اللّه درّج يَشُوع فَوْق بني إسرائيل
1 وَ بَعَدْ مَوْت مُوسَى عَبْد اللّٰهْ، اللّٰهْ قَالْ لِيَشُوعْ وِلَيْد نُونْ مُسَاعِدْ مُوسَى: 2 «عَبْدِي مُوسَى مَاتْ. هَسَّعْ قُمّ، إِنْتَ وَ كُلَّ الشَّعَبْ. أَقْطَعَوْا بَحَرْ الْأُرْدُنْ وَ أَمْشُوا لِلْبَلَدْ الْأَنَا نَنْطِيهَا لَيْكُو إِنْتُو بَنِي إِسْرَائِيلْ. 3 وَ أَيِّ بَكَانْ الرِّجْلَكْ تَفْجَقَهْ، أَنَا نَنْطِيهْ لَيْكُو مِثِلْ أَنَا وَاعَدْت بَيَّهْ مُوسَى. 4 وَ مِنْ الْوَطِي لِلْمُنْشَاقْ، أَرْضُكُو تَمْشِي مِنْ الصَّحَرَاء لِجِبَالْ لُبْنَانْ. وَ مِنْ الصَّبَاحْ لِلْغَرِبْ، تَمْشِي مِنْ بَحَرْ الْفُرَاتْ، الْبَحَرْ الْكَبِيرْ، لَحَدِّي الْبَحَرْ الْأَبْيَضْ وَ كُلَّ بَلَدْ الْحِتِّيِّينْ. 5 فِي كُلَّ مُدَّةْ حَيَاتَكْ، مَا فِي نَادُمْ الْيَقْدَرْ يَقِيفْ قِدَّامَكْ. وَ أَنَا نُكُونْ مَعَاكْ مِثِلْ كُنْت مَعَ مُوسَى وَ لَا نَابَاكْ وَ لَا نِخَلِّيكْ. 6 أَبْقَى شَدِيدْ وَ فَحَلْ! أَشَانْ إِنْتَ بَسْ التِّوَدِّي الشَّعَبْ دَا فِي الْبَلَدْ الْأَنَا حَلَفْت لِجُدُودْهُمْ وَ قُلْت نَنْطِيهَا لَيْهُمْ. 7 أَيْوَى، أَبْقَى شَدِيدْ وَ فَحَلْ بِزِيَادَةْ. وَ سَوِّي أَيِّ شَيّءْ حَسَبْ التَّوْرَاةْ الْأَمَرَكْ بَيَّهْ عَبْدِي مُوسَى. مَا تِبَارِي مِنَّهْ وَ لَا إِسْرَةْ وَ لَا زَيْنَةْ. وَ بَيْدَا، تَنْجَحْ فِي أَيِّ بَكَانْ التَّمْشِي فَوْقَهْ. 8 وَ كِتَابْ التَّوْرَاةْ هَنَا مُوسَى دَا، مَا تِبَعِّدَهْ مِنَّكْ. أَقْرِيهْ فَجُرْ وَ عَشِيَّةْ أَشَانْ تِسَوِّي أَيِّ شَيّءْ حَسَبْ الْكَلَامْ الْمَكْتُوبْ فَوْقَهْ. وَ بَيْدَا، كُلَّ شَيّءْ التِّسَوِّيهْ يَبْقَى عَدِيلْ وَ تَنْجَحْ. 9 وَ أَذَّكَّرْ كَدَرْ أَنَا أَمَرْتَكْ أَبْقَى شَدِيدْ وَ فَحَلْ. مَا تَرْجِفْ وَ لَا تَخَافْ أَشَانْ أَنَا اللّٰهْ إِلٰـهَكْ نُكُونْ مَعَاكْ فِي أَيِّ بَكَانْ الْإِنْتَ تَمْشِي فَوْقَهْ.»
يَشُوع جهّز يقْطع البحر
10 وَ خَلَاصْ، يَشُوعْ أَمَرْ شُيُوخْ الشَّعَبْ وَ قَالْ: 11 «أَدْخُلُوا الْفَرِيقْ وَ آمُرُوهُمْ لِلشَّعَبْ وَ قُولُوا لَيْهُمْ: ‹كُلُّكُو جَهُّزُوا زَادْكُو. أَشَانْ فِي تَلَاتَةْ يَوْم تَقْطَعَوْا بَحَرْ الْأُرْدُنْ وَ تَدْخُلُوا فِي الْبَلَدْ الْيَنْطِيهَا لَيْكُو اللّٰهْ إِلٰـهْكُو وَ تِشِيلُوهَا.›»
12 وَ يَشُوعْ كَلَّمْ لِقَبِيلَةْ رَأُوبِينْ وَ قَبِيلَةْ قَادْ وَ نُصّ قَبِيلَةْ مَنَسَّى وَ قَالْ: 13 «أَذَّكَّرَوْا الْأَمُرْ الْأَنْطَاكُو مُوسَى عَبْد اللّٰهْ، وَكِتْ قَالْ: ‹اللّٰهْ إِلٰـهْكُو أَنْطَاكُو الْبَلَدْ دِي وَ رَاحَةْ.› 14 هَسَّعْ دَا، عَوِينْكُو وَ عِيَالْكُو وَ بَهَايِمْكُو يَقْعُدُوا هِنِي فِي الْبَلَدْ الْأَنْطَاهَا لَيْكُو مُوسَى، صَبَاحْ لِبَحَرْ الْأُرْدُنْ. وَ لَاكِنْ إِنْتُو كُلُّكُو الرُّجَالْ الْفُرَّاسْ، جَهُّزُوا لِلْحَرِبْ وَ أَمْشُوا قِدَّامْ أَخْوَانْكُو وَ سَاعُدُوهُمْ. 15 سَاعُدُوا أَخْوَانْكُو لَحَدِّي اللّٰهْ يَنْطِيهُمْ الرَّاحَةْ مِثِلْكُو وَ هُمَّنْ كُلَ يِشِيلُوا الْأَرْض الْأَنْطَاهَا لَيْهُمْ اللّٰهْ إِلٰـهْكُو. وَ بَعَدْ دَا، تِقَبُّلُوا فِي أَرْض وَرَثَتْكُو، صَبَاحْ لِبَحَرْ الْأُرْدُنْ، الْأَنْطَاهَا لَيْكُو مُوسَى عَبْد اللّٰهْ.»
16 وَ هُمَّنْ رَدَّوْا لِيَشُوعْ وَ قَالَوْا لَيَّهْ: «كُلَّ شَيّءْ الْإِنْتَ أَمَرْتِنَا بَيَّهْ، أَنِحْنَ نِسَوُّوهْ. وَ أَيِّ بَكَانْ التِّرَسِّلْنَا فَوْقَهْ، نَمْشُوا. 17 وَ مِثِلْ سِمِعْنَا كَلَامْ مُوسَى فِي أَيِّ شَيّءْ، نَسْمَعَوْا كَلَامَكْ إِنْتَ كُلَ. وَ خَلِّي اللّٰهْ إِلٰـهَكْ يُكُونْ مَعَاكْ مِثِلْ كَانْ مَعَ مُوسَى. 18 وَ أَيِّ نَادُمْ الْعِصِي أَمْرَكْ وَ مَا يَسْمَعْ كَلَامَكْ التُّقُولَهْ فِي أَيِّ شَيّءْ، نَكْتُلُوهْ. أَيْوَى، أَبْقَى شَدِيدْ وَ فَحَلْ!»
© La Bible en arabe tchadien © Alliance biblique du Tchad, 2019
