دَاوُد قدّم آخِر كلامه
1 دَاهُو آخِرْ كَلَامْ دَاوُدْ.
دَا كَلَامْ دَاوُدْ وِلَيْد يَسَّى،
كَلَامْ الرَّاجِلْ الْعَظِيمْ.
هُو الْاللّٰهْ إِلٰـهْ يَعْقُوبْ مَسَحَهْ وَ دَرَّجَهْ مَلِكْ
وَ هُو شَاعِرْ الْكُلَّ بَنِي إِسْرَائِيلْ يِحِبُّوهْ وَ يِكَرُّمُوهْ.
2 وَ هُو قَالْ:
«رُوحْ اللّٰهْ حَجَّى بِوَاسِطَتِي
وَ كَلَّمْ بِخَشْمِي.
3 اللّٰهْ إِلٰـهْ بَنِي إِسْرَائِيلْ حَجَّى،
أَيْوَى، مَلْجَأْ بَنِي إِسْرَائِيلْ قَالْ لَيِّ:
‹الْمَلِكْ الْيَحْكِمْ بِالْعَدَالَةْ
وَ يُقُودْ النَّاسْ بِخَوْف اللّٰهْ،
4 هُو بَسْ مِثِلْ ضَيّ الصَّبَاحْ
فِي طَلُوعْ الْحَرَّايْ بَلَا سَحَابْ
وَ مِثِلْ نُورْ الْيِقَوِّمْ الْخَضَارْ
بَعَدْ الْمَطَرَةْ.›
5 «وَ دَاهُو الشَّيّءْ الرَّبّ سَوَّاهْ
مَعَايِ أَنَا وَ مَعَ ذُرِّيّتِي،
هُو سَوَّى مَعَايِ مُعَاهَدَةْ دَايْمَةْ
وَ كَامِلَةْ وَ مَضْمُونَةْ.
وَ فِي أَيِّ شَيّءْ، هُو يِنَجِّينِي
وَ يِحَقِّقْ مُنَى قَلْبِي.
6 وَ لَاكِنْ كُلَّ النَّاسْ الْمَا نَافْعِينْ،
هُمَّنْ مِثِلْ فِرِعْ عِنْدَهْ شَوْك الْيَزْقُلُوهْ بَعِيدْ
وَ مَا يِنْكَرِبْ بِإِيدْ سَاكِتْ.
7 وَ النَّادُمْ الْيِدَوْر يِلَمِّسَهْ،
وَاجِبْ يِشِيلْ فَاسْ أَوْ عُودْ حَرْبَةْ
حَتَّى يُكُرَّهْ وَ يَزْقُلَهْ فِي النَّارْ
وَ يُتُشَّهْ.»
الفُرّاس المعْروفين هنا دَاوُد
8 دَاهُو أَسَامَيْ فُرَّاسْ دَاوُدْ. الْأَوَّلَانِي يِشَبَالْ مِنْ حِلَّةْ حَكْمُونْ وَ هُو قَايِدْ هَنَا الْفُرَّاسْ دَوْل. وَ أُسْمَهْ الْآخَرْ عَدِينُو مِنْ حِلَّةْ عَصْنُو. وَ هُو بَسْ الْكَتَلْ 800 رَاجِلْ فِي الدُّوَاسْ فِي يَوْم وَاحِدْ.
9 وَ التَّانِي أَلِعَازَرْ وِلَيْد دُودُو مِنْ حِلَّةْ أَخُوخْ. هُو كُلَ فَارِسْ مِنْ الْفُرَّاسْ التَّلَاتَةْ الْمَشَوْا مَعَ دَاوُدْ وَ وَقَفَوْا ضِدّ الْفِلِسْطِيِّينْ اللَّمَّوْا لِلْحَرِبْ. كُلَّ رُجَالْ بَنِي إِسْرَائِيلْ أَنْسَحَبَوْا 10 وَ لَاكِنْ أَلِعَازَرْ قَعَدْ ثَابِتْ وَ كَتَلْ الْفِلِسْطِيِّينْ لَحَدِّي إِيدَهْ خِدْرَتْ وَ بِقَتْ قَوِيَّةْ فِي سَيْفَهْ. وَ فِي الْيَوْم دَا، اللّٰهْ أَنْطَى نَصُرْ كَبِيرْ لِبَنِي إِسْرَائِيلْ. وَ بَنِي إِسْرَائِيلْ قَبَّلَوْا لِأَلِعَازَرْ أَشَانْ يِشِيلُوا الْكَسِيبَةْ بَسْ.
