حِزْقِيَّا بِقي ملك في يَهُوذَا
1 وَ فِي السَّنَةْ التَّالْتَةْ هَنَا حُكُمْ هُوشَعْ وِلَيْد إِيلَى مَلِكْ مَمْلَكَةْ إِسْرَائِيلْ، حِزْقِيَّا وِلَيْد أَحَازْ بِقِي مَلِكْ فِي مَمْلَكَةْ يَهُوذَا. 2 وَ حِزْقِيَّا عِنْدَهْ 25 سَنَةْ وَكِتْ بِقِي مَلِكْ وَ حَكَمْ 29 سَنَةْ فِي مَدِينَةْ الْقُدُسْ. وَ أَمَّهْ أُسُمْهَا أَبِي بِنَيَّةْ زَكَرِيَّا.
3 وَ حِزْقِيَّا سَوَّى الْعَدِيلْ قِدَّامْ اللّٰهْ مِثِلْ جِدَّهْ دَاوُدْ سَوَّاهْ. 4 هُو هَدَّمْ الْبَكَانَاتْ الْعَالِيِينْ وَ رَمَى الْحُجَارْ الْغَزَّوْهُمْ لِلْعِبَادَةْ وَ كَسَّرْ الْعِيدَانْ الْغَزَّوْهُمْ لِعِبَادَةْ أَشِيرَةْ. وَ كَسَّرْ الدَّابِي هَنَا النَّحَاسْ الْمُوسَى صَنَعَهْ أَشَانْ لَحَدِّي الْوَكِتْ دَاكْ، بَنِي إِسْرَائِيلْ قَاعِدِينْ يِحَرُّقُوا بَخُورْ لِلدَّابِي السَّمَّوْه نَحُوشْتَانْ. 5 وَ حِزْقِيَّا أَتْوَكَّلْ عَلَيْ اللّٰهْ إِلٰـهْ بَنِي إِسْرَائِيلْ. وَ مِنْ كُلَّ مُلُوكْ مَمْلَكَةْ يَهُوذَا الْحَكَمَوْا قَبْلَهْ أَوْ الْحَكَمَوْا بَعَدَهْ، مَا فِي مَلِكْ مِثْلَهْ هُو. 6 وَ هُو مُتَمَسِّكْ بِاللّٰهْ وَ أَبَداً مَا طَرَّفْ مِنَّهْ. وَ هُو حَفَضْ الْوَصَايَا الْاللّٰهْ أَمَرْ بَيْهُمْ مُوسَى.
7 وَ اللّٰهْ كَانْ مَعَايَهْ وَ حِزْقِيَّا قَاعِدْ يَنْجَحْ فِي كُلَّ شَيّءْ الْيِسَوِّيهْ. وَ هُو أَتْمَرَّدْ ضِدّ مَلِكْ بَلَدْ أَشُورْ وَ أَبَى مَا يَقْعُدْ تِحِتْ حُكْمَهْ. 8 وَ حِزْقِيَّا أَنَّصَرْ فِي الْفِلِسْطِيِّينْ وَ شَالْ أَرْضُهُمْ لَحَدِّي حِلَّةْ غَزَّةْ، مِنْ حِلَّالْ دُقَاقْ الْمَا زِيَادَةْ مِنْ بَيْت طَوِيلْ هَنَا مُرَاقَبَةْ لَحَدِّي الْمُدُنْ الْقَوِيِّينْ.
ملك أَشُور شال السَامِرَة
9 وَ السَّنَةْ الرَّابْعَةْ هَنَا حُكُمْ حِزْقِيَّا، دِي هِي السَّنَةْ السَّابْعَةْ هَنَا حُكُمْ هُوشَعْ وِلَيْد إِيلَى مَلِكْ مَمْلَكَةْ إِسْرَائِيلْ. وَ فِي السَّنَةْ دِي، شَلْمَنَاسَرْ مَلِكْ بَلَدْ أَشُورْ جَاءْ لِمَدِينَةْ السَّامِرَةْ وَ حَاصَرْهَا. 10 وَ بَعَدْ مُدَّةْ تَلَاتَةْ سَنَةْ، هُو شَالْ الْمَدِينَةْ دِي. وَ دَا فِي السَّنَةْ السَّادْسَةْ هَنَا حُكُمْ حِزْقِيَّا وَ السَّنَةْ التَّاسْعَةْ هَنَا حُكُمْ هُوشَعْ مَلِكْ مَمْلَكَةْ إِسْرَائِيلْ. 11 وَ مَلِكْ أَشُورْ وَدَّى نَاسْ مَمْلَكَةْ إِسْرَائِيلْ فِي الْغُرْبَةْ فِي بَلَدْ أَشُورْ. وَ هُو سَكَّنَاهُمْ فِي حِلَّةْ حَلَحْ وَ فِي خَشُمْ بَحَرْ حَابُرْ فِي مَنْطَقَةْ قُزَانْ وَ فِي حِلَّالْ الْمَادِيِّينْ. 12 وَ دَا أَشَانْ نَاسْ مَمْلَكَةْ إِسْرَائِيلْ مَا سِمْعَوْا كَلَامْ اللّٰهْ إِلٰـهُّمْ وَ مَا كَرَّمَوْا الْمُعَاهَدَةْ. وَ مَا سِمْعَوْا كَلَامَهْ وَ لَا طَبَّقَوْا أَوَامِرَهْ الْأَنْطَاهُمْ لَيْهُمْ بِوَاسِطَةْ عَبْدَهْ مُوسَى.
