قوانين الضحايا المُحرّقين
1 وَ اللّٰهْ نَادَى مُوسَى مِنْ خَيْمَةْ الْإِجْتِمَاعْ وَ قَالْ لَيَّهْ: 2 حَجِّي لِبَنِي إِسْرَائِيلْ وَ قُولْ لَيْهُمْ وَكِتْ نَادُمْ مِنْكُو يِقَدِّمْ هَدِيَّةْ لِلّٰهْ، وَاجِبْ يِقَدِّمْ الْهَدِيَّةْ دِي مِنْ الْبَقَرْ وَلَّا مِنْ الْغَنَمْ.
3 وَ كَنْ هَدِيّتَهْ دِي ضَحِيَّةْ مُحَرَّقَةْ مِنْ الْبَقَرْ، وَاجِبْ يِقَدِّمْ تَوْر الْمَا عِنْدَهْ أَيِّ عَيْب. جِيبَهْ فِي مَدَخَلْ خَيْمَةْ الْإِجْتِمَاعْ أَشَانْ اللّٰهْ يَرْضَى بِالتَّوْر دَا. 4 النَّادُمْ دَا يُخُطّ إِيدَهْ فِي رَاسْ الضَّحِيَّةْ وَ اللّٰهْ يَرْضَى بَيْهَا وَ تَبْقَى لَيَّهْ كَفَّارَةْ. 5 وَ هُو يَدْبَحْ التَّوْر قِدَّامْ اللّٰهْ. وَ رُجَالْ الدِّينْ مِنْ ذُرِّيَّةْ هَارُونْ يِشِيلُوا الدَّمّ وَ يُرُشُّوهْ فِي نَوَايِطْ الْمَدْبَحْ الْقَاعِدْ فِي مَدَخَلْ خَيْمَةْ الْإِجْتِمَاعْ. 6 وَ وَكِتْ هُو يَسْلَخْ الضَّحِيَّةْ وَ يِقَطِّعْ لَحَمْهَا، 7 رُجَالْ الدِّينْ مِنْ ذُرِّيَّةْ هَارُونْ يُخُطُّوا حَطَبْ فِي الْمَدْبَحْ وَ يِقَبُّضُوا نَارْ فَوْقَهْ. 8 وَ يُخُطُّوا اللَّحَمْ الْمُقَطَّعْ وَ الرَّاسْ وَ الشَّحَمْ فِي الْحَطَبْ الْمُقَبَّضْ نَارْ فِي الْمَدْبَحْ. 9 وَ النَّادُمْ دَا يِغَسِّلْ الْبُطُونْ وَ الضَّلَافَيْ بِأَلْمِي وَ رَاجِلْ الدِّينْ يِحَرِّقْهُمْ كُلُّهُمْ فِي الْمَدْبَحْ. وَ دِي ضَحِيَّةْ مُحَرَّقَةْ وَ هِي هَدِيَّةْ مُحَرَّقَةْ الرِّيحِتْهَا اللّٰهْ يَرْضَى بَيْهَا.
10 وَ كَنْ هَدِيّتَهْ دِي ضَحِيَّةْ مُحَرَّقَةْ مِنْ الْغَنَمْ أَوْ الْعِنْزَيْ، هُو يِقَدِّمْ تَيْس أَوْ كَبِشْ الْمَا عِنْدَهْ أَيِّ عَيْب. 11 هُو يَدْبَحَهْ فِي النُّصّ الْمُنْشَاقِي هَنَا الْمَدْبَحْ قِدَّامْ اللّٰهْ وَ رُجَالْ الدِّينْ مِنْ ذُرِّيَّةْ هَارُونْ يُرُشُّوا الدَّمّ فِي نَوَايِطْ الْمَدْبَحْ. 12 هُو يِقَطِّعْ لَحَمَهْ وَ رَاسَهْ وَ شَحَمَهْ وَ رَاجِلْ الدِّينْ يُخُطُّهُمْ فِي الْحَطَبْ الْمُقَبَّضْ نَارْ فِي الْمَدْبَحْ. 13 وَ النَّادُمْ دَا يِغَسِّلْ الْبُطُونْ وَ الضَّلَافَيْ بِأَلْمِي وَ رَاجِلْ الدِّينْ يِقَدِّمْهُمْ كُلُّهُمْ وَ يِحَرِّقْهُمْ فِي الْمَدْبَحْ. وَ دِي ضَحِيَّةْ مُحَرَّقَةْ وَ هِي هَدِيَّةْ مُحَرَّقَةْ الرِّيحِتْهَا اللّٰهْ يَرْضَى بَيْهَا.
14 وَ كَنْ هَدِيّتَهْ دِي ضَحِيَّةْ مُحَرَّقَةْ مِنْ الطُّيُورْ الْيِقَدِّمْهُمْ لِلّٰهْ، وَاجِبْ يِقَدِّمْ قِمْرِيْ أَوْ حَمَامْ. 15 وَ رَاجِلْ الدِّينْ يِقَدِّمْ الطَّيْرَايْ فِي الْمَدْبَحْ وَ يَكْسِرْ رَقَبَتْهَا وَ يِحَرِّقْهَا فِي الْمَدْبَحْ وَ يَعَصِرْ دَمَّهَا فِي الدُّرْدُرْ هَنَا نَوَايِطْ الْمَدْبَحْ. 16 وَ يَمْرُقْ خُزَّانِتْهَا وَ رِيشْهَا وَ يِدَفِّقْهُمْ صَبَاحْ الْمَدْبَحْ فِي الْبَكَانْ الْيُصُبُّوا فَوْقَهْ الرُّمَادْ الْمُدَهَّنْ. 17 وَ يُشُقّ الطَّيْرَايْ مِنْ بَيْن جَنَاحَيْهَا وَ لَاكِنْ مَا يَقْطَعْهَا إِتْنَيْن. وَ رَاجِلْ الدِّينْ يِحَرِّقْ الطَّيْرَايْ دِي فِي الْحَطَبْ الْمُقَبَّضْ نَارْ فِي الْمَدْبَحْ. وَ دِي ضَحِيَّةْ مُحَرَّقَةْ وَ هِي هَدِيَّةْ مُحَرَّقَةْ الرِّيحِتْهَا اللّٰهْ يَرْضَى بَيْهَا.
© La Bible en arabe tchadien © Alliance biblique du Tchad, 2019
