أَحَاز بِقي ملك في يَهُوذَا
1 وَ أَحَازْ عِنْدَهْ 20 سَنَةْ وَكِتْ بِقِي مَلِكْ وَ حَكَمْ 16 سَنَةْ فِي مَدِينَةْ الْقُدُسْ. وَ هُو مَا سَوَّى الْعَدِيلْ قِدَّامْ اللّٰهْ مِثِلْ جِدَّهْ دَاوُدْ. 2 وَ لَاكِنْ هُو تَابَعْ دَرِبْ مُلُوكْ مَمْلَكَةْ إِسْرَائِيلْ وَ هُو كُلَ سَوَّى أَصْنَامْ لِعِبَادَةْ الْإِلٰـهْ بَعَلْ. 3 وَ هُو قَدَّمْ بَخُورْ فِي وَادِي بَنِي هِنُّومْ وَ قَدَّمْ عِيَالَهْ وَ حَرَّقَاهُمْ فِي النَّارْ. وَ دَا نَفْس الْمُحَرَّمَاتْ السَّوَّوْهُمْ الْأُمَمْ الْاللّٰهْ قَلَعْ مِنْهُمْ أَرْضُهُمْ وَ أَنْطَاهَا لِبَنِي إِسْرَائِيلْ. 4 وَ أَحَازْ قَدَّمْ ضَحَايَا وَ حَرَّقْ بَخُورْ فِي الْبَكَانَاتْ الْعَالِيِينْ هَنَا عِبَادَةْ الْأَصْنَامْ وَ فِي رُوسَيْ الْجِبَالْ وَ تِحِتْ أَيِّ شَدَرَةْ خَضْرَةْ.
5 وَ خَلَاصْ، اللّٰهْ إِلٰـهَهْ سَلَّمَهْ فِي إِيدْ مَلِكْ بَلَدْ أَرَامْ. هُو حَارَبَهْ وَ كَرَبْ مِنَّهْ نَاسْ كَتِيرِينْ وَ سَوَّاهُمْ مَسَاجِينْ وَ وَدَّاهُمْ مَدِينَةْ دِمَشْق. وَ بَتَّانْ، اللّٰهْ سَلَّمَهْ فِي إِيدْ فَقَحْ وِلَيْد رَمَلْيَا مَلِكْ مَمْلَكَةْ إِسْرَائِيلْ وَ هُو كُلَ أَنَّصَرْ فَوْقَهْ نَصُرْ كَبِيرْ. 6 وَ فِي يَوْم وَاحِدْ، فَقَحْ كَتَلْ 120 000 رَاجِلْ مِنْ مَمْلَكَةْ يَهُوذَا كُلُّهُمْ رُجَالْ فَحَلِينْ. وَ دَا أَشَانْ هُمَّنْ أَبَوْا اللّٰهْ رَبّ جُدُودْهُمْ. 7 وَ زِكْرِي رَاجِلْ فَارِسْ هَنَا قَبِيلَةْ أَفْرَايِمْ كَتَلْ مَعَسِيَّا وِلَيْد الْمَلِكْ وَ عَزْرِقَامْ مُرَاقِبْ قَصِرْ الْمَلِكْ وَ أَلِقَانَى نَايِبْ الْمَلِكْ. 8 وَ عَسْكَرْ مَمْلَكَةْ إِسْرَائِيلْ كَرَبَوْا مِنْ أَخْوَانْهُمْ بَنِي يَهُوذَا 200 000 عَوِينْ وَ أَوْلَادْ وَ بَنَاتْ. وَ نَهَبَوْا غَنِيمَةْ كَتِيرَةْ وَ وَدَّوْهَا فِي مَدِينِتْهُمْ السَّامِرَةْ.
