عمل هنا الملك سُلَيْمَان
1 فِي مُدَّةْ 20 سَنَةْ، سُلَيْمَانْ بَنَى بَيْت اللّٰهْ وَ قَصِرْ لِنَفْسَهْ. 2 وَ هُو بَنَى بَتَّانْ الْحِلَّالْ الْحِيرَامْ أَنْطَاهُمْ لَيَّهْ وَ أَنْطَاهُمْ لِبَنِي إِسْرَائِيلْ لِيَسْكُنُوا فِيهُمْ. 3 وَ سُلَيْمَانْ مَشَى هَجَمْ حِلَّةْ حَمَاتْ صُوبَةْ وَ شَالْهَا. 4 وَ بَتَّانْ كُلَ بَنَى حِلَّةْ تَدْمُورْ الْفِي الصَّحَرَاء وَ بَنَى حِلَّالْ فِي بَلَدْ حَمَاتْ لِيَبْقَوْا مَخَازِنْ. 5 وَ سُلَيْمَانْ بَنَى حِلَّةْ بَيْت حُرُونْ الْفَوْق وَ حِلَّةْ بَيْت حُرُونْ التِّحِتْ وَ هُمَّنْ دَوْل مُدُنْ قَوِيِّينْ عِنْدُهُمْ دَرَادِرْ وَ بِيبَانْ وَ قَفَلَةْ. 6 وَ بَنَى حِلَّةْ بَعَلَةْ وَ كُلَّ الْحِلَّالْ الْيَخْزِنْ فَوْقهُمْ وَ الْحِلَّالْ الْيُخُطّ فَوْقهُمْ عَرَبَاتَهْ هَنَا الْحَرِبْ وَ خَيْلَهْ. وَ سُلَيْمَانْ بَنَى كُلَّ شَيّءْ الْيِدَوْرَهْ فِي مَدِينَةْ الْقُدُسْ وَ فِي جِبَالْ لُبْنَانْ وَ فِي كُلَّ مَمْلَكَتَهْ الْهُو قَاعِدْ يَحْكِمْ فَوْقهَا.
7 وَ فِي الْبَلَدْ، يِفَضِّلْ نَاسْ مِنْ الْحِتِّيِّينْ وَ الْأَمُورِيِّينْ وَ الْفِرِزِّيِّينْ وَ الْحِوِّيِّينْ وَ الْيَبُوسِيِّينْ. وَ النَّاسْ دَوْل هُمَّنْ مَا مِنْ بَنِي إِسْرَائِيلْ. 8 وَ بَنِي إِسْرَائِيلْ مَا دَمَّرَوْا النَّاسْ دَوْل كُلُّهُمْ وَ فِي شَانْ دَا، وَاحِدِينْ مِنْ ذُرِّيِّتْهُمْ فَضَّلَوْا فِي الْبَلَدْ. وَ سُلَيْمَانْ أَسْتَعْمَلْهُمْ فِي الْخِدْمَةْ الْإِجْبَارِيَّةْ لَحَدِّي الْيَوْم. 9 وَ سُلَيْمَانْ مَا أَنْطَى خِدْمَةْ الْإِجْبَارِيَّةْ دِي لِنَادُمْ وَاحِدْ مِنْ بَنِي إِسْرَائِيلْ. وَ لَاكِنْ هُو سَوَّاهُمْ عَسْكَرَهْ وَ مَسَائِيلَهْ وَ كُبَارَاتْ عَرَبَاتَهْ هَنَا الْحَرِبْ وَ سِيَادْ خَيْلَهْ. 10 وَ دَاهُو عَدَدْ كُبَارَاتْ الْحُكَّامْ هَنَا الْمَلِكْ سُلَيْمَانْ. هُمَّنْ 250 رُجَالْ الْيِرَاقُبُوا الْخَدَّامِينْ.
