يُوشِيَّا جدّد المُعاهدة
1 وَ طَوَّالِي، مَلِكْ يُوشِيَّا نَادَى كُلَّ شُيُوخْ بَنِي يَهُوذَا وَ شُيُوخْ مَدِينَةْ الْقُدُسْ لِيِلِمُّوا. 2 وَ بَعَدْ دَا، الْمَلِكْ مَشَى بَيْت اللّٰهْ مَعَ كُلَّ نَاسْ مَمْلَكَةْ يَهُوذَا وَ كُلَّ سُكَّانْ مَدِينَةْ الْقُدُسْ وَ رُجَالْ الدِّينْ وَ الْأَنْبِيَاء وَ كُلَّ الشَّعَبْ مِنْ الْكُبَارْ لَحَدِّي الدُّقَاقْ. وَ هُو قَرَى لَيْهُمْ كُلَّ الْكَلَامْ الْفِي كِتَابْ الْمُعَاهَدَةْ اللِّقَوْه فِي بَيْت اللّٰهْ. 3 وَ الْمَلِكْ وَقَفْ جَنْب عَمُودْ بَيْت اللّٰهْ وَ جَدَّدْ الْمُعَاهَدَةْ مَعَ اللّٰهْ. وَاجِبْ أَيِّ وَاحِدْ يِتَابِعْ اللّٰهْ وَ يَحْفَضْ وَصِيَّاتَهْ وَ تَعْلِيمَهْ وَ شُرُوطَهْ بِكُلَّ قَلْبَهْ وَ بِكُلَّ فِكْرَهْ وَ يِطَبِّقْ كَلَامْ الْمُعَاهَدَةْ الْمَكْتُوبْ فِي الْكِتَابْ دَا. وَ كُلَّ الشَّعَبْ قَصَّدَوْا بِالْمُعَاهَدَةْ دِي.
يُوشِيَّا هدّم بكان الأصْنام
4 وَ الْمَلِكْ أَمَرْ حِلْقِيَّا كَبِيرْ رُجَالْ الدِّينْ وَ رُجَالْ الدِّينْ الْآخَرِينْ وَ حُرَّاسْ مَدَخَلْ بَيْت اللّٰهْ وَ قَالْ خَلِّي يَمُرْقُوا مِنْ بَيْت اللّٰهْ كُلَّ الْمُعِدَّاتْ الصَّنَعَوْهُمْ لِعِبَادَةْ أَصْنَامْ بَعَلْ وَ أَشِيرَةْ وَ لِكُلَّ قُوَّاتْ السَّمَاءْ. وَ خَلَاصْ، هُمَّنْ مَرَقَوْهُمْ بَرَّا مِنْ مَدِينَةْ الْقُدُسْ وَ حَرَّقَوْهُمْ فِي وَادِي قِدْرُونْ وَ وَدَّوْا الرُّمَادْ فِي بَيْت إِيلْ. 5 وَ هُو طَرَدْ رُجَالْ الدِّينْ الْخَطَّوْهُمْ مُلُوكْ مَمْلَكَةْ يَهُوذَا لِيِحَرُّقُوا بَخُورْ فِي الْبَكَانَاتْ الْعَالِيِينْ هَنَا الْعِبَادَةْ الْفِي حِلَّالْ بَلَدْ يَهُوذَا وَ حَوَالَيْهَا لِمَدِينَةْ الْقُدُسْ. وَ طَرَدْ النَّاسْ الْيِحَرُّقُوا الْبَخُورْ لِبَعَلْ وَ لِلْحَرَّايْ وَ الْقَمَرْ وَ النُّجُومْ وَ لِكُلَّ قُوَّاتْ السَّمَاءْ. 6 وَ مَرَقْ مِنْ بَيْت اللّٰهْ الْعُودْ الْغَزَّوْه لِعِبَادَةْ أَشِيرَةْ وَ وَدَّاهْ بَرَّا مِنْ مَدِينَةْ الْقُدُسْ فِي وَادِي قِدْرُونْ وَ هِنَاكْ حَرَّقَهْ وَ رِحْكَهْ وَ الرُّمَادْ كَمَانْ شَتَّتَهْ فِي قُبُورْ الشَّعَبْ. 7 وَ الْمَلِكْ دَمَّرْ بُيُوتْ النَّاسْ الْبِسَوُّوا الشَّرْمَطَةْ الْقَاعِدِينْ فِي فَضَايَةْ بَيْت اللّٰهْ. وَ فِي الْبَكَانْ دَا، عَوِينْ قَاعِدَاتْ يِتِرَّنْ قَبَقْ لِعِبَادَةْ الْإِلٰـهَةْ أَشِيرَةْ.
