الحشرات و اليباس جايين
1 دَاهُو كَلَامْ اللّٰهْ الْقَالَهْ لِيُوِيلْ وِلَيْد فَتُوِيلْ.
2 أَسْمَعَوْا، يَا الشُّيُوخْ،
خُطُّوا أَدَانْكُو كُلُّكُو، يَا سُكَّانْ الْبَلَدْ!
شَيّءْ مِثِلْ دَا أَوَّلْ كَانْ فِي زَمَنْكُو وَلَّا؟
أَوْ كَانْ فِي وَكِتْ أَبَّهَاتْكُو؟
3 حَجُّوا بَيَّهْ لِعِيَالْكُو
وَ عِيَالْكُو يِحَجُّوا بَيَّهْ لِعِيَالْهُمْ
وَ عِيَالْهُمْ يِحَجُّوا بَيَّهْ لِذُرِّيِّتْهُمْ.
4 الْفَضَّلَتَهْ أَمْ بُكْبُكْ،
الْجَرَادْ أَكَلَهْ
وَ الْفَضَّلَهْ الْجَرَادْ،
أَمْ كَشَوْل أَكَلَتَهْ
وَ الْفَضَّلَتَهْ أَمْ كَشَوْل،
سَارْ اللَّيْل أَكَلَهْ.
5 يَا السَّكَّارَى، قُمُّوا وَ أَبْكُوا!
يَا شَرَّابِينْ الْخَمَرْ، أَبْكُوا بِحِزِنْ
أَشَانْ الْخَمَرْ أَنْقَطَعْ مِنْكُو.
6 حَشَرَاتْ قَمَّوْا
مِثِلْ عَسْكَرْ ضِدّ بَلَدِي
وَ هُمَّنْ قَوِيِّينْ
وَ مَا يِنْحَسْبُوا مِنْ الْكَتَرَةْ.
وَ سُنُونْهُمْ مِثِلْ سُنُونْ الدُّودْ
وَ فَوَاطِرْهُمْ مِثِلْ فَوَاطِرْ مَرْة الدُّودْ.
7 وَ هُمَّنْ دَمَّرَوْا جِنَيْنَةْ عِنَبِي
وَ كَسَّرَوْا شَدَرْ تِينِي.
وَ مَرَقَوْا قِرْفَهْ وَ رَمَوْه
وَ يَبَّسَوْا فُرُوعَهْ.
8 أَبْكُوا مِثِلْ مَرَةْ صَبِيَّةْ
الرَّبَطَتْ شُوَالْ مِثِلْ فَرْدَةْ مِنْ الْحِزِنْ
أَشَانْ تَبْكِي لِرَاجِلْهَا هَنَا شَبَابْهَا.
9 هَدَايَا الدَّقِيقْ وَ هَدَايَا الشَّرَابْ،
مَا يِقَدُّمُوهُمْ بَتَّانْ فِي بَيْت اللّٰهْ
وَ رُجَالْ الدِّينْ خَدَّامِينْ اللّٰهْ حِزْنَوْا.
10 وَ الزِّرَاعَةْ أَدَّمَّرَتْ
وَ الْأَرْض يِبْسَتْ مِثِلْ مَرَةْ حَزْنَانَةْ.
أَشَانْ الْقَمَحْ أَدَّمَّرْ
وَ الْخَمَرْ كَمَّلْ
وَ الدِّهِنْ بِقِي مَا فِيهْ.
11 أَحْزَنَوْا، يَا الْحَرَّاتِينْ!
وَ أَبْكُوا، يَا سِيَادْ جِنَيْنَاتْ الْعِنَبْ!
أَشَانْ مَا تَقْطَعَوْا الْقَمَحْ الْأَحْمَرْ
وَ لَمِّينْ الْقَمَحْ الْأَبْيَضْ بِقِي مَا فِيهْ.
12 وَ جِنَيْنَاتْ الْعِنَبْ يِبْسَوْا
وَ شَدَرْ التِّينْ جَفَّ.
وَ كُلَّ شَدَرْ الْيَنْطِي عِيَالْ يِبِسْ
أَيْوَى، الرُّمَّانْ وَ النَّخَلْ وَ التُّفَّاحْ.
وَ الْفَرَحْ وَدَّرْ مِنْ قُلُوبْ النَّاسْ.
يُوِيل طلب التَوْبة و الصيام
13 يَا رُجَالْ الدِّينْ، أَلْبَسَوْا خُلْقَانْ الْحِزِنْ وَ نُوحُوا
وَ أَبْكُوا، يَا إِنْتُو الْخَدَّامِينْ فِي الْمَدْبَحْ.
تَعَالُوا أَحْزَنَوْا طُولْ اللَّيْل بِخُلْقَانْ الْحِزِنْ،
يَا خَدَّامِينْ إِلٰـهِي.
هَدَايَا الدَّقِيقْ وَ هَدَايَا الشَّرَابْ
مَا يِقَدُّمُوهُمْ بَتَّانْ فِي بَيْت اللّٰهْ إِلٰـهْكُو.
14 خَصُّصُوا يَوْم هَنَا صِيَامْ
وَ قَرُّرُوا مَلَمَّةْ خَاصَّة.
لِمُّوا الشُّيُوخْ
وَ كُلَّ سُكَّانْ الْبَلَدْ
فِي بَيْت اللّٰهْ إِلٰـهْكُو
وَ كَوْرُكُوا لَيَّهْ.
يوم اللّه يوم الدمار
15 يَا السَّلَامْ! كِكَّيْف الْيَوْم دَا!
يَوْم اللّٰهْ قَرَّبْ
وَ دَا جَايِ مِنْ الْقَادِرْ بِدَمَارْ.
16 وَ مِنْ قِدَّامْنَا،
الْمَعَاشْ أَنْقَطَعْ
وَ مِنْ بَيْت اللّٰهْ،
الْفَرْحَةْ وَ السُّرُورْ أَنْقَطَعَوْا.
17 التَّيْرَابْ يِبِسْ فِي لُبّ الْأَرْض
وَ الدَّبَنْقَاتْ أَلْهَدَّمَوْا.
وَ الْمَخَازِنْ فِضَوْا
أَشَانْ الْمَعَاشْ يِبِسْ.
18 أَسْمَعَوْا، الْبَهَايِمْ قَاعِدِينْ يَقُنْتُوا
وَ الْبَقَرْ عَايْرِينْ فِي أَيِّ بَكَانْ.
أَشَانْ مَا عِنْدُهُمْ قَشّ
وَ الْغَنَمْ كُلَ تَعْبَانِينْ.
صلاة النبي
19 نَصْرَخْ لَيْك إِنْتَ، يَا اللّٰهْ،
أَشَانْ النَّارْ أَكَلَتْ قَشّ الْكَدَادَةْ
وَ الْحَرِيقَةْ أَكَلَتْ كُلَّ شَدَرْ الْخَلَاءْ.
20 وَ حَيْوَانَاتْ الْكَدَادَةْ كُلَ
وَجَّهَوْا لَيْك
أَشَانْ كُلَّ الرُّهُودْ يِبْسَوْا
وَ النَّارْ أَكَلَتْ قَشّ الْكَدَادَةْ.
© La Bible en arabe tchadien © Alliance biblique du Tchad, 2019