9 وَ هِنَاكْ فِي السَّامِرَةْ، فِيَّهْ نَبِي اللّٰهْ أُسْمَهْ عُدَيْد. هُو مَرَقْ لَاقَاهُمْ لِلْعَسْكَرْ الْقَبَّلَوْا السَّامِرَةْ وَ قَالْ لَيْهُمْ: «دَاهُو غَضَبْ اللّٰهْ رَبّ جُدُودْكُو نَزَلْ فِي بَنِي يَهُوذَا وَ هُو سَلَّمَاهُمْ لَيْكُو. وَ إِنْتُو كَمَانْ كَتَلْتُوهُمْ بَلَا مَحَنَّةْ لَحَدِّي خَبَرْ مَوْتهُمْ دَا طَلَعْ فِي السَّمَاءْ. 10 وَ هَسَّعْ، إِنْتُو تِدَوْرُوا تِسَوُّوهُمْ لِنَاسْ بَلَدْ يَهُوذَا وَ سُكَّانْ مَدِينَةْ الْقُدُسْ دَوْل عَبِيدْ وَ خَدِيمْ. وَ بِمِثِلْ دَا، تَبْقَى خَاطِيِّينْ قِدَّامْ اللّٰهْ إِلٰـهْكُو. 11 هَسَّعْ دَا، أَسْمَعَوْا كَلَامِي. أَطُلْقُوا الْمَسَاجِينْ الْكَرَبْتُوهُمْ مِنْ أَخْوَانْكُو أَشَانْ غَضَبْ اللّٰهْ الْمُحْرِقْ جَايِ فَوْقكُو.»
12 وَ كُبَارَاتْ وَاحِدِينْ مِنْ قَبِيلَةْ أَفْرَايِمْ كُلَ قَمَّوْا ضِدّ الرُّجَالْ الْقَبَّلَوْا مِنْ الْحَرِبْ. وَ الْكُبَارَاتْ دَوْل هُمَّنْ عَزَرْيَا وِلَيْد يُوحَنَانْ وَ بَرَكْيَا وِلَيْد مَشِلِّمُوتْ وَ يَحِزْقِيَّا وِلَيْد شَلُّومْ وَ عَمَاسَا وِلَيْد حَدْلَايْ. 13 وَ قَالَوْا لَيْهُمْ: «مَا وَاجِبْ تِجِيبُوا الْمَسَاجِينْ دَوْل هِنِي. أَنِحْنَ هَسَّعْ كُلَ خَاطِيِّينْ قِدَّامْ اللّٰهْ وَ تِدَوْرُوا تِزِيدُوا فِي ذُنُوبْنَا وَ خَطَايَانَا وَلَّا؟ خَطَايَانَا كَتِيرِينْ وَ دَاهُو غَضَبْ اللّٰهْ جَايِ فَوْقنَا، يَا بَنِي إِسْرَائِيلْ!»
14 وَ خَلَاصْ، الْعَسْكَرْ طَلَقَوْا الْمَسَاجِينْ وَ الْغَنِيمَةْ قِدَّامْ الْكُبَارَاتْ وَ كُلَّ الشَّعَبْ. 15 وَ نَاسْ الْكَلَّفَوْهُمْ قَمَّوْا وَ شَجَّعَوْا الْمَسَاجِينْ وَ شَالَوْا مِنْ الْغَنِيمَةْ وَ لَبَّسَوْهُمْ لِكُلَّ الْعَرْيَانِينْ. وَ أَنْطَوْهُمْ خُلْقَانْ وَ نِعْلَيْ وَ أَكِلْ وَ شَرَابْ وَ صَبَّوْا لَيْهُمْ دِهِنْ فِي عَوَاوِيرْهُمْ. وَ رَكَّبَوْا فِي حَمِيرْ النَّاسْ الْمَا يَقْدَرَوْا يُرُوغُوا وَ وَدَّوْهُمْ لِأَخْوَانْهُمْ فِي أَرِيحَا الْبِنَادُوهَا مَدِينَةْ النَّخَلْ. وَ بَعَدْ دَا، قَبَّلَوْا السَّامِرَةْ.
أَحَاز دوّر فزع من ملك أَشُور
16 وَ فِي الْوَكِتْ دَا، أَحَازْ مَلِكْ مَمْلَكَةْ يَهُوذَا رَسَّلْ لِمَلِكْ بَلَدْ أَشُورْ أَشَانْ يَجِي يَفْزَعَهْ. 17 وَ دَا، أَشَانْ الْأَدَوْمِيِّينْ بَتَّانْ جَوْا وَ حَارَبَوْا مَمْلَكَةْ يَهُوذَا وَ كَرَبَوْا نَاسْهُمْ وَ وَدَّوْهُمْ مَسَاجِينْ. 18 وَ فِي نَفْس الْوَكِتْ، الْفِلِسْطِيِّينْ كُلَ جَوْا هَجَمَوْا سَهَلَةْ شَفِيلَةْ وَ مَنْطَقَةْ الْجُنُوبْ هَنَا بَلَدْ يَهُوذَا. وَ هُمَّنْ شَالَوْا حِلَّالْ بَيْت شَمْس وَ أَيَّلُونْ وَ قَدِيرُوتْ. وَ بَتَّانْ شَالَوْا حِلَّالْ سُوكُو وَ تِمْنَةْ وَ قِمْزُو وَ الْحِلَّالْ التَّابْعِينْ لَيْهُمْ. وَ سَكَنَوْا فِي كُلَّ الْحِلَّالْ دَوْل. 19 اللّٰهْ قَاعِدْ يِمَسْكِنْ مَمْلَكَةْ يَهُوذَا بِسَبَبْ أَحَازْ مَلِكْهُمْ، هُو اللَّزَّ بَنِي يَهُوذَا يِسَوُّوا الذَّنِبْ وَ بِنَفْسَهْ كُلَ عِصِي اللّٰهْ.
