بُنى بيت اللّه
1 وَ الْمَلِكْ سُلَيْمَانْ بَدَا بُنَى بَيْت اللّٰهْ بِـ 480 سَنَةْ بَعَدْ مَرِقِينْ بَنِي إِسْرَائِيلْ مِنْ بَلَدْ مَصِرْ. وَ دَا فِي السَّنَةْ الرَّابْعَةْ هَنَا حُكْمَهْ فِي بَنِي إِسْرَائِيلْ وَ فِي الشَّهَرْ الْأُسْمَهْ زِيُو وَ هُو الشَّهَرْ التَّانِي هَنَا السَّنَةْ. 2 وَ الْبَيْت السُّلَيْمَانْ بَنَاهْ لِلّٰهْ دَا طُولَهْ 60 دُرَاعْ وَ عُرْضَهْ 20 دُرَاعْ وَ طُولَهْ فَوْق كَمَانْ 30 دُرَاعْ. 3 وَ قِدَّامْ بَيْت اللّٰهْ، فِيَّهْ غُرْفَةْ هَنَا مَدَخَلْ الْعُرْضَهَا 20 دُرَاعْ مَعَ عُرْض الْبَيْت سَوَا وَ طُولْهَا 10 دُرَاعْ قِدَّامْ الْبَيْت. 4 وَ الْبَيْت دَا رَكَّبَوْا لَيَّهْ شَبَابِيكْ وَ سَدَّوْهُمْ بِحَدِيدْ مَضْفُورْ.
5 وَ بَنَوْا بُيُوتْ بَرَّا فِي طُولْ الدُّرْدُرْ هَنَا الْبَكَانْ الْمُقَدَّسْ وَ الْبَكَانْ الْمُقَدَّسْ مَرَّةْ وَاحِدْ. 6 وَ الْقَصِرْ التِّحْتَانِي عُرْضَهْ 5 دُرَاعْ وَ الْأُسْطَانِي عُرْضَهْ 6 دُرَاعْ وَ التَّالِتْ عُرْضَهْ 7 دُرَاعْ أَشَانْ دُرْدُرْ هَنَا بَيْت اللّٰهْ مَا عِنْدَهْ نَفْس التُّخُنْ فِي كُلَّ طُولَهْ فَوْق. وَ تُخْنَهْ مَا مُتَسَاوِي فِي أَيِّ قَصِرْ. وَ بَيْدَا، الْمَرَادِيسْ الْيِثَبُّتُوا الْبَيْت مَا يَدْخُلُوا فِي الدُّرْدُرْ هَنَا بَيْت اللّٰهْ.
7 وَ الْبُنَى هَنَا بَيْت اللّٰهْ دَا سَوَّوْه بِحُجَارْ مُجَهَّزِينْ الْقَطَعَوْهُمْ قُبَّالْ. وَ بَيْدَا، مَا بِنْسَمِعْ ضَرِبِينْ هَنَا مِطْرَقَةْ وَ لَا فَاسْ وَ لَا آلَةْ آخَرَةْ هَنَا حَدِيدْ فِي لُبّ بَيْت اللّٰهْ وَكِتْ قَاعِدِينْ يَبْنُوهْ.
8 وَ الْبَابْ الْيَدْخُلُوا بَيَّهْ الْقَصِرْ الْأُسْطَانِي قَاعِدْ بِنُصّ الزَّيْنَةْ هَنَا بَيْت اللّٰهْ. وَ يَرْكَبَوْا فِي الْقَصِرْ الْأُسْطَانِي دَا بِعَتَبَةْ وَ مِنْ هِنَاكْ، يَرْكَبَوْا بَتَّانْ فِي الْقَصِرْ الْفَوْقَانِي.
