الكُبارات ألآمروا ضِدّ عِيسَى
1 وَ عِيدْ الْفِصْحَ وَ عِيدْ الْخُبْزَةْ بَلَا تَوَّارَةْ قَرَّبْ. وَ بِيَوْمَيْن قُبَّالْ الْعِيدْ، كُبَارَاتْ رُجَالْ الدِّينْ وَ الْعُلَمَاءْ قَاعِدِينْ يِفَكُّرُوا كِكَّيْف يَكُرْبُوا عِيسَى بِغَشّ وَ يَكْتُلُوهْ. 2 وَ حَجَّوْا أَمْبَيْنَاتْهُمْ وَ قَالَوْا: «مَا نَكُرْبُوهْ فِي أَيَّامْ الْعِيدْ أَشَانْ أَكُونْ فِتْنَةْ تَبْقَى أَمْبَيْنَاتْ الشَّعَبْ.»
المرة صبّت عِطِر في راس عِيسَى
3 وَ عِيسَى قَاعِدْ فِي بَيْت سِمْعَانْ الْمُجَدِّمْ فِي حِلَّةْ بَيْت عَنْيَا. وَ وَكِتْ هُو قَاعِدْ يَاكُلْ، مَرَةْ وَاحِدَةْ جَاتْ لَيَّهْ وَ جَابَتْ مَاعُونْ هَنَا حَجَرْ مَلَانْ عِطِرْ أَصْلِي وَ غَالِي بِلْحَيْن الْأُسْمَهْ نَارْدِينْ. وَ هِي فَكَّتْ الْمَاعُونْ دَا وَ صَبَّتْ الْعِطِرْ كُلَّ كَيْ فِي رَاسْ عِيسَى. 4 وَ نَاسْ وَاحِدِينْ زِعِلَوْا وَ حَجَّوْا أَمْبَيْنَاتْهُمْ وَ قَالَوْا: «مَالَا وَدَّرَتْ الْعِطِرْ الْغَالِي دَا؟ 5 كَنْ بَاعَوْا الْعِطِرْ دَا، يَلْقَوْا مِنَّهْ 300 دِينَارْ أَشَانْ يَنْطُوهْ لِلْمَسَاكِينْ.» وَ خَلَاصْ هَرَجَوْهَا.
6 لَاكِنْ عِيسَى قَالْ: «مَالَا تِبَشْتُنُوا الْمَرَةْ دِي؟ هِي سَوَّتْ لَيِّ شَيّءْ سَمَحْ. 7 الْمَسَاكِينْ قَاعِدِينْ مَعَاكُو دَايْماً وَ تَقْدَرَوْا تِسَوُّوا لَيْهُمْ الْخَيْر أَيِّ وَكِتْ التِّدَوْرُوهْ. لَاكِنْ أَنَا مَا نَقْعُدْ مَعَاكُو دَايْماً. 8 وَ هِي سَوَّتْ الشَّيّءْ الْقِدْرَتَهْ. قُبَّالْ مَا نُمُوتْ، هِي صَبَّتْ عِطِرْ فِي جِسْمِي أَشَانْ تِجَهِّزْنِي لِلْقَبُرْ. 9 وَ نُقُولْ لَيْكُو الْحَقّ، يِحَجُّوا فِي الشَّيّءْ الْهِي سَوَّتَهْ دَا وَ يِذَّكَّرَوْهَا فِي أَيِّ بَكَانْ فِي الدُّنْيَا الْيِبَلُّغُوا فَوْقَهْ الْبِشَارَةْ.»
خيانة يَهُوذَا لعِيسَى
10 وَ فِي الْبَكَانْ دَا، يَهُوذَا الْإِسْخَرِيَوْطِي وَاحِدْ مِنْ التَّلَامِيذ الْأَتْنَا عَشَرْ مَشَى لِكُبَارَاتْ رُجَالْ الدِّينْ أَشَانْ يِسَلِّمْ لَيْهُمْ عِيسَى. 11 وَ الْكُبَارَاتْ سِمْعَوْا كَلَامَهْ وَ فِرْحَوْا بَيَّهْ وَ قَالَوْا يَنْطُوهْ قُرُسْ. وَ خَلَاصْ، يَهُوذَا قَاعِدْ يِفَتِّشْ فُرْصَةْ أَشَانْ يِسَلِّمْ لَيْهُمْ عِيسَى.