سَنْحَرِيب قلع مناطِق بني يَهُوذَا
13 وَ فِي سَنِةْ 14 هَنَا حُكُمْ حِزْقِيَّا، سَنْحَرِيبْ مَلِكْ بَلَدْ أَشُورْ هَجَمْ الْمُدُنْ الْقَوِيِّينْ هَنَا مَمْلَكَةْ يَهُوذَا وَ قَلَعَاهُمْ. 14 وَ حِزْقِيَّا مَلِكْ مَمْلَكَةْ يَهُوذَا رَسَّلْ لِمَلِكْ أَشُورْ فِي حِلَّةْ لَكِيشْ وَ قَالْ لَيَّهْ: «أَنَا مُذْنِبْ! هَسَّعْ دَا، كِسّ مِنِّي. وَ كُلَّ شَيّءْ التُّخُطَّهْ فَوْقِي دَا نَحْمَلَهْ.» وَ خَلَاصْ، مَلِكْ أَشُورْ دَوَّرْ مِنْ حِزْقِيَّا مَلِكْ يَهُوذَا 10 000 كِيلَوْ هَنَا فُضَّةْ وَ 1 000 كِيلَوْ هَنَا دَهَبْ. 15 وَ حِزْقِيَّا أَنْطَاهْ كُلَّ الْفُضَّةْ الْقَاعِدَةْ فِي بَيْت اللّٰهْ وَ فِي الْمَخَازِنْ هَنَا قَصِرْ الْمَلِكْ. 16 وَ فِي الْوَكِتْ دَا بَسْ، حِزْقِيَّا مَلَّطْ الدَّهَبْ مِنْ الْبِيبَانْ وَ عِيدَانْهُمْ هَنَا بَيْت اللّٰهْ الْمُمَسَّحِينْ بِدَهَبْ وَ أَنْطَاهْ لِمَلِكْ أَشُورْ.
سَنْحَرِيب يهدِّد مدينة القدس
17 وَ مِنْ حِلَّةْ لَكِيشْ، مَلِكْ بَلَدْ أَشُورْ رَسَّلْ وَزِيرَهْ هَنَا الدِّفَاعْ وَ كَبِيرْ الْمَسَائِيلْ وَ قَايِدْ الدَّيْش وَ مَعَاهُمْ دَيْش كَبِيرْ لِلْمَلِكْ حِزْقِيَّا فِي مَدِينَةْ الْقُدُسْ. وَ وَكِتْ وَصَّلَوْا فِي مَدِينَةْ الْقُدُسْ، قَعَدَوْا جَنْب مَجْرَةْ الْبِرْكَةْ الْعَالِي فِي الدَّرِبْ الْمَاشِي عَلَيْ زَرَعْ الْغَسَّالِينْ. 18 وَ هُمَّنْ طَلَبَوْا أَشَانْ يِحَجُّوا لِلْمَلِكْ. وَ لَاكِنْ أَلِيَاقِيمْ وِلَيْد حِلْقِيَّا مَسْؤُولْ فِي قَصِرْ الْمَلِكْ مَرَقْ مِنْ الْمَدِينَةْ لِيِلَاقِيهُمْ وَ مَشَوْا مَعَايَهْ شَبْنَا الْكَاتِبْ وَ يُوَاخْ وِلَيْد أَسَافْ الْكَاتِبْ الْيِذَكِّرْ الْمَلِكْ.
