فرْحة بُولُس بتَوْبِتهم
1 يَا أَخْوَانِي النِّحِبُّكُو، خَلِّي نِفَكُّرُوا فِي وَعَدْ اللّٰهْ دَا. وَ خَلِّي نِطَهُّرُوا جِسِمْنَا وَ قُلُوبْنَا مِنْ أَيِّ شَيّءْ الْيِنَجِّسْنَا. لَحَدِّي نِعِيشُوا بِحَالْ صَالْحَةْ وَ خَوْف اللّٰهْ.
2 أَفْتَحَوْا قُلُوبْكُو لَيْنَا. أَنِحْنَ مَا سَوَّيْنَا شَيّءْ فَسِلْ لِنَادُمْ وَ مَا دَمَّرْنَا نَادُمْ وَ مَا غَشَّيْنَا نَادُمْ. 3 وَ مَا قُلْت الْكَلَامْ دَا أَشَانْ نِدَوْر نُلُومْكُو. مِثِلْ أَوَّلْ قُلْتَهْ، إِنْتُو قَاعِدِينْ فِي قُلُوبْنَا وَ أَشَانْ دَا، نِعِيشُوا سَوَا وَ نُمُوتُوا سَوَا. 4 نِحَجِّي بَيْكُو دَايْماً بِفَرْحَةْ. أَنَا مَبْسُوطْ مِنْكُو بِلْحَيْن. شَجَّعْتُونِي شَجَاعَةْ شَدِيدَةْ بِلْحَيْن. وَ خَلَاصْ، فِي أُسُطْ كُلَّ صُعُوبَاتْنَا، عِنْدِي فَرَحْ زِيَادَةْ.
5 وَ وَكِتْ جِينَا فِي مَقِدُونِيَةْ كُلَ، مَا لِقِينَا رَاحَةْ. تِعِبْنَا وَ فِي أَيِّ بَكَانْ لِقِينَا مَشَاكِلْ وَ خَوْف قَاعِدْ فِي قُلُوبْنَا. 6 لَاكِنْ اللّٰهْ الْيِشَجِّعْ التَّعْبَانِينْ شَجَّعَانَا بِجَيَّةْ أَخُونَا تِيطُسْ. 7 وَ شَجَاعِتْنَا دِي مَا بِسَبَبْ جَيْتَهْ بَسْ. لَا! الْخَبَرْ الْجَابَهْ مِنْكُو شَجَّعَانَا زِيَادَةْ. هُو أَوْرَانَا كَدَرْ إِنْتُو شَجَّعْتُوهْ. وَ قَالْ إِنْتُو قَرْمَانِينْ لَيِّ وَ حَزْنَانِينْ لِلْمُشْكِلَةْ الْبِقَتْ وَ عِنْدُكُو حَمِيصَةْ لَيِّ فِي قُلُوبْكُو. وَ أَشَانْ دَا، أَنَا فَرْحَانْ فَرْحَةْ كَبِيرَةْ. 8 كَنْ جَوَابِي جَابْ حِزِنْ فِي قُلُوبْكُو كُلَ، أَنَا مَا نَدْمَانْ لَيَّهْ. صَحِيحْ، أَوَّلْ نِدِمْت لَيَّهْ. لَاكِنْ هَسَّعْ نَعَرِفْ جَوَابِي دَا جَابْ حِزِنْ فِي قُلُوبْكُو لَاكِنْ الْحِزِنْ دَا مَا طَوَّلْ.
9 وَ هَسَّعْ دَا، أَنَا فَرْحَانْ. أَنَا مَا فَرْحَانْ بِحِزِنْكُو لَاكِنْ أَنَا فَرْحَانْ أَشَانْ الْحِزِنْ وَدَّاكُو لِلتَّوْبَةْ. الْحِزِنْ دَا جَاءْ مِنْ اللّٰهْ وَ أَشَانْ دَا، مَا خَسَّرْنَاكُو شَيّءْ. 10 أَشَانْ الْحِزِنْ الْيَجِي مِنْ اللّٰهْ يِسَبِّبْ التَّوْبَةْ التِّوَدِّينَا لِلنَّجَاةْ وَ مَا يِجِيبْ النَّدَامَةْ. لَاكِنْ الْحِزِنْ النَّاسْ الدُّنْيَا يِسَبُّبُوهْ، يِوَدِّيهُمْ لِلْمَوْت.
11 فَكُّرُوا فِي الشَّيّءْ السَّبَّبْ لَيْكُو الْحِزِنْ الْجَاءْ مِنْ اللّٰهْ دَا. إِنْتُو وَاجَهْتُوا الْمُشْكِلَةْ بِنِيَّةْ وَاحِدَةْ. وَ عَجَلَةْ كَيْ دَافَعْتُوا لِنُفُوسْكُو وَ زِعِلْتُوا مِنْ الْخَاطِي. وَ خُفْتُوا خَوْف شَدِيدْ وَ بِقِيتُوا قَرْمَانِينْ لَيِّ وَ عِنْدُكُو لَيِّ حَمِيصَةْ. وَ قَلِبْكُو قَمَّ وَ أَدَّبْتُوا الْمُذْنِبْ. وَ خَلَاصْ، بِأَيِّ دَلِيلْ إِنْتُو وَصَّفْتُوا كَدَرْ إِنْتُو بَرِيِّينْ مِنْ كُلَّ الْكَلَامْ دَا.
12 صَحِيحْ، أَنَا كَتَبْت لَيْكُو جَوَابْ يَوْم دَاكْ لَاكِنْ مَا كَتَبْتَهْ فِي شَانْ النَّادُمْ السَّوَّى الْفَسِلْ وَ لَا فِي شَانْ الْفَسَالَةْ. أَنَا كَتَبْتَهْ أَشَانْ نِدَوْر تَعَرْفُوا قِدَّامْ اللّٰهْ كَدَرْ عِنْدُكُو نِيَّةْ زِيَادَةْ لَيْنَا. 13 وَ دَا شَجَّعَانَا بِلْحَيْن. فِرِحْنَا بِسَبَبْ الشَّجَاعَةْ اللِّقِينَاهَا دِي. وَ فِرِحْنَا زِيَادَةْ بِفَرْحَةْ تِيطُسْ أَشَانْ أَوَّلْ قَلْبَهْ مُعَلَّقْ وَ إِنْتُو رَقَّدْتُوا قَلْبَهْ مَرَّةْ وَاحِدْ. 14 أَشَانْ أَوَّلْ كُلَ أَنَا رَاسِي مَرْفُوعْ وَكِتْ أَوْرَيْتَهْ بَيْكُو وَ خَلَاصْ كَلَامِي دَا مَا خَجَّلَانِي. مِثِلْ كُلَّ الْكَلَامْ الْقُلْنَا لَيْكُو صَحِيحْ، الْكَلَامْ الْقُلْتَهْ فِيكُو لِتِيطُسْ، دَا كُلَ بِقِي صَحِيحْ. 15 وَ هُو قَاعِدْ يِفَكِّرْ فِيكُو وَ بِكِكَّيْف إِنْتُو كُلُّكُو سِمِعْتُوا كَلَامَهْ. وَ كَرَبْتُوهْ عَدِيلْ وَ كَرَّمْتُوهْ تَمَامْ وَ خَلَاصْ، هُو يِحِبُّكُو كَتِيرْ. 16 وَ أَنَا نَفْرَحْ أَشَانْ عَشَمِي فَوْقكُو ثَابِتْ.
© La Bible en arabe tchadien © Alliance biblique du Tchad, 2019
