أَبِقَايِل نجّت ناس بَيْتها
1 وَ صَمُوِيلْ مَاتْ وَ دَفَنَوْه فِي بَيْتَهْ فِي حِلَّةْ الرَّامَةْ. وَ كُلَّ بَنِي إِسْرَائِيلْ لَمَّوْا وَ بَكَوْا لَيَّهْ. وَ بَعَدْ دَا، دَاوُدْ مَشَى فِي كَدَادَةْ فَارَانْ.
2 وَ فِي حِلَّةْ مَاعَوْن، فِيَّهْ رَاجِلْ وَاحِدْ عِنْدَهْ مَالْ كَتِيرْ وَ مَالَهْ دَا قَاعِدْ فِي حِلَّةْ كَرْمَلْ. هُو عِنْدَهْ 3 000 غَنَمْ ضَوَايِنْ وَ 1 000 عِنْزَيْ. وَ مَشَى فِي حِلَّةْ كَرْمَلْ لِيَقْطَعْ صُوفْ غَنَمَهْ. 3 وَ الرَّاجِلْ دَا أُسْمَهْ نَابَالْ وَ مَرْتَهْ أُسُمْهَا أَبِقَايِلْ. هِي مَرَةْ عَاقْلَةْ وَ سَمْحَةْ بِلْحَيْن وَ لَاكِنْ رَاجِلْهَا إِيدَيْنَهْ قَوِي وَ هَوَانْ. وَ هُو مِنْ خَشُمْ بَيْت كَالِبْ. 4 وَ فِي الْكَدَادَةْ، دَاوُدْ سِمِعْ كَدَرْ نَابَالْ مَشَى يَقْطَعْ صُوفْ غَنَمَهْ. 5 وَ دَاوُدْ رَسَّلْ عَشَرَةْ صُبْيَانْ وَ قَالْ لَيْهُمْ: «أَمْشُوا حِلَّةْ كَرْمَلْ وَ تَلْقَوْا نَابَالْ. وَ وَدُّوا لَيَّهْ سَلَامِي وَ قُولُوا لَيَّهْ: 6 ‹تِعِيشْ دَايْماً! وَ السَّلَامْ عَلَيْك وَ لِأَهَلَكْ وَ لِكُلَّ مَالَكْ! 7 وَ هَسَّعْ دَا، أَنَا سِمِعْت كَدَرْ إِنْتَ جِيتْ مَعَ نَاسَكْ لِتَقْطَعْ صُوفْ غَنَمَكْ. وَ وَكِتْ رُعْيَانَكْ قَعَدَوْا مَعَانَا، أَنِحْنَ مَا سَوَّيْنَا لَيْهُمْ شَيّءْ فَسِلْ. وَ شَيّءْ وَاحِدْ كُلَ مَا وَدَّرْ لَيْهُمْ وَكِتْ هُمَّنْ قَعَدَوْا فِي كَرْمَلْ. 8 أَسْأَلْ نَاسَكْ وَ هُمَّنْ يِأَوْرُوكْ! وَ خَلِّي نَاسِي يَلْقَوْا مِنَّكْ رِضَى أَشَانْ أَنِحْنَ جِينَا فِي يَوْم الْعِيدْ. وَ مِنْ فَضْلَكْ، أَنْطِي الشَّيّءْ التَّقْدَرْ تَنْطِيهْ لِعَبِيدَكْ وَ لِوِلَيْدَكْ دَاوُدْ.›»
9 وَ وَكِتْ صُبْيَانْ دَاوُدْ وَصَّلَوْا بَكَانْ نَابَالْ، حَجَّوْا لَيَّهْ بِكُلَّ الْكَلَامْ الدَّاوُدْ رَسَّلَاهُمْ بَيَّهْ. وَ قَعَدَوْا يَرْجَوْا. 10 وَ نَابَالْ قَالْ لِنَاسْ دَاوُدْ: «دَاوُدْ دَا، هُو يَاتُو؟ وِلَيْد يَسَّى دَا، هُو يَاتُو؟ فِي وَكِتْنَا دَا، فِيَّهْ عَبِيدْ كَتِيرِينْ الْيِعَرُّدُوا مِنْ سِيَادْهُمْ! 11 وَ أَنَا كَمَانْ، كِكَّيْف نِشِيلْ خُبْزِتِي وَ أَلْمِيِّ وَ لَحَمِي الْجَهَّزْتَهْ لِنَاسِي وَ نَنْطِيهْ لِنَاسْ الْمَا نَعَرِفْهُمْ جَايِينْ مِنْ وَيْن كُلَ؟»
12 وَ خَلَاصْ، صُبْيَانْ دَاوُدْ قَمَّوْا قَبَّلَوْا. وَ وَكِتْ وَصَّلَوْا، حَجَّوْا لِدَاوُدْ بِكُلَّ الْكَلَامْ دَا. 13 وَ دَاوُدْ قَالْ لِنَاسَهْ: «خَلِّي أَيِّ وَاحِدْ مِنْكُو يِشِيلْ سَيْفَهْ!» وَ خَلَاصْ، أَيِّ وَاحِدْ شَالْ سَيْفَهْ وَ رَبَطَهْ فِي صُلْبَهْ. وَ دَاوُدْ كُلَ شَالْ هَنَايَهْ وَ مَشَوْا. وَ الْمَشَوْا، عَدَدْهُمْ 400 رَاجِلْ وَ 200 كَمَانْ قَعَدَوْا مَعَ الْخُمَامْ.