جاهِزين العشاء
12 وَ أَوَّلْ يَوْم مِنْ أَيَّامْ عِيدْ الْخُبْزَةْ بَلَا تَوَّارَةْ جَاءْ. وَ دَا الْيَوْم الْيَدْبَحَوْا فَوْقَهْ الْحَمَلْ فِي شَانْ عَشَاءْ عِيدْ الْفِصْحَ. وَ التَّلَامِيذ سَأَلَوْا عِيسَى وَ قَالَوْا: «تِدَوْر أَنِحْنَ نَمْشُوا وَيْن أَشَانْ نِحَصُّلُوا لَيْك عَشَاءْ عِيدْ الْفِصْحَ؟»
13 وَ هُو رَسَّلْ نَاسَيْن مِنْ تَلَامِيذَهْ وَ قَالْ: «أَمْشُوا فِي الْمَدِينَةْ وَ تَلْقَوْا نَادُمْ وَاحِدْ شَايِلْ جَرّ هَنَا أَلْمِي. تَابُعُوهْ. 14 وَ أَمْشُوا فِي الْبَيْت الْهُو يَدْخُلْ فَوْقَهْ وَ حَجُّوا لِسِيدْ الْبَيْت دَا وَ قُولُوا: ‹سَيِّدْنَا الْمُعَلِّمْ قَالْ: ”وَيْن بَيْت الضِّيفَانْ النَّاكُلْ فَوْقَهْ عَشَاءْ عِيدْ الْفِصْحَ مَعَ تَلَامِيذِي؟“› 15 وَ هُو يِوَصِّفْكُو غُرْفَةْ وَسِيعَةْ وَ جَاهِزَةْ فَوْق فِي الْقَصِرْ. وَ فِي الْبَكَانْ دَا بَسْ، حَصُّلُوا لَيْنَا الْعَشَاءْ.»
16 وَ التَّلَامِيذ قَمَّوْا وَ مَشَوْا فِي الْمَدِينَةْ وَ لِقَوْا كُلَّ شَيّءْ مِثِلْ هُو قَالَهْ لَيْهُمْ. وَ حَصَّلَوْا عَشَاءْ عِيدْ الْفِصْحَ.
العشاء
17 وَ فِي الْمَغْرِبْ، عِيسَى مَشَى لِلْبَيْت مَعَ التَّلَامِيذ الْأَتْنَا عَشَرْ. 18 وَ وَكِتْ قَاعِدِينْ يَاكُلُوا سَوَا، عِيسَى قَالْ: «نُقُولْ لَيْكُو الْحَقّ، وَاحِدْ مِنْكُو يُخُونِّي. أَيْوَى، نَادُمْ وَاحِدْ الْقَاعِدْ يَاكُلْ مَعَايِ.» 19 وَ هُمَّنْ بِقَوْا حَزْنَانِينْ. وَ كُلُّهُمْ سَأَلَوْه، الْوَاحِدْ بَعَدْ الْآخَرْ وَ قَالَوْا: «أَنَا وَلَّا؟» 20 وَ قَالْ لَيْهُمْ: «الْيُخُونِّي هُو مِنْ التَّلَامِيذ الْأَتْنَا عَشَرْ وَ قَاعِدْ يِدِسّ إِيدَهْ مَعَايِ فِي الْمَاعُونْ. 21 وَ أَكِيدْ أَنَا إِبْن الْإِنْسَانْ نُمُوتْ مِثِلْ مَكْتُوبْ فَوْقَهْ فِي الْكِتَابْ. وَ لَاكِنْ الْعَذَابْ يَرْجَى الرَّاجِلْ الْيُخُونِّي أَنَا إِبْن الْإِنْسَانْ. أَخَيْر لِلرَّاجِلْ دَا كَنْ مَا وِلْدَوْه!»
