خِدْمة الرسول في تَسَلونِيكِي
1 يَا أَخْوَانِي، إِنْتُو ذَاتْكُو تَعَرْفُوا كَدَرْ إِنْتُو فَضَّلْتُونَا وَ دَا مَا سَاكِتْ. 2 تَعَرْفُوا كَدَرْ جِينَا لَيْكُو مِنْ حِلَّةْ فِلِبِّي التَّعَّبَوْنَا وَ عَيَّرَوْنَا فَوْقهَا بِلْحَيْن. لَاكِنْ اللّٰهْ أَنْطَانَا شَجَاعَةْ وَ قَمَّيْنَا نِبَلُّغُوا لَيْكُو بِشَارَةْ اللّٰهْ، حَتَّى كَانْ النَّاسْ خَالَفَوْنَا بِشِدَّةْ كُلَ. 3 وَ دَا يِوَصِّفْ كَدَرْ نِنَادُوا النَّاسْ فِي الدَّرِبْ الْعَدِيلْ. وَ دَا مَا بِكِدِبْ وَ لَا بِنِيَّةْ فَسْلَةْ وَ لَا بِنَجَاضَةْ.
4 بِالْعَكْس، اللّٰهْ شَافْ قُلُوبْنَا وَ كَلَّفَانَا بِالْبِشَارَةْ وَ أَشَانْ دَا بَسْ، نِبَشُّرُوا النَّاسْ. وَ نِبَشُّرُوهُمْ دَا، مَا أَشَانْ نِدَوْرُوا رِضَى مِنْهُمْ لَاكِنْ أَشَانْ نِدَوْرُوا رِضَى مِنْ اللّٰهْ الْيَكْشِفْ قُلُوبْنَا. 5 أَبَداً مَا حَجَّيْنَا كَلَامْ هَنَا غَشّ. وَ أَبَداً مَا عِنْدِنَا طَمَعْ أَشَانْ نَاكُلُوا مَالْ هَنَا أَيِّ نَادُمْ. اللّٰهْ شَاهِدْ لِكَلَامْنَا. 6 وَ كُلَّ شَيّءْ السَّوَّيْنَاهْ مَا أَشَانْ نِدَوْرُوا شُكُرْ مِنْ النَّاسْ وَ لَا مِنْكُو وَ لَا مِنْ النَّاسْ الْآخَرِينْ. 7 أَنِحْنَ رُسُلْ الْمَسِيحْ وَ عِنْدِنَا حَقّ لِنَطُلْبُوا مِنْكُو شَيّءْ كَتِيرْ، لَاكِنْ أَنِحْنَ مَا شِلْنَا مِنْكُو شَيّءْ.
وَكِتْ أَنِحْنَ قَاعِدِينْ فِي أُسُطْكُو، حَنَّيْنَا فَوْقكُو مِثِلْ الْأَمّ التِّحِنّ فِي عِيَالْهَا. 8 أَنِحْنَ قَاعِدِينْ نِحِنُّوا فَوْقكُو وَ أَشَانْ دَا، دَوَّرْنَا نَنْطُوكُو بِشَارَةْ اللّٰهْ. وَ زِيَادَةْ مِنْ دَا، دَوَّرْنَا نَنْطُوكُو نُفُوسْنَا أَشَانْ نِحِبُّوكُو بِلْحَيْن.
9 يَا أَخْوَانِي، فَكُّرُوا فِي تَعَبْنَا وَ عَمَلْنَا. لَيْل وَ نَهَارْ خَدَمْنَا بِدُرَاعْنَا. مَا دَوَّرْنَا نِكَلُّفُوا نَادُمْ مِنْكُو بَيْنَا وَكِتْ أَنِحْنَ قَاعِدِينْ نِبَلُّغُوا لَيْكُو بِشَارَةْ اللّٰهْ. 10 إِنْتُو ذَاتْكُو تَقْدَرَوْا تَشْهَدَوْا لَيْنَا وَ اللّٰهْ كُلَ شَاهِدْ كَدَرْ حَالْنَا مَعَاكُو إِنْتُو الْمُؤمِنِينْ، هِي صَالْحَةْ وَ عَدِيلَةْ وَ مَا عِنْدَهَا عَيْب. 11 وَ تَعَرْفُوا كَدَرْ أَنِحْنَ بِقِينَا مَعَ أَيِّ نَادُمْ مِنْكُو مِثِلْ الْأَبُو مَعَ عِيَالَهْ. 12 وَ أَنِحْنَ دَايْماً شَجَّعْنَاكُو وَ صَبَّرْنَاكُو وَ وَصَّيْنَاكُو بِشِدَّةْ أَشَانْ تِعِيشُوا بِالْحَالْ الْوَاجْبَةْ لِلنَّاسْ الْاللّٰهْ نَادَاهُمْ لِيَدْخُلُوا فِي مَمْلَكَتَهْ وَ مَجْدَهْ.
