هزيمة أَبْشَلُوم
1 وَ دَاوُدْ حَسَبْ عَسْكَرَهْ الْمَعَايَهْ وَ خَطَّ لَيْهُمْ قُيَّادْ فِي آلَافْ وَ قُيَّادْ فِي مِيَاتْ. 2 وَ دَاوُدْ أَنْطَى أَمُرْ لِلْعَسْكَرْ يَمْشُوا. وَ التِّلِتْ مِنْ الْعَسْكَرْ دَا، هُو كَلَّفْ بَيَّهْ يُوَابْ وَ التِّلِتْ كَلَّفْ بَيَّهْ أَبِشَايْ وِلَيْد صَرُويَةْ الْهُو أَخُو يُوَابْ وَ التِّلِتْ كَلَّفْ بَيَّهْ إِتَّايْ الْمِنْ حِلَّةْ قَاتْ. وَ الْمَلِكْ قَالْ لِعَسْكَرَهْ: «أَنَا ذَاتِي نَمْشِي مَعَاكُو.»
3 وَ لَاكِنْ عَسْكَرَهْ قَالَوْا لَيَّهْ: «لَا! يَا سِيدْنَا الْمَلِكْ، إِنْتَ مَا تَمْشِي مَعَانَا. أَشَانْ كَنْ أَنِحْنَ عَرَّدْنَا كُلَ، نَادُمْ يَجْعَلْنَا مَا فِيهْ وَ كَنْ نُصِّنَا مَاتْ كُلَ، مَا يِجِيبُوا خَبَرْنَا. وَ إِنْتَ وِحَيْدَكْ مُهِمّ مِنْ 10 000 مِنِّنَا وَ دَا أَخَيْر لَيْنَا كَنْ تَقْعُدْ فِي الْمَدِينَةْ وَ تِجِيبْ لَيْنَا مِنْهَا الْفَزَعْ.» 4 وَ الْمَلِكْ قَالْ لَيْهُمْ: «أَنَا نِسَوِّي الشَّيّءْ التِّدَوْرُوهْ.»
وَ خَلَاصْ، الْمَلِكْ وَقَفْ فِي خَشُمْ بَابْ الْحِلَّةْ وَكِتْ كُلَّ عَسْكَرَهْ مَارْقِينْ بِمِيَاتْ وَ آلَافْ. 5 وَ هُو أَمَرْ يُوَابْ وَ أَبِشَايْ وَ إِتَّايْ وَ قَالْ لَيْهُمْ: «أَسَّهَّلَوْا مَعَ الصَّبِي أَبْشَلُومْ فِي شَانْ رَيْدِتِي لَيَّهْ.» وَ كُلَّ عَسْكَرَهْ سِمْعَوْا بِالْأَمُرْ الْمَلِكْ أَنْطَاهْ لِلْقُيَّادْ فِي سَبَبْ أَبْشَلُومْ.
6 وَ خَلَاصْ، عَسْكَرْ دَاوُدْ مَرَقَوْا فِي الْكَدَادَةْ لِيِحَارُبُوا بَنِي إِسْرَائِيلْ. وَ الْحَرِبْ بَدَا فِي الْغَابَةْ هَنَا بَلَدْ أَفْرَايِمْ. 7 وَ عَسْكَرْ بَنِي إِسْرَائِيلْ أَنْهَزَمَوْا قِدَّامْ نَاسْ دَاوُدْ. وَ فِي الْيَوْم دَا، الْهَزِيمَةْ بِقَتْ كَبِيرَةْ وَ مَاتَوْا فَوْقهَا 20 000 رَاجِلْ. 8 وَ الْحَرِبْ أَلْوَسَّعْ فِي كُلَّ الْبَلَدْ. وَ فِي الْيَوْم دَا، النَّاسْ الْكَتَلَتْهُمْ الْغَابَةْ كَتِيرِينْ زِيَادَةْ مِنْ النَّاسْ الْكَتَلَاهُمْ الْحَرِبْ.
