بني إسرائيل يقبُّلوا بلدهم
1 «يَا إِبْن آدَمْ، أَتْنَبَّأْ لِجِبَالْ إِسْرَائِيلْ وَ قُولْ: ‹يَا نَاسْ جِبَالْ إِسْرَائِيلْ، أَسْمَعَوْا كَلَامْ اللّٰهْ. 2 دَاهُو اللّٰهْ الرَّبّ قَالْ: الْعَدُو قَالْ: ”أَيْوَى! الْبَكَانَاتْ الْعَالِيِينْ الْقَاعِدِينْ مِنْ زَمَانْ دَوْل بِقَوْا وَرَثَتْنَا.“› 3 بِسَبَبْ دَا، أَتْنَبَّأْ لِجِبَالْ إِسْرَائِيلْ وَ قُولْ: ‹دَاهُو اللّٰهْ الرَّبّ قَالْ: ”دَمَّرَوْكُو وَ ضَايَقَوْكُو مِنْ كُلِّ جِيهَةْ لِتَبْقَوْا وَرَثَةْ لِكُلَّ الْأُمَمْ الْآخَرِينْ وَ بِقِيتُوا شِمَّيْتَةْ فِي خُشُومْ كُلَّ الشُّعُوبْ.“›»
4 وَ فِي شَانْ دَا، يَا جِبَالْ إِسْرَائِيلْ، أَسْمَعَوْا كَلَامْ اللّٰهْ الرَّبّ. دَاهُو اللّٰهْ الرَّبّ حَجَّى لِلْجِبَالْ وَ الْحُجَارْ وَ الرُّجُولْ وَ الْوُدْيَانْ وَ الْبَكَانَاتْ الْمُهَدَّمِينْ وَ الْمُدُنْ الْخَرَابْ النَّهَبَوْهُمْ وَ أَشَّمَّتَوْا فَوْقهُمْ الْأُمَمْ الْمُحَوِّقِينْهُمْ. 5 وَ دَاهُو اللّٰهْ الرَّبّ قَالْ: «أَكِيدْ بِمَحَبِّتِي الشَّدِيدَةْ، نِحَجِّي ضِدّ كُلَّ الْأُمَمْ الْآخَرِينْ وَ ضِدّ كُلَّ نَاسْ بَلَدْ أَدَوْم. أَشَانْ بِفَرْحَةْ فِي قُلُوبْهُمْ وَ كَرَاهِيَّةْ فِي نُفُوسْهُمْ، هُمَّنْ نَهَبَوْا بَلَدِي وَ شَالَوْا مَرْعَاهَا.»
6 «وَ فِي شَانْ دَا، أَتْنَبَّأْ لِبَلَدْ إِسْرَائِيلْ وَ قُولْ لِلْجِبَالْ وَ الْحُجَارْ وَ الرُّجُولْ وَ الْوُدْيَانْ: ‹دَاهُو اللّٰهْ الرَّبّ قَالْ: ”أَكِيدْ أَنَا نِحَجِّي بِكُلَّ غِيرْتِي وَ بِكُلَّ غَضَبِي بِسَبَبْ الْإِهَانَةْ السَّوَّوْهَا لَيْكُو الْأُمَمْ.“›»
7 وَ فِي شَانْ دَا، دَاهُو اللّٰهْ الرَّبّ قَالْ: «أَنَا حَلَفْت! أَكِيدْ الْأُمَمْ الْمُحَوِّقِينْكُو يِلْحَمَّلَوْا نَتِيجَةْ الْإِهَانَةْ السَّوَّوْهَا لَيْكُو. 8 وَ إِنْتُو، يَا جِبَالْ إِسْرَائِيلْ، تِقَوُّمُوا شَدَرْ وَ يِسَوُّوا فُرُوعْ وَ يَلْدَوْا فَوَاكِهْ لِشَعَبِي بَنِي إِسْرَائِيلْ أَشَانْ قَرِيبْ يِقَبُّلُوا هِنِي. 9 أَيْوَى، دَاهُونِي أَنَا جَايِ لَيْكُو وَ نِوَجِّهْ عَلَيْكُو وَ بَتَّانْ أَرْضُكُو تِتَيْرُبُوهَا وَ تَحَرْتُوهَا. 10 وَ نِكَتِّرْ نَاسْ بَنِي إِسْرَائِيلْ وَ يَسْكُنُوا الْمُدُنْ وَ يَبْنُوا الْبَكَانَاتْ الْمُهَدَّمِينْ. 