1 جَوَابْ مِنِّي أَنَا بُولُسْ رَسُولْ عِيسَى الْمَسِيحْ بِإِذِنْ اللّٰهْ. وَ دَاهُو نَكْتِبْ لَيْكُو مَعَ أَخُونَا تِمُوتَاوُسْ. وَ أَنِحْنَ نِسَلُّمُوكُو إِنْتُو جَمَاعَةْ الْمُؤمِنِينْ هَنَا اللّٰهْ الْقَاعِدِينْ فِي حِلَّةْ كُرُنْتُسْ وَ لِكُلَّ الصَّالِحِينْ الْقَاعِدِينْ فِي أَيِّ بَكَانْ فِي بَلَدْ أَخَايَةْ. 2 عَلَيْكُمْ السَّلَامْ وَ الرَّحْمَةْ مِنْ اللّٰهْ أَبُونَا وَ رَبِّنَا عِيسَى الْمَسِيحْ.
الشجاعة في الضيقة
3 خَلِّي نَشْكُرُوا اللّٰهْ أَبُو رَبِّنَا عِيسَى الْمَسِيحْ. هُو أَبُونَا الرَّحِيمْ وَ كُلَّ الشَّجَاعَةْ جَايَةْ مِنَّهْ هُو. 4 وَ اللّٰهْ يِشَجِّعْنَا فِي كُلِّ ضِيقَةْ أَشَانْ أَنِحْنَ كُلَ بِالشَّجَاعَةْ دِي نِشَجُّعُوا الْآخَرِينْ الْقَاعِدِينْ فِي أَيِّ ضِيقَةْ. 5 وَ صَحِيحْ، أَنِحْنَ قَاعِدِينْ نِشَارُكُوا كَتِيرْ فِي تَعَبْ الْمَسِيحْ وَ لَاكِنْ بِعَلَاقِتْنَا مَعَايَهْ، كُلَ نَلْقَوْا شَجَاعَةْ زِيَادَةْ. 6 كَنْ أَنِحْنَ قَاعِدِينْ فِي الضِّيقَةْ، دَا بِقِي أَشَانْ إِنْتُو تَلْقَوْا الشَّجَاعَةْ وَ النَّجَاةْ. وَ كَنْ اللّٰهْ أَنْطَانَا الشَّجَاعَةْ، دَا بِقِي أَشَانْ إِنْتُو كُلَ تَلْقَوْا الشَّجَاعَةْ وَ تَقْدَرَوْا تَحْمَلَوْا التَّعَبْ بِصَبُرْ مِثِلْنَا. 7 عَشَمْنَا فَوْقكُو قَوِي بِلْحَيْن أَشَانْ نَعَرْفُوا كَدَرْ تِشَارُكُوا فِي الشَّجَاعَةْ مِثِلْ أَوَّلْ قَاعِدِينْ تِشَارُكُوا مَعَانَا فِي التَّعَبْ.
8 يَا أَخْوَانِي، نِدَوْرُوا نِعَرُّفُوكُو بِالضِّيقَةْ الْجَاتْ فَوْقنَا فِي بَلَدْ آسِيَا. وَ الضِّيقَةْ دِي شَدِيدَةْ بِلْحَيْن وَ فَاتَتْ قُدْرِتْنَا لَحَدِّي قُلْنَا مُتْنَا خَلَاصْ. 9 وَ فِي الْبَكَانْ دَا، بِقِينَا مِثِلْ نَاسْ الْحَكَمَوْا لَيْهُمْ بِالْمَوْت. وَ دَا بِقِي أَشَانْ مَا نِنْتَكْلُوا عَلَيْ نُفُوسْنَا لَاكِنْ نِنْتَكْلُوا عَلَيْ اللّٰهْ الْيَبْعَثْ الْمَيْتِينْ. 10 وَ أَكِيدْ اللّٰهْ الْفَزَعْنَا مِنْ الْمَوْت دَا، هُو يَفْزَعْنَا بَتَّانْ. خَطَّيْنَا عَشَمْنَا فَوْقَهْ هُو بَسْ وَ أَكِيدْ هُو يَفْزَعْنَا بَتَّانْ. 11 وَ إِنْتُو كُلَ وَاجِبْ تِعَاوُنُونَا بِدُعَاكُو. وَ اللّٰهْ يَقْبَلْ دُعَاكُو الْكَتِيرْ وَ بِسَبَبْ دُعَاكُو دَا، هُو يِبَارِكْنَا وَ خَلَاصْ نَاسْ كَتِيرِينْ يَشْكُرُوا اللّٰهْ فِي شَانَّا.
