يُونَتَان حبّاه لدَاوُد
1 وَ وَكِتْ دَاوُدْ كَمَّلْ كَلَامَهْ مَعَ شَاوُولْ، يُونَتَانْ قَلْبَهْ عَلَّقْ فَوْق دَاوُدْ وَ هُو حَبَّاهْ مِثِلْ نَفْسَهْ. 2 وَ مِنْ الْيَوْم دَا، شَاوُولْ خَطَّ دَاوُدْ مَعَايَهْ وَ مَا خَلَّاهْ يِقَبِّلْ بَكَانْ أَبُوهْ. 3 وَ يُونَتَانْ سَوَّى عَلَاقَةْ مَعَ دَاوُدْ أَشَانْ هُو حَبَّاهْ مِثِلْ نَفْسَهْ. 4 وَ يُونَتَانْ سَلَّ جَلَّابِيّتَهْ وَ أَنْطَاهَا لِدَاوُدْ. وَ أَنْطَاهْ خُلْقَانَهْ هَنَا الْعَسْكَرْ وَ سَيْفَهْ وَ نُبَّالَهْ وَ حِزَامَهْ كُلَ.
5 وَ فِي أَيِّ مُهِمَّةْ الشَّاوُولْ يِرَسِّلَهْ فَوْقهَا، دَاوُدْ يَنْجَحْ. وَ شَاوُولْ خَطَّاهْ قَايِدْ فِي الرُّجَالْ الْمُحَارِبِينْ. وَ كُلَّ الشَّعَبْ وَ رُجَالْ شَاوُولْ رَادَوْه لِدَاوُدْ.
شَاوُول كِرِهه لدَاوُد
6 وَ بَعَدْ دَاوُدْ كَتَلْ جَالُوتْ الْفِلِسْطِي، هُمَّنْ قَبَّلَوْا مِنْ بَكَانْ الْحَرِبْ وَ الْعَوِينْ الْمِنْ كُلَّ حِلَّالْ بَلَدْ إِسْرَائِيلْ مَرَقَنْ لِيِلَاقَنْ الْمَلِكْ شَاوُولْ بِغِنَيْ وَ لِعِبْ وَ نَقَاقِيرْ وَ جِقِنْدِيَّةْ وَ زَغْرَاطْ. 7 وَ هِنَّ كُلِّهِنْ كَيْ قَاعِدَاتْ يَلْعَبَنْ وَ يِغَنَّنْ وَ يُقُولَنْ: «شَاوُولْ كَتَلْ آلَافْ وَ دَاوُدْ كَتَلْ عَشَرَاتْ الْآلَافْ!»
8 وَ الْغِنَيْ دَا حَرَّقْ قَلِبْ شَاوُولْ وَ هُو زِعِلْ زَعَلْ شَدِيدْ وَ فَكَّرْ وَ قَالْ: «كَنْ هِنَّ يُقُولَنْ دَاوُدْ كَتَلْ عَشَرَاتْ الْآلَافْ وَ أَنَا كَتَلْت آلَافْ بَسْ، فَضَّلْ لَيَّهْ إِلَّا الْمُلُكْ!» 9 وَ مِنْ الْيَوْم دَا، شَاوُولْ كِرِهَهْ لِدَاوُدْ.
10 وَ أَمْبَاكِرْ، رُوحْ فَسْلَةْ مِنْ الْإِلٰـهَاتْ جَاتْ فِي شَاوُولْ. وَ هُو قَاعِدْ يِتْنَبَّأْ فِي بَيْتَهْ وَ دَاوُدْ كَمَانْ قَاعِدْ يُدُقّ فِي جِقِنْدِيّتَهْ مِثِلْ أَوَّلْ. وَ شَاوُولْ عِنْدَهْ حَرْبَةْ فِي إِيدَهْ. 11 وَ طَوَّالِي، زَرَقَهْ لِدَاوُدْ وَ قَالْ فِي نَفْسَهْ: «خَلِّي نِلَصِّقَهْ فِي الدُّرْدُرْ!» لَاكِنْ دَاوُدْ خَنَسْ مِنَّهْ مَرَّتَيْن.
12 وَ شَاوُولْ خَافْ مِنْ دَاوُدْ أَشَانْ اللّٰهْ كَانْ مَعَايَهْ وَ خَلَّاهْ لَيَّهْ هُو. 13 وَ فِي شَانْ دَا، شَاوُولْ بَعَدَهْ مِنَّهْ وَ خَطَّاهْ قَايِدْ فِي أَلِفْ عَسْكَرْ وَ هُو يَمْشِي وَ يَجِي فِي رَاسْهُمْ. 14 وَ دَاوُدْ قَاعِدْ يَنْجَحْ فِي الْحَرِبْ أَشَانْ اللّٰهْ مَعَايَهْ. 15 وَ وَكِتْ شَاوُولْ شَافْ دَاوُدْ قَاعِدْ يَنْجَحْ بِزِيَادَةْ فِي الْحَرِبْ، هُو خَافْ مِنَّهْ بِلْحَيْن. 16 وَ لَاكِنْ كُلَّ بَنِي إِسْرَائِيلْ وَ نَاسْ قَبِيلَةْ يَهُوذَا يِرِيدُوهْ لِدَاوُدْ أَشَانْ هُو بَسْ قَايِدْ الدَّيْش وَ قَاعِدْ يَمْشِي وَ يَجِي فِي رَاسْهُمْ.
