دهب في ماعون هنا طينة
1 وَ خَلَاصْ، اللّٰهْ بَسْ رَحَمْنَا بِالْخِدْمَةْ دِي وَ أَشَانْ دَا، أَبَداً مَا نَكْسَلَوْا مِنْهَا. 2 وَ أَنِحْنَ أَبَيْنَا مَا تَابَعْنَا الْحَالْ التِّجِيبْ الْعَيْب وَ لَا الذُّنُوبْ الْيِسَوُّوهُمْ النَّاسْ بِعَشِيرْ. نَابَوْا مَا نِسَوُّوا شَيّءْ بِنَجَاضَةْ وَ أَبَداً مَا نِبَدُّلُوا كَلَامْ اللّٰهْ. لَا. لَاكِنْ قِدَّامْ اللّٰهْ نِكَلُّمُوا الْحَقّ بِكَلَامْ وَاضِحْ وَ نِخَلُّوا قَلِبْ هَنَا أَيِّ نَادُمْ يَشْهَدْ لِحَالْنَا الْعَدِيلَةْ.
3 وَ كَنْ الْبِشَارَةْ النِّبَلُّغُوهَا مَا تِنْفَهِمْ، هِي مَا تِنْفَهِمْ إِلَّا لِلنَّاسْ الْمُوَدِّرِينْ بَسْ. 4 النَّاسْ الْمَا مُؤمِنِينْ دَوْل قُلُوبْهُمْ عَمْيَانِينْ أَشَانْ إِبْلِيسْ عِنْدَهْ سُلْطَةْ فِي الدُّنْيَا دِي وَ هُو عَمَاهُمْ. هُو يِدَوْر يَدْحَرْهُمْ مَا يِشِيفُوا النُّورْ الْمَجِيدْ هَنَا الْمَسِيحْ النِّبَلُّغُوا بَيَّهْ الْبِشَارَةْ. الْمَسِيحْ هُو صُورَةْ اللّٰهْ.
5 وَ الْكَلَامْ النِّبَلُّغُوهْ مَا بُخُصّ نُفُوسْنَا. لَاكِنْ نِبَلُّغُوا بِعِيسَى الْمَسِيحْ وَ نُقُولُوا هُو بَسْ الرَّبّ. وَ أَنِحْنَ خَدَّامِينْ بَسْ وَ نَخْدُمُوا لَيْكُو فِي شَانَهْ. 6 وَ زَمَانْ اللّٰهْ قَالْ: «خَلِّي النُّورْ يِضَوِّي فِي أُسْط الضَّلَامْ.» وَ هُو بَسْ النَّوَّرْ قُلُوبْنَا أَشَانْ نَعَرْفُوا نُورْ اللّٰهْ الْمَجِيدْ الْقَاعِدْ فِي وِجِهْ عِيسَى الْمَسِيحْ.
7 وَ الْبَرَكَةْ الْعِنْدِنَا دِي مِثِلْ دَهَبْ صَافِي الْقَاعِدْ فِي مَاعُونْ هَنَا طِينَةْ. وَ دَا يِوَصِّفْ كَدَرْ الْقُدْرَةْ الْعَجِيبَةْ النَّخْدُمُوا بَيْهَا، هِي مِنْ اللّٰهْ بَسْ وَ مَا مِنِّنَا أَنِحْنَ. 8 أَنِحْنَ يِضَايُقُونَا فِي أَيِّ بَكَانْ لَاكِنْ مَا يِوَقُّفُونَا. وَ أَنِحْنَ مُتَحَيِّرِينْ لَاكِنْ مَا وَدَّرْنَا الْعَشَمْ. 9 وَ النَّاسْ يِتَعُّبُونَا لَاكِنْ اللّٰهْ مَا يِخَلِّينَا. يَرْمُونَا لَاكِنْ مَا يِدَمُّرُونَا. 10 الْمَسِيحْ تِعِبْ وَ مَاتْ. وَ فِي أَيِّ بَكَانْ، أَنِحْنَ كُلَ نَتْعَبَوْا مِثْلَهْ أَشَانْ حَيَاةْ عِيسَى تِنْشَافْ فِي جِسِمْنَا. 11 أَنِحْنَ حَيِّينْ وَ لَاكِنْ دَايْماً يِسَلُّمُونَا لِلْمَوْت فِي شَانْ خِدْمِتْنَا لِعِيسَى. وَ دَا يَبْقَى لَيْنَا أَشَانْ حَيَاةْ عِيسَى تِنْشَافْ فِي جِسِمْنَا الْيُمُوتْ. 12 وَ خَلَاصْ، أَنِحْنَ نِعِيشُوا فِي أُسْط الْمَوْت أَشَانْ إِنْتُو تَلْقَوْا الْحَيَاةْ الْأَبَدِيَّةْ.
13 مَكْتُوبْ فِي الْكِتَابْ: <أَنَا آمَنْت وَ أَشَانْ دَا كَلَّمْت.> وَ أَنِحْنَ كُلَ عِنْدِنَا إِيمَانْ مِثِلْ الْإِيمَانْ دَا. أَنِحْنَ مُؤمِنِينْ وَ أَشَانْ دَا نِكَلُّمُوا. 14 وَ نَعَرْفُوا كَدَرْ اللّٰهْ الْبَعَثْ رَبِّنَا عِيسَى مِنْ أُسْط الْمَيْتِينْ يَبْعَثْنَا أَنِحْنَ كُلَ مَعَ عِيسَى وَ يِوَدِّينَا مَعَاكُو فِي حَضَرَتَهْ. 15 وَ كُلَّ خِدْمِتْنَا دِي لِفَايْدِتْكُو. وَ نَخْدُمُوا أَشَانْ رَحْمَةْ اللّٰهْ تَلْحَقْ كُلَّ النَّاسْ وَ هُمَّنْ يَشْكُرُوا اللّٰهْ زِيَادَةْ وَ كُلُّهُمْ يِمَجُّدُوهْ.
16 أَشَانْ دَا أَبَداً مَا نَكْسَلَوْا. صَحِيحْ، جِسِمْنَا قَاعِدْ يُمُوتْ وَ لَاكِنْ الْحَيَاةْ الْجَدِيدَةْ قَاعِدَةْ تِزِيدْ فِي قُلُوبْنَا كُلِّ يَوْم. 17 وَ التَّعَبْ الْعِنْدِنَا هَسَّعْ دَا، هُو خَفِيفْ وَ مَا يِطَوِّلْ. لَاكِنْ التَّعَبْ دَا يِجَهِّزْنَا لِلْمَجْد الْعَظِيمْ الْأَبَداً مَا يِكَمِّلْ. 18 وَ مَا نُخُطُّوا بَالْنَا فِي شَيّءْ الْبِنْشَافْ. نُخُطُّوا بَالْنَا فِي شَيّءْ الْمَا بِنْشَافْ. أَشَانْ الْبِنْشَافْ يِكَمِّلْ وَ لَاكِنْ الْمَا بِنْشَافْ يَقْعُدْ إِلَى الْأَبَدْ.
© La Bible en arabe tchadien © Alliance biblique du Tchad, 2019