11 وَ نِكَتِّرْ النَّاسْ وَ الْبَهَايِمْ وَ هُمَّنْ يَلْدَوْا وَ يَبْقَوْا كَتِيرِينْ. وَ نِسَوِّيهُمْ كَتِيرِينْ زِيَادَةْ مِنْ أَوَّلْ وَ نِسَوِّي لَيْهُمْ الْخَيْر زِيَادَةْ مِنْ الْبِدَايَةْ. وَ بَيْدَا، يَعَرْفُوا كَدَرْ أَنَا بَسْ اللّٰهْ. 12 وَ نِوَدِّي نَاسْ مِنْ شَعَبِي بَنِي إِسْرَائِيلْ يُرُوغُوا الْأَرْض وَ هُمَّنْ يِشِيلُوهَا وَ هِي تَبْقَى وَرَثَتْهُمْ. وَ بَتَّانْ هِي مَا تَكْتُلْ عِيَالْهُمْ بِالْجُوعْ.»
13 دَاهُو اللّٰهْ الرَّبّ قَالْ: «دَاهُو قَاعِدِينْ بُقُولُوا كَدَرْ بَلَدْ إِسْرَائِيلْ تَاكُلْ أُمِّتْهَا وَ تَكْتُلْ عِيَالْهُمْ بِالْجُوعْ. 14 وَ بِسَبَبْ دَا، يَا بَلَدْ إِسْرَائِيلْ، إِنْتِ مَا تَاكُلِي أُمِّتْكِ بَتَّانْ وَ لَا تَكْتُلِي عِيَالْهُمْ بِالْجُوعْ. وَ دَا كَلَامْ اللّٰهْ الرَّبّ. 15 وَ بَتَّانْ مَا نِسَمِّعْكِ خَبَرْ هَنَا إِهَانَةْ السَّوَّوْهَا لَيْكِ الْأُمَمْ. وَ مَا تِلْحَمَّلَيْ مُعْيَارْ الشُّعُوبْ. وَ أَبَداً مَا تِتَرْتِعِي أُمِّتْكِ.» وَ دَا كَلَامْ اللّٰهْ الرَّبّ.
اللّه ينْطي بني إسرائيل قلِب جديد
16 وَ اللّٰهْ حَجَّى لَيِّ وَ قَالْ: 17 «أَسْمَعْ، يَا إِبْن آدَمْ. وَكِتْ بَنِي إِسْرَائِيلْ سَكَنَوْا فِي أَرْضُهُمْ، هُمَّنْ نَجَّسَوْهَا بِعَمَلْهُمْ وَ دَرِبْهُمْ الشَّالَوْه. وَ نَجَاسِتْهُمْ قَاعِدَةْ قِدَّامِي مِثِلْ نَجَاسَةْ الْمَرَةْ الْعِنْدَهَا حَيْض. 18 وَ أَنَا نَزَّلْت غَضَبِي فَوْقهُمْ بِسَبَبْ الدَّمّ الدَّفَّقَوْه وَ أَصْنَامْهُمْ النَّجَّسَوْا بَيْهُمْ الْبَلَدْ. 19 وَ أَنَا شَتَّتُّهُمْ بَيْن الْأُمَمْ وَ فَرَّقْتُهُمْ فِي أُسْط الْبُلْدَانْ وَ حَاكَمْتُهُمْ حَسَبْ عَمَلْهُمْ وَ دَرِبْهُمْ الشَّالَوْه. 20 وَ فِي أَيِّ بَكَانْ الشَّتَّوْا فَوْقَهْ شَعَبِي بَيْن الْأُمَمْ، هُمَّنْ مَا أَحْتَرَمَوْا أُسْمِي الْمُقَدَّسْ. وَ النَّاسْ قَالَوْا فَوْقهُمْ: ‹صَحِيحْ، هُمَّنْ شَعَبْ اللّٰهْ وَ لَاكِنْ هُو طَرَدَاهُمْ مِنْ بَلَدَهْ!› 21 وَ هَسَّعْ، أَنَا فَكَّرْت فِي أُسْمِي الْمُقَدَّسْ الْبَنِي إِسْرَائِيلْ مَا أَحْتَرَمَوْه بَيْن الْأُمَمْ الشَّتَّوْا فِي أُسُطْهُمْ.