14 وَ وَاحِدْ مِنْ خَدَّامِينْ نَابَالْ جَاءْ خَبَّرْ أَبِقَايِلْ مَرِةْ نَابَالْ بِكُلَّ شَيّءْ الْحَصَلْ وَ قَالْ لَيْهَا: «دَاهُو دَاوُدْ رَسَّلْ نَاسَهْ جَوْا مِنْ الْكَدَادَةْ لِيِسَلُّمُوا سِيدْنَا. لَاكِنْ هُو مَا رَحَّبْ بَيْهُمْ. 15 وَ النَّاسْ دَوْل زَيْنِينْ لَيْنَا مَرَّةْ وَاحِدْ وَكِتْ أَنِحْنَ قَعَدْنَا مَعَاهُمْ فِي الْكَدَادَةْ وَ مَا سَوَّوْا لَيْنَا شَيّءْ فَسِلْ. وَ مِنْ مَالْنَا كُلَ، شَيّءْ مَا وَدَّرْ. 16 لَيْل وَ نَهَارْ، هُمَّنْ بِقَوْا لَيْنَا مِثِلْ الزَّرِيبَةْ فِي كُلَّ الْوَكِتْ الْأَنِحْنَ قَعَدْنَا مَعَاهُمْ وَ سَارْحِينْ بِالْغَنَمْ. 17 وَ هَسَّعْ دَا، أَعَرْفِي وَ شِيفِي الشَّيّءْ التَّقْدَرَيْ تِسَوِّيهْ أَشَانْ مَصِيبَةْ كَبِيرَةْ جَايَةْ لِسِيدْنَا وَ أَهَلَهْ. أَشَانْ سَيِّدْنَا مَا نَافِعْ وَ نَادُمْ يَهْدِيهْ كُلَ مَا فِيهْ!»
18 وَ طَوَّالِي، أَبِقَايِلْ شَالَتْ 200 خُبْزَةْ وَ 2 قِرْبَةْ هَنَا خَمَرْ وَ 5 غَنَمْ مُنَجَّضِينْ وَ 15 كَوْرَوْ هَنَا قَمَحْ فَرِيكِي وَ 100 دُكْرُمَةْ هَنَا عِنَبْ يَابِسْ مُعَبَّكْ وَ 200 دُكْرُمَةْ هَنَا تِينْ يَابِسْ مُعَبَّكْ. وَ كُلَّ الْأَشْيَاءْ دَوْل، هِي شَدَّتْهُمْ فِي حَمِيرْ. 19 وَ قَالَتْ لِخَدَّامِينْهَا: «إِنْتُو قَدُّمُوا وَ أَنَا نَمْشِي وَرَاكُو.» وَ لَاكِنْ هِي مَا قَالَتْ شَيّءْ لِرَاجِلْهَا نَابَالْ.
20 وَ هِي رِكْبَتْ فِي حُمَارْهَا وَ مَشَتْ عَلَيْ الْحَجَرْ. وَ دَاوُدْ كُلَ بِنَاسَهْ جَايِينْ بِنُصّ الْحَجَرْ بِهِنَاكْ. وَ جَوْا وَ بِغَفْلَةْ، لَمَّوْا. 21 وَ قُبَّالْ مَا يِلِمُّوا، دَاوُدْ قَالْ: «أَنَا سَوَّيْت خَطَا. النَّادُمْ دَا، أَنَا حَفَضْت كُلَّ مَالَهْ فِي الْكَدَادَةْ أَشَانْ شَيّءْ مَا يِوَدِّرْ لَيَّهْ. وَ الْخَيْر السَّوَّيْتَهْ لَيَّهْ دَا، هُو قَبَّلَهْ لَيِّ بِشَرّ! 22 كَدَرْ لِأَمْبَاكِرْ فَجُرْ، كَنْ أَنَا خَلَّيْت نَادُمْ وَاحِدْ مِنْ رُجَالْ نَابَالْ عَاشْ كُلَ، خَلِّي الرَّبّ يِعَاقِبْنِي عِقَابْ شَدِيدْ!»