19 وَ قَايِدْ الدَّيْش قَالْ لَيْهُمْ: «قُولُوا لِحِزْقِيَّا الْكَلَامْ دَا الْجَايِ مِنْ الْمَلِكْ الْكَبِيرْ هَنَا بَلَدْ أَشُورْ: ‹وَيْن الْأَمَانْ الْإِنْتَ مُتَوَكِّلْ عَلَيَّهْ؟ 20 إِنْتَ تَحْسِبْ الْكَلَامْ الْفَاضِي يَنْطِي رَايْ وَ قُدْرَةْ فِي الْحَرِبْ وَلَّا؟ وَ هَسَّعْ دَا، عَلَيْ يَاتُو إِنْتَ أَتْوَكَّلْت لِتِتْمَرَّدْ ضِدِّي؟ 21 دَاهُو إِنْتَ أَتْوَكَّلْت عَلَيْ بَلَدْ مَصِرْ وَ هِي مِثِلْ مُعَاوَنَةْ هَنَا عَقَيْقَايْ الْمَفْجُوخَةْ التَّطْعَنْ أَيِّ نَادُمْ الْيِرَّكَّزْ فَوْقَهْ. وَ فِرْعَوْن مَلِكْ مَصِرْ هُو مِثِلْ دَا لِكُلَّ النَّاسْ الْيِتْوَكَّلَوْا عَلَيَّهْ.›
22 «وَ تُقُولُوا لَيِّ: ‹عَلَيْ اللّٰهْ إِلٰـهْنَا بَسْ أَتْوَكَّلْنَا.› لَاكِنْ دَا حِزْقِيَّا بَسْ الْهَدَّمْ الْبَكَانَاتْ الْعَالِيِينْ وَ الْمَدَابِحْ هَنَا عِبَادَةْ اللّٰهْ! وَ هُو قَالْ لِنَاسْ بَلَدْ يَهُوذَا وَ سُكَّانْ مَدِينَةْ الْقُدُسْ: ‹أَمْشُوا أَسْجُدُوا قِدَّامْ الْمَدْبَحْ الْهِنِي فِي مَدِينَةْ الْقُدُسْ.›
23 «وَ هَسَّعْ دَا، تَعَالْ أَسْتَفِقْ مَعَ سِيدِي مَلِكْ بَلَدْ أَشُورْ. أَنَا نَنْطِيكْ 2 000 خَيْل كَنْ تَلْقَى لَيْهُمْ رَكَّابِينْ. 24 وَ كِكَّيْف إِنْتَ تَقْدَرْ تِنَّصِرْ فِي مَسْؤُولْ وَاحِدْ صَغَيَّرْ مِنْ خَدَّامِينْ سِيدِي؟ إِنْتَ تِتْوَكَّلْ عَلَيْ مَصِرْ لِتَلْقَى عَرَبَاتْ حَرِبْ وَ سِيَادْ خَيْل وَلَّا؟ 25 وَ هَسَّعْ بِإِذِنْ اللّٰهْ، أَنَا قَمَّيْت ضِدّ الْبَكَانْ دَا لِنِدَمِّرَهْ. أَيْوَى! اللّٰهْ بَسْ قَالْ لَيِّ: ‹قُمّ ضِدّ الْبَلَدْ دِي وَ دَمِّرْهَا.›»
26 وَ خَلَاصْ، أَلِيَاقِيمْ وِلَيْد حِلْقِيَّا وَ شَبْنَا وَ يُوَاخْ رَدَّوْا لِقَايِدْ الدَّيْش وَ قَالَوْا لَيَّهْ: «مِنْ فَضْلَكْ، كَلِّمْ لَيْنَا أَنِحْنَ خَدَّامِينَكْ بِالْأَرَامِيَّةْ أَشَانْ أَنِحْنَ نَفْهَمَوْا اللُّغَّةْ دِي. لَاكِنْ مَا تِكَلِّمْ لَيْنَا بِالْعِبْرَانِيَّةْ وَ لَا تِسَمِّعْ الشَّعَبْ الْقَاعِدِينْ فِي رَاسْ الدُّرْدُرْ.» 27 وَ قَايِدْ الدَّيْش قَالْ لَيْهُمْ: «هَلْ كَلَامْ سِيدِي الرَّسَّلَانِي دَا بُخُصُّكُو إِنْتُو وَ مَلِكُّو بَسْ وَلَّا؟ لَا! الْكَلَامْ دَا بُخُصّ كُلَّ النَّاسْ الْقَاعِدِينْ فِي دُرْدُرْ الْمَدِينَةْ. هُمَّنْ كُلَ مِثِلْكُو يِنْجَبْرُوا يَاكُلُوا هُرَارْهُمْ وَ يَشَرْبَوْا بَوْلهُمْ.»