11 وَ سُلَيْمَانْ حَوَّلَاهَا لِبِنَيَّةْ فِرْعَوْن مِنْ مَدِينَةْ دَاوُدْ لِلْبَيْت الْهُو بَنَى لَيْهَا. وَ سُلَيْمَانْ قَالْ: «مَرْتِي مَا تَقْعُدْ فِي قَصِرْ دَاوُدْ أَبُويِ مَلِكْ بَنِي إِسْرَائِيلْ. أَشَانْ أَيِّ بَكَانْ الصَّنْدُوقْ اللّٰهْ قَعَدْ فَوْقَهْ، الْبَكَانْ دَا مُقَدَّسْ.»
نِظام العِبادة
12 وَ سُلَيْمَانْ قَدَّمْ ضَحَايَا مُحَرَّقِينْ فِي الْمَدْبَحْ الْبَنَاهْ قِدَّامْ غُرْفَةْ مَدَخَلْ هَنَا بَيْت اللّٰهْ. 13 وَ حَسَبْ وَصَايَا مُوسَى، سُلَيْمَانْ يِقَدِّمْ ضَحَايَا كُلَّ يَوْم وَ فِي كُلِّ يَوْم السَّبْت وَ أَوَّلْ يَوْم فِي كُلِّ شَهَرْ. وَ بَتَّانْ يِقَدِّمْ ضَحَايَا فِي وَكِتْ الْأَعْيَادْ التَّلَاتَةْ الْكُبَارْ فِي السَّنَةْ مِثِلْ عِيدْ الْخُبْزَةْ بَلَا تَوَّارَةْ وَ عِيدْ الْقَطِعْ وَ عِيدْ اللَّقَادِيبْ. 14 وَ سُلَيْمَانْ طَبَّقْ الْقَرَارْ الدَّاوُدْ أَبُوهْ شَالَهْ وَ هُو خَطَّ مَجْمُوعَاتْ رُجَالْ الدِّينْ وَ اللَّاوِيِّينْ فِي خِدْمِتْهُمْ. اللَّاوِيِّينْ يَشْكُرُوا اللّٰهْ وَ يِسَاعُدُوا رُجَالْ الدِّينْ فِي خِدْمِتْهُمْ هَنَا كُلَّ يَوْم. وَ الْحُرَّاسْ مُقَسَّمِينْ فِي أَيِّ بَابْ حَسَبْ مَجْمُوعَاتْهُمْ. أَشَانْ دَا بَسْ الْأَمُرْ هَنَا دَاوُدْ عَبْد اللّٰهْ. 15 وَ هُمَّنْ مَا طَرَّفَوْا مِنْ أَمُرْ دَاوُدْ، الْبُخُصّ رُجَالْ الدِّينْ وَ اللَّاوِيِّينْ وَ فِي أَيِّ شَيّءْ الْبُخُصّ الْمَالْ.
16 وَ بِمِثِلْ دَا، سُلَيْمَانْ حَقَّقْ كُلَّ الْخِدْمَةْ الْبَدَاهَا مِنْ يَوْم خَطَّوْا أَسَاسْ بَيْت اللّٰهْ، لَحَدِّي يَوْم كَمَّلَوْه. وَ بَيْت اللّٰهْ كَمَّلْ تَمَامْ. 17 وَ خَلَاصْ، الْمَلِكْ سُلَيْمَانْ مَشَى حِلَّةْ عَصْيُونْ قِيبَرْ وَ حِلَّةْ إِيلَاتْ وَ الْحِلَّالْ دَوْل فِي خَشُمْ الْبَحَرْ هَنَا بَلَدْ أَدَوْم. 18 وَ حِيرَامْ مَلِكْ صُورْ رَسَّلْ لَيَّهْ خَدَّامِينَهْ الْيَعَرْفُوا الْبَحَرْ عَدِيلْ وَ السُّفُنْ كُلَ. وَ الْخَدَّامِينْ دَوْل سَافَرَوْا سَوَا مَعَ خَدَّامِينْ سُلَيْمَانْ لِبَلَدْ أُفِيرْ. وَ جَابَوْا مِنْ هِنَاكْ دَهَبْ زِيَادَةْ مِنْ 15 000 كِيلَوْ لِلْمَلِكْ سُلَيْمَانْ.
© La Bible en arabe tchadien © Alliance biblique du Tchad, 2019
