المدْبح و الحَوْط الكبير
1 وَ صَنَعَوْا مَدْبَحْ هَنَا نَحَاسْ الطُّولَهْ 20 دُرَاعْ وَ عُرْضَهْ كُلَ 20 دُرَاعْ وَ طُولَهْ فَوْق كَمَانْ 10 دُرَاعْ.
2 وَ صَنَعَوْا حَوْط كَبِيرْ مُدَوَّرْ. وَ خَشْمَهْ يِسَاوِي 10 دُرَاعْ مِنْ طَرَفَهْ لِطَرَفَهْ. وَ طُولَهْ فَوْق يِسَاوِي 5 دُرَاعْ وَ دَايِرَهْ كَمَانْ 30 دُرَاعْ. 3 وَ جَمَّلَوْا الْحَوْط بِصُوَرْ هَنَا تِيرَانْ وَ فِي أَيِّ دُرَاعْ، رَسَمَوْا 10 تَوْر وَ دَا، فِي كُلَّ دَايِرَةْ الْحَوْط. وَ التِّيرَانْ دَوْل رَصَّوْهُمْ عَلَيْ رَوْقَيْن. وَ هُمَّنْ وَ الْحَوْط كُلُّهُمْ كَيْ صُنْعَةْ وَاحِدَةْ بَسْ. 4 وَ الْحَوْط دَا خَطَّوْه فِي 12 تِيرَانْ هَنَا نَحَاسْ. وَ التِّيرَانْ دَوْل مُوَجِّهِينْ عَلَيْ الْأَرْبَعَةْ جِيهَاتْ. تَلَاتَةْ مُوَجِّهِينْ عَلَيْ جِيهَةْ الْمُنْشَاقْ وَ تَلَاتَةْ عَلَيْ جِيهَةْ الْغَرِبْ وَ تَلَاتَةْ عَلَيْ جِيهَةْ الْوَطِي وَ تَلَاتَةْ عَلَيْ جِيهَةْ الصَّبَاحْ. وَ ضُهُورْهُمْ دَاخَلْ تِحِتْ الْحَوْط. 5 وَ خَشُمْ الْحَوْط دَا تُخْنَهْ يِسَاوِي أَرْبَعَةْ أُصْبَعْ وَ خَشْمَهْ مِثِلْ نُوَّارْ السِّتَّيْب. وَ الْحَوْط دَا يِشِيلْ 300 بِرْمِيلْ هَنَا أَلْمِي. 6 وَ صَنَعَوْا عَشَرَةْ حِيطَانْ آخَرِينْ هَنَا نَحَاسْ. الْخَمْسَةْ خَطَّوْهُمْ بِنُصّ الزَّيْنَةْ هَنَا بَيْت اللّٰهْ وَ الْخَمْسَةْ الْآخَرِينْ كَمَانْ خَطَّوْهُمْ بِنُصّ الْإِسْرَةْ أَشَانْ يِغَسُّلُوا الضَّحَايَا الْمُحَرَّقِينْ الْيِقَدُّمُوهُمْ. وَ لَاكِنْ رُجَالْ الدِّينْ يِلْوَضَّوْا بِأَلْمِي هَنَا الْحَوْط الْكَبِيرْ.
مُعِدّات بيت اللّه
7 وَ صَنَعَوْا عَشَرَةْ فَانُوسْ مِنْ دَهَبْ حَسَبْ الشُّرُوطْ وَ خَطَّوْهُمْ فِي لُبّ بَيْت اللّٰهْ، الْخَمْسَةْ بِنُصّ الزَّيْنَةْ وَ الْخَمْسَةْ الْآخَرِينْ بِنُصّ الْإِسْرَةْ. 8 وَ سَوَّوْا عَشَرَةْ طَرَبَيْزَةْ وَ خَطَّوْهُمْ فِي لُبّ بَيْت اللّٰهْ، الْخَمْسَةْ بِنُصّ الزَّيْنَةْ وَ الْخَمْسَةْ الْآخَرِينْ بِنُصّ الْإِسْرَةْ. وَ صَنَعَوْا مِيَةْ كَاسْ هَنَا دَهَبْ. 9 وَ سَوَّوْا فَضَايْ لِرُجَالْ الدِّينْ. وَ بَتَّانْ سَوَّوْا فَضَايْ آخَرَةْ كَبِيرَةْ وَ بِيبَانْهَا مَسَحَوْهُمْ بِنَحَاسْ. 10 وَ كَنْ لِلْحَوْط الْكَبِيرْ كَمَانْ، خَطَّوْه بِنُصّ الزَّيْنَةْ هَنَا الْبَيْت فِي رُكْنَهْ مُقَابِلْ وَطِي صَبَاحْ.