يُوَاب كتل أَبْشَلُوم
9 وَ أَبْشَلُومْ بِغَفْلَةْ أَنْلَقَى وِجِهْ بِوِجِهْ مَعَ نَاسْ دَاوُدْ. وَ هُو رَاكِبْ فِي بَغَلْ وَ الْبَغَلْ دَا دَخَلْ تِحِتْ فِرِعْ هَنَا شَدَرَةْ بَلُّوطْ. وَ رَاسْ أَبْشَلُومْ دَخَلْ فِي مَفَارِقْ الْفِرِعْ وَ هُو قَعَدْ مُعَلَّقْ أَمْبَيْن السَّمَاءْ وَ الْأَرْض وَ الْبَغَلْ فَاتْ خَلَّاهْ.
10 وَ عَسْكَرِي وَاحِدْ شَافَهْ وَ مَشَى خَبَّرَهْ لِيُوَابْ وَ قَالْ: «دَاهُو أَنَا شِفْت أَبْشَلُومْ مُعَلَّقْ فِي فِرِعْ هَنَا شَدَرَةْ.» 11 وَ يُوَابْ قَالْ لِلرَّاجِلْ الْجَابْ لَيَّهْ الْخَبَرْ: «صَحِيحْ كَيْ، إِنْتَ شِفْتَهْ وَلَّا؟ وَ مَالَا مَا ضَرَبْتَهْ وَ كَتَلْتَهْ فِي بَكَانَهْ دَا؟ كَنْ أَوَّلْ إِنْتَ كَتَلْتَهْ، أَنَا نَنْطِيكْ 10 حَجَرْ فُضَّةْ وَ حِزَامْ.» 12 وَ الرَّاجِلْ قَالْ لِيُوَابْ: «كَنْ إِنْتَ تَنْطِينِي 1 000 حَجَرْ فُضَّةْ كُلَ، أَنَا مَا نَرْفَعْ إِيدِي وَ نَضُرْبَهْ لِوِلَيْد الْمَلِكْ. أَشَانْ أَنِحْنَ كُلِّنَا سِمِعْنَا بِأَمُرْ الْمَلِكْ الْأَنْطَاهْ لَيْك إِنْتَ وَ أَبِشَايْ وَ إِتَّايْ وَ قَالْ: ‹فَكُّرُوا فِي الصَّبِي أَبْشَلُومْ.› 13 وَ كَنْ أَنَا سَوَّيْت نَفْسِي مِثِلْ مَا سِمِعْت كَلَامَهْ وَ قَمَّيْت كَتَلْتَهْ كُلَ، الْمَلِكْ يَعَرِفْ كُلَّ شَيّءْ وَ يِعَاقِبْنِي وَ إِنْتَ ذَاتَكْ مَا تَحْمِينِي.» 14 وَ يُوَابْ قَالْ: «أَنَا مَا نِأَخِّرْ وَكْتِي مَعَاكْ.»
وَ خَلَاصْ، يُوَابْ شَالْ تَلَاتَةْ كَوْكَابْ وَ غَزَّاهُمْ فِي قَلِبْ أَبْشَلُومْ وَكِتْ هُو لِسَّاعْ حَيّ وَ مُعَلَّقْ فِي الشَّدَرَةْ. 15 وَ بَعَدْ دَا، عَشَرَةْ صُبْيَانْ الشَّايْلِينْ سِلَاحَهْ لِيُوَابْ جَوْا حَوَّقَوْه وَ تَمَّمَوْه.
16 وَ خَلَاصْ، يُوَابْ ضَرَبْ الْبُوقْ وَ عَسْكَرَهْ وَقَفَوْا مِنْ مُطَارَدَةْ بَنِي إِسْرَائِيلْ أَشَانْ هُو وَقَّفَاهُمْ. 17 وَ شَالَوْا جَنَازَةْ أَبْشَلُومْ وَ زَقَلَوْهَا فِي نُقْرَةْ فِي الْغَابَةْ وَ رَدَمَوْا فَوْقَهْ حُجَارْ. وَ كُلَّ بَنِي إِسْرَائِيلْ عَرَّدَوْا وَ أَيِّ وَاحِدْ قَبَّلْ بَيْتَهْ.