11 وَ التَّالِتْ شَمَّا وِلَيْد آقِي مِنْ حِلَّةْ هَرَارْ. الْفِلِسْطِيِّينْ لَمَّوْا عَسْكَرْهُمْ فِي حِلَّةْ لَاحِي وَ فِي الْبَكَانْ دَا، فِيَّهْ زَرَعْ هَنَا عَدَسْ. وَ رُجَالْ بَنِي إِسْرَائِيلْ عَرَّدَوْا مِنْ الْفِلِسْطِيِّينْ 12 وَ لَاكِنْ شَمَّا وَاقِفْ فِي لُبّ الزَّرَعْ دَا وَ مِنْ هِنَاكْ، مَرَقْ وَ حَارَبَاهُمْ لِلْفِلِسْطِيِّينْ. وَ اللّٰهْ أَنْطَى نَصُرْ كَبِيرْ لِبَنِي إِسْرَائِيلْ.
13 وَ يَوْم وَاحِدْ فِي وَكْت الْقَطِعْ، تَلَاتَةْ مِنْ الْفُرَّاسْ التَّلَاتِينْ هَنَا دَاوُدْ جَوْا لِقَوْه لِدَاوُدْ فِي كَرْكُورْ عَدُلَّامْ. وَ فِي الْوَكِتْ دَا، الْفِلِسْطِيِّينْ لَمَّوْا عَسْكَرْهُمْ وَ قَعَدَوْا فِي وَادِي رَفَايِينْ. 14 وَ دَاوُدْ مَشَى لَجَأْ فِي بَكَانَهْ الْقَوِي. وَ فِي الْوَكِتْ دَا، فِلِسْطِيِّينْ وَاحِدِينْ قَاعِدِينْ فِي مُعَسْكَرْهُمْ فِي بَيْت لَحَمْ. 15 وَ طَوَّالِي، دَاوُدْ أَتْمَنَّى وَ قَالْ: «يَاتُو يِجِيبْ لَيِّ أَلْمِي نَشْرَبْ مِنْ الْبِيرْ الْقَاعِدَةْ فِي مَدَخَلْ بَيْت لَحَمْ؟» 16 وَ خَلَاصْ، الْفُرَّاسْ التَّلَاتَةْ مَشَوْا دَخَلَوْا فِي مُعَسْكَرْ الْفِلِسْطِيِّينْ وَ شَالَوْا أَلْمِي مِنْ الْبِيرْ الْقَاعِدَةْ فِي مَدَخَلْ بَيْت لَحَمْ وَ جَابَوْه وَ أَنْطَوْه لِدَاوُدْ. وَ هُو أَبَى مَا يَشَرْبَهْ وَ لَاكِنْ قَدَّمَهْ هَدِيَّةْ شَرَابْ لِلّٰهْ. 17 وَ قَالْ: «إِسْتَغْفَرْ اللّٰهْ! أَبَداً مَا نِسَوِّي شَيّءْ مِثِلْ دَا! مَا نَشْرَبْ مِنْ الْأَلْمِي دَا أَشَانْ هُو مِثِلْ دَمّ الرُّجَالْ الْمَشَوْا جَابَوْه بِتَمَنْ حَيَاتْهُمْ.» وَ دَاوُدْ أَبَى مَا يَشْرَبْ الْأَلْمِي دَا. وَ دَا الشَّيّءْ السَّوَّوْه الْفُرَّاسْ التَّلَاتَةْ دَوْل.
18 وَ أَبِشَايْ أَخُو يُوَابْ وِلَيْدهَا لِصَرُويَةْ، هُو قَايِدْ التَّلَاتَةْ. وَ يَوْم وَاحِدْ، هُو بَسْ بِحَرِبْتَهْ كَتَلْ 300 رَاجِلْ. وَ أُسْمَهْ بِقِي طَالِعْ أَمْبَيْن الْفُرَّاسْ التَّلَاتَةْ دَوْل. 19 وَ هُو لِقِي شَرَفْ زِيَادَةْ مِنْ التَّلَاتَةْ وَ بِقِي قَايِدْهُمْ. وَ مَا فِي الْيُفُوتَهْ أَمْبَيْن الْفُرَّاسْ التَّلَاتَةْ.