9 وَ بَعَدْ سُلَيْمَانْ كَمَّلْ بُنَى بَيْت اللّٰهْ، خَطَّ لَيَّهْ مَرَادِيسْ هَنَا أَرْز وَ سَدَّ رَاسَهْ بِخَشَبْ. 10 وَ بَنَى الْبُيُوتْ بَرَّا فِي طُولْ الدُّرْدُرْ هَنَا الْبَيْت الْمُقَدَّسْ وَ أَيِّ بَيْت طُولَهْ 5 دُرَاعْ وَ لَمَّاهُمْ مَعَ دُرْدُرْ الْبَيْت الْمُقَدَّسْ بِحَطَبْ الْأَرْز.
11 وَ اللّٰهْ حَجَّى لِسُلَيْمَانْ وَ قَالْ: 12 «دَاهُو إِنْتَ قَاعِدْ تَبْنِي لَيِّ الْبَيْت دَا. وَ كَنْ تَمْشِي حَسَبْ قَوَانِينِي وَ تِتَابِعْ شُرُوطِي وَ تَحْفَضْ وَصِيَّاتِي وَ تِطَبِّقْهُمْ، خَلَاصْ أَنَا نِحَقِّقْ الْكَلَامْ الْقُلْتَهْ فِي شَانَكْ وَ دَا الْكَلَامْ الْقُلْتَهْ لِأَبُوكْ دَاوُدْ. 13 وَ أَنَا نَسْكُنْ فِي لُبّ شَعَبِي بَنِي إِسْرَائِيلْ وَ أَبَداً مَا نِخَلِّيهُمْ.»
جمِّلين لُبّ بيت اللّه
14 وَ بَعَدْ كَمَّلْ بُنَى بَيْت اللّٰهْ، سُلَيْمَانْ 15 سَدَّ كُلَّ دَاخَلْ الْبَيْت مِنْ تِحِتْ لَحَدِّي فَوْق بِخَشَبْ الْأَرْز. وَ تُرَابَهْ كُلَ سَدَّاهْ بِخَشَبْ السَّرْوِي. 16 وَ فِي لُبّ الْبَيْت دَاخَلْ، بَنَى غُرْفَةْ خَاصَّةْ وَ دَا الْبَكَانْ الْمُقَدَّسْ مَرَّةْ وَاحِدْ. طُولَهْ يِسَاوِي 20 دُرَاعْ وَ سَدَّاهْ بِخَشَبْ الْأَرْز مِنْ تِحِتْ لَحَدِّي فَوْق.
17 وَ الْبَكَانْ الْفَضَّلْ مِنْ الْغُرْفَةْ الْكَبِيرَةْ هَنَا بَيْت اللّٰهْ قَاعِدْ قِدَّامْ الْبَكَانْ الْمُقَدَّسْ مَرَّةْ وَاحِدْ وَ طُولَهْ يِسَاوِي 40 دُرَاعْ. 18 وَ خَشَبْ الْأَرْز السَّدَّوْا بَيَّهْ الْبَكَانْ الْمُقَدَّسْ مِنْ دَاخَلْ، نَقَشَوْا فَوْقَهْ صُوَرْ هَنَا بُخَسْ وَ زُهُورْ مُفَتَّحِينْ. وَ سَدَّوْا كُلَّ الْبَكَانْ الْمُقَدَّسْ دَا بِخَشَبْ الْأَرْز. وَ بَيْدَا، حَجَرْ وَاحِدْ كُلَ مَا بِنْشَافْ.