18 وَ فِي حَيَاتَهْ، أَبْشَلُومْ غَزَّ حَجَرْ الْيِذَّكَّرَوْا بَيَّهْ فِي وَادِي الْمَلِكْ وَ قَالْ: «أَنَا مَا عِنْدِي وِلَيْد الْيِشِيلْ أُسْمِي.» وَ سَمَّى الْحَجَرْ دَا بِأُسْمَهْ. وَ لَحَدِّي الْيَوْم، بِنَادُوهْ حَجَرْ أَبْشَلُومْ.
دَاوُد سِمِع بمَوْت أَبْشَلُوم
19 وَ أَخِمَاعَصْ وِلَيْد صَدُوقْ قَالْ: «مِنْ فَضْلَكْ، خَلِّينِي نَجْرِي نِخَبِّرْ الْمَلِكْ بِالْخَبَرْ الْحَلُو دَا أَشَانْ اللّٰهْ نَجَّاهْ مِنْ إِيدْ عُدْوَانَهْ.» 20 وَ يُوَابْ قَالْ لَيَّهْ: «لَا! الْيَوْم إِنْتَ مَا تِوَدِّي خَبَرْ حَلُو، تِوَدِّيهْ يَوْم آخَرْ. وَ الْخَبَرْ هَنَا الْيَوْم دَا، خَبَرْ شَيْن أَشَانْ وِلَيْد الْمَلِكْ مَاتْ.»
21 وَ يُوَابْ رَسَّلْ وَاحِدْ حَبَشِي مِنْ خَدَّامِينَهْ وَ قَالْ لَيَّهْ: «أَمْشِي خَبِّرْ الْمَلِكْ بِالشَّيّءْ الشِّفْتَهْ.» وَ خَلَاصْ، الْحَبَشِي سَجَدْ قِدَّامْ يُوَابْ وَ قَمَّ مَشَى بِجَرِي.
22 وَ بَتَّانْ أَخِمَاعَصْ وِلَيْد صَدُوقْ قَالْ لِيُوَابْ: «كَنْ شُنُو يُكُونْ لَيِّ كُلَ، خَلِّينِي نَمْشِي وَرَاءْ الْحَبَشِي دَا.» وَ يُوَابْ قَالْ لَيَّهْ: «مَالَا إِنْتَ كُلَ تَمْشِي، يَا وِلَيْدِي؟ أَشَانْ دَا مَا الْخَبَرْ الْإِنْتَ تَلْقَى فَوْقَهْ فَايْدَةْ.» 23 وَ أَخِمَاعَصْ قَالْ: «كَنْ شُنُو يُكُونْ لَيِّ كُلَ، نَمْشِي.» وَ يُوَابْ قَالْ لَيَّهْ: «أَمْشِي.»
وَ خَلَاصْ، أَخِمَاعَصْ جَرَى بِالدَّرِبْ السَّاهِلْ وَ سَبَقَهْ لِلْحَبَشِي. 24 وَ فِي الْوَكِتْ دَا، دَاوُدْ قَاعِدْ أَمْبَيْنَاتْ الْبِيبَانْ الْإِتْنَيْن هَنَا الْحِلَّةْ. وَ الْحَرَسْ كَمَانْ قَاعِدْ فِي بَكَانْ وَاحِدْ بِفَوْق لِلْبَابْ وَ دَا بَكَانْ الْيَقْعُدْ فَوْقَهْ الْحَرَسْ. وَ الْحَرَسْ شَافْ رَاجِلْ جَارِي جَايِ وِحَيْدَهْ. 25 وَ الْحَرَسْ نَادَى لِيِخَبِّرْ الْمَلِكْ. وَ الْمَلِكْ قَالْ لَيَّهْ: «كَنْ هُو جَايِ وِحَيْدَهْ دَا، يِوَصِّفْ كَدَرْ يِجِيبْ خَبَرْ حَلُو.» وَ الرَّاجِلْ قَاعِدْ يِقَرِّبْ لَيْهُمْ.
