النبي إِلِيَاس بلّغ بالجفاف
1 وَ فِيَّهْ رَاجِلْ وَاحِدْ أُسْمَهْ إِلِيَاسْ سَاكِنْ فِي حِلَّةْ تِشْبِي فِي تُرَابْ قِلْعَادْ. وَ هُو قَالْ لِلْمَلِكْ أَخَابْ: «نَحْلِفْ بِاللّٰهْ الْحَيّ، إِلٰـهْ بَنِي إِسْرَائِيلْ الْأَنَا قَاعِدْ نَعَبُدَهْ، فِي السِّنِينْ الْجَايِينْ مَا فِي كَرَنْج وَ لَا مَطَرَةْ إِلَّا كَنْ أَنَا شَحَدْتَهْ.»
2 وَ بَعَدْ دَا، اللّٰهْ حَجَّى لِإِلِيَاسْ وَ قَالْ: 3 «قُمّ مِنْ هِنِي وَ أَمْشِي عَلَيْ صَبَاحْ وَ أَلَّبَّدْ فِي وَادِي كَرِيتْ صَبَاحْ لِبَحَرْ الْأُرْدُنْ. 4 وَ هِنَاكْ تَشْرَبْ مِنْ الْوَادِي وَ أَنَا أَمَرْت غُرْبَاتْ يِجِيبُوا لَيْك أَكِلْ.»
5 وَ خَلَاصْ، إِلِيَاسْ سَوَّى حَسَبْ أَمُرْ اللّٰهْ. هُو مَشَى سَكَنْ فِي وَادِي كَرِيتْ صَبَاحْ لِبَحَرْ الْأُرْدُنْ. 6 وَ فِي الْبَكَانْ دَا فَجُرْ وَ عَشِيَّةْ، الْغُرْبَاتْ قَاعِدِينْ يِجِيبُوا لَيَّهْ خُبْزَةْ وَ لَحَمْ. وَ هُو قَاعِدْ يَشْرَبْ مِنْ أَلْمِي الْوَادِي.
إِلِيَاس مشى لأرْملة في صَرَفَةْ
7 وَ بَعَدْ إِلِيَاسْ قَعَدْ وَكِتْ شِيَّةْ فِي الْبَكَانْ دَا، الْوَادِي يِبِسْ أَشَانْ الْمَطَرَةْ مَا صَبَّتْ فِي الْبَلَدْ. 8 وَ خَلَاصْ، اللّٰهْ حَجَّى لَيَّهْ وَ قَالْ: 9 «قُمّ أَمْشِي حِلَّةْ صَرَفَةْ الْقَاعِدَةْ فِي تُرَابْ صَيْدَا وَ أَسْكُنْ هِنَاكْ. أَشَانْ أَنَا أَمَرْت لِمَرَةْ وَاحِدَةْ أَرْمَلَةْ تَنْطِيكْ أَكِلْ.»
10 وَ خَلَاصْ، إِلِيَاسْ قَمَّ مَشَى فِي صَرَفَةْ. وَ وَكِتْ وِصِلْ فِي مَدَخَلْ الْحِلَّةْ، هُو شَافْ الْمَرَةْ الْأَرْمَلَةْ قَاعِدَةْ تِلَقِّطْ حَطَبْ. هُو نَادَاهَا وَ قَالْ لَيْهَا: «مِنْ فَضُلْكِ، جِيبِي لَيِّ أَلْمِي شِيَّةْ فِي مَاعُونْ نَشْرَبْ.» 11 وَ وَكِتْ مَاشَةْ تِجِيبْ لَيَّهْ الْأَلْمِي دَا، هُو نَادَاهَا بَتَّانْ وَ قَالْ لَيْهَا: «جِيبِي لَيِّ مَعَاكِ خُبْزَةْ صَغَيْرَةْ كُلَ.»
12 وَ هِي رَدَّتْ لَيَّهْ: «نَحْلِفْ بِاللّٰهْ الْحَيّ إِلٰـهَكْ، أَنَا مَا عِنْدِي شَيّءْ جَاهِزْ. مَا فَضَّلْ لَيِّ إِلَّا دَقِيقْ فِي عُمْرَةْ يِسَاوِي مَلْيَةْ إِيدْ وَ دِهِنْ شِيَّةْ فِي كَرْيَوْ. وَ هَسَّعْ جِيتْ نِلَقِّطْ حَطَبْ أَشَانْ نِسَوِّي أَكِلْ لَيِّ أَنَا وَ لِوِلَيْدِي نَاكُلُوا. وَ بَعَدْ دَا، نُمُوتُوا.»
