1 جَوَابْ مِنِّي أَنَا بُولُسْ رَسُولْ عِيسَى الْمَسِيحْ بِأَمُرْ مِنْ اللّٰهْ مُنَجِّينَا وَ الْمَسِيحْ عِيسَى الْعَشَمْنَا قَاعِدْ فَوْقَهْ. 2 وَ نَكْتِبْ لَيْك إِنْتَ، يَا تِمُوتَاوُسْ، الْبِقِيتْ وِلَيْدِي الصَّحِيحْ بِالْإِيمَانْ. عَلَيْكُمْ السَّلَامْ وَ النِّعْمَةْ وَ الرَّحْمَةْ مِنْ اللّٰهْ أَبُونَا وَ عِيسَى الْمَسِيحْ رَبِّنَا.
مُشْكِلة التعْليم الما صحيح
3 نُقُولْ لَيْك نَفْس الْكَلَامْ الْقُلْتَهْ لَيْك وَكِتْ خَلَّيْتَكْ وَ سَافَرْت لِبَلَدْ مَقِدُونِيَةْ. وَاجِبْ تَقْعُدْ فِي حِلَّةْ أَفَسُسْ أَشَانْ تِوَصِّيهُمْ لِلنَّاسْ الْقَاعِدِينْ يِشَتُّتُوا التَّعْلِيمْ الْمَا صَحِيحْ. آمُرْهُمْ أَشَانْ يِخَلُّوا مِنْهُمْ الْكَلَامْ دَا. 4 قُولْ لَيْهُمْ مَا وَاجِبْ يُخُطُّوا بَالْهُمْ بَتَّانْ فِي قِصَصْ بَاطْلِينْ وَ لَا فِي الْقَرَمْ الطُّوَالْ بِلْحَيْن دَوْل. الْكَلَامْ الْمِثِلْ دَا يِسَبِّبْ الْمُنَاقَشَاتْ الْمَا عِنْدُهُمْ فَايْدَةْ وَ مَا يِوَافِقْ مَعَ الشَّيّءْ الْاللّٰهْ يِدَوْر يِسَوِّيهْ فِي النَّاسْ. دَرِبْ اللّٰهْ هُو بِالْإِيمَانْ.
5 وَ أَنْطَيْتَكْ الْوَصِيَّةْ دِي أَشَانْ نِدَوْر هُمَّنْ يِعِيشُوا بِالْمَحَبَّةْ الْجَايَةْ مِنْ قَلِبْ طَاهِرْ وَ ضَمِيرْ صَافِي وَ إِيمَانْ مُخْلِصْ. 6 نَاسْ وَاحِدِينْ خَلَّوْا مِنْهُمْ الْأَشْيَاءْ الْعَدِيلِينْ دَوْل وَ دَخَلَوْا فِي مُنَاقَشَاتْ هَنَا كَلامْ بَاطِلْ. 7 يِدَوْرُوا يِسَوُّوا نُفُوسْهُمْ مُعَلِّمِينْ فِي التَّوْرَاةْ. لَاكِنْ مَا فِهْمَوْا الشَّيّءْ الْقَاعِدِينْ يِحَجُّوا بَيَّهْ وَ لَا الْكَلَامْ الْمُنْكَرِبِينْ فَوْقَهْ.
شُروط التَوْراة عديلين
8 وَ أَنِحْنَ نَعَرْفُوا شُرُوطْ التَّوْرَاةْ هُمَّنْ عَدِيلِينْ كَنْ نِعَلُّمُوهُمْ بِطَرِيقَةْ صَحِيحَةْ. 9 وَاجِبْ نَفْهَمَوْا كَدَرْ اللّٰهْ أَنْطَى شُرُوطْ التَّوْرَاةْ مَا لِلصَّالِحِينْ بَسْ لَاكِنْ أَنْطَاهُمْ لِلْمُجْرِمِينْ وَ الْعَاصِيِينْ وَ الْكُفَّارْ وَ الْمُذْنِبِينْ وَ النَّاسْ النِّجْسِينْ وَ الْبَكْرَهَوْا الدِّينْ وَ النَّاسْ الْيَكْتُلُوا أَبَّهَاتْهُمْ وَ الْيَكْتُلُوا أَمَّهَاتْهُمْ وَ كُلَّ كَتَّالِينْ الدِّمَمْ. 10 وَ شُرُوطْ التَّوْرَاةْ، اللّٰهْ أَنْطَاهُمْ لِلزَّنَّايِينْ وَ الشَّمَارِيخْ وَ تُجَّارْ الْعَبِيدْ وَ الْكَدَّابِينْ وَ الْيَحَلْفُوا بِالْبَاطِلْ وَ لِكُلَّ النَّاسْ الْيِسَوُّوا أَيِّ شَيّءْ آخَرْ الْيِخَالِفْ التَّعْلِيمْ الْعَدِيلْ. 11 وَ التَّعْلِيمْ هُو عَدِيلْ كَنْ يِوَافِقْ مَعَ الْبِشَارَةْ الْاللّٰهْ كَلَّفَانِي بَيْهَا أَشَانْ نِبَلِّغْهَا. وَ هِي الْبِشَارَةْ الْمَجِيدَةْ الْمِنْ اللّٰهْ الْوَاجِبْ لَيَّهْ الشُّكُرْ.
