مُوسَى رسّل ناس يروغوا البلد
1 وَ اللّٰهْ حَجَّى لِمُوسَى وَ قَالْ: 2 «رَسِّلْ نَاسْ لِيُرُوغُوا لَيْك بَلَدْ كَنْعَانْ الْأَنَا نَنْطِيهَا لِبَنِي إِسْرَائِيلْ. شِيلْ مِنْ أَيِّ قَبِيلَةْ نَادُمْ عَاقِلْ لِيِمَثِّلْ قَبِيلَةْ أَبَّهَاتَهْ وَ رَسِّلْهُمْ.» 3 وَ خَلَاصْ مُوسَى رَسَّلَاهُمْ مِنْ كَدَادَةْ فَارَانْ حَسَبْ كَلَامْ اللّٰهْ. وَ الرُّجَالْ دَوْل كُلُّهُمْ مِنْ كُبَارَاتْ بَنِي إِسْرَائِيلْ. 4 وَ دَوْل أَسَامَيْهُمْ.
مِنْ قَبِيلَةْ رَأُوبِينْ، شَمُّوعْ وِلَيْد زَكُّورْ.5 وَ مِنْ قَبِيلَةْ شِمْعُونْ، شَافَاطْ وِلَيْد حُورِي.6 وَ مِنْ قَبِيلَةْ يَهُوذَا، كَالِبْ وِلَيْد يَفُونَى.7 وَ مِنْ قَبِيلَةْ يَسَّاكَرْ، يِقَالْ وِلَيْد يُوسُفْ.8 وَ مِنْ قَبِيلَةْ أَفْرَايِمْ، هُوشَعْ وِلَيْد نُونْ.9 وَ مِنْ قَبِيلَةْ بَنْيَامِينْ، فَلْطِي وِلَيْد رَافُو.10 وَ مِنْ قَبِيلَةْ زَبُلُونْ، قَدِّيِيلْ وِلَيْد سُودِي.11 وَ مِنْ قَبِيلَةْ يُوسُفْ وَ دَا مِنْ قَبِيلَةْ مَنَسَّى، قَدِّي وِلَيْد سُوسِي.12 وَ مِنْ قَبِيلَةْ دَانْ، عَمِيِيلْ وِلَيْد قَمَالِي.13 وَ مِنْ قَبِيلَةْ أَشِيرْ، سَتُورْ وِلَيْد مِكَايِيلْ.14 وَ مِنْ قَبِيلَةْ نَفْتَالِي، نَحْبِي وِلَيْد وَفْسِي.15 وَ مِنْ قَبِيلَةْ قَادْ، قَوِيلْ وِلَيْد مَاكِي.16 وَ دَوْل أَسَامَيْ النَّاسْ الرَّسَّلَاهُمْ مُوسَى لِيُرُوغُوا بَلَدْ كَنْعَانْ. وَ مُوسَى سَمَّى هُوشَعْ وِلَيْد نُونْ بِأُسُمْ يَشُوعْ.
17 وَ مُوسَى رَسَّلَاهُمْ لِيُرُوغُوا بَلَدْ كَنْعَانْ وَ قَالْ لَيْهُمْ: «أَمُرْقُوا مِنْ هِنِي. عَدُّوا بِصَحَرَاء النَّقَبْ وَ أَمْشُوا قِدَّامْ عَلَيْ الْجِبَالْ. 18 وَ شِيفُوا كِكَّيْف الْبَلَدْ دِي وَ أَكُّدُوا مِنْ نَاسْهَا كَنْ قَوِيِّينْ وَلَّا ضَعِيفِينْ وَ كَنْ كَتِيرِينْ وَلَّا شِيَّةْ. 19 وَ بَتَّانْ أَكُّدُوا عَدِيلْ كَنْ الْبَلَدْ دِي زَيْنَةْ وَلَّا فَسْلَةْ وَ أَكُّدُوا مِنْ بُيُوتْهَا كَنْ خِيَمْ سَاكِتْ وَلَّا مُدُنْ قَوِيِّينْ. 20 وَ شِيفُوا كَنْ أَرْض الْبَلَدْ دِي تِقَوِّمْ مَعَاشْ وَلَّا لَا وَ كَنْ عِنْدَهَا شَدَرْ وَلَّا مَا عِنْدَهَا. وَ مَا تَخَافَوْا، جِيبُوا مَعَاكُو شِيَّةْ مِنْ فَوَاكِهَّا.»