20 وَ تَغْلَتْ فَلَاسَرْ مَلِكْ بَلَدْ أَشُورْ جَاءْ لِأَحَازْ لَاكِنْ مَا فَزَعَهْ، جَاءْ ضَايَقَهْ. 21 وَ أَحَازْ شَالْ الْكَنْز الْفِي بَيْت اللّٰهْ وَ فِي قَصِرْ الْمَلِكْ وَ فِي بُيُوتْ الْمَسَائِيلْ وَ أَنْطَاهْ لِمَلِكْ بَلَدْ أَشُورْ مِثِلْ هَدِيَّةْ. وَ لَاكِنْ بَيْدَا كُلَ، مَا لِقِي مِنَّهْ أَيِّ فَزَعْ. 22 وَ وَكِتْ هُو قَاعِدْ فِي الضِّيقَةْ كُلَ، الْمَلِكْ أَحَازْ قَاعِدْ يَعَصَى اللّٰهْ. 23 هُو قَاعِدْ يِقَدِّمْ ضَحَايَا لِإِلٰـهَاتْ مَدِينَةْ دِمَشْق الْهَزَمَوْه وَ قَالْ فِي نَفْسَهْ: «إِلٰـهَاتْ مَلِكْ بَلَدْ أَرَامْ فَزَعَوْا نَاسْهُمْ. كَنْ مِثِلْ دَا، أَنَا كُلَ نِقَدِّمْ لَيْهُمْ ضَحَايَا أَشَانْ يَفْزَعَوْنِي.» وَ لَاكِنْ دَا سَبَّبْ دَمَارْ لَيَّهْ هُو وَ لِكُلَّ بَنِي إِسْرَائِيلْ.
24 وَ أَحَازْ لَمَّ كُلَّ الْمُعِدَّاتْ هَنَا بَيْت اللّٰهْ وَ كَسَّرَاهُمْ وَ بَعَدْ دَا، قَفَّلْ بِيبَانْ بَيْت اللّٰهْ. وَ سَوَّى لِنَفْسَهْ مَدَابِحْ فِي أَيِّ بَكَانْ فِي مَدِينَةْ الْقُدُسْ. 25 وَ بَنَى بَكَانَاتْ عَالِيِينْ فِي كُلَّ حِلَّالْ بَلَدْ يَهُوذَا لِيِحَرُّقُوا فَوْقهُمْ الْبَخُورْ لِإِلٰـهَاتْ آخَرِينْ. وَ بِمِثِلْ دَا، هُو غَضَّبْ اللّٰهْ رَبّ جُدُودَهْ.
26 وَ الْبَاقِي مِنْ عَمَلْ أَحَازْ وَ كُلَّ شَيّءْ السَّوَّاهْ مِنْ الْبِدَايَةْ لِلنِّهَايَةْ مَكْتُوبِينْ فِي كِتَابْ مُلُوكْ بَنِي يَهُوذَا وَ بَنِي إِسْرَائِيلْ. 27 وَ أَحَازْ مَاتْ وَ لِحِقْ أَبَّهَاتَهْ وَ دَفَنَوْه فِي مَدِينَةْ الْقُدُسْ وَ لَاكِنْ مَا سَتَرَوْه فِي قُبُورْ مُلُوكْ بَنِي إِسْرَائِيلْ. وَ وِلَيْدَهْ حِزْقِيَّا حَكَمْ فِي بَدَلَهْ.
© La Bible en arabe tchadien © Alliance biblique du Tchad, 2019