26 وَ الْحَرَسْ شَافْ نَادُمْ آخَرْ جَارِي جَايِ وِحَيْدَهْ وَ نَادَى حَارِسْ الْبِيبَانْ وَ قَالْ: «دَاهُو نَادُمْ آخَرْ جَارِي جَايِ وِحَيْدَهْ.» وَ الْمَلِكْ قَالْ: «هُو دَا كُلَ جَايِبْ خَبَرْ حَلُو.» 27 وَ الْحَرَسْ قَالْ بَتَّانْ: «أَنَا عِرِفْت الرَّاجِلْ الْأَوَّلْ دَا مِنْ جَرِيهْ وَ هُو أَخِمَاعَصْ وِلَيْد صَدُوقْ.» وَ الْمَلِكْ قَالْ: «هُو دَا رَاجِلْ هَنَا خَيْر جَايِ يِجِيبْ خَبَرْ حَلُو بِلْحَيْن.»
28 وَ وَكِتْ أَخِمَاعَصْ وَصَّلْ بَكَانْ الْمَلِكْ، هُو قَالْ: «السَّلَامْ عَلَيْك!» وَ وَقَعْ فِي الْأَرْض وَ سَجَدْ قِدَّامْ الْمَلِكْ وَ قَالْ: «يَا سِيدِي الْمَلِكْ، نِبَارِكْ اللّٰهْ إِلٰـهَكْ السَّلَّمْ لَيْك النَّاسْ الْأَتْمَرَّدَوْا ضِدَّكْ.» 29 وَ الْمَلِكْ قَالْ: «وَ كِكَّيْف حَالَةْ الصَّبِي أَبْشَلُومْ؟» وَ أَخِمَاعَصْ قَالْ لِلْمَلِكْ: «أَنَا شِفْت النَّاسْ بَرْجَلَوْا بِزِيَادَةْ وَكِتْ يُوَابْ رَسَّلْ أَنَا عَبْدَكْ. وَ لَاكِنْ أَنَا مَا نَعَرْفَهْ شُنُو كَانْ.» 30 وَ الْمَلِكْ قَالْ لَيَّهْ: «كِسّ وَ أَقْعُدْ هِنِي.» وَ أَخِمَاعَصْ كَسَّ وَ قَعَدْ يَرْجَى.
31 وَ خَلَاصْ، الْحَبَشِي جَاءْ وَ قَالْ لِلْمَلِكْ: «أَنَا جِبْت لِسِيدِي الْمَلِكْ خَبَرْ حَلُو، الْيَوْم اللّٰهْ سَلَّمَاكْ مِنْ إِيدْ عُدْوَانَكْ الْقَمَّوْا ضِدَّكْ.» 32 وَ الْمَلِكْ قَالْ: «وَ كِكَّيْف حَالَةْ الصَّبِي أَبْشَلُومْ؟» وَ الْحَبَشِي قَالْ: «يَا سِيدِي الْمَلِكْ، كُلَّ عُدْوَانَكْ وَ كُلَّ النَّاسْ الْقَمَّوْا ضِدَّكْ لِيِسَوُّوا لَيْك الْفَسَالَةْ، خَلِّي يَبْقَوْا مِثِلْ الصَّبِي دَا.»
33 وَ خَلَاصْ، الْمَلِكْ بَرْجَلْ وَ طَلَعْ فِي الْقَصِرْ الْقَاعِدْ فِي خَشُمْ بَابْ الْحِلَّةْ وَ دَخَلْ فِي غُرْفَةْ وَ قَمَّ يَبْكِي. وَ يُرُوغْ وَ يُقُولْ: «يَا وِلَيْدِي أَبْشَلُومْ! هَايْ وِلَيْدِي! يَا وِلَيْدِي أَبْشَلُومْ، مَالَا أَنَا مَا مُتّْ فِي بَدَلَكْ! هَايْ وِلَيْدِي أَبْشَلُومْ، يَا وِلَيْدِي!»
© La Bible en arabe tchadien © Alliance biblique du Tchad, 2019
