صنْدوق الربّ في بلد الفِلِسْطيّين
1 وَ بَعَدْ شَالَوْا صَنْدُوقْ الرَّبّ، الْفِلِسْطِيِّينْ نَقَلَوْه مِنْ حَجَرْ الْمُسَاعَدَةْ وَ وَدَّوْه مَدِينَةْ أَشْدُودْ. 2 وَ جَابَوْه فِي بَيْت الْعِبَادَةْ هَنَا صَنَمْهُمْ دَقُون وَ خَطَّوْا صَنْدُوقْ الرَّبّ جَنْب الصَّنَمْ دَا. 3 وَ أَمْبَاكِرْ بِفَجُرْ بَدْرِي، سُكَّانْ أَشْدُودْ قَمَّوْا وَ دَاهُو لِقَوْا دَقُون وَاقْعِ بِوِجْهَهْ قِدَّامْ صَنْدُوقْ اللّٰهْ! وَ هُمَّنْ شَالَوْه وَ بَتَّانْ خَطَّوْه فِي بَكَانَهْ. 4 وَ أَمْبَاكِرْ كُلَ بِفَجُرْ بَدْرِي، قَمَّوْا وَ دَاهُو لِقَوْا دَقُون وَاقْعِ بِوِجْهَهْ قِدَّامْ صَنْدُوقْ اللّٰهْ! وَ رَاسَهْ وَ إِيدَيْنَهْ مُقَطَّعِينْ وَ وَاقِعِينْ فِي عَتَبَةْ الْبَيْت. وَ فَضَّلَتْ إِلَّا جِتِّتَهْ بَسْ. 5 وَ فِي شَانْ دَا بَسْ فِي أَشْدُودْ، رُجَالْ الدِّينْ هَنَا دَقُون وَ كُلَّ النَّاسْ الْيَدْخُلُوا فِي بَيْت الْعِبَادَةْ هَنَا دَقُون مَا يُخُطُّوا رِجْلَيْهُمْ فِي الْعَتَبَةْ لَحَدِّي الْيَوْم.
6 وَ اللّٰهْ ضَرَبْ نَاسْ مَدِينَةْ أَشْدُودْ شَدِيدْ وَ بَرْجَلَاهُمْ بِزِيَادَةْ. وَ ضَرَبْ نَاسْ أَشْدُودْ وَ الْحِلَّالْ التَّابْعِينْهَا بِوَبَاءْ هَنَا حُبُونْ. 7 وَ وَكِتْ شَافَوْا الشَّيّءْ الْكَانْ فَوْقهُمْ، سُكَّانْ أَشْدُودْ قَالَوْا: «صَنْدُوقْ إِلٰـهْ بَنِي إِسْرَائِيلْ كَيْ مَا يَقْعُدْ فِي بَلَدْنَا أَشَانْ هُو نَزَّلْ وَبَاءْ شَدِيدْ فَوْقنَا أَنِحْنَ وَ فِي إِلٰـهْنَا دَقُون.» 8 وَ نَادَوْهُمْ لِلْكُبَارَاتْ هَنَا الْفِلِسْطِيِّينْ، لَمَّوْهُمْ كُلُّهُمْ كَيْ وَ قَالَوْا: «هَسَّعْ دَا، نِسَوُّوا شُنُو بِصَنْدُوقْ إِلٰـهْ بَنِي إِسْرَائِيلْ؟» وَ هُمَّنْ رَدَّوْا وَ قَالَوْا: «خَلِّي يِوَدُّوهْ فِي حِلَّةْ قَاتْ.» وَ خَلَاصْ، هُمَّنْ شَالَوْا صَنْدُوقْ إِلٰـهْ بَنِي إِسْرَائِيلْ وَ وَدَّوْه فِي حِلَّةْ قَاتْ.
9 وَ وَكِتْ وَدَّوْه هِنَاكْ، اللّٰهْ ضَرَبْ الْحِلَّةْ دِي ضَرْبَةْ شَدِيدَةْ بِلْحَيْن. وَ كُلَّ سُكَّانْهَا بَرْجَلَوْا مَرَّةْ وَاحِدْ. وَ نَزَّلْ فَوْقهُمْ وَبَاءْ هَنَا حُبُونْ مِنْ دُقَاقْهُمْ لَحَدِّي كُبَارْهُمْ. 10 وَ خَلَاصْ، وَدَّوْا صَنْدُوقْ الرَّبّ لِمَدِينَةْ عَقْرُونْ.
وَ وَكِتْ دَخَّلَوْه فِي عَقْرُونْ، كُلَّ السُّكَّانْ صَرَخَوْا وَ قَالَوْا: «دَاهُو جَابَوْا لَيْنَا صَنْدُوقْ إِلٰـهْ بَنِي إِسْرَائِيلْ أَشَانْ يِكَتُّلُونَا كُلِّنَا كَيْ، أَنِحْنَ وَ شَعَبْنَا!» 11 وَ هُمَّنْ رَسَّلَوْا لِكُبَارَاتْ الْفِلِسْطِيِّينْ وَ لَمَّوْهُمْ وَ قَالَوْا لَيْهُمْ: «قَبُّلُوا صَنْدُوقْ إِلٰـهْ بَنِي إِسْرَائِيلْ فِي بَكَانَهْ أَشَانْ مَا يَكْتُلْنَا أَنِحْنَ وَ كُلَّ شَعَبْنَا.» أَشَانْ فِي كُلَّ الْمَدِينَةْ دِي، بَرْجَالْ شَدِيدْ مِنْ الْمَوْت نَزَلْ فَوْقهُمْ أَشَانْ اللّٰهْ ضَرَبَاهُمْ بِرُعُبْ شَدِيدْ. 12 وَ كُلَّ النَّاسْ الْمَا مَاتَوْا، مَرَضْ الْحُبُونْ كَرَبَاهُمْ وَ بَكِي نَاسْ الْمَدِينَةْ لِحِقْ لَحَدِّي السَّمَاءْ.
© La Bible en arabe tchadien © Alliance biblique du Tchad, 2019