حُورَام صنع خُمام آخرين
11 وَ حُورَامْ صَنَعْ الْبُرَامْ وَ الْفَيْلَاتْ وَ الْكِيسَانْ. وَ هُو كَمَّلْ كُلَّ الْخِدْمَةْ هَنَا بَيْت اللّٰهْ الْكَلَّفَهْ بَيْهَا الْمَلِكْ سُلَيْمَانْ. 12 وَ هُو صَنَعْ
الْعَمَدْ الْإِتْنَيْنوَ رُوسَيْهُمْ الْخَطَّاهُمْ فِي رَاسْ الْعَمَدْوَ السِّلْسِلَتَيْن هَنَا نَحَاسْ الْمَضْفُورِينْ الْخَطَّاهُمْ فِي رُوسَيْ الْعَمَدْ دَوْل13 وَ الْأُرْبُعْمِيَةْ رُمَّانْ الْمُعَلَّقِينْ رَوْقَيْن فِي السِّلْسِلَتَيْن هَنَا نَحَاسْ الْمَضْفُورِينْ الْخَطَّاهُمْ فِي رُوسَيْ الْعَمَدْ دَوْل14 وَ الْعَشَرَةْ أَسَاسْوَ الْعَشَرَةْ حِيطَانْ الْخَطَّاهُمْ فَوْقهُمْ15 وَ الْحَوْط الْكَبِيرْ الْوَحِيدْوَ الْأَتْنَا عَشَرْ تِيرَانْ التِّحْتَهْ16 وَ الْبُرَامْ وَ الْفَيْلَاتْ وَ الْحَدَايِدْ الْيِسِلُّوا بَيْهُمْ اللَّحَمْ.كُلَّ الْمُعِدَّاتْ دَوْل، حُورَامْ أَبِي صَنَعَاهُمْ بِنَحَاسْ نَقِي لِبَيْت اللّٰهْ بِأَمُرْ الْمَلِكْ سُلَيْمَانْ. 17 وَ الْمَلِكْ أَمَرْ يَصْنَعَوْا كُلَّ الْمُعِدَّاتْ دَوْل فِي قَوَالِبْ هَنَا طِينَةْ فِي تُرَابْ بَحَرْ الْأُرْدُنْ أَمْبَيْن سُكُّوتْ وَ صَرِيدَةْ. 18 وَ سُلَيْمَانْ سَوَّى مُعِدَّاتْ كَتِيرِينْ مَرَّةْ وَاحِدْ لَحَدِّي نَادُمْ مَا يَقْدَرْ يَعَرِفْ وَزِنْ النَّحَاسْ السَّوَّوْهُمْ بَيَّهْ.
سُلَيْمَان سوّى مُعِدّات آخرين
19 وَ بَتَّانْ كُلَ سُلَيْمَانْ سَوَّى مُعِدَّاتْ آخَرِينْ لِبَيْت اللّٰهْ. وَ هُمَّنْ
مُخْبَرْ الْبَخُورْ هَنَا الدَّهَبْوَ الطَّرَابِيزْ هَنَا الدَّهَبْ الْيِقَدُّمُوا فَوْقهُمْ الْخُبْزَةْ لِلّٰهْ20 وَ الْفَوَانِيسْ وَ طِيَيْسَاتْهُمْ كُلُّهُمْ كَيْ مِنْ دَهَبْ صَافِي وَ دَوْل الْيِأَوْقُدُوهُمْ قِدَّامْ الْبَكَانْ الْمُقَدَّسْ مَرَّةْ وَاحِدْ حَسَبْ الشُّرُوطْ21 وَ الزُّهُورْ وَ الطِّيَيْسَاتْ لِلنَّارْ وَ الْكَلَالِيبْ كُلُّهُمْ كَيْ مِنْ دَهَبْ صَافِي22 وَ السَّكَاكِينْ وَ الْكِيسَانْ وَ الصُّفَرْ وَ خَمَّامَاتْ النَّارْ كُلُّهُمْ كَيْ مِنْ دَهَبْ صَافِيوَ الْبِيبَانْ هَنَا الْبَكَانْ الْمُقَدَّسْ مَرَّةْ وَاحِدْ وَ الْبِيبَانْ هَنَا بَيْت اللّٰهْ كُلُّهُمْ كَيْ مِنْ دَهَبْ.© La Bible en arabe tchadien © Alliance biblique du Tchad, 2019
