دَاوُد في بلد الفِلِسْطيّين
1 وَ دَاوُدْ قَالْ فِي نَفْسَهْ: «يَوْم مِنْ الْأَيَّامْ، شَاوُولْ يَجِي يَكْتُلْنِي. وَ شَيّءْ آخَرْ نِسَوِّيهْ مَا فِيهْ إِلَّا نِعَرِّدْ وَ نَمْشِي بَلَدْ الْفِلِسْطِيِّينْ. وَ بَيْدَا، هُو يِخَلِّي مُطَارَدَتِي فِي كُلَّ بَلَدْ إِسْرَائِيلْ. وَ أَنَا نَنْجَى مِنَّهْ.»
2 وَ دَاوُدْ وَ الرُّجَالْ السُّتُّمِيَةْ الْمَعَايَهْ مَشَوْا لِأَكِيشْ وِلَيْد مَعُوكْ مَلِكْ حِلَّةْ قَاتْ. 3 وَ دَاوُدْ مَشَى سَكَنْ بَكَانْ أَكِيشْ مَلِكْ قَاتْ، هُو وَ النَّاسْ الْمَعَايَهْ، أَيِّ وَاحِدْ بِعَايِلْتَهْ. وَ دَاوُدْ كُلَ شَالْ عَوِينَهْ الْإِتْنَيْن أَخِنُوعَمُ الْمِنْ حِلَّةْ يَزْرَعِيلْ وَ أَبِقَايِلْ الْأَوَّلْ مَرِةْ نَابَالْ الْمِنْ حِلَّةْ كَرْمَلْ. 4 وَ وَكِتْ شَاوُولْ سِمِعْ كَدَرْ دَاوُدْ عَرَّدْ مَشَى حِلَّةْ قَاتْ، هُو خَلَّى مُطَارَدَتَهْ.
5 وَ دَاوُدْ قَالْ لِأَكِيشْ: «كَنْ رِضِيتْ لَيِّ، أَنْطِينِي حِلَّةْ وَاحِدَةْ مِنْ الْحِلَّالْ دَوْل نَقْعُدْ فَوْقهَا. وَ مَالَا أَنَا عَبْدَكْ نَقْعُدْ مَعَاكْ فِي حِلَّةْ الْمَلِكْ؟» 6 وَ خَلَاصْ فِي الْيَوْم دَا، أَكِيشْ أَنْطَاهْ لِدَاوُدْ حِلَّةْ صِقْلَاقْ. وَ أَشَانْ دَا بَسْ، حِلَّةْ صِقْلَاقْ قَاعِدَةْ فِي إِيدَيْن مُلُوكْ يَهُوذَا لَحَدِّي الْيَوْم.
7 وَ دَاوُدْ قَعَدْ فِي بَلَدْ الْفِلِسْطِيِّينْ مُدَّةْ سَنَةْ وَ أَرْبَعَةْ شَهَرْ. 8 وَ دَاوُدْ وَ نَاسَهْ قَاعِدِينْ يَمْشُوا يَهْجُمُوا الْقَشُورِيِّينْ وَ الْقِرْزِيِّينْ وَ الْعَمَالِقْ. وَ دَوْل النَّاسْ السَّاكْنِينْ مِنْ زَمَانْ فِي الْأَرْض مِنْ شُورْ لَحَدِّي بَلَدْ مَصِرْ. 9 وَ دَاوُدْ يِدَمِّرْ الْبَلَدْ وَ يَكْتُلْ كُلَّ الرُّجَالْ وَ الْعَوِينْ وَ يِشِيلْ الْغَنَمْ وَ الْبَقَرْ وَ الْحَمِيرْ وَ الْجُمَالْ وَ الْخُلْقَانْ. وَ يِقَبِّلْ يَجِي لِلْمَلِكْ أَكِيشْ.
10 وَ الْمَلِكْ أَكِيشْ يُقُولْ لَيَّهْ: «الْيَوْم هَجَمْتُوا وَيْن؟» وَ دَاوُدْ يَكْدِبْ وَ يُقُولْ: «هَجَمْنَا بِنُصّ الْوَطِي هَنَا بَلَدْ يَهُوذَا وَ أَرْض الْيَرْحَمِيلِيِّينْ وَ أَرْض الْقِينِيِّينْ.»
11 وَ فِي الْبَكَانَاتْ الْمَشَى هَجَمْهُمْ، دَاوُدْ يَكْتُلْ كُلَّ النَّاسْ. مَا يِخَلِّي وَ لَا مَرَةْ وَ لَا رَاجِلْ أَشَانْ كَنْ يِجِيبُوهُمْ فِي حِلَّةْ قَاتْ، يِحَجُّوا وَ يِأَوْرُوا بِالْبُلْدَانْ الْهُو هَجَمَاهُمْ بِالصَّحِيحْ. وَ دَا الشَّيّءْ الدَّاوُدْ قَاعِدْ يِسَوِّيهْ وَكِتْ هُو قَاعِدْ فِي بَلَدْ الْفِلِسْطِيِّينْ. 12 وَ أَكِيشْ آمَنَهْ لِدَاوُدْ وَ قَالْ فِي نَفْسَهْ: «هَسَّعْ دَا، دَاوُدْ بِقِي مَكْرُوهْ لِأَهَلَهْ بَنِي إِسْرَائِيلْ. أَشَانْ دَا، خَلِّي يَبْقَى لَيِّ خَدَّامْ دَايْماً.»
© La Bible en arabe tchadien © Alliance biblique du Tchad, 2019
