَشِيَّةْ. 6 وَ أَيِّ نَادُمْ الْيَقْعُدْ فِي شَيّءْ الْقَعَدْ فَوْقَهْ النَّادُمْ الْمُبَجِّلْ، وَاجِبْ يِغَسِّلْ خُلْقَانَهْ وَ يِلْبَرَّدْ. وَ بَيْدَا كُلَ، يُكُونْ نِجِسْ لَحَدِّي الْعَشِيَّةْ. 7 وَ أَيِّ نَادُمْ الْيَلْمَسْ النَّادُمْ الْمُبَجِّلْ، وَاجِبْ يِغَسِّلْ خُلْقَانَهْ وَ يِلْبَرَّدْ. وَ بَيْدَا كُلَ، يُكُونْ نِجِسْ لَحَدِّي الْعَشِيَّةْ. 8 وَ كَنْ الرَّاجِلْ الْمُبَجِّلْ يَبْزُقْ فِي نَادُمْ طَاهِرْ، النَّادُمْ دَا وَاجِبْ يِغَسِّلْ خُلْقَانَهْ وَ يِلْبَرَّدْ. وَ بَيْدَا كُلَ، يُكُونْ نِجِسْ لَحَدِّي الْعَشِيَّةْ. 9 وَ أَيِّ سَرْج الْيَرْكَبْ فَوْقَهْ النَّادُمْ الْمُبَجِّلْ يُكُونْ نِجِسْ. 10 وَ أَيِّ نَادُمْ الْيَلْمَسْ أَيِّ شَيّءْ الْقَاعِدْ تِحِتْ النَّادُمْ الْمُبَجِّلْ يُكُونْ نِجِسْ لَحَدِّي الْعَشِيَّةْ. وَ النَّادُمْ الْيِشِيلْ الْأَشْيَاءْ دَوْل، وَاجِبْ يِغَسِّلْ خُلْقَانَهْ وَ يِلْبَرَّدْ. وَ بَيْدَا كُلَ، يُكُونْ نِجِسْ لَحَدِّي الْعَشِيَّةْ. 11 وَ كَنْ النَّادُمْ الْمُبَجِّلْ يَلْمَسْ أَيِّ نَادُمْ قُبَّالْ مَا يِغَسِّلْ إِيدَيْنَهْ بِأَلْمِي، وَاجِبْ النَّادُمْ دَا يِغَسِّلْ خُلْقَانَهْ وَ يِلْبَرَّدْ. وَ بَيْدَا كُلَ، يُكُونْ نِجِسْ لَحَدِّي الْعَشِيَّةْ. 12 وَ الْمَاعُونْ هَنَا الطِّينَةْ اللَّمَّسَهْ النَّادُمْ الْمُبَجِّلْ، وَاجِبْ يِكَسُّرُوهْ. وَ أَيِّ مَاعُونْ هَنَا حَطَبْ، وَاجِبْ يِغَسُّلُوهْ بِأَلْمِي.
13 «وَ وَكِتْ النَّادُمْ الْمُبَجِّلْ يِطَّهَّرْ مِنْ بَجَلَهْ، وَاجِبْ يَحْسِبْ سَبْعَةْ يَوْم لِطِهَارْتَهْ وَ يِغَسِّلْ خُلْقَانَهْ وَ يِلْبَرَّدْ بِأَلْمِي نَضِيفْ. وَ بَعَدْ دَا، يَبْقَى طَاهِرْ. 14 وَ فِي الْيَوْم التَّامِنْ، هُو يِشِيلْ إِتْنَيْن قِمْرِيْ أَوْ إِتْنَيْن حَمَامْ وَ يَمْشِي فِي مَدَخَلْ خَيْمَةْ الْإِجْتِمَاعْ قِدَّامْ اللّٰهْ وَ يَنْطِيهْ لِرَاجِلْ الدِّينْ. 15 وَ رَاجِلْ الدِّينْ يِقَدِّمْ الْوَاحِدَةْ ضَحِيَّةْ لِكَفَّارَةْ الذَّنِبْ وَ الْآخَرَةْ ضَحِيَّةْ مُحَرَّقَةْ. وَ هُو يِسَوِّي لَيَّهْ كَفَّارَةْ قِدَّامْ اللّٰهْ فِي شَانْ بَجَلَهْ.
16 «وَ كَنْ نَادُمْ مَرَقْ مِنَّهْ مَنِي، وَاجِبْ يِلْبَرَّدْ. وَ بَيْدَا كُلَ، يُكُونْ نِجِسْ لَحَدِّي الْعَشِيَّةْ. 17 وَ أَيِّ خَلَقْ أَوْ أَيِّ فَرْوَةْ الْيَلْمَسْهَا مَنِي، يِغَسُّلُوهَا بِأَلْمِي وَ بَيْدَا كُلَ، تُكُونْ نِجْسَةْ لَحَدِّي الْعَشِيَّةْ. 18 وَ كَنْ رَاجِلْ رَقَدْ مَعَ مَرَةْ، هُمَّنْ الْإِتْنَيْن وَاجِبْ يِلْبَرَّدَوْا. وَ بَيْدَا كُلَ، يُكُونُوا نِجْسِينْ لَحَدِّي الْعَشِيَّةْ.