19 وَ دَاخَلْ بَيْت اللّٰهْ، سُلَيْمَانْ بَنَى الْبَكَانْ الْمُقَدَّسْ مَرَّةْ وَاحِدْ دَا لِيُخُطُّوا فَوْقَهْ صَنْدُوقْ مُعَاهَدَةْ اللّٰهْ. 20 وَ الْبَكَانْ الْمُقَدَّسْ مَرَّةْ وَاحِدْ طُولَهْ 20 دُرَاعْ وَ عُرْضَهْ 20 دُرَاعْ وَ طُولَهْ فَوْق كُلَ 20 دُرَاعْ. وَ سُلَيْمَانْ مَسَحْ لُبَّهْ بِدَهَبْ صَافِي. وَ سَوَّى مُخْبَرْ كُلَ مِنْ حَطَبْ الْأَرْز وَ مَسَحَهْ بِدَهَبْ. 21 وَ سُلَيْمَانْ مَسَحْ لُبّ الْبَيْت دَا بِدَهَبْ صَافِي وَ عَلَّقْ سَلَاسِلْ هَنَا دَهَبْ قِدَّامْ الْبَكَانْ الْمُقَدَّسْ مَرَّةْ وَاحِدْ الْمَمْسُوحْ بِدَهَبْ. 22 وَ خَلَاصْ بَيْدَا، هُو مَسَحْ بِدَهَبْ صَافِي كُلَّ الْبَيْت وَ الْمُخْبَرْ الْخَطَّاهْ قِدَّامْ الْبَكَانْ الْمُقَدَّسْ مَرَّةْ وَاحِدْ.
23 وَ فِي لُبّ الْبَكَانْ الْمُقَدَّسْ مَرَّةْ وَاحِدْ، صَنَعْ تَمَاثِيلْ هَنَا مَخْلُوقِينْ سَمَاوِيِّينْ إِتْنَيْن بِحَطَبْ الزَّيْتُونْ. وَ أَيِّ وَاحِدْ طُولَهْ فَوْق 10 دُرَاعْ. 24 وَ أَيِّ مَخْلُوقْ سَمَاوِي عِنْدَهْ جَنَاحَيْ إِتْنَيْن. وَ طُولْ الْجِنْح الْوَاحِدْ 5 دُرَاعْ وَ الْجِنْح الْآخَرْ كُلَ طُولَهْ 5 دُرَاعْ. وَ مِنْ طَرَفْ جِنْحَهْ الْوَاحِدْ لِجِنْحَهْ الْآخَرْ، طُولَهْ 10 دُرَاعْ. 25 وَ طُولْ الْمَخْلُوقِينْ السَّمَاوِيِّينْ الْإِتْنَيْن دَوْل سَوَا سَوَا يَعْنِي 10 دُرَاعْ أَيِّ وَاحِدْ. وَ شَكِلْهُمْ كُلَ وَاحِدْ. 26 وَ أَيِّ وَاحِدْ مِنْ الْمَخْلُوقِينْ السَّمَاوِيِّينْ دَوْل طُولَهْ فَوْق 10 دُرَاعْ. 27 وَ سُلَيْمَانْ خَطَّ الْمَخْلُوقِينْ السَّمَاوِيِّينْ دَوْل دَاخَلْ فِي لُبّ الْبَكَانْ الْمُقَدَّسْ مَرَّةْ وَاحِدْ. وَ الْمَخْلُوقِينْ السَّمَاوِيِّينْ دَوْل مُمَطِّطِينْ جَنَاحَيْهُمْ وَ جِنْح هَنَا الْمَخْلُوقْ السَّمَاوِي الْوَاحِدْ يِلَمِّسْ الدُّرْدُرْ بِهِنِي وَ جِنْح هَنَا الْمَخْلُوقْ السَّمَاوِي الْآخَرْ يِلَمِّسْ الدُّرْدُرْ بِهِنَاكْ. وَ مِثِلْ دَا، جَنَاحَيْهُمْ الْآخَرِينْ كَمَانْ لَامِّينْ سَوَا فِي أُسْط الْبَيْت، جِنْح مَعَ جِنْح. 28 وَ التَّمَاثِيلْ هَنَا الْمَخْلُوقِينْ السَّمَاوِيِّينْ الْإِتْنَيْن دَوْل، مَسَحَاهُمْ بِدَهَبْ.