23 وَ وَكِتْ أَبِقَايِلْ شَافَتْ دَاوُدْ، دَلَّتْ عَجَلَةْ مِنْ حُمَارْهَا. وَ بَرَكَتْ وَ سَجَدَتْ قِدَّامَهْ، 24 وَ كَرَبَتْ رِجِلَيْنَهْ وَ قَالَتْ: «يَا سَيِّدِي، أَجْعَلْ الْخَطَا دَا مِنِّي أَنَا! وَ دَاهُو أَنَا خَادْمَكْ نِحَجِّي لَيْك وَ أَسْمَعْ كَلَامِي. 25 مِنْ فَضْلَكْ، يَا سَيِّدِي، نَابَالْ هُو سِيدْ شَرّ، مَا تَجْعَلَهْ! الْأُسُمْ بِتَابِعْ سِيدَهْ وَ أُسْمَهْ نَابَالْ مَعَنَاتَهْ مَطْمُوسْ. وَ أَنَا خَادْمَكْ مَا شِفْت النَّاسْ الْإِنْتَ رَسَّلْتُهُمْ، يَا سَيِّدِي. 26 وَ هَسَّعْ، يَا سَيِّدِي، نَحْلِفْ لَيْك بِاللّٰهْ الْحَيّ وَ بِحَيَاتَكْ إِنْتَ كَدَرْ اللّٰهْ دَحَرَكْ مِنْ دَفِّقِينْ الدَّمّ وَ كَفِّينْ التَّارْ. خَلِّي عُدْوَانَكْ وَ كُلَّ النَّاسْ الْيِدَوْرُوا لَيْك الْفَسَالَةْ يَبْقَوْا مِثِلْ نَابَالْ، يَا سَيِّدِي! 27 وَ خَلَاصْ، يَا سَيِّدِي، أَقْبَلْ الْهَدَايَا الْأَنَا خَادْمَكْ جِبْتُهُمْ لَيْك وَ قَسِّمْهُمْ لِلصُّبْيَانْ الْمَعَاكْ. 28 وَ سَامِحْ أَنَا خَادْمَكْ فِي الْخَطَا السَّوَّيْتَهْ، يَا سَيِّدِي. أَكِيدْ اللّٰهْ يِثَبِّتْ ذُرِّيّتَكْ فِي الْمُلُكْ أَشَانْ إِنْتَ قَاعِدْ تِحَارِبْ فِي شَانْ اللّٰهْ. وَ أَبَداً فِي مُدَّةْ حَيَاتَكْ، مَا يَلْقَوْا فَوْقَكْ أَيِّ عَيْب. 29 وَ كَنْ نَادُمْ قَاعِدْ يِطَارِدَكْ وَ يِدَوْر يَكْتُلَكْ، يَا سَيِّدِي، اللّٰهْ إِلٰـهَكْ يِنَجِّيكْ وَ يَحْفَضَكْ مِثِلْ نَادُمْ الْقَاعِدْ يَحْفَضْ مَالَهْ. وَ لَاكِنْ عُدْوَانَكْ، اللّٰهْ يِوَدِّيهُمْ بَعِيدْ مِنَّكْ مِثِلْ حَجَرْ الزَّرَقَوْه بِمِقْلَاعْ. 30 وَ وَكِتْ اللّٰهْ يِتِمّ كُلَّ شَيّءْ الْوَاعَدَكْ بَيَّهْ إِنْتَ سَيِّدِي، هُو يِدَرِّجَكْ مَلِكْ فِي إِسْرَائِيلْ. 31 يَا سَيِّدِي، كَنْ إِنْتَ كَفَّيْت التَّارْ، دَا يَقْعُدْ لَيْك فِي فِكْرَكْ وَ تَنْدَمْ لِلشَّيّءْ السَّوَّيْتَهْ أَشَانْ فِي زَعَلَكْ بَسْ إِنْتَ كَتَلْت نَاسْ. وَ وَكِتْ اللّٰهْ يِسَوِّي لَيْك الْخَيْر، مَا تَنْسَانِي.»
32 وَ دَاوُدْ قَالْ لِأَبِقَايِلْ: «بَارَكْ اللّٰهْ إِلٰـهْ بَنِي إِسْرَائِيلْ الْجَابَاكِ الْيَوْم لِتِلَاقِينِي! 33 اللّٰهْ يِبَارِكْ فَوْقكِ وَ فِي فِكِرْكِ أَشَانْ إِنْتِ دَحَرْتِينِي مَا نَكْتُلْ نَاسْ وَ مَا نِلْكَفَّى التَّارْ. 34 وَ نَحْلِفْ بِاللّٰهْ الْحَيّ إِلٰـهْ بَنِي إِسْرَائِيلْ، هُو بَسْ دَحَرَانِي مَا نِسَوِّي لَيْكِ شَيّءْ فَسِلْ. وَ كَنْ إِنْتِ مَا جِيتِ عَجَلَةْ لَاقَيْتِينِي، أَمْبَاكِرْ فَجُرْ دَا، نَادُمْ وَاحِدْ كُلَ مَا يِفَضِّلْ فِي بَيْت نَابَالْ!»