شُكُر بُولُس لنِعْمة اللّه
12 وَ أَنَا نَشْكُرْ كَتِيرْ رَبِّنَا عِيسَى الْمَسِيحْ الْأَنْطَانِي الْقُدْرَةْ الْبَيْهَا نِسَوِّي الْخِدْمَةْ دِي. نَشْكُرَهْ أَشَانْ هُو جَعَلَانِي نَادُمْ أَمِينْ وَ عَزَلَانِي أَشَانْ نَخْدِمْ لَيَّهْ. 13 وَ دَا عَجِيبْ، أَشَانْ أَوَّلْ أَنَا كَافِرْ بَيَّهْ وَ قَاعِدْ نِتَعِّبْ نَاسَهْ وَ أَنَا قَدُّومِي مُرّ مَرَّةْ وَاحِدْ. لَاكِنْ الرَّبّ رَحَمَانِي أَشَانْ سَوَّيْت الذُّنُوبْ دَوْل وَكِتْ لِسَّاعْنِي مَا عِرِفْت الْحَقّ وَ مَا عِنْدِي إِيمَانْ. 14 وَ رَبِّنَا أَنْطَانِي نِعْمَةْ كَبِيرَةْ بِلْحَيْن وَ أَنْطَانِي الْإِيمَانْ وَ الْمَحَبَّةْ الْقَاعِدِينْ فِي الْمَسِيحْ عِيسَى.
15 نُقُولُوا الْمَسِيحْ عِيسَى جَاءْ فِي الدُّنْيَا أَشَانْ يِنَجِّي الْمُذْنِبِينْ وَ الْكَلَامْ دَا حَقّ وَ وَاجِبْ لِكُلَّ النَّاسْ يِصَدُّقُوا بَيَّهْ. وَ أَنَا أَذْنَبْت فَوْقَهْ زِيَادَةْ مِنْ كُلَّ النَّاسْ. 16 وَ لَاكِنْ دَاهُو السَّبَبْ الْبَيَّهْ رَبِّنَا رَحَمَانِي. أَنَا أَكْبَرْ مُذْنِبْ وَ لَاكِنْ الْمَسِيحْ عِيسَى وَصَّفْ بَيِّ صَبْرَهْ الْعَظِيمْ وَ سَوَّانِي مَثَلْ وَاضِحْ لِكُلَّ النَّاسْ الْيِآمُنُوا بَيَّهْ وَ يَلْقَوْا الْحَيَاةْ الْأَبَدِيَّةْ. 17 وَ الْحَمْد وَ الْمَجْد لِلّٰهْ دَايْماً وَ إِلَى الْأَبَدْ. هُو بَسْ الْمَلِكْ الدَّايِمْ الْأَبَداً مَا يُمُوتْ وَ لَا يِنْشَافْ، اللّٰهْ الْوَاحِدْ. آمِينْ.
أكْرُب الإيمان قوي
18 يَا وِلَيْدِي تِمُوتَاوُسْ، الْوَصِيَّةْ الْأَنْطَيْتهَا لَيْك تِوَافِقْ مَعَ الْكَلَامْ الْأَتْنَبَّأَوْا بَيَّهْ الشُّيُوخْ فِي شَانَكْ. فَكِّرْ فِي الْكَلَامْ دَا وَ جَاهِدْ بَيَّهْ جِهَادْ عَدِيلْ. 19 أَكْرُبْ الْإِيمَانْ قَوِي وَ سَوِّي كُلِّ شَيّءْ بِنِيَّةْ مُخْلِصَةْ. نَاسْ وَاحِدِينْ خَلَّوْا مِنْهُمْ النِّيَّةْ الْمُخْلِصَةْ وَ تَلَّفَوْا إِيمَانْهُمْ مَرَّةْ وَاحِدْ. 20 وَ مِنْهُمْ هَمَانِي وَ إِسْكَنْدَرْ وَ أَنَا سَلَّمْتُهُمْ لِلشَّيْطَانْ أَشَانْ يَلْقَوْا أَدَبْ وَ مَا يَكْفُرُوا بَتَّانْ.
© La Bible en arabe tchadien © Alliance biblique du Tchad, 2019