22 «وَ فِي شَانْ دَا، قُولْ لِبَنِي إِسْرَائِيلْ: ‹دَاهُو اللّٰهْ الرَّبّ قَالْ: ”مَا فِي شَانْكُو إِنْتُو أَنَا قَمَّيْت، يَا بَنِي إِسْرَائِيلْ، وَ لَاكِنْ قَمَّيْت فِي شَانْ أُسْمِي الْمُقَدَّسْ الْإِنْتُو مَا أَحْتَرَمْتُوهْ بَيْن الْأُمَمْ الْإِنْتُو شَتَّتُّوا فِي أُسُطْهُمْ. 23 وَ أَنَا نِوَصِّفْ قَدَاسَةْ أُسْمِي الْعَظِيمْ الْإِنْتُو مَا أَحْتَرَمْتُوهْ بَيْن الْأُمَمْ. أَيْوَى، دَا أُسْمِي الْإِنْتُو مَا أَحْتَرَمْتُوهْ فِي أُسُطْهُمْ. وَ وَكِتْ نِوَصِّفْ قَدَاسْتِي بَيْكُو قِدَّامْهُمْ، هُمَّنْ يَعَرْفُوا كَدَرْ أَنَا بَسْ اللّٰهْ. وَ دَا كَلَامْ اللّٰهْ الرَّبّ.
24 «‹”وَ أَنَا نِشِيلْكُو مِنْ بَيْن الْأُمَمْ وَ نِلِمُّكُو مِنْ كُلَّ الْبُلْدَانْ وَ نِوَدِّيكُو فِي أَرْضُكُو. 25 وَ أَنَا نُرُشُّكُو بِأَلْمِي طَاهِرْ وَ تَبْقَوْا طَاهِرِينْ وَ نِطَهِّرْكُو مِنْ كُلَّ نَجَاسِتْكُو وَ مِنْ كُلَّ أَصْنَامْكُو. 26 وَ نَنْطِيكُو قَلِبْ جَدِيدْ وَ نُخُطّ فَوْقكُو رُوحْ جَدِيدَةْ. وَ نَمْرُقْ مِنْكُو قَلِبْكُو الْقَوِي مِثِلْ الْحَجَرْ وَ نَنْطِيكُو قَلِبْ لَيِّنْ هَنَا إِنْسَانْ. 27 وَ نُخُطّ فَوْقكُو رُوحِي أَشَانْ تَمْشُوا حَسَبْ شُرُوطِي وَ تَحْفَضَوْا قَوَانِينِي وَ تِطَبُّقُوهُمْ. 28 وَ تَسْكُنُوا فِي الْبَلَدْ الْأَنَا أَنْطَيْتهَا لِجُدُودْكُو. وَ خَلَاصْ، إِنْتُو تَبْقَوْا شَعَبِي وَ أَنَا نَبْقَى إِلٰـهْكُو. 29 وَ أَنَا نِنَجِّيكُو مِنْ كُلَّ نَجَاسِتْكُو. وَ نِقَوِّمْ الْمَعَاشْ وَ نِكَتِّرَهْ لَيْكُو وَ بَتَّانْ مَا نِجِيبْ فَوْقكُو الْجُوعْ. 30 وَ نِكَتِّرْ فَوَاكِهْ الشَّدَرْ وَ إِنْتَاجْ الزِّرَاعَةْ أَشَانْ بَتَّانْ مَا تَلْقَوْا عَيْب بَيْن الْأُمَمْ فِي شَانْ الْجُوعْ. 