8 وَ بَعَدْ دَا، يُوشِيَّا جَابْ كُلَّ رُجَالْ الدِّينْ الْقَاعِدِينْ فِي حِلَّالْ بَلَدْ يَهُوذَا. وَ هُو نَجَّسْ كُلَّ الْبَكَانَاتْ الْعَالِيِينْ هَنَا الْعِبَادَةْ الرُّجَالْ الدِّينْ قَاعِدِينْ يِحَرُّقُوا فَوْقهُمْ الْبَخُورْ مِنْ قَبَعْ لَحَدِّي بِيرْ سَبْعَةْ. وَ هُو دَمَّرْ الْبَكَانَاتْ الْعَالِيِينْ هَنَا الْعِبَادَةْ الْفِي خَشُمْ بَابْ الْمَدِينَةْ وَ خَاصَّةً الْبَابْ هَنَا حَاكِمْ الْمَدِينَةْ يَشُوعْ الْقَاعِدْ بِنُصّ الْإِسْرَةْ لِمَدَخَلْ الْمَدِينَةْ. 9 وَ رُجَالْ الدِّينْ هَنَا الْبَكَانَاتْ الْعَالِيِينْ هَنَا الْعِبَادَةْ مَا عِنْدُهُمْ إِذِنْ يِقَدُّمُوا ضَحَايَا فِي مَدْبَحْ اللّٰهْ الْفِي مَدِينَةْ الْقُدُسْ لَاكِنْ عِنْدُهُمْ إِذِنْ يَاكُلُوا خُبْزَةْ بَلَا تَوَّارَةْ مَعَ رُجَالْ الدِّينْ أَخْوَانْهُمْ.
10 وَ بَتَّانْ الْمَلِكْ نَجَّسْ الْمَحْرَقْ هَنَا تُوفَةْ الْقَاعِدْ فِي وَادِي بَنِي هِنُّومْ أَشَانْ بَتَّانْ نَادُمْ مَا يِحَرِّقْ وِلَيْدَهْ وَ لَا بِنَيِّتَهْ فِي النَّارْ لِإِلٰـهْ مُولَكْ. 11 وَ بَعَّدْ تَمَاثِيلْ الْخَيْل الْخَصَّصَوْهُمْ مُلُوكْ مَمْلَكَةْ يَهُوذَا لِعِبَادَةْ الْحَرَّايْ. وَ تَمَاثِيلْ الْخَيْل دَوْل أَوَّلْ خَطَّوْهُمْ جَنْب مَدَخَلْ بَيْت اللّٰهْ وَ جَنْب بَيْت الْمَسْؤُولْ نَتَنْمَلِكْ. وَ يُوشِيَّا حَرَّقْ الْعَرَبَاتْ هَنَا عِبَادَةْ الْحَرَّايْ كُلَ. 12 وَ الْمَلِكْ هَدَّمْ الْمَدَابِحْ الْبَنَوْهُمْ مُلُوكْ مَمْلَكَةْ يَهُوذَا فِي رَاسْ قَصِرْ مَلِكْ أَحَازْ وَ الْمَدَابِحْ الْمَنَسَّى بَنَاهُمْ فِي الْفَضَايَاتْ الْإِتْنَيْن هَنَا بَيْت اللّٰهْ. وَ بَعَدْ هَدَّمَاهُمْ، هُو شَالْ التُّرَابْ وَ دَفَّقَهْ فِي وَادِي قِدْرُونْ. 13 وَ هُو نَجَّسْ كُلَّ الْبَكَانَاتْ الْعَالِيِينْ هَنَا الْعِبَادَةْ الْمُقَابِلِينْ مَدِينَةْ الْقُدُسْ بِنُصّ الزَّيْنَةْ هَنَا حَجَرْ الدَّمَارْ. وَ الْبَكَانَاتْ دَوْل، زَمَانْ سُلَيْمَانْ مَلِكْ بَنِي إِسْرَائِيلْ بَنَاهُمْ لِعَشْتَرُوتْ الْإِلٰـهَةْ الْمُحَرَّمَةْ هِنْت نَاسْ بَلَدْ صَيْدَا وَ لِكَمُوشْ الْإِلٰـهْ الْمُحَرَّمْ هَنَا نَاسْ بَلَدْ مُوَابْ وَ لِمِلْكُومْ الصَّنَمْ الْمَكْرُوهْ هَنَا بَنِي عَمُّونْ. 14 وَ هُو رَمَى الْحُجَارْ الْغَزَّوْهُمْ وَ كَسَّرْ الْعِيدَانْ الْغَزَّوْهُمْ لِعِبَادَةْ أَشِيرَةْ وَ مَلَا الْبَكَانْ دَا بِعُضَامْ النَّاسْ.