دَاوُد أخد بِنيّة شَاوُول
17 وَ يَوْم وَاحِدْ، شَاوُولْ قَالْ لِدَاوُدْ: «دِي هِي بِنَيِّتِي الْكَبِيرَةْ مِيرَبْ، نَنْطِيهَا لَيْك مَرَةْ! وَ لَاكِنْ بِشَرْط تَبْقَى رَاجِلْ فَحَلْ وَ تِحَارِبْ فِي حُرُوبْ اللّٰهْ.» وَ فِي قَلْبَهْ، شَاوُولْ قَالْ: «خَلِّي أَنَا مَا نَكْتُلَهْ لَاكِنْ نَرْمِيهْ فِي إِيدْ الْفِلِسْطِيِّينْ.»
18 وَ دَاوُدْ رَدَّ لَيَّهْ وَ قَالْ: «أَنَا كَيْ يَاتُو؟ وَ خَشُمْ بَيْت أَبُويِ فِي بَنِي إِسْرَائِيلْ كَيْ شُنُو؟ وَ كِكَّيْف نَبْقَى نَسِيبْ الْمَلِكْ؟» 19 وَ فِي وَكِتْ الدَّاوُدْ يِشِيلْ فَوْقَهْ مَرْتَهْ مِيرَبْ بِنَيَّةْ شَاوُولْ، طَوَّالِي أَبُوهَا قَمَّ أَنْطَاهَا لِعَدْرِيِيلْ مِنْ حِلَّةْ مَحُولَى.
20 وَ لَاكِنْ مِكَالْ بِنَيَّةْ شَاوُولْ الصَّغَيْرَةْ حَبَّتَهْ لِدَاوُدْ. وَ وَكِتْ شَاوُولْ سِمْعَهْ، هُو فِرِحْ 21 وَ قَالْ فِي قَلْبَهْ: «خَلِّي نَنْطِيهَا لَيَّهْ أَشَانْ تَبْقَى لَيَّهْ شَرَكْ! وَ الْفِلِسْطِيِّينْ يَكْتُلُوهْ!» وَ شَاوُولْ قَالْ لِدَاوُدْ: «هَسَّعْ دَا، دِي فُرْصَةْ آخَرَةْ الْبَيْهَا إِنْتَ تَبْقَى نَسِيبِي!»
22 وَ شَاوُولْ قَالْ لِخَدَّامِينَهْ: «قُولُوا لِدَاوُدْ بِعَشِيرْ: ‹الْمَلِكْ فَرْحَانْ بَيْك وَ كُلَّ خَدَّامِينَهْ يِحِبُّوكْ. مَا تَابَى! أَبْقَى نَسِيبْ الْمَلِكْ!›» 23 وَ خَدَّامِينْ شَاوُولْ قَالَوْا الْكَلَامْ دَا لِدَاوُدْ وَ دَاوُدْ قَالْ: «إِنْتُو تِشِيفُوا الشَّيّءْ دَا حَيِّينْ، لِنَبْقَى نَسِيبْ الْمَلِكْ؟ أَنَا مِسْكِينْ وَ مَا نِسَاوِي شَيّءْ!»
24 وَ الْخَدَّامِينْ جَابَوْا الرَّدّ هَنَا دَاوُدْ لِلْمَلِكْ. 25 وَ شَاوُولْ قَالْ: «قُولُوا لِدَاوُدْ: ‹الْمَلِكْ مَا بِدَوْر مِنَّكْ مَالْ فِي بِنَيِّتَهْ. لَاكِنْ هُو يِدَوْر مِيَةْ قُلَفْ هَنَا الْفِلِسْطِيِّينْ التَّكْتُلْهُمْ. أَشَانْ شَاوُولْ يِشِيلْ التَّارْ فِي عُدْوَانَهْ.›» وَ بَيْدَا، شَاوُولْ يَحْسِبْ يَرْمِي دَاوُدْ فِي إِيدْ الْفِلِسْطِيِّينْ.
26 وَ خَدَّامِينْ شَاوُولْ حَجَّوْا بِالْكَلَامْ دَا لِدَاوُدْ. وَ هُو قَصَّدْ لِيَبْقَى نَسِيبْ الْمَلِكْ. وَ قُبَّالْ الْوَعَدْ مَا يِتِمّ، 27 دَاوُدْ شَالْ رُجَالَهْ وَ مَشَى كَتَلْ مِيتَيْن رُجَالْ مِنْ الْفِلِسْطِيِّينْ. وَ جَابْ عَدَدْ الْقُلَفْ وَ أَنْطَاهُمْ لِلْمَلِكْ أَشَانْ يَبْقَى نَسِيبَهْ. وَ خَلَاصْ، شَاوُولْ أَنْطَاهْ بِنَيِّتَهْ مِكَالْ.
28 وَ شَاوُولْ عِرِفْ تَمَامْ كَدَرْ اللّٰهْ قَاعِدْ مَعَ دَاوُدْ وَ بِنَيِّتَهْ مِكَالْ كُلَ حَبَّتَهْ. 29 وَ بَيْدَا، شَاوُولْ خَافْ مِنْ دَاوُدْ بِزِيَادَةْ. وَ مِنْ الْيَوْم دَا، هُو شَافَهْ مِثِلْ عَدُوهْ. 30 وَ فِي أَيِّ وَكِتْ كَنْ كُبَارَاتْ الْفِلِسْطِيِّينْ يَهْجُمُوا، دَاوُدْ يِنَّصِرْ فَوْقهُمْ. وَ نَصْرَهْ بِقِي زِيَادَةْ مِنْ نَصُرْ كُلَّ الْقُيَّادْ الْآخَرِينْ هَنَا شَاوُولْ. وَ بَيْدَا، أُسْمَهْ طَلَعْ.
© La Bible en arabe tchadien © Alliance biblique du Tchad, 2019