13 وَ خَلَاصْ إِلِيَاسْ قَالْ لَيْهَا: «مَا تَخَافَيْ، أَمْشِي وَ سَوِّي مِثِلْ إِنْتِ قُلْتِيهْ. وَ بِالشَّيّءْ الْعِنْدِكِ دَا بَسْ، سَوِّي لَيِّ أَنَا خُبْزَةْ صَغَيْرَةْ وَ جِيبِيهَا لَيِّ. وَ بَعَدْ دَا، سَوِّيهْ لَيْكِ إِنْتِ وَ لِوِلَيْدكِ. 14 أَشَانْ دَاهُو اللّٰهْ إِلٰـهْ بَنِي إِسْرَائِيلْ قَالْ: ‹الدَّقِيقْ مَا يِكَمِّلْ مِنْ الْعُمْرَةْ وَ الدِّهِنْ مَا يِكَمِّلْ مِنْ الْكَرْيَوْ لَحَدِّي الْيَوْم الْاللّٰهْ يِجِيبْ الْمَطَرَةْ فِي الْأَرْض.›»
15 وَ خَلَاصْ، الْمَرَةْ مَشَتْ وَ سَوَّتْ مِثِلْ إِلِيَاسْ قَالَهْ لَيْهَا. وَ هُمَّنْ أَكَلَوْا، هِي وَ إِلِيَاسْ وَ عَايِلِتْهَا لِمُدَّةْ أَيَّامْ. 16 وَ الدَّقِيقْ الْفِي الْعُمْرَةْ مَا كَمَّلْ وَ الدِّهِنْ الْفِي الْكَرْيَوْ كُلَ مَا كَمَّلْ وَ دَا بِقِي حَسَبْ كَلَامْ اللّٰهْ الْقَالَهْ بِوَاسِطَةْ إِلِيَاسْ.
النبي إِلِيَاس قوّم وِلَيْد المرة
17 وَ بَعَدْ دَا، وِلَيْد الْمَرَةْ الْأَرْمَلَةْ سِتّ الْبَيْت دِي بِقِي مَرْضَانْ. وَ مَرَضَهْ بِقِي شَدِيدْ بِلْحَيْن لَحَدِّي مَاتْ. 18 وَ هِي قَالَتْ لِإِلِيَاسْ: «شُنُو الْبَيْنِي وَ بَيْنَكْ، يَا نَبِي اللّٰهْ؟ إِنْتَ جِيتْ أَشَانْ تِذَكِّرْنِي بِخَطَايِ وَ تَكْتُلْ وِلَيْدِي وَلَّا؟» 19 وَ هُو رَدَّ لَيْهَا وَ قَالْ: «أَنْطِينِي وِلَيْدكِ.»
وَ خَلَاصْ، شَالْ الْوِلَيْد مِنْ إِيدَيْنهَا وَ مَشَى بَيَّهْ فَوْق فِي الْقَصِرْ، فِي الْبَيْت الْهُو سَاكِنْ فَوْقَهْ وَ رَقَّدَهْ فِي السَّرِيرْ. 20 وَ فِي الْبَكَانْ دَا، سَأَلْ اللّٰهْ بِشِدَّةْ وَ قَالْ: «يَا اللّٰهْ إِلٰـهِي، لِلْمَرَةْ الْأَنَا قَاعِدْ ضَيْف فِي بَكَانْهَا دِي كُلَ تِسَوِّي لَيْهَا شَيّءْ فَسِلْ وَ تَكْتُلْ وِلَيْدهَا وَلَّا؟»
21 وَ إِلِيَاسْ أَلْمَطَّطْ تَلَاتَةْ مَرَّاتْ مِنْ فَوْق لِلْوِلَيْد وَ سَأَلْ اللّٰهْ بِشِدَّةْ وَ قَالْ: «يَا اللّٰهْ إِلٰـهِي، نَشْحَدَكْ تِقَبِّلْ رُوحْ الْوِلَيْد دَا.» 22 وَ اللّٰهْ قِبِلْ سُؤَالَهْ وَ رُوحْ الْوِلَيْد قَبَّلَتْ وَ هُو حِيِي. 23 وَ إِلِيَاسْ شَالْ الْوِلَيْد وَ دَلَّى بَيَّهْ مِنْ الْقَصِرْ وَ أَنْطَاهْ لِأَمَّهْ وَ قَالْ: «شِيفِي! دَاهُو وِلَيْدكِ حِيِي.» 24 وَ الْمَرَةْ قَالَتْ لِإِلِيَاسْ: «أَيْوَى، هَسَّعْ أَنَا عِرِفْت كَدَرْ إِنْتَ نَبِي اللّٰهْ وَ أَكِيدْ الْكَلَامْ الْقَاعِدْ تُقُولَهْ دَا جَايِ مِنْ اللّٰهْ.»
© La Bible en arabe tchadien © Alliance biblique du Tchad, 2019