22 وَ وَكِتْ قَاعِدِينْ يِلْعَشَّوْا، عِيسَى شَالْ خُبْزَةْ وَاحِدَةْ وَ شَكَرْ اللّٰهْ وَ كَسَرْهَا وَ أَنْطَاهَا لَيْهُمْ وَ قَالْ: «شِيلُوهْ. دَا جِسْمِي.» 23 وَ شَالْ كَاسْ وَ شَكَرْ اللّٰهْ وَ أَنْطَاهْ لَيْهُمْ وَ كُلُّهُمْ شِرْبَوْا مِنَّهْ. 24 وَ عِيسَى قَالْ لَيْهُمْ: «دَا دَمِّي هَنَا الْمُعَاهَدَةْ الْجَدِيدَةْ الْيِدَفِّقْ فِي شَانْ نَاسْ كَتِيرِينْ. 25 وَ نُقُولْ لَيْكُو الْحَقّ، مِنْ الْيَوْم أَنَا مَا نَشْرَبْ بَتَّانْ عَصِيرْ الْعِنَبْ لَحَدِّي الْيَوْم النَّشْرَبْ عَصِيرْ الْعِنَبْ الْجَدِيدْ فِي مَمْلَكَةْ اللّٰهْ.»
26 وَ غَنَّوْا غِنَيْ مِنْ الزَّبُورْ وَ مَرَقَوْا مِنْ الْمَدِينَةْ وَ مَشَوْا جَبَلْ الزَّيْتُونْ.
المسيح قال بُطْرُس ينْكُره
27 وَ عِيسَى قَالْ لَيْهُمْ: «أَكِيدْ كُلُّكُو تَفْشُلُوا أَشَانْ مَكْتُوبْ فِي الْكِتَابْ: <نَضْرُبْ الرَّاعِي وَ الْغَنَمْ يِشِتُّوا.> 28 وَ لَاكِنْ بَعَدْ أَنَا بَعَثْت، نَمْشِي قِدَّامْكُو فِي دَارْ الْجَلِيلْ.» 29 وَ بُطْرُسْ رَدَّ لَيَّهْ وَ قَالْ: «كَنْ كُلَّ الْآخَرِينْ يِخَلُّوكْ كُلَ، أَنَا مَا نِخَلِّيكْ!»
30 وَ عِيسَى رَدَّ لَيَّهْ وَ قَالْ: «نُقُولْ لَيْك الْحَقّ، اللَّيْلَةْ دِي قُبَّالْ الدِّيكْ مَا يِعَوْعِي مَرَّتَيْن، إِنْتَ تَنْكُرْنِي تَلَاتَةْ مَرَّاتْ.» 31 وَ بُطْرُسْ زِعِلْ وَ قَالْ: «أَنَا كَنْ نُمُوتْ مَعَاكْ كُلَ، أَبَداً مَا نَنْكُرَكْ!» وَ كُلَّ التَّلَامِيذ قَالَوْا نَفْس الشَّيّءْ.
دُعا عِيسَى المسيح في جَسِيمَانِي
32 وَ خَلَاصْ عِيسَى وَ تَلَامِيذَهْ مَشَوْا فِي بَكَانْ أُسْمَهْ جَسِيمَانِي. وَ قَالْ لَيْهُمْ: «أَقْعُدُوا هِنِي وَكِتْ أَنَا قَاعِدْ نِصَلِّي.» 33 وَ شَالْ مَعَايَهْ بُطْرُسْ وَ يَعْقُوبْ وَ يُوحَنَّا وَ قَلْبَهْ بَرْجَلْ وَ بَدَا يَتْعَبْ بِلْحَيْن. 34 وَ قَالْ لَيْهُمْ: «أَنَا حَزْنَانْ مَرَّةْ وَاحِدْ لَحَدِّي نِدَوْر الْمَوْت. أَقْعُدُوا هِنِي وَاعِيِّينْ.»
35 وَ مَشَى قِدَّامْ شِيَّةْ وَ سَجَدْ فِي الْأَرْض وَ سَأَلْ اللّٰهْ أَشَانْ التَّعَبْ دَا مَا يَجِي فَوْقَهْ كَنْ دَا مُمْكِنْ. 36 وَ قَالْ: «أَبَّ! يَا أَبُويِ! مَا فِي شَيّءْ قَاسِي لَيْك. بَعِّدْ مِنِّي كَاسْ التَّعَبْ دَا! لَاكِنْ خَلِّي يَبْقَى مِثِلْ إِنْتَ تِدَوْرَهْ وَ مَا مِثِلْ أَنَا نِدَوْرَهْ.»