35 وَ دَاوُدْ قِبِلْ الْهَدَايَا الْأَبِقَايِلْ جَابَتْهُمْ وَ قَالْ لَيْهَا: «أَمْشِي بَيْتكِ بِالسَّلَامَةْ. أَنَا سِمِعْت كَلَامْكِ وَ نِسَوِّي كُلَّ شَيّءْ الطَّلَبْتِيهْ مِنِّي.»
36 وَ أَبِقَايِلْ قَبَّلَتْ بَكَانْ نَابَالْ رَاجِلْهَا وَ لِقَتَهْ سَوَّى عَازُومَةْ كَبِيرَةْ فِي بَيْتَهْ مِثِلْ عَازُومَةْ هَنَا مَلِكْ. وَ هُو سَكْرَانْ مَرَّةْ وَاحِدْ وَ فَرْحَانْ. وَ هِي مَا قَالَتْ لَيَّهْ شَيّءْ لَحَدِّي الْفَجُرْ. 37 وَ بِفَجُرْ، وَكِتْ سَكَرَهْ شَتَّ مِنَّهْ، أَبِقَايِلْ حَجَّتْ لَيَّهْ بِكُلَّ شَيّءْ الْحَصَلْ. وَ وَكِتْ نَابَالْ سِمِعْ الْكَلَامْ دَا، طَقَّاهْ وَجَعْ قَلِبْ وَ جِلْدَهْ مَاتْ. 38 وَ قَعَدْ حَوَالَيْ عَشَرَةْ يَوْم وَ بَعَدْ دَا، اللّٰهْ حَكَمْ لَيَّهْ بِالْمَوْت.
39 وَ وَكِتْ دَاوُدْ سِمِعْ بِمَوْت نَابَالْ، قَالْ: «الْحَمْدُ للّٰهْ. اللّٰهْ دَافَعْ لَيِّ مِنْ مُعْيَارْ نَابَالْ وَ دَحَرَانِي مَا نِسَوِّي شَيّءْ فَسِلْ ضِدَّهْ. وَ هُو قَبَّلْ لَيَّهْ فَسَالْتَهْ فِي رَاسَهْ.» وَ دَاوُدْ رَسَّلْ نَاسْ لِأَبِقَايِلْ وَ دَوَّرْ يَاخُدْهَا. 40 وَ وَكِتْ نَاسْ دَاوُدْ وَصَّلَوْا فِي حِلَّةْ كَرْمَلْ بَكَانْ أَبِقَايِلْ، قَالَوْا لَيْهَا: «دَاوُدْ رَسَّلَانَا لَيْكِ أَشَانْ يِدَوْر يَاخُدْكِ.»
41 وَ طَوَّالِي، أَبِقَايِلْ وَقَعَتْ فِي الْأَرْض وَ بَرَكَتْ قِدَّامْ دَاوُدْ وَ قَالَتْ: «أَنَا خَادْمَهْ جَاهِزَةْ لِنَبْقَى خَادِمْ لِنِجِيبْ أَلْمِي لِنِغَسِّلْ رِجِلَيْن خَدَّامِينْ سَيِّدِي.» 42 وَ أَبِقَايِلْ قَمَّتْ عَجَلَةْ وَ رِكْبَتْ فِي حُمَارْهَا. وَ مَشَنْ مَعَاهَا خَمْسَةْ بَنَاتْ وَ تَابَعَنْ خَدَّامِينْ دَاوُدْ. وَ خَلَاصْ، هِي بِقَتْ مَرِةْ دَاوُدْ. 43 وَ قُبَّالْ دَا كُلَ، دَاوُدْ عِنْدَهْ مَرَةْ أُسُمْهَا أَخِنُوعَمُ. هِي مِنْ حِلَّةْ يَزْرَعِيلْ. وَ بَيْدَا، أَخِنُوعَمُ وَ أَبِقَايِلْ كُلِّهِنْ كَيْ عَوِينَهْ لِدَاوُدْ. 44 وَ كَنْ لِمِكَالْ مَرِةْ دَاوُدْ الْأَوَّلَانِيَّةْ، شَاوُولْ أَبُوهَا شَالَاهَا وَ أَنْطَاهَا لِرَاجِلْ آخَرْ أُسْمَهْ فَلْطِي وِلَيْد لَيِشْ مِنْ حِلَّةْ قَلِّيمْ.
© La Bible en arabe tchadien © Alliance biblique du Tchad, 2019
