بِداية حُكُم آسَا في يَهُوذَا
1 وَ أَبِيَّا مَاتْ وَ لِحِقْ أَبَّهَاتَهْ وَ دَفَنَوْه فِي مَدِينَةْ دَاوُدْ. وَ وِلَيْدَهْ آسَا حَكَمْ فِي بَدَلَهْ. وَ فِي وَكِتْ حُكْمَهْ، الْبَلَدْ قَاعِدَةْ فِي رَاحَةْ لِمُدَّةْ عَشَرَةْ سَنَةْ. 2 وَ آسَا سَوَّى الزَّيْن وَ الْعَدِيلْ قِدَّامْ اللّٰهْ إِلٰـهَهْ. 3 هُو هَدَّمْ الْمَدَابِحْ هَنَا الْإِلٰـهَاتْ الْآخَرِينْ وَ الْبَكَانَاتْ الْعَالِيِينْ وَ رَمَى الْحُجَارْ الْغَزَّوْهُمْ وَ كَسَّرْ الْعِيدَانْ الْغَزَّوْهُمْ لِعِبَادَةْ أَشِيرَةْ. 4 وَ آسَا أَمَرْ نَاسْ مَمْلَكَةْ يَهُوذَا لِيِتَابُعُوا اللّٰهْ رَبّ جُدُودْهُمْ وَ يِطَبُّقُوا وَصَايَا اللّٰهْ وَ قَوَانِينَهْ. 5 وَ هُو هَدَّمْ الْبَكَانَاتْ الْعَالِيِينْ وَ الْبَكَانَاتْ الْيِحَرُّقُوا فَوْقهُمْ الْبَخُورْ فِي كُلَّ حِلَّالْ بَلَدْ يَهُوذَا. وَ فِي وَكِتْ حُكْمَهْ، الْمَمْلَكَةْ قَاعِدَةْ بِالسَّلَامَةْ. 6 وَ هُو بَنَى مُدُنْ قَوِيِّينْ فِي بَلَدْ يَهُوذَا أَشَانْ فِي الْوَكِتْ دَا، الْبَلَدْ قَاعِدَةْ فِي رَاحَةْ. وَ فِي السِّنِينْ دَوْل، مَا كَانْ حَرِبْ ضِدَّهْ أَشَانْ اللّٰهْ أَنْطَاهْ الرَّاحَةْ.
7 وَ آسَا قَالْ لِنَاسْ مَمْلَكَةْ يَهُوذَا: «خَلِّي نَبْنُوا الْمُدُنْ دَوْل وَ نِحَوُّقُوهُمْ بِدُرْدُرْ وَ بُيُوتْ طُوَالْ هَنَا مُرَاقَبَةْ وَ بِيبَانْ بِحَوَادِرْهُمْ، الْبَلَدْ قَاعِدَةْ فِي الرَّاحَةْ فِي إِيدَيْنَهْ دَا، أَشَانْ أَنِحْنَ تَابَعْنَا اللّٰهْ إِلٰـهْنَا. أَيْوَى، أَنِحْنَ تَابَعْنَاهْ وَ هُو أَنْطَانَا الرَّاحَةْ مِنْ كُلِّ جِيهَةْ.» وَ هُمَّنْ نَجَحَوْا فِي بُنَاهُمْ.
آسَا أنّصر في الحُروب
8 وَ آسَا عِنْدَهْ 300 000 عَسْكَرْ مِنْ قَبِيلَةْ يَهُوذَا شَايْلِينْ دَرَقْ كُبَارْ وَ حُرَابْ وَ 280 000 عَسْكَرْ مِنْ قَبِيلَةْ بَنْيَامِينْ شَايْلِينْ دَرَقْ دُقَاقْ وَ نَشَاشِيبْ. وَ كُلُّهُمْ رُجَالْ فُرَّاسْ.
9 وَ يَوْم وَاحِدْ، زَارَحْ الْمِنْ بَلَدْ الْحَبَشَةْ جَاءْ بِمَلْيُونْ عَسْكَرْ وَ 300 عَرَبَاتْ حَرِبْ وَ هَجَمْهُمْ. وَ وَصَّلْ لَحَدِّي مَدِينَةْ مَرِيشَةْ. 10 وَ آسَا مَرَقْ لَيَّهْ وَ رَصَّوْا لِلْحَرِبْ فِي وَادِي صَفَاتَةْ قَرِيبْ لِمَدِينَةْ مَرِيشَةْ. 11 وَ آسَا سَأَلْ اللّٰهْ إِلٰـهَهْ وَ قَالْ: «يَا اللّٰهْ، بَلَاكْ إِنْتَ مَا فِي نَادُمْ الْيَقْدَرْ يَفْزَعْ الْقَادِرْ وَ الضَّعِيفْ. أَفْزَعْنَا، يَا اللّٰهْ إِلٰـهْنَا، أَشَانْ أَنِحْنَ مُتَوَكِّلِينْ عَلَيْك إِنْتَ! وَ بِأُسْمَكْ إِنْتَ بَسْ، أَنِحْنَ جِينَا نِقَابُلُوا الْمَلَايِينْ دَوْل. يَا اللّٰهْ، إِنْتَ إِلٰـهْنَا. مَا تِخَلِّي الْإِنْسَانْ يِنَّصِرْ فَوْقَكْ!»
12 وَ اللّٰهْ حَارَبْ الْحَبَشِيِّينْ وَ هُمَّنْ عَرَّدَوْا قِدَّامْ آسَا وَ عَسْكَرْ مَمْلَكَةْ يَهُوذَا. 13 وَ آسَا وَ عَسْكَرَهْ طَرَدَوْهُمْ لَحَدِّي حِلَّةْ قَرَارْ وَ كَتَلَوْهُمْ وَ وَاحِدْ كُلَ مِنْ الْحَبَشِيِّينْ مَا فَضَّلْ. أَشَانْ عَسْكَرْهُمْ أَدَّمَّرَوْا قِدَّامْ اللّٰهْ وَ قِدَّامْ شَعَبَهْ. وَ عَسْكَرْ مَمْلَكَةْ يَهُوذَا شَالَوْا غَنِيمَةْ كَتِيرَةْ.
14 وَ هُمَّنْ شَالَوْا كُلَّ الْحِلَّالْ الْحَوَالَيْ قَرَارْ أَشَانْ خَوْف اللّٰهْ كَرَبَاهُمْ. وَ عَسْكَرْ مَمْلَكَةْ يَهُوذَا نَهَبَوْا الْحِلَّالْ دَوْل وَ شَالَوْا مِنْهُمْ غَنِيمَةْ كَتِيرَةْ. 15 وَ هُمَّنْ هَجَمَوْا زَرَايِبْ الْبَهَايِمْ وَ شَالَوْا غَنَمْ وَ جُمَالْ كَتِيرِينْ. وَ بَعَدْ دَا، قَبَّلَوْا مَدِينَةْ الْقُدُسْ.
© La Bible en arabe tchadien © Alliance biblique du Tchad, 2019
