إِشْبُوشَت كتلوه
1 وَ وَكِتْ إِشْبُوشَتْ وِلَيْد شَاوُولْ سِمِعْ كَدَرْ أَبْنِيرْ مَاتْ فِي حِبْرُونْ، هُو أَنْبَهَتْ مَرَّةْ وَاحِدْ. وَ كُلَّ بَنِي إِسْرَائِيلْ أَنْبَهَتَوْا. 2 وَ إِشْبُوشَتْ عِنْدَهْ كُبَارَاتْ عَسْكَرْ إِتْنَيْن. الْوَاحِدْ أُسْمَهْ بَعَنَى وَ التَّانِي أُسْمَهْ رِكَابْ. وَ هُمَّنْ عِيَالْ رِمُّونْ الْمِنْ حِلَّةْ بِيرُوتْ مِنْ قَبِيلَةْ بَنْيَامِينْ. وَ حِلَّةْ بِيرُوتْ مَحْسُوبَةْ لِتُرَابْ بَنْيَامِينْ. 3 وَ زَمَانْ، نَاسْ حِلَّةْ بِيرُوتْ عَرَّدَوْا وَ مَشَوْا حِلَّةْ قِتَايِمْ وَ قَعَدَوْا هِنَاكْ لَحَدِّي الْيَوْم.
4 وَ يُونَتَانْ وِلَيْد شَاوُولْ عِنْدَهْ وِلَيْد رِجِلَيْنَهْ مَاتَوْا. وَ دَا حَصَلْ وَكِتْ جَابَوْا خَبَرْ مَوْت شَاوُولْ وَ يُونَتَانْ مِنْ حِلَّةْ يَزْرَعِيلْ. وَ فِي الْوَكِتْ دَاكْ، الْوِلَيْد عِنْدَهْ خَمْسَةْ سَنَةْ. وَ الْمَرَةْ التَّكُرْبَهْ شَالَتَهْ وَ مُعَرِّدَةْ بَيَّهْ وَ مِنْ السَّعْجَالْ، هُو وَقَعْ مِنْهَا. وَ بِسَبَبْ دَا، رِجِلَيْنَهْ مَاتَوْا. وَ الْوِلَيْد دَا أُسْمَهْ مَفِيبُشَتْ.
5 وَ رِكَابْ وَ بَعَنَى عِيَالْ رِمُّونْ الْمِنْ حِلَّةْ بِيرُوتْ مَشَوْا بَكَانْ إِشْبُوشَتْ وَكِتْ الْحَرَّايْ حَامِيَةْ. وَ هُو رَاقِدْ يِنْجَمَّ. 6 وَ هُمَّنْ دَخَلَوْا فِي الْبَيْت مِثِلْ يِدَوْرُوا يِشِيلُوا قَمَحْ وَ طَعَنَوْه فِي بَطْنَهْ وَ كَتَلَوْه. وَ بَعَدْ دَا، رِكَابْ وَ أَخُوهْ بَعَنَى عَرَّدَوْا. 7 وَ وَكِتْ دَخَلَوْا فِي الْبَيْت، لِقَوْه رَاقِدْ فِي سَرِيرَهْ فِي لُبّ بَيْتَهْ قَاعِدْ يِنْجَمَّ. وَ خَلَاصْ، طَعَنَوْه كَتَلَوْه وَ قَطَعَوْا رَاسَهْ وَ عَرَّدَوْا بَيَّهْ.
وَ هُمَّنْ رَاغَوْا طُولْ اللَّيْل فِي الدَّرِبْ الْمَاشِي وَادِي الْأُرْدُنْ. 8 وَ جَابَوْا رَاسْ إِشْبُوشَتْ لِدَاوُدْ فِي حِبْرُونْ وَ قَالَوْا لَيَّهْ: «يَا سِيدْنَا الْمَلِكْ، فِي شَانَكْ إِنْتَ الْيَوْم اللّٰهْ عَاقَبْ شَاوُولْ وَ ذُرِّيّتَهْ. وَ هَسَّعْ دَا، دَاهُو رَاسْ إِشْبُوشَتْ وِلَيْد شَاوُولْ، عَدُوكْ الدَّوَّرْ يَكْتُلَكْ.»
9 وَ دَاوُدْ رَدَّ لِرِكَابْ وَ أَخُو بَعَنَى عِيَالْ رِمُّونْ الْمِنْ حِلَّةْ بِيرُوتْ وَ قَالْ لَيْهُمْ: «نَحْلِفْ بِاللّٰهْ الْحَيّ الْفَدَانِي مِنْ كُلَّ شَيّءْ فَسِلْ! 10 أَنَا نُقُولْ لَيْكُو، زَمَانْ نَادُمْ وَاحِدْ خَبَّرَانِي بِمَوْت شَاوُولْ وَ هُو يَحْسِبْ جَابْ لَيِّ خَبَرْ حَلُو. لَاكِنْ أَنَا كَرَبْتَهْ وَ كَتَلْتَهْ فِي صِقْلَاقْ. وَ دِي نَتِيجَةْ الْخَبَرْ الْهُو جَابَهْ. 11 وَ لَاكِنْ إِنْتُو دَوْل فَسْلِينْ مَرَّةْ وَاحِدْ. كَتَلْتُوا لَيْكُو نَادُمْ صَالِحْ فِي لُبّ بَيْتَهْ فِي سَرِيرَهْ! وَ بِسَبَبْ الدِّمَّةْ دِي، أَنَا نِعَاقِبْكُو وَ نُقُشُّكُو مِنْ الْأَرْض.»
12 وَ دَاوُدْ أَمَرْ نَاسَهْ يَكْتُلُوا رِكَابْ وَ بَعَنَى. وَ هُمَّنْ كَتَلَوْهُمْ وَ قَطَعَوْا إِيدَيْهُمْ وَ رِجْلَيْهُمْ وَ عَلَّقَوْا جِثَثُّهُمْ جَنْب الرَّهَدْ الْفِي حِبْرُونْ. وَ لَاكِنْ رَاسْ إِشْبُوشَتْ كَمَانْ، شَالَوْه وَ دَفَنَوْه فِي قَبُرْ أَبْنِيرْ فِي حِبْرُونْ.
© La Bible en arabe tchadien © Alliance biblique du Tchad, 2019