13 وَ فِي شَانْ دَا، نَشْكُرُوا اللّٰهْ دَايْماً أَشَانْ وَكِتْ سِمِعْتُوا مِنِّنَا كَلَامْ اللّٰهْ، إِنْتُو كَرَبْتُوهْ قَوِي. قِبِلْتُوهْ مَا مِثِلْ كَلَامْ إِنْسَانِي بَسْ لَاكِنْ قِبِلْتُوهْ مِثِلْ كَلَامْ اللّٰهْ. وَ بِالصَّحِيحْ، هُو كَلَامْ اللّٰهْ وَ قَاعِدْ يِسَوِّي خِدِمْتَهْ فِي قُلُوبْكُو إِنْتُو الْمُؤمِنِينْ.
14 يَا أَخْوَانِي، مِثِلْ دَا، إِنْتُو تَابَعْتُوا نَفْس الدَّرِبْ مِثِلْ نَاسْ اللّٰهْ أُمَّةْ الْمَسِيحْ أَخْوَانْكُو الْيِتَابُعُوا الْمَسِيحْ عِيسَى فِي دَارْ الْيَهُودِيَّةْ. وَ إِنْتُو بِقِيتُوا مِثِلْهُمْ. نَاسْ بَلَدْكُو تَعَّبَوْكُو مِثِلْ الْيَهُودْ كُلَ تَعَّبَوْا أَخْوَانْهُمْ نَاسْ الْمَسِيحْ الْفِي بَلَدْهُمْ. 15 الْيَهُودْ دَوْل، هُمَّنْ بَسْ الْكَتَلَوْا الرَّبّ عِيسَى وَ الْأَنْبِيَاء الْقُبَّالَهْ. وَ لَيْنَا أَنِحْنَ كُلَ، تَعَّبَوْنَا بِلْحَيْن. هُمَّنْ يِغَضُّبُوا اللّٰهْ وَ خَلَاصْ بِقَوْا عَدُو لِكُلَّ النَّاسْ. 16 هُمَّنْ يَدْحَرَوْنَا مَا نِبَلُّغُوا الْبِشَارَةْ التِّنَجِّي النَّاسْ، لِلنَّاسْ الْمَا يَهُودْ. وَ مِثِلْ دَا، يِتَمُّمُوا عَدَدْ ذُنُوبْهُمْ مَرَّةْ وَاحِدْ وَ غَضَبْ اللّٰهْ نَزَلْ فَوْقهُمْ خَلَاصْ.
الرسول مُشْتاق ليهم
17 يَا أَخْوَانِي، أَنِحْنَ أَنْفَرَقْنَا مِنْكُو لِوَكِتْ شِيَّةْ. وَ كَنْ أَنِحْنَ مَشَيْنَا بَعِيدْ مِنْكُو كُلَ، قُلُوبْنَا قَاعِدِينْ مَعَاكُو. وَ أَنِحْنَ مُشْتَاقِينْ لَيْكُو بِزِيَادَةْ وَ دَوَّرْنَا نِشِيفُوكُو بَتَّانْ. 18 دَوَّرْنَا نِقَبُّلُوا لَيْكُو، خَاصَّةً أَنَا بُولُسْ. حَاوَلْنَا نَمْشُوا لَيْكُو عِدَّةْ مَرَّاتْ لَاكِنْ إِبْلِيسْ سَدَّ لَيْنَا الدَّرِبْ. 19 أَيْوَى، نِدَوْرُوا نِشِيفُوكُو بَتَّانْ أَشَانْ إِنْتُو بَسْ عَشَمْنَا وَ فَرَحْنَا. وَ فِي يَوْم جَيَّةْ رَبِّنَا عِيسَى، شُنُو الدَّلِيلْ الْيِوَصِّفْ خِدْمِتْنَا مَا فَشَلَتْ؟ الدَّلِيلْ هُو إِنْتُو وَ إِيمَانْكُو. 20 أَيْوَى بِسَبَبْكُو إِنْتُو بَسْ، نَرْفَعَوْا رُوسَيْنَا فَوْق وَ نَفْرَحَوْا بِلْحَيْن.
© La Bible en arabe tchadien © Alliance biblique du Tchad, 2019
