بني إسرائيل طلبوا ملك
1 وَ وَكِتْ صَمُوِيلْ بِقِي شَايِبْ خَلَاصْ، دَرَّجْ أَوْلَادَهْ حُكَّامْ فِي إِسْرَائِيلْ. 2 وَ وِلَيْدَهْ الْبِكِرْ أُسْمَهْ يُوِيلْ وَ التَّانِي أَبِيَّا. وَ هُمَّنْ قَاعِدِينْ يَحْكُمُوا مِنْ حِلَّةْ بِيرْ سَبْعَةْ. 3 لَاكِنْ الْأَوْلَادْ دَوْل مَا تَابَعَوْا دَرِبْ أَبُوهُمْ. دَوَّرَوْا مَصْلَحَةْ نَفِسْهُمْ وَ يَقْبَلَوْا الرَّشْوَةْ وَ يِدَنْقُسُوا الشَّرِيعَةْ.
4 وَ كُلَّ شُيُوخْ بَنِي إِسْرَائِيلْ لَمَّوْا وَ مَشَوْا لِصَمُوِيلْ فِي حِلَّةْ الرَّامَةْ. 5 وَ قَالَوْا لَيَّهْ: «دَاهُو إِنْتَ بِقِيتْ شَايِبْ وَ أَوْلَادَكْ مَا قَاعِدِينْ يِتَابُعُوا دَرْبَكْ. هَسَّعْ دَا، دَرِّجْ لَيْنَا مَلِكْ يَحْكِمْنَا، مِثِلْ الْأُمَمْ الْآخَرِينْ.» 6 وَ صَمُوِيلْ زِعِلْ فِي الْكَلَامْ الْبُقُولْ: «دَرِّجْ لَيْنَا مَلِكْ يَحْكِمْنَا.» وَ قَمَّ سَأَلْ اللّٰهْ. 7 وَ اللّٰهْ قَالْ لَيَّهْ: «أَسْمَعْ كَلَامْ الشَّعَبْ فِي كُلَّ شَيّءْ الْبُقُولُوهْ لَيْك. هُمَّنْ مَا رَفَضَوْك إِنْتَ لَاكِنْ رَفَضَوْنِي أَنَا. وَ مَا يِدَوْرُوا نَحْكِمْهُمْ. 8 أَعَرِفْ! مِنْ يَوْم الْأَنَا مَرَقْتُهُمْ مِنْ بَلَدْ مَصِرْ لَحَدِّي هَسَّعْ، هُمَّنْ خَلَّوْنِي وَ عَبَدَوْا إِلٰـهَاتْ آخَرِينْ. وَ الشَّيّءْ الدَّايْماً سَوَّوْه لَيِّ أَنَا دَا، هَسَّعْ قَاعِدِينْ يِسَوُّوهْ لَيْك إِنْتَ كُلَ! 9 وَ هَسَّعْ دَا خَلَاصْ، أَقْبَلْ طَلَبْهُمْ. لَاكِنْ حَذِّرْهُمْ وَ عَرِّفْهُمْ حُقُوقْ الْمَلِكْ الْيَحْكِمْهُمْ.»
حُقوق الملك
10 وَ صَمُوِيلْ حَجَّى لِبَنِي إِسْرَائِيلْ الطَّلَبَوْا مِنَّهْ مَلِكْ بِكُلَّ الْكَلَامْ الْقَالَهْ لَيَّهْ اللّٰهْ. 11 وَ قَالْ لَيْهُمْ: «دَاهُو حُقُوقْ الْمَلِكْ الْيَحْكِمْكُو. هُو يِشِيلْ أَوْلَادْكُو لِيُسُوقُوا لَيَّهْ عَرَبَاتَهْ هَنَا الْحَرِبْ وَ يَرْكَبَوْا فِي خَيْلَهْ وَ يَجْرُوا قِدَّامْ عَرَبَتَهْ. 12 وَ يِشِيلْ وَاحِدِينْ مِنْهُمْ وَ يِسَوِّيهُمْ قُيَّادْ فِي آلَافْ وَ قُيَّادْ فِي خَمْسِينَاتْ. وَ يَحَرْتُوا زَرْعَهْ وَ يَقْطَعَوْا إِنْتَاجَهْ وَ يَصْنَعَوْا لَيَّهْ سِلَاحْ هَنَا الْحَرِبْ وَ آلَاتْ عَرَبَاتَهْ هَنَا الْحَرِبْ.
13 «وَ يِشِيلْ بَنَاتْكُو أَشَانْ يِسَوَّنْ لَيَّهْ رِيحَةْ فِي بَيْتَهْ وَ يِسَوَّنْ لَيَّهْ أَكِلْ وَ يِدِسَّنْ لَيَّهْ خُبْزَةْ فِي الْفُرُنْ. 14 وَ يِشِيلْ الْعَدِيلْ مِنْ زِرَاعِتْكُو وَ جِنَيْنَاتْكُو هَنَا الْعِنَبْ وَ الزَّيْتُونْ وَ يَنْطِيهُمْ لِخَدَّامِينَهْ. 15 وَ يِشِيلْ الْعُشُرْ مِنْ إِنْتَاجْ زِرَاعِتْكُو وَ عِنَبْكُو وَ يَنْطِيهُمْ لِخَدَّامِينَهْ وَ كُبَارَاتَهْ. 16 وَ يِشِيلْ خَدَّامِينْكُو وَ خَدَّامَاتْكُو وَ صُبْيَانْكُو وَ حَمِيرْكُو الْعِنْدُهُمْ قُدْرَةْ لِيَخْدُمُوا لَيَّهْ. 17 وَ يِشِيلْ الْعُشُرْ مِنْ غَنَمْكُو. وَ فِي الأَخِيرْ، إِنْتُو ذَاتْكُو تَبْقَوْا لَيَّهْ عَبِيدْ! 18 وَ فِي الْوَكِتْ دَا، إِنْتُو تَبْكُوا لِلّٰهْ أَشَانْ الْمَلِكْ الْإِنْتُو عَزَلْتُوهْ. وَ لَاكِنْ فِي الْيَوْم دَا، اللّٰهْ مَا يَسْمَعْكُو أَبَداً.»
19 وَ بَيْدَا كُلَ، الشَّعَبْ أَبَوْا مَا سِمْعَوْا كَلَامْ صَمُوِيلْ وَ قَالَوْا: «لَا! مَا لَمَّانَا! دَرِّجْ لَيْنَا مَلِكْ بَسْ 20 أَشَانْ أَنِحْنَ كُلَ نَبْقَوْا مِثِلْ الْأُمَمْ الْآخَرِينْ. مَلِكْنَا يَحْكِمْ فَوْقنَا وَ يَمْشِي قِدَّامْ عَسْكَرْنَا وَ يِحَارِبْ مَعَانَا.»
21 وَ صَمُوِيلْ سِمِعْ كُلَّ كَلَامْهُمْ وَ كَلَّمَهْ لِلّٰهْ. 22 وَ اللّٰهْ قَالْ لَيَّهْ: «كَنْ كَيْ دَا، أَسْمَعْ كَلَامْهُمْ وَ دَرِّجْ لَيْهُمْ مَلِكْ.» وَ خَلَاصْ، صَمُوِيلْ قَالْ لِبَنِي إِسْرَائِيلْ: «خَلِّي أَيِّ وَاحِدْ يِقَبِّلْ حِلِّتَهْ.»
© La Bible en arabe tchadien © Alliance biblique du Tchad, 2019