31 وَ إِنْتُو تِذَّكَّرَوْا دُرُوبْكُو الْفَسْلِينْ وَ أَعْمَالْكُو الْمَا عَدِيلِينْ وَ الْعَيْب يَكْرُبْكُو بِسَبَبْ خَطَاكُو وَ مُحَرَّمَاتْكُو. 32 أَعَرْفُوا كَدَرْ دَا مَا بِسَبَبْكُو إِنْتُو أَنَا قَمَّيْت مِثِلْ دَا. وَ خَلِّي الْعَيْب يَكْرُبْكُو وَ تَخْجَلَوْا بِسَبَبْ دُرُوبْكُو، يَا بَنِي إِسْرَائِيلْ.“›» وَ دَا كَلَامْ اللّٰهْ الرَّبّ.
33 وَ دَاهُو اللّٰهْ الرَّبّ قَالْ: «يَوْم نِطَهِّرْكُو مِنْ كُلَّ خَطَاكُو، نِثَبِّتْكُو فِي مُدُنْكُو بَتَّانْ وَ الْبَكَانَاتْ الْمُهَدَّمِينْ يِنْبَنُوا. 34 وَ الْبَلَدْ الْخَرْبَانَةْ، يَحَرْتُوهَا بَتَّانْ وَ أَيِّ نَادُمْ الْيُفُوتْ جَنْبَهَا مَا يِذَّكَّرْ خَرَابْهَا. 35 وَ النَّاسْ يُقُولُوا: ‹الْبَلَدْ دِي أَوَّلْ خَرْبَانَةْ وَ هَسَّعْ بِقَتْ مِثِلْ جِنَيْنَةْ عَدِنْ! دَاهُو الْمُدُنْ الْمُكَسَّرِينْ وَ خَرْبَانِينْ وَ مُهَدَّمِينْ بَنَوْهُمْ وَ سَكَنَوْا فَوْقهُمْ.› 36 وَ بَيْدَا، الْأُمَمْ الْفَضَّلَوْا الْمُحَوِّقِينْكُو يَعَرْفُوا كَدَرْ أَنَا اللّٰهْ بَنَيْت الْمُهَدَّمْ وَ عَدَّلْت الْخَرَبَوْه. وَ دَا، أَنَا اللّٰهْ بَسْ قُلْتَهْ وَ نِحَقِّقَهْ.»
37 وَ دَاهُو اللّٰهْ الرَّبّ قَالْ: «بَتَّانْ أَنَا نِخَلِّي بَنِي إِسْرَائِيلْ يِفَتُّشُونِي أَشَانْ نُقُمّ نِسَاعِدْهُمْ. وَ نِكَتِّرْ نَاسْهُمْ مِثِلْ الْغَنَمْ. 38 الْمُدُنْ الْمُكَسَّرِينْ يِنْمَلُوا بِنَاسْ مِثِلْ الْغَنَمْ الْكَتِيرِينْ هَنَا الْبَيْت الْمُقَدَّسْ وَ هَنَا مَدِينَةْ الْقُدُسْ فِي وَكِتْ أَعْيَادْهَا. وَ بَيْدَا، يَعَرْفُوا كَدَرْ أَنَا بَسْ اللّٰهْ.»
© La Bible en arabe tchadien © Alliance biblique du Tchad, 2019
