اللّه عزل ناس ليصْنعوا المُعِدّات
1 وَ اللّٰهْ حَجَّى لِمُوسَى بَتَّانْ وَ قَالْ: 2 «أَسْمَعْ. أَنَا عَزَلْت بَصَلِيلْ وِلَيْد أُورِي وِلَيْد حُورْ مِنْ قَبِيلَةْ يَهُوذَا. 3 أَنَا نَزَّلْت رُوحِي فَوْقَهْ وَ أَنْطَيْتَهْ خِبْرَةْ وَ فِهِمْ وَ مَعْرَفَةْ لِيَصْنَعْ كُلِّ شَيّءْ. 4 وَ دَا، يَعَرِفْ يَصْنَعْ أَشْيَاءْ بِدَهَبْ وَ فُضَّةْ وَ نَحَاسْ 5 وَ يَقْطَعْ الْحُجَارْ الْغَالِيِّينْ وَ يَنْقُشْهُمْ وَ يَنْجُرْ الْخَشَبْ وَ يَصْنَعْ كُلَّ شَيّءْ. 6 وَ بَيْدَا، أَنَا كَلَّفْت أُهُلِيَابْ وِلَيْد أَخِسَمَاكْ مِنْ قَبِيلَةْ دَانْ لِيِسَاعِدَهْ. وَ بَتَّانْ، أَنَا أَنْطَيْت خِبْرَةْ لِكُلَّ الصِّنَاعِيِينْ لِيِسَوُّوا كُلَّ الْأَشْيَاءْ الْأَنَا أَمَرْتَكْ بَيْهُمْ. وَ هُمَّنْ
7 خَيْمَةْ الْإِجْتِمَاعْوَ الصَّنْدُوقْ الْفَوْقَهْ لِيحَانْ الْمُعَاهَدَةْوَ سِدَادْتَهْ الْيِسِدُّوهْ بَيْهَاوَ كُلَّ مُعِدَّاتْ الْخَيْمَةْ8 وَ الطَّرَبَيْزَةْ وَ كُلَّ مُعِدَّاتْهَاوَ الْفَانُوسْ هَنَا الدَّهَبْ الصَّافِي وَ كُلَّ مُعِدَّاتَهْوَ مُخْبَرْ الْبَخُورْ9 وَ الْمَدْبَحْ هَنَا الضَّحَايَا الْمُحَرَّقِينْ وَ كُلَّ مُعِدَّاتَهْوَ الْحَوْط وَ قَعَرَهْ10 وَ الْخُلْقَانْ الْغَالِيِّينْ الْخَاصِّينْ لِهَارُونْ رَاجِلْ الدِّينْوَ خُلْقَانْ عِيَالَهْ وَكِتْ يَخْدُمُوا مِثِلْ رُجَالْ دِينْ11 وَ دِهِنْ الْمَسَحَانْوَ الْبَخُورْ الْمُعَطَّرْ الْيِحَرُّقُوهْ فِي الْبَكَانْ الْمُقَدَّسْ.«وَ هُمَّنْ يِسَوُّوا كُلَّ الْأَشْيَاءْ دَوْل مِثِلْ أَنَا أَمَرْتَكْ بَيَّهْ.»
طبِّقين شُروط يوم السبْت
12 وَ بَتَّانْ اللّٰهْ قَالْ لِمُوسَى: 13 «قُولْ لِبَنِي إِسْرَائِيلْ: ‹أَحْفَضَوْا يَوْمِي هَنَا السَّبْت أَشَانْ أَنَا جَعَلْتَهْ عَلَامَةْ بَيْنِي وَ بَيْنكُو مِنْ ذُرِّيَّةْ لِذُرِّيَّةْ. وَ بَيْدَا، تَعَرْفُوا كَدَرْ أَنَا اللّٰهْ بَسْ نِخَصِّصْكُو. 14 وَ أَحْفَضَوْا يَوْم السَّبْت أَشَانْ هُو يَوْم مُقَدَّسْ لَيْكُو. كَنْ نَادُمْ مَا يِحْتَرِمْ يَوْم السَّبْت، وَاجِبْ يَكْتُلُوهْ. وَ كَنْ نَادُمْ يِسَوِّي أَيِّ خِدْمَةْ فِي الْيَوْم دَا، وَاجِبْ يَفْصُلُوهْ مِنْ أَهَلَهْ. 15 فِي سِتَّةْ يَوْم، سَوُّوا خِدْمِتْكُو وَ لَاكِنْ الْيَوْم السَّابِعْ دَا، هُو سَبْت. هُو يَوْم هَنَا رَاحَةْ، مُقَدَّسْ لِلّٰهْ. وَ كَنْ نَادُمْ سَوَّى أَيِّ عَمَلْ فِي يَوْم السَّبْت دَا، وَاجِبْ يَكْتُلُوهْ. 16 خَلِّي بَنِي إِسْرَائِيلْ يَحْفَضَوْا يَوْم السَّبْت وَ يِعَيُّدُوهْ مِنْ ذُرِّيَّةْ لِذُرِّيَّةْ مِثِلْ مُعَاهَدَةْ دَايْمَةْ. 17 وَ هُو يَبْقَى عَلَامَةْ دَايْمَةْ بَيْنِي وَ بَيْن بَنِي إِسْرَائِيلْ أَشَانْ أَنَا اللّٰهْ خَلَقْت السَّمَاوَاتْ وَ الْأَرْض فِي سِتَّةْ يَوْم. وَ فِي الْيَوْم السَّابِعْ كَمَانْ، أَنَا مَا خَلَقْت شَيّءْ. وَ بَيْدَا، أَنَا جَعَلْتَهْ يَوْم هَنَا رَاحَةْ.›»
18 وَ وَكِتْ اللّٰهْ كَمَّلْ كَلَامَهْ مَعَ مُوسَى فِي جَبَلْ سِينَاء، أَنْطَاهْ لِيحَانْ الْمُعَاهَدَةْ. وَ هُمَّنْ لِيحَانْ إِتْنَيْن هَنَا حَجَرْ الْاللّٰهْ ذَاتَهْ كَتَبْ فَوْقهُمْ كَلَامَهْ.
© La Bible en arabe tchadien © Alliance biblique du Tchad, 2019