29 وَ فِي كُلَّ الدَّرَادِرْ الدَّاخَلْ هَنَا الْغُرَفْ الْإِتْنَيْن هَنَا بَيْت اللّٰهْ، نَقَشْ صُوَرْ هَنَا مَخْلُوقِينْ سَمَاوِيِّينْ وَ شَدَرْ نَخَلْ وَ زُهُورْ مُفَتَّحِينْ. 30 وَ هُو مَسَحْ أَرْض الْغُرَفْ الْإِتْنَيْن دَوْل بِدَهَبْ. 31 وَ فِي مَدَخَلْ الْبَكَانْ الْمُقَدَّسْ مَرَّةْ وَاحِدْ، سَوَّى بَابْ أَبْ ضَلْفِتَيْن بِحَطَبْ الزَّيْتُونْ. وَ الْحَطَبْ الْيِرَكُّبُوا فَوْقَهْ الْبَابْ دَا، طُولَهْ يِسَاوِي الْخُمُسْ هَنَا الدُّرْدُرْ. 32 وَ الْبِيبَانْ الْإِتْنَيْن هَنَا الْبَابْ أَبْ ضَلْفِتَيْن دَوْل، سَوَّاهُمْ بِحَطَبْ الزَّيْتُونْ. وَ نَقَشْ فَوْقهُمْ صُوَرْ هَنَا مَخْلُوقِينْ سَمَاوِيِّينْ وَ شَدَرْ نَخَلْ وَ زُهُورْ مُفَتَّحِينْ وَ مَسَحَاهُمْ بِدَهَبْ. الْمَخْلُوقِينْ السَّمَاوِيِّينْ وَ النَّخَلْ كُلُّهُمْ كَيْ مَسَحَاهُمْ بِدَهَبْ.
33 وَ سَوَّى نَفْس الشَّيّءْ لِلْبَابْ هَنَا مَدَخَلْ بَيْت اللّٰهْ. وَ الْحَطَبْ الْيِرَكُّبُوا فَوْقَهْ الْبَابْ دَا سَوَّاهْ بِحَطَبْ الزَّيْتُونْ وَ طُولَهْ يِسَاوِي الرُّبُعْ هَنَا الدُّرْدُرْ. 34 وَ سَوَّى بِيبَانْ إِتْنَيْن بِحَطَبْ السَّرْوِي الْعِنْدُهُمْ رُبَاطْ أَمْبَيْنَاتْهُمْ وَ الْوَاحِدْ يِنْطَبِقْ فِي الْآخَرْ. 35 وَ فِي الْبِيبَانْ دَوْل، نَقَشْ صُوَرْ هَنَا مَخْلُوقِينْ سَمَاوِيِّينْ وَ شَدَرْ نَخَلْ وَ زُهُورْ مُفَتَّحِينْ وَ مَسَحَاهُمْ بِدَهَبْ.
36 وَ الْفَضَايْ الدَّخْلَانِيَّةْ، حَوَّقْهَا بِتَلَاتَةْ رَوْق هَنَا حَجَرْ مَنْقُوشْ. وَ فِي رَاسْ التَّلَاتَةْ رَوْق هَنَا حَجَرْ، خَطَّ رَوْق وَاحِدْ هَنَا حَطَبْ الْأَرْز. 37 وَ أَسَاسْ بَيْت اللّٰهْ، خَطَّوْه فِي السَّنَةْ الرَّابْعَةْ هَنَا حُكُمْ سُلَيْمَانْ فِي الشَّهَرْ الْأُسْمَهْ زِيُو. 38 وَ فِي سَنِةْ 11 هَنَا حُكْمَهْ فِي الشَّهَرْ الْأُسْمَهْ بُولْ يَعْنِي فِي الشَّهَرْ التَّامِنْ، بُنَى هَنَا الْبَيْت دَا كَمَّلْ مَرَّةْ وَاحِدْ حَسَبْ الْوَاجِبْ لَيَّهْ. وَ سُلَيْمَانْ بَنَى الْبَيْت دَا فِي مُدَّةْ سَبْعَةْ سَنَةْ.
© La Bible en arabe tchadien © Alliance biblique du Tchad, 2019