تأخير الزيارة التالْتة
12 وَ أَنِحْنَ فَرْحَانِينْ أَشَانْ قُلُوبْنَا قَاعِدِينْ يِأَكُّدُوا لَيْنَا كَدَرْ عِشْنَا مَعَ كُلَّ نَاسْ الدُّنْيَا وَ خَاصَّةً مَعَاكُو إِنْتُو بِقَلِبْ أَبْيَضْ وَ بِنِيَّةْ مُخْلِصَةْ الْاللّٰهْ يَرْضَى بَيْهُمْ. مَا عِشْنَا حَسَبْ فِكِرْ نَاسْ الدُّنْيَا لَاكِنْ عِشْنَا بِرَحْمَةْ اللّٰهْ. 13 وَ أَبَداً مَا نَكْتُبُوا لَيْكُو إِلَّا الْكَلَامْ الْوَاضِحْ التَّقْدَرَوْا تَقْرُوهْ وَ طَوَّالِي تَفْهَمَوْه. وَ أَنَا نِتْمَنَّى كَدَرْ تَفْهَمَوْا نِيِّتْنَا تَمَامْ. 14 وَ قُلْت الْكَلَامْ دَا أَشَانْ إِنْتُو لِسَّاعْكُو مَا فِهِمْتُوا نِيِّتْنَا تَمَامْ. وَ كَنْ فِهِمْتُوا نِيِّتْنَا، خَلَاصْ فِي يَوْم جَيَّةْ رَبِّنَا عِيسَى، إِنْتُو تِفَاشُرُوا بَيْنَا مِثِلْ أَنِحْنَ نِفَاشُرُوا بَيْكُو.
15 وَ أَكِيدْ، عَشَمِي فَوْقكُو بِقِي قَوِي. وَ أَشَانْ دَا، دَوَّرْت نَمْشِي لَيْكُو طَوَّالِي وَ نُزُورْكُو وَ تَلْقَوْا رَحْمَةْ مَرَّتَيْن. 16 وَ دَوَّرْت نَخْشَاكُو أَوَّلْ مَرَّةْ وَكِتْ أَنَا مَاشِي لِمَقِدُونِيَةْ وَ بَتَّانْ وَكِتْ أَنَا مُقَبِّلْ مِنْهَا. وَ دَوَّرْت تِسَاعُدُونِي فِي سَفَرِي لِدَارْ الْيَهُودِيَّةْ.
17 وَ كَنْ دَوَّرْت نَمْشِي لَيْكُو مِثِلْ دَا، هَلْ تُقُولُوا أَنَا شِلْت نِيَّةْ بَلَا فِكِرْ وَلَّا؟ هَلْ تُقُولُوا أَنَا نِشِيلْ نِيَّةْ مِثِلْ نَاسْ الدُّنْيَا الْبُقُولُوا «أَيْوَى» وَ «لَا» فِي نَفْس الْوَكِتْ؟ 18 اللّٰهْ صَادِقْ! كَلَامْنَا لَيْكُو أَبَداً مَا يَبْقَى «أَيْوَى» وَ «لَا» فِي نَفْس الْوَكِتْ. 19 أَشَانْ إِبْن اللّٰهْ عِيسَى الْمَسِيحْ الْأَنَا وَ أَخْوَانِي سِيلَا وَ تِمُوتَاوُسْ بَلَّغْنَاكُو بَيَّهْ، أَبَداً مَا يِخَلْبِطْ «أَيْوَى» وَ «لَا». كَلَامَهْ دَايْماً، أَيْوَى. 20 أَشَانْ كُلَّ شَيّءْ الْاللّٰهْ وَاعَدْ بَيَّهْ، هُو تَمَّاهْ فِي الْمَسِيحْ. وَ بِالْمَسِيحْ، اللّٰهْ يُقُولْ «أَيْوَى». وَ بِسَبَبْ دَا، نُقُولُوا آمِينْ بِأُسْمَهْ وَ نِمَجُّدُوا اللّٰهْ.
21 وَ اللّٰهْ بَسْ ثَبَّتَانَا مَعَاكُو فِي عَلَاقَةْ مَعَ الْمَسِيحْ. وَ هُو بَسْ الدَّرَّجَانَا لِخِدِمْتَهْ. 22 وَ هُو خَطَّ فَوْقنَا خِتْمَهْ وَ نَزَّلْ فِي قُلُوبْنَا الرُّوحْ الْقُدُّوسْ أَشَانْ يَبْقَى الضَّمَانْ الْيِوَصِّفْنَا كَدَرْ اللّٰهْ يِسَوِّي كُلِّ شَيّءْ الْوَاعَدْ بَيَّهْ.
23 وَ اللّٰهْ شَاهِدْ لَيِّ كَدَرْ كَلَامِي مَا كِدِبْ. أَنَا مَا دَوَّرْت يَبْقَى لَيْكُو قَاسِي. وَ أَشَانْ دَا بَسْ، أَنَا مَا مَشَيْت بَتَّانْ فِي كُرُنْتُسْ. 24 وَ مَا نَعَصُرُوكُو فِي الشَّيّءْ الْبُخُصّ إِيمَانْكُو أَشَانْ نَعَرْفُوا كَدَرْ إِنْتُو ثَابْتِينْ فِي الْإِيمَانْ. لَاكِنْ، أَخَيْر لَيْنَا نَخْدُمُوا مَعَاكُو أَشَانْ فَرْحِتْكُو تِزِيدْ.
© La Bible en arabe tchadien © Alliance biblique du Tchad, 2019