15 وَ بَتَّانْ الْمَلِكْ هَدَّمْ الْمَدْبَحْ الْفِي بَيْت إِيلْ وَ دَا الْبَكَانْ الْعَالِي الْبَنَاهْ يَرُبَعَامْ وِلَيْد نَبَاتْ اللَّزَّ نَاسْ مَمْلَكَةْ إِسْرَائِيلْ فِي الذُّنُوبْ. وَ يُوشِيَّا هَدَّمْ الْمَدْبَحْ دَا وَ الْبَكَانْ الْعَالِي هَنَا الْعِبَادَةْ. وَ حَرَّقْ الْبَكَانْ الْعَالِي وَ رِحِكَهْ بِقِي رُمَادْ وَ تَشَّ الْعُودْ الْغَزَّوْه لِعِبَادَةْ أَشِيرَةْ. 16 وَ بَعَدْ دَا، يُوشِيَّا شَقْلَبْ وَ شَافْ الْقُبُورْ الْقَاعِدِينْ فِي رَاسْ الْحَجَرْ فِي الْبَكَانْ دَا. وَ رَسَّلْ نَاسْ يِجِيبُوا الْعُضَامْ مِنْ الْقُبُورْ وَ هُو قَمَّ تَشَّ الْعُضَامْ فِي الْمَدْبَحْ دَا أَشَانْ يِنَجِّسَهْ. وَ الشَّيّءْ دَا بِقِي حَسَبْ كَلَامْ نَبِي اللّٰهْ الْأَوَّلْ قَالَهْ. 17 وَ الْمَلِكْ سَأَلْ وَ قَالْ: «الْحَجَرْ الْقَاعِدْ نِشِيفَهْ، دَا شُنُو؟» وَ نَاسْ الْحِلَّةْ رَدَّوْا لَيَّهْ وَ قَالَوْا: «دَا قَبُرْ هَنَا نَبِي اللّٰهْ الْجَاءْ مِنْ بَلَدْ يَهُوذَا وَ حَجَّى بِالْأَشْيَاءْ الْهَسَّعْ إِنْتَ سَوَّيْتهُمْ فِي الْمَدْبَحْ هَنَا بَيْت إِيلْ.» 18 وَ خَلَاصْ، الْمَلِكْ قَالْ: «خَلُّوا الْقَبُرْ دَا! نَادُمْ مَا يِلَمِّسْ عُضَامْ النَّبِي.» وَ بِمِثِلْ دَا، مَا لِمْسَوْا عُضَامْ النَّبِي دَا وَلَّا عُضَامْ النَّبِي الشَّايِبْ الْجَاءْ مِنْ السَّامِرَةْ كُلَ.
19 وَ الْمَلِكْ يُوشِيَّا هَدَّمْ كُلَّ الْبُيُوتْ الْقَاعِدِينْ فِي الْبَكَانَاتْ الْعَالِيِينْ هَنَا الْعِبَادَةْ الْفِي حِلَّالْ السَّامِرَةْ الْبَنَوْهُمْ مُلُوكْ مَمْلَكَةْ إِسْرَائِيلْ أَشَانْ يِغَضُّبُوا اللّٰهْ. وَ هُو دَمَّرْ كُلَّ الْبُيُوتْ دَوْل مِثِلْ سَوَّاهْ فِي بَيْت إِيلْ. 20 وَ فِي رَاسْ مَدَابِحْ هَنَا الْبَكَانَاتْ الْعَالِيِينْ دَوْل، هُو دَبَحْ كُلَّ رُجَالْ الدِّينْ الْقَاعِدِينْ فِي الْبَكَانْ دَا وَ حَرَّقْ عُضَامْ النَّاسْ. وَ بَعَدْ دَا، قَبَّلْ مَدِينَةْ الْقُدُسْ.