النجاسة التمْرُق من فرْج المرة
19 «وَ كَنْ مَرَةْ عِنْدَهَا حَيْض وَ الدَّمّ قَاعِدْ يِسِيلْ مِنْهَا، هِي تَقْعُدْ سَبْعَةْ يَوْم فِي حَيْضهَا. وَ أَيِّ نَادُمْ الْيَلْمَسْهَا يُكُونْ نِجِسْ لَحَدِّي الْعَشِيَّةْ. 20 وَ فِي وَكِتْ حَيْضهَا، أَيِّ سَرِيرْ التَّرْقُدْ فَوْقَهْ يُكُونْ نِجِسْ وَ أَيِّ شَيّءْ التَّقْعُدْ فَوْقَهْ يُكُونْ نِجِسْ. 21 وَ أَيِّ نَادُمْ الْيَلْمَسْ سَرِيرْهَا، وَاجِبْ يِغَسِّلْ خُلْقَانَهْ وَ يِلْبَرَّدْ. وَ بَيْدَا كُلَ، يُكُونْ نِجِسْ لَحَدِّي الْعَشِيَّةْ. 22 وَ أَيِّ نَادُمْ الْيَلْمَسْ الشَّيّءْ الْهِي قَعَدَتْ فَوْقَهْ، وَاجِبْ يِغَسِّلْ خُلْقَانَهْ وَ يِلْبَرَّدْ. وَ بَيْدَا كُلَ، يُكُونْ نِجِسْ لَحَدِّي الْعَشِيَّةْ. 23 وَ كَنْ فِي شَيّءْ فِي سَرِيرْهَا أَوْ فِي شَيّءْ الْهِي قَعَدَتْ فَوْقَهْ، النَّادُمْ الْيَلْمَسَهْ يُكُونْ نِجِسْ لَحَدِّي الْعَشِيَّةْ. 24 وَ كَنْ رَاجِلْ يَرْقُدْ مَعَ مَرَةْ وَ فِي نَفْس الْوَكِتْ حَيْضهَا جَاءْ لَيْهَا وَ الدَّمّ لِمِسْ الرَّاجِلْ، هُو يُكُونْ نِجِسْ لَحَدِّي سَبْعَةْ يَوْم. وَ أَيِّ سَرِيرْ الْيَرْقُدْ فَوْقَهْ يُكُونْ نِجِسْ.
25 «وَ كَنْ مَرَةْ عِنْدَهَا دِمِّيَّةْ أَوْ حَيْضهَا يِأَخِّرْ فَوْقهَا زِيَادَةْ مِنْ الْوَكِتْ الْوَاجِبْ لَيْهَا، هِي تُكُونْ نِجْسَةْ فِي كُلَّ الْمُدَّةْ دِي. وَ دِي مِثِلْ نَجَاسِتْهَا فِي كُلَّ أَيَّامْ حَيْضهَا الطَّبِيعِي. 26 وَ وَكِتْ هِي عِنْدَهَا دِمِّيَّةْ، أَيِّ سَرِيرْ التَّرْقُدْ فَوْقَهْ وَ أَيِّ شَيّءْ التَّقْعُدْ فَوْقَهْ يُكُونْ نِجِسْ مِثِلْ فِي أَيَّامْ حَيْضهَا الطَّبِيعِي. 27 وَ أَيِّ نَادُمْ الْيَلْمَسْهُمْ يُكُونْ نِجِسْ وَ وَاجِبْ يِغَسِّلْ خُلْقَانَهْ وَ يِلْبَرَّدْ. وَ بَيْدَا كُلَ، يُكُونْ نِجِسْ لَحَدِّي الْعَشِيَّةْ.
28 «وَ كَنْ دِمِّيِّتْهَا وَقَفَتْ، وَاجِبْ تَحْسِبْ سَبْعَةْ يَوْم وَ بَعَدْ دَا، تَبْقَى طَاهِرَةْ. 29 وَ فِي الْيَوْم التَّامِنْ، هِي تِشِيلْ قِمْرِيْ إِتْنَيْن أَوْ حَمَامْ إِتْنَيْن وَ تِوَدِّيهْ لِرَاجِلْ الدِّينْ فِي مَدَخَلْ خَيْمَةْ الْإِجْتِمَاعْ. 30 وَ رَاجِلْ الدِّينْ يِقَدِّمْ الْوَاحِدَةْ ضَحِيَّةْ لِكَفَّارَةْ الذَّنِبْ وَ الْآخَرَةْ ضَحِيَّةْ مُحَرَّقَةْ. وَ هُو يِسَوِّي لَيْهَا كَفَّارَةْ قِدَّامْ اللّٰهْ فِي شَانْ دِمِّيِّتْهَا النَّجَّسَتْهَا.»
31 يَا مُوسَى وَ هَارُونْ! أَدْحَرَوْا بَنِي إِسْرَائِيلْ مَا يِقَرُّبُوا لِلْبَكَانْ الْمُقَدَّسْ وَكِتْ هُمَّنْ نِجْسِينْ. وَ دَا، أَشَانْ مَا يِنَجُّسُوا خَيْمِتِي الْمُقَدَّسَةْ الْفِي أُسُطْهُمْ وَ يُمُوتُوا بِسَبَبْ نَجَاسِتْهُمْ.
32 وَ دَوْل الْقَوَانِينْ الْبُخُصُّوا النَّادُمْ الْعِنْدَهْ بَجَلْ أَوْ الْيِنَّجَّسْ بِسَبَبْ مَنِي الْيَمْرُقْ مِنَّهْ. 33 وَ بُخُصُّوا الْمَرَةْ الْعِنْدَهَا حَيْض أَوْ الرَّاجِلْ وَ الْمَرَةْ الْعِنْدُهُمْ بَجَلْ أَوْ الرَّاجِلْ الْيَرْقُدْ مَعَ مَرَةْ نِجْسَةْ.
© La Bible en arabe tchadien © Alliance biblique du Tchad, 2019
