الكِدِب في الزمن الأخير
1 وَ بِكَلَامْ وَاضِحْ، الرُّوحْ الْقُدُّوسْ يُقُولْ كَدَرْ فِي الزَّمَنْ الْأَخِيرْ، نَاسْ وَاحِدِينْ يَمُرْقُوا مِنْ دَرِبْ الْإِيمَانْ. وَ يِتَابُعُوا دَرِبْ الشَّوَاطِينْ الْيِوَدُّرُوهُمْ وَ يَسْمَعَوْا تَعْلِيمْ مِنْ الشَّوَاطِينْ. 2 وَ يِنْغَشَّوْا بِسَبَبْ النَّاسْ الْيِشَتُّتُوا التَّعْلِيمْ دَا. وَ النَّاسْ دَوْل، هُمَّنْ مُنَافِقِينْ وَ كَدَّابِينْ وَ قُلُوبْهُمْ مَيْتِينْ.
3 يَدْحَرَوْا النَّاسْ مِنْ الْأَخِيدَةْ وَ يِحَرُّمُوا لِلنَّاسْ أَشْيَاءْ وَاحِدِينْ مِنْ الْأَكِلْ. وَ لَاكِنْ الْأَكِلْ دَا، اللّٰهْ خَلَقَهْ أَشَانْ النَّاسْ الْمُؤمِنِينْ الْيَعَرْفُوا الْحَقّ يَقْبَلَوْه بِشُكُرْ. 4 أَيْوَى، كُلَّ شَيّءْ الْاللّٰهْ خَلَقَهْ سَمَحْ وَ مَا فِي شَيّءْ مَكْرُوهْ كَنْ نَاكُلُوهْ بِشُكُرْ. 5 أَشَانْ الْأَكِلْ يَبْقَى حَلَالْ بِكَلَامْ اللّٰهْ وَ دُعَا هَنَا الشُّكُرْ.
أبْقى خدّام عديل للمسيح
6 كَنْ تِعَلِّمْ الْأَخْوَانْ الْوَصَايَا دَوْل، إِنْتَ تَبْقَى خَدَّامْ عَدِيلْ لِلْمَسِيحْ عِيسَى. وَ كَلَامْ الْإِيمَانْ وَ التَّعْلِيمْ الْعَدِيلْ التِّتَابِعَهْ، دَوْل يَبْقَوْا لَيْك مِثِلْ أَكِلْ الْيَنْطِيكْ قُدْرَةْ. 7 أَنْقَرِعْ مَرَّةْ وَاحِدْ مِنْ الْقِصَصْ الْبَاطْلِينْ وَ الْكَلَامْ الْمِثِلْ كَلَامْ الْعَجَايِزْ الْخَرْفَانَاتْ. دَرِّبْ نَفْسَكْ أَشَانْ تَبْقَى نَادُمْ تَقِي. 8 صَحِيحْ، الرِّيَاضَةْ عِنْدَهَا فَايْدَةْ لَاكِنْ التَّقْوَى فَايْدِتَهْ زِيَادَةْ مِنْ كُلِّ شَيّءْ وَ نَلْقَوْا مِنْهَا، فِي الدُّنْيَا وَ فِي الْآخِرَةْ، الْحَيَاةْ الْاللّٰهْ وَاعَدَانَا بَيْهَا. 9 الْكَلَامْ دَا حَقّ وَ وَاجِبْ كُلَّ النَّاسْ يِصَدُّقُوا بَيَّهْ. 10 وَ فِي سَبَبْ الْوَعَدْ دَا، نَتْعَبَوْا وَ نِجَاهُدُوا. خَطَّيْنَا عَشَمْنَا ثَابِتْ فِي اللّٰهْ الْحَيّ الْهُو بَسْ مُنَجِّي هَنَا كُلَّ النَّاسْ خَاصَّةً الْمُؤمِنِينْ.
بُولُس شجّع تِمُوتَاوُس
11 آمُرْهُمْ لِلنَّاسْ أَشَانْ يِتَابُعُوا الْكَلَامْ دَا وَ عَلِّمْهُمْ لَيَّهْ. 12 مَا تِخَلِّي نَادُمْ يَحْقِرَكْ بِسَبَبْ إِنْتَ صَغَيَّرْ فِي الْعُمُرْ. سَوِّي نَفْسَكْ مَثَلْ لِلْمُؤمِنِينْ فِي كَلَامَكْ وَ حَالَكْ. خَلِّي يِشِيفُوا فَوْقَكْ الْمَحَبَّةْ وَ الْإِيمَانْ وَ الطِّهَارَةْ. 13 لَحَدِّي نَجِيكْ، أنْكَرِبْ فِي قِرَايِةْ كِتَابْ اللّٰهْ لِلنَّاسْ وَ مَا تِخَلِّي مِنَّكْ الْبَشِّرِينْ وَ الْعَلِّمِينْ.
14 خُطّ بَالَكْ فِي الْبَرَكَةْ الْاللّٰهْ أَنْطَاهَا لَيْك بِالْكَلَامْ الْأَتْنَبَّأَوْا بَيَّهْ جَمَاعَةْ الشُّيُوخْ وَكِتْ خَطَّوْا إِيدَيْهُمْ فَوْقَكْ. 15 أنْكَرِبْ فِي الْوَاجِبَاتْ دَوْل وَ جَاهِدْ فِي شَانْهُمْ أَشَانْ كُلَّ النَّاسْ يِشِيفُوا نَجَاحَكْ. 16 خُطّ بَالَكْ فِي نَفْسَكْ وَ فِي تَعْلِيمَكْ لِلنَّاسْ. أنْكَرِبْ فَوْقَهْ وَ بِمِثِلْ دَا، تِنَجِّي نَفْسَكْ وَ تِنَجِّي النَّاسْ الْيَسْمَعَوْا كَلَامَكْ.
© La Bible en arabe tchadien © Alliance biblique du Tchad, 2019