ناس يَهُوذَا عيّدوا عيد الْفِصْح
21 وَ الْمَلِكْ يُوشِيَّا أَمَرْ كُلَّ الشَّعَبْ وَ قَالْ لَيْهُمْ: «عَيُّدُوا عِيدْ الْفِصْحَ لِلّٰهْ إِلٰـهْكُو حَسَبْ الْكَلَامْ الْمَكْتُوبْ فِي كِتَابْ الْمُعَاهَدَةْ.» 22 وَ الشَّعَبْ أَبَداً مَا عَيَّدَوْا عِيدْ مِثِلْ دَا مِنْ الْوَكِتْ الْحَكَمَوْا فَوْقَهْ الْحُكَّامْ الْبِنَادُوهُمْ الْقُضْيَاءْ لَحَدِّي كُلَّ الْوَكِتْ الْحَكَمَوْا فَوْقَهْ مُلُوكْ مَمْلَكَةْ إِسْرَائِيلْ وَ مُلُوكْ مَمْلَكَةْ يَهُوذَا. 23 وَ لَاكِنْ فِي سَنِةْ 18 هَنَا حُكُمْ الْمَلِكْ يُوشِيَّا، عَيَّدَوْا عِيدْ الْفِصْحَ لِلّٰهْ فِي مَدِينَةْ الْقُدُسْ.
24 وَ يُوشِيَّا كَتَلْ الْيِكَلُّمُوا مَعَ الْمَيْتِينْ وَ الْجَنَّانِيِّينْ وَ دَمَّرْ الْأَصْنَامْ وَ التَّمَاثِيلْ وَ كُلَّ الْمُحَرَّمَاتْ الْقَاعِدِينْ فِي بَلَدْ يَهُوذَا وَ مَدِينَةْ الْقُدُسْ. وَ دَا أَشَانْ يِحَقِّقْ كَلَامْ التَّوْرَاةْ الْمَكْتُوبْ فِي الْكِتَابْ اللِّقَاهْ حِلْقِيَّا كَبِيرْ رُجَالْ الدِّينْ فِي بَيْت اللّٰهْ. 25 وَ مَا فِي مَلِكْ مِثِلْ يُوشِيَّا التَّابَعْ لِلّٰهْ بِكُلَّ قَلْبَهْ وَ كُلَّ فِكْرَهْ وَ كُلَّ قُدُرْتَهْ حَسَبْ تَوْرَاةْ مُوسَى. وَ بَعَدَهْ مَا فِي مَلِكْ مِثْلَهْ.
26 وَ بَيْدَا كُلَ، اللّٰهْ مَا خَلَّى مِنَّهْ غَضَبَهْ الْمُحْرِقْ ضِدّ مَمْلَكَةْ يَهُوذَا بِسَبَبْ كُلَّ الْفَسَالَةْ السَّوَّاهَا مَنَسَّى ضِدَّهْ. 27 وَ اللّٰهْ قَالْ: «نِبَعِّدْ مِنْ قِدَّامِي مَمْلَكَةْ يَهُوذَا مِثِلْ بَعَّدْت مَمْلَكَةْ إِسْرَائِيلْ. وَ نِخَلِّي مِنِّي مَدِينَةْ الْقُدُسْ الْمَدِينَةْ الْأَنَا عَزَلْتَهَا وَ الْبَيْت الْأَنَا قُلْت فَوْقَهْ: ‹دَا بَسْ الْبَكَانْ النُّخُطّ فَوْقَهْ أُسْمِي.›»
28 وَ الْبَاقِي مِنْ عَمَلْ يُوشِيَّا وَ كُلَّ شَيّءْ السَّوَّاهْ مَكْتُوبِينْ فِي كِتَابْ تَارِيخْ مُلُوكْ بَنِي يَهُوذَا. 29 وَ فِي وَكِتْ حُكُمْ يُوشِيَّا، فِرْعَوْن نَكُو مَلِكْ بَلَدْ مَصِرْ قَمَّ لِيَهْجِمْ مَلِكْ بَلَدْ أَشُورْ بِجِيهَةْ بَحَرْ الْفُرَاتْ. وَ الْمَلِكْ يُوشِيَّا مَشَى قَابَلَهْ فِي الدَّرِبْ وَ لَاكِنْ وَكِتْ مَلِكْ مَصِرْ شَافَهْ، كَتَلَهْ لِيُوشِيَّا فِي حِلَّةْ مَقِدُّو. 30 وَ مَسَائِيلَهْ شَالَوْه فِي عَرَبَةْ وَ وَدَّوْه مِنْ مَقِدُّو لَحَدِّي مَدِينَةْ الْقُدُسْ وَ دَفَنَوْه فِي قَبُرَهْ. وَ شَعَبْ الْبَلَدْ شَالَوْه لِيَحَازْ وِلَيْد يُوشِيَّا مَسَحَوْه وَ دَرَّجَوْه مَلِكْ فِي بَدَلْ أَبُوهْ.
