الحرِب مع الفِلِسْطيّين
1 وَ شَاوُولْ عِنْدَهْ 30 سَنَةْ وَكِتْ بِقِي مَلِكْ فِي بَنِي إِسْرَائِيلْ وَ هُو حَكَمْ 42 سَنَةْ لَحَدِّي مَاتْ.
2 وَ يَوْم وَاحِدْ، شَاوُولْ عَزَلْ 3 000 رَاجِلْ مِنْ بَنِي إِسْرَائِيلْ. وَ 2 000 خَطَّاهُمْ مَعَايَهْ فِي مِكْمَاشْ وَ فِي جَبَلْ بَيْت إِيلْ. وَ 1 000 كَمَانْ خَطَّاهُمْ مَعَ يُونَتَانْ وِلَيْدَهْ فِي حِلَّةْ قِبَيْعَةْ بَنْيَامِينْ. وَ الْفَضَّلَوْا مِنْ الرُّجَالْ، شَاوُولْ قَالْ خَلِّي أَيِّ وَاحِدْ يِقَبِّلْ بَيْتَهْ.
3 وَ يَوْم وَاحِدْ، يُونَتَانْ كَتَلْ قَايِدْ الْفِلِسْطِيِّينْ الْقَاعِدْ فِي قَبَعْ. وَ الْفِلِسْطِيِّينْ كُلَ سِمْعَوْا بِالْخَبَرْ دَا. وَ شَاوُولْ أَمَرْ لِيَضُرْبُوا الْبُوقْ فِي كُلَّ الْبَلَدْ وَ قَالْ: «خَلِّي كُلَّ الْعِبْرَانِيِّينْ يَسْمَعَوْا الْخَبَرْ دَا!» 4 وَ كُلَّ بَنِي إِسْرَائِيلْ سِمْعَوْا كَدَرْ شَاوُولْ كَتَلْ قَايِدْ الْفِلِسْطِيِّينْ وَ هُمَّنْ عِرْفَوْا كَدَرْ الْفِلِسْطِيِّينْ قَاعِدِينْ يَكْرَهَوْهُمْ. وَ خَلَاصْ، كُلَّ رُجَالْ بَنِي إِسْرَائِيلْ وَقَفَوْا مِثِلْ رَاجِلْ وَاحِدْ وَرَاءْ شَاوُولْ فِي حِلَّةْ قِلْقَالْ. 5 وَ الْفِلِسْطِيِّينْ كُلَ لَمَّوْا لِيِحَارُبُوا بَنِي إِسْرَائِيلْ وَ هُمَّنْ عِنْدُهُمْ 30 000 عَرَبَاتْ الْحَرِبْ وَ 6 000 سِيَادْ الْخَيْل وَ رُجَالْ كَتِيرِينْ مِثِلْ رَمْلَةْ هَنَا خَشُمْ الْبَحَرْ. وَ جَوْا وَ دَلَّوْا فِي حِلَّةْ مِكْمَاشْ صَبَاحْ لِحِلَّةْ بَيْت آوَنْ. 6 وَ وَكِتْ رُجَالْ بَنِي إِسْرَائِيلْ شَافَوْا كَدَرْ عَدُوهُمْ جَاءْ لَيْهُمْ قَرِيبْ، هُمَّنْ بَرْجَلَوْا وَ جَرَوْا أَلَّبَّدَوْا فِي الْكَرَاكِيرْ وَ النُّقَارْ وَ الْحُجَارْ وَ الْغَابَةْ وَ الْبِيَارْ. 7 وَ وَاحِدِينْ مِنْ الْعِبْرَانِيِّينْ قَطَعَوْا بَحَرْ الْأُرْدُنْ وَ وَصَّلَوْا بَلَدْ قَادْ وَ قِلْعَادْ. وَ لَاكِنْ شَاوُولْ كَمَانْ قَعَدْ فِي قِلْقَالْ. وَ كُلَّ الرُّجَالْ الْمَعَايَهْ قَاعِدِينْ يَرْجُفُوا مِنْ الْخَوْف.
8 وَ شَاوُولْ قَعَدْ سَبْعَةْ يَوْم حَسَبْ الْوَعَدْ الْأَنْطَاهْ لَيَّهْ صَمُوِيلْ. وَ لَاكِنْ صَمُوِيلْ مَا جَاءْ لَيَّهْ فِي قِلْقَالْ. وَ الرُّجَالْ بَدَوْا يِشَتُّتُوا مِنَّهْ. 9 وَ خَلَاصْ، شَاوُولْ قَالْ: «جِيبُوا لَيِّ بَهَايِمْ لِلضَّحِيَّةْ الْمُحَرَّقَةْ وَ ضَحَايَا السَّلَامَةْ.» وَ هُو قَدَّمْ الضَّحِيَّةْ الْمُحَرَّقَةْ.
