يَهُوشَفَط أسّس قُضياء في يَهُوذَا
1 وَ يَهُوشَفَطْ مَلِكْ مَمْلَكَةْ يَهُوذَا قَبَّلْ بِالسَّلَامَةْ فِي بَيْتَهْ فِي مَدِينَةْ الْقُدُسْ. 2 وَ يَاهُو النَّبِي الْيِشِيفْ رُؤْيَةْ وِلَيْد حَنَانِي لَاقَاهْ لِلْمَلِكْ يَهُوشَفَطْ وَ قَالْ لَيَّهْ: «وَاجِبْ لَيْك تَفْزَعْ لِنَاسْ الْفَسْلِينْ وَلَّا؟ وَ تِحِبّ النَّاسْ الْيَكْرَهَوْا اللّٰهْ وَلَّا؟ بِالسَّبَبْ دَا، غَضَبْ اللّٰهْ يَنْزِلْ فَوْقَكْ. 3 وَ لَاكِنْ إِنْتَ سَوَّيْت أَعْمَالْ عَدِيلِينْ أَشَانْ مَلَّطْ الْعِيدَانْ الْغَزَّوْهُمْ لِعِبَادَةْ أَشِيرَةْ فِي كُلَّ الْبَلَدْ وَ ثَبَّتّْ قَلْبَكْ لِتِتَابِعْ الرَّبّ.»
4 وَ يَهُوشَفَطْ سَكَنْ فِي مَدِينَةْ الْقُدُسْ. وَ بَكَانْ وَاحِدْ يَمْرُقْ وَ يَمْشِي مِنْ بِيرْ سَبْعَةْ لَحَدِّي جِبَالْ أَفْرَايِمْ وَ شَجَّعْ الشَّعَبْ لِيِقَبُّلُوا لِلّٰهْ رَبّ جُدُودْهُمْ. 5 وَ خَطَّ قُضْيَاءْ فِي الْبَلَدْ وَ فِي كُلَّ مُدُنْ الْقَوِيِّينْ هَنَا مَمْلَكَةْ يَهُوذَا، مَدِينَةْ بَعَدْ مَدِينَةْ. 6 وَ قَالْ لَيْهُمْ: «فَكُّرُوا فِي خِدْمِتْكُو التِّسَوُّوهَا أَشَانْ مَا وَاجِبْ تِشَارُعُوا حَسَبْ النَّاسْ لَاكِنْ حَسَبْ شَرِيعَةْ اللّٰهْ. وَ هُو يُكُونْ مَعَاكُو وَكِتْ تَقْطَعَوْا الشَّرِيعَةْ. 7 وَ هَسَّعْ دَا، أَخَافَوْا مِنْ اللّٰهْ. وَ فَكُّرُوا فِي الشَّيّءْ التِّسَوُّوهْ أَشَانْ اللّٰهْ إِلٰـهْنَا مَا يِدَوْر الظُّلُمْ وَ لَا التَّفْرِقَةْ وَ لَا الرَّشْوَةْ.»
8 وَ فِي مَدِينَةْ الْقُدُسْ كُلَ، يَهُوشَفَطْ خَطَّ وَاحِدِينْ مِنْ اللَّاوِيِّينْ وَ رُجَالْ الدِّينْ وَ كُبَارَاتْ عَايِلَاتْ بَنِي إِسْرَائِيلْ لِيِسَوُّوا الشَّرِيعَةْ حَسَبْ شَرِيعَةْ اللّٰهْ وَ يِحِلُّوا خِلَافْ الشَّعَبْ. 9 وَ أَمَرَاهُمْ وَ قَالْ: «سَوُّوا خِدْمِتْكُو بِخَوْف مِنْ اللّٰهْ وَ بِأَمَانْ وَ بِقَلِبْ وَاحِدْ. 10 وَ كَنْ أَخْوَانْكُو جَوْا لَيْكُو مِنْ حِلَّالْهُمْ السَّاكْنِينْ فَوْقهُمْ وَ عِنْدُهُمْ مُشْكِلَةْ بِسَبَبْ دِمَّةْ أَوْ مَشَاكِلْ فِي وَصَايَا أَوْ فِي قَوَانِينْ أَوْ شُرُوطْ أَوْ مُحَاكَمَةْ، حَذُّرُوهُمْ بَيْهُمْ. وَ بَيْدَا، هُمَّنْ مَا يَبْقَوْا خَاطِيِّينْ قِدَّامْ اللّٰهْ وَ غَضَبَهْ مَا يَنْزِلْ فَوْقكُو وَ لَا فَوْق أَخْوَانْكُو. وَ سَوُّوا مِثِلْ دَا أَشَانْ مَا تَبْقَوْا خَاطِيِّينْ. 11 وَ فِي كُلَّ شَيّءْ الْبُخُصّ كَلَامْ اللّٰهْ، رَاجِلْ الدِّينْ أَمَرْيَا هُو بَسْ كَبِيرْ. وَ فِي كُلَّ شَيّءْ الْبُخُصّ مَلِكْ مَمْلَكَةْ يَهُوذَا، زَبَدْيَا وِلَيْد إِسْمَاعِيلْ هُو بَسْ مَسْؤُولْ فَوْقَهْ. وَ اللَّاوِيِّينْ يَبْقَوْا لَيْكُو مُرَاقِبِينْ. أَبْقَوْا شُدَادْ وَ أَخْدُمُوا وَ اللّٰهْ يُكُونْ مَعَ أَيِّ نَادُمْ الْيِسَوِّي الْخَيْر.»
© La Bible en arabe tchadien © Alliance biblique du Tchad, 2019