20 وَ بَنَايَا الْمِنْ حِلَّةْ قَبْصِيلْ، هُو وِلَيْد يَهُويَدَعْ رَاجِلْ وَاحِدْ فَحَلْ. وَ بَنَايَا دَا، هُو ذَاتَهْ فَحَلْ وَ شَدِيدْ. دَا هُو بَسْ الْكَتَلْ رُجَالْ إِتْنَيْن فَحَلِينْ هَنَا بَلَدْ مُوَابْ. وَ يَوْم وَاحِدْ وَكِتْ التَّلَجْ نَزَلْ، هُو دَخَلْ فِي نُقْرَةْ وَ كَتَلْ دُودْ. 21 وَ بَتَّانْ هُو بَسْ كَتَلْ مَصْرِي الشَّوْفتَهْ تِخَوِّفْ. وَ الْمَصْرِي دَا قَاعِدْ بِحَرِبْتَهْ فِي إِيدَهْ وَ بَنَايَا مَشَى لَيَّهْ هَجَمَهْ بِعَصَاةْ وَ قَلَعْ مِنَّهْ حَرِبْتَهْ وَ كَتَلَهْ بَيْهَا. 22 وَ دَوْل الْأَعْمَالْ السَّوَّاهُمْ بَنَايَا وِلَيْد يَهُويَدَعْ وَ أُسْمَهْ بِقِي طَالِعْ مِثِلْ الْفُرَّاسْ التَّلَاتَةْ. 23 وَ هُو لِقِي شَرَفْ زِيَادَةْ مِنْ التَّلَاتِينْ وَ لَاكِنْ مَا لِحِقْ التَّلَاتَةْ. وَ دَاوُدْ خَطَّاهْ مَسْؤُولْ حَرَسَهْ.
24 وَ الرُّجَالْ التَّلَاتِينْ هَنَا دَاوُدْ هُمَّنْ
عَسَاحِيلْ أَخُو يُوَابْوَ أَلِحَنَانْ وِلَيْد دُودُو مِنْ بَيْت لَحَمْ25 وَ شَمَّا وَ أَلِيقَا، هُمَّنْ دَوْل مِنْ حِلَّةْ حَرُودْ26 وَ حَالَصْ مِنْ حِلَّةْ فَلِطْوَ عِيرَا وِلَيْد عِقَيْش مِنْ حِلَّةْ تَقُوعَةْ27 وَ أَبِعَازَرْ مِنْ حِلَّةْ عَنَتُوتْوَ مَبُنَّايْ مِنْ حِلَّةْ حُوشَى28 وَ سَلْمُونْ مِنْ حِلَّةْ أَخُوخْوَ مَهْرَايْ مِنْ حِلَّةْ نَطُوفَا29 وَ غَالِبْ وِلَيْد بَعَنَى مِنْ حِلَّةْ نَطُوفَاوَ إِتَّايْ وِلَيْد رِيبَايْ مِنْ حِلَّةْ قِبَيْعَةْ فِي أَرْض قَبِيلَةْ بَنْيَامِينْ30 وَ بَنَايَا مِنْ حِلَّةْ فِرْعَتُونْوَ هِدَّايْ مِنْ وَادِي قَعَشْ31 وَ أَبِعَلْبُونْ مِنْ حِلَّةْ عَرَبَةْوَ عَزْمَاوَتْ مِنْ حِلَّةْ بَرْحُمْ32 وَ أَلِيَحْبَا مِنْ حِلَّةْ شَعَلْبُونْوَ وَاحِدْ مِنْ أَوْلَادْ يَاشِنْوَ يُونَتَانْ33 وَ شَمَّا مِنْ حِلَّةْ هَرَارْوَ أَخِيَامْ وِلَيْد شَرَارْ مِنْ حِلَّةْ هَرَارْ34 وَ أَلِفَالَطْ وِلَيْد أَحَسْبَايْ وِلَيْد رَاجِلْ وَاحِدْ مِنْ حِلَّةْ مَعَاكَةْوَ أَلِعَامْ وِلَيْد أَخِتُوفَلْ مِنْ حِلَّةْ قِيلُو35 وَ حَصْرَايْ مِنْ حِلَّةْ كَرْمَلْوَ فَعَرَايْ مِنْ حِلَّةْ عَرَبْ36 وَ يِقَالْ وِلَيْد نَاتَانْ مِنْ حِلَّةْ صُوبَةْوَ بَانِي مِنْ قَبِيلَةْ قَادْ37 وَ سَلَخْ مِنْ بَنِي عَمُّونْوَ نَحْرَايْ مِنْ حِلَّةْ بِيرُوتْ، هُو الشَّايِلْ سِلَاحْ يُوَابْ وِلَيْدهَا لِصَرُويَةْ38 وَ عِيرَا وَ قَارِبْ كُلُّهُمْ مِنْ عَايِلَةْ يِتْرِي39 وَ أُرِيَّا الْحِتِّي.دَوْل كُلُّهُمْ كَيْ فُرَّاسْ دَاوُدْ وَ عَدَدْهُمْ 37.
© La Bible en arabe tchadien © Alliance biblique du Tchad, 2019