37 وَ قَبَّلْ لِلتَّلَامِيذ وَ لِقِيهُمْ نَايْمِينْ وَ قَالْ لِبُطْرُسْ: «يَا سِمْعَانْ، إِنْتَ نَايِمْ وَلَّا؟ سَاعَةْ وَاحِدَةْ كُلَ مَا قِدِرْت تَقْعُدْ وَاعِي؟ 38 أَقْعُدُوا وَاعِيِّينْ وَ أَسْأَلَوْا اللّٰهْ أَشَانْ التَّعَبْ مَا يِجَرِّبْ إِيمَانْكُو وَ يِتَلِّفَهْ. أَيْوَى، أَسْأَلَوْا اللّٰهْ أَشَانْ الْإِنْسَانْ عِنْدَهْ نِيَّةْ لَاكِنْ مَا عِنْدَهْ قُدْرَةْ.»
39 وَ طَرَّفْ مِنْهُمْ بَتَّانْ وَ سَأَلْ اللّٰهْ بِنَفْس الْكَلَامْ مِثِلْ أَوَّلْ. 40 وَ بَعَدَيْن هُو قَبَّلْ لِلتَّلَامِيذ وَ بَتَّانْ لِقِيهُمْ نَايْمِينْ أَشَانْ النَّوْم شَالَاهُمْ مَرَّةْ وَاحِدْ. وَ مَا عِرْفَوْا الْكَلَامْ الْيُقُولُوا لَيَّهْ. 41 وَ تَالِتْ مَرَّةْ هُو جَاءْ لَيْهُمْ وَ قَالْ: «إِنْتُو لِسَّاعْكُو نَايْمِينْ وَلَّا؟ تِدَوْرُوا تِنْجَمَّوْا؟ خَلَاصْ، الْوَكِتْ تَمَّ. إِبْن الْإِنْسَانْ خَانَوْه وَ يِسَلُّمُوهْ لِلْمُذْنِبِينْ! 42 قُمُّوا نَمْشُوا! شِيفُوا، الْيُخُونِّي جَايِ!»
عِيسَى المسيح كربوه
43 وَ عِيسَى لِسَّاعْ مَا كَمَّلْ كَلَامَهْ بَسْ، يَهُوذَا الْمِنْ التَّلَامِيذ الْأَتْنَا عَشَرْ جَاءْ. وَ جَابْ مَعَايَهْ نَاسْ كَتِيرِينْ عِنْدُهُمْ سُيُوفْ وَ عِصَيْ. الرَّسَّلَوْهُمْ كُبَارَاتْ رُجَالْ الدِّينْ وَ الْعُلَمَاءْ وَ الشُّيُوخْ. 44 وَ الْخَايِنْ أَنْطَاهُمْ عَلَامَةْ مِنْ أَوَّلْ وَ قَالْ: «النَّادُمْ النِّحِبَّهْ، دَا بَسْ هُو. خَلِّي الْعَسْكَرْ يَكُرْبُوهْ وَ يِوَدُّوهْ.» 45 وَ وَكِتْ هُو وَصَّلْ فِي الْبَكَانْ دَا، هُو مَشَى عَجَلَةْ كَيْ لِعِيسَى وَ قَالْ: «سَيِّدْنَا!» وَ حَبَّاهْ. 46 وَ خَلَاصْ عِيسَى كَرَبَوْه.
47 وَ وَاحِدْ مِنْ النَّاسْ الْقَاعِدِينْ مَعَ عِيسَى سَلَّ سَيْفَهْ وَ ضَرَبْ عَبِدْ هَنَا كَبِيرْ رُجَالْ الدِّينْ وَ قَطَعْ أَدَانَهْ. 48 وَ عِيسَى حَجَّى وَ قَالْ: «كِكَّيْف إِنْتُو جِيتُوا تَكُرْبُونِي بِسُيُوفْ وَ عِصَيْ؟ أَنَا مُجْرِمْ وَلَّا؟ 49 كُلَّ يَوْم أَنَا قَاعِدْ أَمْبَيْنَاتْكُو فِي فَضَايَةْ بَيْت اللّٰهْ وَ قَاعِدْ نِعَلِّمْ النَّاسْ وَ إِنْتُو مَا كَرَبْتُونِي. لَاكِنْ خَلِّي يَبْقَى مِثِلْ مَكْتُوبْ فِي الْكِتَابْ.»