28 وَ بَعَدْ دَا، قَايِدْ الدَّيْش قَمَّ بِطُولَهْ وَ عَاطْ بِحِسّ عَالِي بِكَلَامْ عِبْرَانِي وَ قَالْ: «أَسْمَعَوْا كَلَامْ الْمَلِكْ الْكَبِيرْ وَ هُو مَلِكْ بَلَدْ أَشُورْ. 29 دَاهُو الْمَلِكْ قَالْ: ‹خَلِّي حِزْقِيَّا مَا يُغُشُّكُو أَشَانْ هُو مَا يَقْدَرْ يِنَجِّيكُو مِنِّي. 30 وَ خَلِّي حِزْقِيَّا مَا يِوَدِّيكُو لَحَدِّي تِتْوَكَّلَوْا عَلَيْ اللّٰهْ وَ يُقُولْ لَيْكُو: ”أَكِيدْ اللّٰهْ يِنَجِّينَا وَ الْمَدِينَةْ دِي كُلَ مَا تَقَعْ فِي إِيدَيْن مَلِكْ أَشُورْ!“› 31 مَا تَسْمَعَوْا كَلَامْ حِزْقِيَّا أَشَانْ دَاهُو مَلِكْ أَشُورْ قَالْ: ‹سَوُّوا مَعَايِ صُلُحْ وَ سَلُّمُوا نُفُوسْكُو لَيِّ. وَ خَلَاصْ، أَيِّ وَاحِدْ مِنْكُو يَاكُلْ مِنْ إِنْتَاجْ عِنَبَهْ وَ تِينَهْ وَ يَشْرَبْ مِنْ أَلْمِي بِيرَهْ. 32 وَ دَا لَحَدِّي أَنَا نِقَبِّلْ وَ نِوَدِّيكُو فِي بَلَدْ مِثِلْ بَلَدْكُو. وَ الْبَلَدْ دِي عِنْدَهَا قَمَحْ وَ خَمَرْ جَدِيدْ وَ مَعَاشْ وَ عِنَبْ وَ زَيْتُونْ لِلدِّهِنْ وَ عَسَلْ وَ بِمِثِلْ دَا، إِنْتُو تِعِيشُوا وَ مَا تُمُوتُوا. مَا تَسْمَعَوْا كَلَامْ حِزْقِيَّا الْقَاعِدْ يُغُشُّكُو وَ يُقُولْ: ”اللّٰهْ يِنَجِّينَا.“ 33 هَلْ إِلٰـهَاتْ الْأُمَمْ قِدْرَوْا نَجَّوْا بُلْدَانْهُمْ مِنْ إِيدْ مَلِكْ أَشُورْ وَلَّا؟ 34 وَيْن إِلٰـهَاتْ حَمَاتْ وَ أَرْفَدْ؟ وَ وَيْن إِلٰـهَاتْ سَفَرْوَايِمْ وَ هِينَعْ وَ عَوَّا؟ هَلْ هُمَّنْ قِدْرَوْا نَجَّوْا مَدِينَةْ السَّامِرَةْ مِنْ إِيدِي وَلَّا؟ 35 وَ مِنْ كُلَّ إِلٰـهَاتْ الْبُلْدَانْ دَوْل، يَاتُو الْقِدِرْ نَجَّى بَلَدَهْ مِنِّي؟ وَ بَيْدَا، هَلْ اللّٰهْ يَقْدَرْ يِنَجِّي مَدِينَةْ الْقُدُسْ مِنِّي وَلَّا؟›»
36 وَ لَاكِنْ الشَّعَبْ سَكَتَوْا مَا رَدَّوْا لَيَّهْ بِأَيِّ كِلْمَةْ أَشَانْ الْمَلِكْ حِزْقِيَّا أَمَرَاهُمْ وَ قَالْ: «مَا تُرُدُّوا لَيَّهْ.» 37 وَ خَلَاصْ، أَلِيَاقِيمْ وِلَيْد حِلْقِيَّا مَسْؤُولْ فِي قَصِرْ الْمَلِكْ وَ شَبْنَا الْكَاتِبْ وَ يُوَاخْ وِلَيْد أَسَافْ الْكَاتِبْ الْيِذَكِّرْ الْمَلِكْ، كُلُّهُمْ جَوْا لِحِزْقِيَّا وَ خُلْقَانْهُمْ مُشَرَّطِينْ مِنْ الْحِزِنْ وَ جَابَوْا لَيَّهْ كَلَامْ قَايِدْ الدَّيْش.
© La Bible en arabe tchadien © Alliance biblique du Tchad, 2019