وَ دَا، وَكِتْ أَوَّلْ إِنْتَاجْ الْعِنَبْ. 21 وَ خَلَاصْ مَشَوْا رَاغَوْا كُلَّ الْبَلَدْ مِنْ صَحَرَاء سِينْ لَحَدِّي رَحُوبْ قَرِيبْ لِلَبُو حَمَاتْ. 22 وَ هُمَّنْ مَشَوْا بِصَحَرَاء نَقَبْ لَحَدِّي وَصَّلَوْا حِلَّةْ حِبْرُونْ، بَكَانْ الْعَايْشِينْ فَوْقَهْ خُشُومْ بُيُوتْ أَخِمَانْ وَ شِيشَايْ وَ تَلْمَايْ مِنْ ذُرِّيَّةْ بَنِي عَنَقْ. وَ حِلَّةْ حِبْرُونْ دِي بَنَوْهَا بِسَبْعَةْ سَنَةْ قُبَّالْ حِلَّةْ صُعَانْ الْقَاعِدَةْ فِي مَصِرْ. 23 وَ هُمَّنْ وَصَّلَوْا فِي وَادِي أَشْكُولْ وَ هِنَاكْ قَطَعَوْا فِرِعْ الْعِنْدَهْ عَنْقُودْ هَنَا عِنَبْ وَ دَرَعَوْه فِي عُودْ وَ شَالَوْه أَمْبَيْنَاتْهُمْ فِي كَتَافَيْهُمْ. وَ شَالَوْا رُمَّانْ وَ تِينْ. 24 وَ الْبَكَانْ دَا، سَمَّوْه وَادِي أَشْكُولْ (مَعَنَاتَهْ وَادِي الْعَنْقُودْ) أَشَانْ بَنِي إِسْرَائِيلْ قَطَعَوْا مِنَّهْ عَنْقُودْ الْعِنَبْ.
الروّاغين خبّروا بالبلد
25 وَ هُمَّنْ رَاغَوْا الْبَلَدْ فِي مُدَّةْ 40 يَوْم وَ قَبَّلَوْا. 26 وَ جَوْا لِقَوْا مُوسَى وَ هَارُونْ وَ كُلَّ مُجْتَمَعْ بَنِي إِسْرَائِيلْ فِي قَادِشْ الْقَاعِدَةْ فِي كَدَادَةْ فَارَانْ. وَ كَلَّمَوْا لَيْهُمْ وَ لِكُلَّ بَنِي إِسْرَائِيلْ بِخَبَرْ الْبَلَدْ دِي وَ وَصَّفَوْا لَيْهُمْ الْفَوَاكِهْ الْجَابَوْهُمْ مِنْهَا. 27 وَ هُمَّنْ قَالَوْا لِمُوسَى: «أَنِحْنَ مَشَيْنَا فِي الْبَلَدْ الْإِنْتَ رَسَّلْتِنَا لَيْهَا وَ صَحِيحْ الْبَلَدْ دِي سَمْحَةْ وَ مَلَانَةْ بِاللَّبَنْ وَ الْعَسَلْ وَ دَاهُو فَوَاكِهَّا. 28 وَ لَاكِنْ نَاسْهَا شُدَادْ وَ مُدُنْهُمْ كُبَارْ وَ قَوِيِّينْ وَ شِفْنَا نَاسْ كُبَارْ مِنْ ذُرِّيَّةْ بَنِي عَنَقْ. 29 وَ الْعَمَالِقْ سَاكْنِينْ فِي صَحَرَاء نَقَبْ وَ الْحِتِّيِّينْ وَ الْيَبُوسِيِّينْ وَ الْأَمُورِيِّينْ سَاكْنِينْ فِي بَلَدْ الْجِبَالْ. وَ الْكَنْعَانِيِّينْ سَاكْنِينْ جَنْب الْبَحَرْ الْأَبْيَضْ وَ فِي خَشُمْ بَحَرْ الْأُرْدُنْ.»
30 وَ كَالِبْ سَكَّتْ النَّاسْ الْقَمَّوْا ضِدّ مُوسَى وَ قَالْ: «قُمُّوا نَمْشُوا نِشِيلُوا الْبَلَدْ أَشَانْ أَنِحْنَ نَقْدَرَوْا نِنَّصُرُوا فَوْقهُمْ!» 31 وَ لَاكِنْ الرُّجَالْ الرَّاغَوْا مَعَايَهْ الْبَلَدْ قَالَوْا: «مَا نَقْدَرَوْا نَمْشُوا نَهْجُمُوا النَّاسْ دَوْل أَشَانْ هُمَّنْ قَوِيِّينْ مِنِّنَا.»
32 وَ خَلَاصْ، قَمَّوْا عَيَّرَوْا لِبَنِي إِسْرَائِيلْ الْبَلَدْ الْهُمَّنْ مَشَوْا رَاغَوْهَا وَ شَافَوْهَا. وَ قَالَوْا: «الْبَلَدْ الرُّغْنَاهَا وَ شِفْنَاهَا دِي مَا عَدِيلَةْ. هِي تِكَتِّلْ سِيَادْهَا وَ كُلَّ النَّاسْ اللِّقِينَاهُمْ هِنَاكْ فَوْقهَا كُلَ نَاسْ كُبَارْ. 33 وَ أَنِحْنَ شِفْنَا نَاسْ مِنْ ذُرِّيَّةْ بَنِي عَنَقْ وَ هُمَّنْ نَاسْ طُوَالْ وَ شُدَادْ. وَ جَنْبُهُمْ أَنِحْنَ نِشِيفُوا نُفُوسْنَا مِثِلْ أَنْقُرَّاصَةْ. وَ هُمَّنْ كُلَ يِشِيفُونَا مِثِلْ دَا.»
© La Bible en arabe tchadien © Alliance biblique du Tchad, 2019
