أَلِفَاز تهم أيُّوب
1 وَ أَلِفَازْ الْمِنْ بَلَدْ تَيْمَانْ شَالْ الْكَلَامْ وَ قَالْ:
2 هَلْ الْإِنْسَانْ نَافِعْ لِلرَّبّ وَلَّا؟
أَشَانْ الْإِنْسَانْ كَنْ حَكِيمْ كُلَ، يَنْفَعْ نَفْسَهْ بَسْ.
3 هَلْ عَدَالْتَكْ تِفَرِّحْ الْقَادِرْ وَلَّا؟
وَ كَنْ إِنْتَ كَامِلْ فِي دَرْبَكْ كُلَ،
هُو يَلْقَى مِنَّكْ شُنُو؟
4 هَلْ بِسَبَبْ تَقْوَاكْ،
هُو يِشَارِعَكْ وَ يِعَاقِبَكْ وَلَّا؟
5 لَا! شَرَّكْ مَا بِقِي كَتِيرْ وَلَّا؟
وَ ذُنُوبَكْ مَا فَاتَوْا الْحَدّ وَلَّا؟
6 أَشَانْ بَلَا سَبَبْ،
إِنْتَ شِلْت ضَمَانْ مِنْ أَخْوَانَكْ
وَ قَلَعْت خُلْقَانْهُمْ
وَ خَلَّيْتهُمْ عَرْيَانِينْ.
7 إِنْتَ مَا أَنْطَيْت أَلْمِي لِلْعَطْشَانْ
وَ لَا أَنْطَيْت أَكِلْ لِلْجِيعَانْ.
8 الْأَرْض لِسِيدْ الْعُنُفْ
وَ الْمَحْبُوبْ يَسْكُنْ فَوْقهَا.
9 الْأَرَامِلْ، إِنْتَ تَطْرُدْهِنْ إِيدَيْهِنْ يَابْسِينْ
وَ ظَلَمْت الْأَتِيمْ الْهَلْكَانْ.
10 وَ فِي شَانْ دَا، الشُّرُكَّ حَوَّقَوْك
وَ الرُّعُبْ كَرَبَكْ بِغَفْلَةْ.
11 إِنْتَ مَا تِشِيفْ الضَّلَامْ
وَ لَا الْأَلْمِي الْكَتِيرْ
الْقَاعِدْ يِغَطِّيكْ وَلَّا؟
12 الرَّبّ مَا فَوْق مِنْ السَّمَاءْ وَلَّا؟
وَ إِنْتَ! شِيفْ النُّجُومْ هُمَّنْ عَالِيِينْ!
13 وَ فِي شَانْ دَا، إِنْتَ قُلْت:
«الرَّبّ يَعَرِفْ شُنُو؟
هُو يَقْدَرْ يِحَاكِمْنَا
مِنْ الضَّلَامْ الْهَالِكْ وَلَّا؟
14 وَ السَّحَابْ مِثِلْ غِطَاءْ تَخِينْ
يَدْحَرَهْ مَا يِشِيفْ
وَكِتْ يَمْشِي
وَ يِحَوِّقْ السَّمَاوَاتْ.»
15 هَلْ إِنْتَ تِدَوْر تَحْفَضْ الدَّرِبْ الزَّمَانْ،
الشَّالَوْه النَّاسْ الْفَسْلِينْ وَلَّا؟
16 هُمَّنْ دَوْل مَاتَوْا قَبُلْ وَكِتْهُمْ
مِثِلْ بَيْت الْأَلْمِي أَكَلْ أَسَاسَهْ.
17 هُمَّنْ قَالَوْا لِلرَّبّ:
«بَعِّدْ مِنِّنَا!
إِنْتَ الْقَادِرْ مَا تَقْدَرْ
تِسَوِّي لَيْنَا شَيّءْ!»
18 وَ لَاكِنْ هُو بَسْ
الْمَلَا بُيُوتْهُمْ بِالْخَيْر.
وَ شَوْرَةْ الْعَاصِيِينْ دِي،
هِي بَعِيدَةْ مِنِّي.
19 الصَّالِحِينْ يِشِيفُوا خَرَابْهُمْ وَ يَفْرَحَوْا
وَ الْبَرِي يِشَّمَّتْ لَيْهُمْ.
20 «الْوَقَفْ ضِدِّنَا مَا أَدَّمَّرْ وَلَّا؟
وَ النَّارْ مَا أَكَلَتْ خُمَامْهُمْ وَلَّا؟»
واجِب أيُّوب يقبِّل للربّ
21 سَوِّي صُلُحْ مَعَ الرَّبّ
وَ تَلْقَى السَّلَامْ.
وَ بَيْدَا، الْحَلُو يِقَبِّلْ
لَيْك بَتَّانْ.
22 أَسْمَعْ تَعْلِيمْ الرَّبّ
وَ أَكْرُبْ كَلَامَهْ فِي قَلْبَكْ.
23 قَبِّلْ لِلْقَادِرْ وَ تَلْقَى الثَّبَاتْ
وَ بَعِّدْ الظُّلُمْ مِنْ خَيْمِتَكْ.
24 أَرْمِي دَهَبَكْ فِي التُّرَابْ
وَ دَهَبْ أُفِيرْ فِي أُسْط حَصْحَصْ الْوَادِي.
25 وَ خَلَاصْ، الْقَادِرْ يَبْقَى دَهَبَكْ
وَ يَبْقَى لَيْك كِيمَانْ هَنَا فُضَّةْ.
26 وَ بَيْدَا، الْقَادِرْ يَبْقَى فَرْحِتَكْ
وَ عَلَيْ الرَّبّ، تَرْفَعْ وِجْهَكْ بَتَّانْ.
27 إِنْتَ تَشْحَدَهْ وَ هُو يَسْمَعَكْ
وَ تِحَقِّقْ نَذْرَكْ.
28 وَ كَنْ شِلْت قَرَارْ كُلَ، يِلْحَقَّقْ لَيْك
وَ النُّورْ يِنَوِّرْ دَرْبَكْ.
29 وَ كَنْ نَاسْ وَاحِدِينْ يِلْمَسْكَنَوْا،
إِنْتَ تُقُولْ: «قُمُّوا فَوْق!»
أَشَانْ الرَّبّ يِنَجِّي الْمِسْكِينْ.
30 أَيْوَى، هُو يِنَجِّي حَتَّى الْمَا بَرِي كُلَ
وَ هُو كُلَ يَنْجَى بِسَبَبْ إِيدَيْنَكْ السَّالِمِينْ.
© La Bible en arabe tchadien © Alliance biblique du Tchad, 2019