50 وَ خَلَاصْ كُلَّ تَلَامِيذَهْ خَلَّوْه وَ جَرَوْا. 51 وَ فِي صَبِي وَاحِدْ التَّابَعْ عِيسَى فِي الْبَكَانْ دَا وَ هُو مَا لَابِسْ لُبَاسْ إِلَّا خَلَقْ وَاحِدْ هَنَا قُمَاشْ غَالِي. وَ الصَّبِي دَا كَرَبَوْه. 52 وَ لَاكِنْ هُو أَنْبَلَصْ مِنْهُمْ خَلَّى خَلَقَهْ فِي إِيدَيْهُمْ وَ جَرَى مِنْهُمْ عَرْيَانْ.
عِيسَى المسيح قِدّام المجْلس
53 وَ عِيسَى وَدَّوْه فِي بَيْت هَنَا كَبِيرْ رُجَالْ الدِّينْ. وَ كُلَّ كُبَارَاتْ رُجَالْ الدِّينْ وَ الْعُلَمَاءْ وَ الشُّيُوخْ لَامِّينْ فِي الْبَيْت دَا وَ قَاعِدِينْ يَرْجَوْه. 54 وَ بُطْرُسْ تَابَعْ عِيسَى مِنْ بَعِيدْ وَ أَنْدَسَّ فِي حَوْش بَيْت هَنَا كَبِيرْ رُجَالْ الدِّينْ. وَ قَعَدْ تِحِتْ مَعَ الْعَسْكَرْ جَنْب النَّارْ. وَ بُطْرُسْ قَاعِدْ يِدَّفَّ فِي أُسُطْهُمْ.
55 وَ كُبَارَاتْ رُجَالْ الدِّينْ وَ كُلَّ نَاسْ هَنَا الْمَجْلَسْ فَتَّشَوْا شَهَادَةْ أَشَانْ يَحْكُمُوا لِعِيسَى بِالْمَوْت. وَ مَا لِقَوْهَا. 56 وَ نَاسْ كَتِيرِينْ قَمَّوْا وَ شَهَدَوْا فَوْقَهْ بِكِدِبْ لَاكِنْ شَهَادَاتْهُمْ كُلَ شِقْ شِقْ. 57 وَ وَاحِدِينْ قَمَّوْا وَ شَهَدَوْا فَوْقَهْ بِكِدِبْ وَ قَالَوْا: 58 «أَنِحْنَ سِمِعْنَاهْ قَالْ: ‹بَيْت اللّٰهْ الْبَنَوْه النَّاسْ دَا، أَنَا نِكَسِّرَهْ. وَ فِي تَلَاتَةْ يَوْم نَبْنِيهْ آخَرْ وَ الْيَبْنُوهْ، مَا نَاسْ.›» 59 لَاكِنْ الشُّهُودْ دَوْل كُلَ، فِي الْكَلَامْ دَا، شَهَادِتْهُمْ مَا وَاحِدَةْ.
60 وَ كَبِيرْ رُجَالْ الدِّينْ قَمَّ فَوْق فِي أُسْط الْمَلَمَّةْ وَ سَأَلْ عِيسَى وَ قَالْ: «مَا تُرُدّ لَيْنَا وَلَّا؟ مَا سِمِعْت شَهَادَةْ النَّاسْ دَوْل فَوْقَكْ وَلَّا؟» 61 وَ عِيسَى قَاعِدْ سَاكِتْ بَسْ وَ مَا رَدَّ لَيَّهْ كَلَامْ.