يَحَاز بِقي ملك في يَهُوذَا
31 وَ يَحَازْ عِنْدَهْ 23 سَنَةْ وَكِتْ بِقِي مَلِكْ وَ حَكَمْ تَلَاتَةْ شَهَرْ فِي مَدِينَةْ الْقُدُسْ. وَ أَمَّهْ أُسُمْهَا حَمُوطَلْ بِنَيَّةْ إِرْمِيَا مِنْ حِلَّةْ لِبْنَةْ. 32 وَ يَحَازْ سَوَّى الْفَسَالَةْ قِدَّامْ اللّٰهْ مِثِلْ جُدُودَهْ سَوَّوْه.
33 وَ فِرْعَوْن نَكُو مَلِكْ بَلَدْ مَصِرْ كَرَبَهْ وَ سَجَنَهْ فِي رِبْلَةْ بَلَدْ حَمَاتْ وَ بَتَّانْ مَا حَكَمْ فِي مَدِينَةْ الْقُدُسْ. وَ زِيَادَةْ مِنْ دَا، الْمَلِكْ نَكُو جَبَرَاهُمْ لِنَاسْ مَمْلَكَةْ يَهُوذَا يِكَفُّوا مِيرِي هَنَا 3 400 كِيلَوْ هَنَا فُضَّةْ وَ 34 كِيلَوْ هَنَا دَهَبْ. 34 وَ فِرْعَوْن نَكُو دَرَّجْ أَلِيَاقِيمْ وِلَيْد يُوشِيَّا مَلِكْ فِي بَدَلْ أَبُوهْ يُوشِيَّا وَ غَيَّرْ أُسْمَهْ وَ سَمَّاهْ يَهُويَقِمْ. وَ كَنْ لِيَحَازْ الْمَسْجُونْ كَمَانْ، وَدَّاهْ مَصِرْ وَ مَاتْ هِنَاكْ.
35 وَ يَهُويَقِمْ شَالْ الْمِيرِي مِنْ نَاسْ مَمْلَكَةْ يَهُوذَا أَشَانْ يَنْطِي لِفِرْعَوْن نَكُو الْفُضَّةْ وَ الدَّهَبْ الْهُو طَلَبَاهُمْ. وَ أَيِّ وَاحِدْ كَفَّى الْمِيرِي الْخَطَّوْه فَوْقَهْ حَسَبْ قُدُرْتَهْ وَ يَهُويَقِمْ أَنْطَاهْ لِمَلِكْ مَصِرْ.
يَهُويَقِم بِقي ملك في يَهُوذَا
36 وَ يَهُويَقِمْ عِنْدَهْ 25 سَنَةْ وَكِتْ بِقِي مَلِكْ وَ حَكَمْ 11 سَنَةْ فِي مَدِينَةْ الْقُدُسْ. وَ أَمَّهْ أُسُمْهَا زَبُودَةْ بِنَيَّةْ فَدَايَا مِنْ حِلَّةْ الرُّومَةْ. 37 وَ يَهُويَقِمْ سَوَّى الْفَسَالَةْ قِدَّامْ اللّٰهْ مِثِلْ جُدُودَهْ سَوَّوْه.
© La Bible en arabe tchadien © Alliance biblique du Tchad, 2019