10 وَ وَكِتْ شَاوُولْ كَمَّلْ مِنْ قَدِّمِينْ الضَّحِيَّةْ الْمُحَرَّقَةْ، طَوَّالِي شَافْ صَمُوِيلْ وَصَّلْ. وَ هُو مَرَقْ لَاقَاهْ. 11 وَ صَمُوِيلْ قَالْ لَيَّهْ: «شُنُو السَّوَّيْتَهْ دَا؟» وَ شَاوُولْ قَالْ: «وَكِتْ أَنَا شِفْت الرُّجَالْ قَاعِدِينْ يِشَتُّتُوا مِنِّي وَ إِنْتَ ذَاتَكْ مَا جِيتْ فِي الْوَعَدْ وَ الْفِلِسْطِيِّينْ لَمَّوْا فِي مِكْمَاشْ، 12 أَنَا قُلْت أَكُونْ الْفِلِسْطِيِّينْ يَهْجُمُونِي فِي قِلْقَالْ قُبَّالْ مَا نَشْحَدْ اللّٰهْ. وَ خَلَاصْ، أَنَا أَنْجَبَرْت وَ قَدَّمْت الضَّحِيَّةْ الْمُحَرَّقَةْ.»
13 وَ صَمُوِيلْ قَالْ لِشَاوُولْ: «إِنْتَ سَوَّيْت شَيّءْ بَلَا فِكِرْ وَ مَا تَابَعْت وَصِيَّةْ اللّٰهْ إِلٰـهَكْ الْهُو أَمَرَكْ بَيْهَا. وَ كَنْ أَوَّلْ إِنْتَ تَابَعْت وَصِيَّةْ اللّٰهْ، هُو يِثَبِّتْ مُلْكَكْ دَايْماً فِي بَنِي إِسْرَائِيلْ. 14 وَ هَسَّعْ دَا، مُلْكَكْ مَا يِطَوِّلْ. أَشَانْ اللّٰهْ عَزَلْ نَادُمْ آخَرْ الْهُو رَضْيَانْ بَيَّهْ وَ دَرَّجَهْ لِيَحْكِمْ شَعَبَهْ. وَ لَاكِنْ إِنْتَ مَا تَابَعْت وَصِيَّةْ اللّٰهْ الْأَمَرَكْ بَيْهَا.» 15 وَ بَعَدْ دَا، صَمُوِيلْ قَمَّ مِنْ قِلْقَالْ وَ مَشَى لِقِبَيْعَةْ فِي أَرْض بَنْيَامِينْ. وَ شَاوُولْ حَسَبْ الرُّجَالْ الْمَعَايَهْ وَ عَدَدْهُمْ بِقِي حَوَالَيْ 600 رَاجِلْ.
16 وَ شَاوُولْ وَ وِلَيْدَهْ يُونَتَانْ وَ الرُّجَالْ الْمَعَاهُمْ قَعَدَوْا فِي قَبَعْ أَرْض بَنْيَامِينْ. وَ الْفِلِسْطِيِّينْ كَمَانْ خَطَّوْا مُعَسْكَرْهُمْ فِي مِكْمَاشْ. 17 وَ الْمُخَرِّبِينْ مِنْ الْفِلِسْطِيِّينْ مَرَقَوْا مِنْ مُعَسْكَرْهُمْ وَ أَنْقَسَمَوْا عَلَيْ تَلَاتَةْ مَجْمُوعَاتْ. الْمَجْمُوعَةْ الْأَوَّلَانِيَّةْ شَالَتْ دَرِبْ عُفْرَةْ عَلَيْ بَلَدْ شُوعَلْ. 18 وَ الْمَجْمُوعَةْ التَّانِيَةْ مَشَتْ عَلَيْ دَرِبْ بَيْت حُرُونْ. وَ الْمَجْمُوعَةْ التَّالْتَةْ كَمَانْ شَالَتْ دَرِبْ الْمَاشِي لِلْحُدُودْ عَلَيْ وَادِي الْمَرَافْعِينْ فِي الصَّحَرَاء.
19 وَ فِي الْوَكِتْ دَاكْ، مَا فِي حَدَّادِي فِي كُلَّ بَلَدْ إِسْرَائِيلْ أَشَانْ الْفِلِسْطِيِّينْ خَافَوْا وَ قَالَوْا: «أَكُونْ الْعِبْرَانِيِّينْ يَصْنَعَوْا سُيُوفْ وَلَّا حُرَابْ.» 20 وَ أَيِّ نَادُمْ مِنْ بَنِي إِسْرَائِيلْ وَاجِبْ يَمْشِي لِحَدَّادْ الْفِلِسْطِيِّينْ حَتَّى يِطَرُّقُوا لَيَّهْ جَرَّايْتَهْ أَوْ حَفَّارَهْ أَوْ فَاسَهْ أَوْ كَدَنْكَتَهْ. 21 وَ طَرِّقِينْ الْجَرَّايْ أَوْ الْكَدَنْكَةْ تَمَنَهْ إِتْنَيْن تِلِتْ هَنَا حَجَرْ فُضَّةْ. وَ طَرِّقِينْ الْفَاسْ أَوْ عَدِّلِينْ رَاسْ الْكَوْكَابْ تَمَنَهْ تِلِتْ هَنَا حَجَرْ فُضَّةْ. 22 وَ أَشَانْ دَا فِي يَوْم الْحَرِبْ، مَا فِي سَيْف وَلَّا حَرْبَةْ فِي إِيدَيْن كُلَّ الرُّجَالْ الْقَاعِدِينْ مَعَ شَاوُولْ وَ يُونَتَانْ. إِلَّا شَاوُولْ وَ وِلَيْدَهْ يُونَتَانْ بَسْ مُسَلَّحِينْ.
23 وَ الْفِلِسْطِيِّينْ مَرَقَوْا مِنْ الْمُعَسْكَرْ وَ قَعَدَوْا فِي دَرِبْ مِكْمَاشْ.
© La Bible en arabe tchadien © Alliance biblique du Tchad, 2019