وَ بَتَّانْ كَبِيرْ رُجَالْ الدِّينْ سَأَلَهْ وَ قَالْ: «هَلْ إِنْتَ الْمَسِيحْ، إِبْن اللّٰهْ الْوَاجِبْ لَيَّهْ كُلَّ الشُّكُرْ؟» 62 وَ عِيسَى قَالْ: «أَنَا هُو. وَ تِشِيفُوا إِبْن الْإِنْسَانْ فِي كُرْسِي جَنْب اللّٰهْ الْقَادِرْ فِي نُصَّهْ الزَّيْنَايْ وَ تِشِيفُوهْ جَايِ فِي سَحَابْ السَّمَاءْ.»
63 وَ كَبِيرْ رُجَالْ الدِّينْ قَمَّ شَرَّطْ خَلَقَهْ مِنْ الزَّعَلْ وَ قَالْ: «بَتَّانْ مَا نِدَوْرُوا شَاهِدْ آخَرْ. 64 إِنْتُو ذَاتْكُو سِمِعْتُوهْ هُو أَشْرَكْ. قَرَارْكُو شُنُو؟» وَ كُلُّهُمْ قَالَوْا وَاجِبْ يَحْكُمُوا لَيَّهْ بِالْمَوْت.
65 وَ وَاحِدِينْ مِنْهُمْ قَمَّوْا يِبَزُّقُوا فَوْقَهْ وَ رَبَطَوْا وِجْهَهْ وَ ضَرَبَوْه وَ قَالَوْا: «أَوْرِينَا يَاتُو الضَّرَبَكْ!» وَ الْعَسْكَرْ دَقَّوْه.
بُطْرُس نكر المسيح
66 وَ بُطْرُسْ قَاعِدْ بَرَّا فِي الْحَوْش وَ بِنَيَّةْ وَاحِدَةْ مِنْ خَدَّامَاتْ هَنَا كَبِيرْ رُجَالْ الدِّينْ قَرَّبَتْ لَيَّهْ. 67 وَ شَافَتْ بُطْرُسْ قَاعِدْ يِدَّفَّ. وَ شَافَتَهْ عَدِيلْ وَ أَكَّدَتْ وَ قَالَتْ: «إِنْتَ كُلَ مَعَ عِيسَى، الْمِنْ النَّاصِرَةْ!» 68 وَ بُطْرُسْ نَكَرْ وَ قَالْ: «كَلَامْكِ دَا مَا نَعَرْفَهْ. كَلَامْكِ مَا عِنْدَهْ مَعَنَى.» وَ الدِّيكْ عَوْعَى.
وَ بُطْرُسْ مَرَقْ وَ مَشَى عَلَيْ خَشُمْ الْحَوْش. 69 وَ الْبِنَيَّةْ شَافَتَهْ بَتَّانْ. وَ حَجَّتْ لِلنَّاسْ الْقَاعِدِينْ هِنَاكْ وَ قَالَتْ: «النَّادُمْ دَا كُلَ مِنْهُمْ.» 70 وَ بَتَّانْ هُو نَكَرْ.
وَ بَعَدْ شِيَّةْ النَّاسْ الْوَاقْفِينْ هِنَاكْ جَوْا لَيَّهْ وَ قَالَوْا: «أَكِيدْ إِنْتَ مِنْهُمْ أَشَانْ إِنْتَ كُلَ مِنْ دَارْ الْجَلِيلْ!» 71 وَ بُطْرُسْ قَمَّ حَلَفْ وَ قَالْ: «خَلِّي اللّٰهْ يَلْعَنِّي كَنْ كَلَامِي مَا صَحِيحْ! أَبَداً أَنَا مَا نَعَرِفْ الرَّاجِلْ التِّحَجُّوا بَيَّهْ دَا.» 72 وَ طَوَّالِي الدِّيكْ عَوْعَى بَتَّانْ. وَ بُطْرُسْ فَكَّرْ فِي الْكَلَامْ الْعِيسَى قَالَهْ لَيَّهْ: «قُبَّالْ الدِّيكْ مَا يِعَوْعِي مَرَّتَيْن، إِنْتَ تَنْكُرْنِي تَلَاتَةْ مَرَّاتْ.» وَ بُطْرُسْ بَكَى بَكِي شَدِيدْ.
© La Bible en arabe tchadien © Alliance biblique du Tchad, 2019
