دَاوُد دوّر يجيب صنْدوق اللّه
1 وَ دَاوُدْ لَمَّ بَتَّانْ 30 000 رَاجِلْ مِنْ أَحْسَنْ الْمُحَارِبِينْ هَنَا بَنِي إِسْرَائِيلْ. 2 وَ قَمَّ مَعَ كُلَّ النَّاسْ دَوْل وَ مَشَوْا حِلَّةْ بَعْلَةْ يَهُوذَا أَشَانْ يِجِيبُوا مِنْ هِنَاكْ صَنْدُوقْ الرَّبّ. وَ دَا الصَّنْدُوقْ الْفَوْقَهْ أُسُمْ اللّٰهْ الْقَادِرْ، هُو الْعَرْشَهْ قَاعِدْ بَيْن الْمَخْلُوقِينْ السَّمَاوِيِّينْ الْمَصْنُوعِينْ فِي سِدَادَةْ الصَّنْدُوقْ. 3 وَ هُمَّنْ شَالَوْا صَنْدُوقْ الرَّبّ مِنْ بَيْت أَبِنَدَابْ الْقَاعِدْ فِي رَاسْ الْحَجَرْ وَ خَطَّوْه فِي كَارَّوْ جَدِيدْ. وَ أَوْلَادْ أَبِنَدَابْ، عُزَّى وَ أَخْيُو، قَادَوْا الْكَارَّوْ 4 الْقَاعِدْ فَوْقَهْ صَنْدُوقْ الرَّبّ وَ أَخْيُو مَاشِي قِدَّامَهْ. 5 وَ دَاوُدْ وَ كُلَّ بَنِي إِسْرَائِيلْ قَاعِدِينْ يَلْعَبَوْا قِدَّامْ صَنْدُوقْ اللّٰهْ فِي حِسّ آلَاتْ السَّوَّوْهُمْ بِحَطَبْ السَّرْوِي مِثِلْ الْجِقِنْدِيَّةْ وَ أَمْ سِبَيْبَةْ وَ التَّنْبَلْ وَ الْبُخْسَةْ وَ النُّقَّارَةْ. 6 وَ وَكِتْ وَصَّلَوْا فِي الْمَدَقّ هَنَا نَاكُونْ، الْبَقَرْ أَتَّرْتَعَوْا وَ عُزَّى مَدَّ إِيدَهْ وَ كَرَبْ صَنْدُوقْ الرَّبّ. 7 وَ اللّٰهْ غِضِبْ غَضَبْ شَدِيدْ ضِدّ عُزَّى وَ طَوَّالِي ضَرَبَهْ أَشَانْ خَطَايَهْ. وَ عُزَّى وَقَعْ مَاتْ هِنَاكْ جَنْب صَنْدُوقْ الرَّبّ.
8 وَ دَاوُدْ زِعِلْ زَعَلْ شَدِيدْ أَشَانْ اللّٰهْ غِضِبْ ضِدّ عُزَّى وَ ضَرَبَهْ. وَ سَمَّى الْبَكَانْ دَا فَارَصْ عُزَّى (مَعَنَاتَهْ ضَرَبْ عُزَّى) وَ الْأُسُمْ دَا قَاعِدْ لَحَدِّي الْيَوْم. 9 وَ فِي الْيَوْم دَا، دَاوُدْ خَافْ خَوْف شَدِيدْ مِنْ اللّٰهْ وَ قَالْ: «كَنْ كَيْ دَا، كِكَّيْف نَقْدَرْ نِجِيبْ صَنْدُوقْ اللّٰهْ فِي بَيْتِي؟»
10 وَ دَاوُدْ أَبَى مَا يِوَدِّي صَنْدُوقْ اللّٰهْ فِي بَيْتَهْ فِي مَدِينَةْ دَاوُدْ. وَ لَاكِنْ وَدَّاهْ فِي بَيْت عُبَيْد أَدَوْم الْمِنْ حِلَّةْ قَاتْ. 11 وَ صَنْدُوقْ اللّٰهْ قَعَدْ تَلَاتَةْ شَهَرْ فِي بَيْت عُبَيْد أَدَوْم. وَ اللّٰهْ بَارَكْ عُبَيْد أَدَوْم وَ كُلَّ عَايِلْتَهْ.
صنْدوق اللّه وصّل في أُورُشَلِيم
12 وَ جَوْا خَبَّرَوْه لِلْمَلِكْ دَاوُدْ كَدَرْ اللّٰهْ بَارَكْ عُبَيْد أَدَوْم وَ كُلَّ عَايِلْتَهْ وَ أَيِّ شَيّءْ الْعِنْدَهْ أَشَانْ صَنْدُوقْ الرَّبّ قَاعِدْ فِي بَيْتَهْ. وَ خَلَاصْ، دَاوُدْ قَمَّ مَشَى شَالْ صَنْدُوقْ الرَّبّ مِنْ بَيْت عُبَيْد أَدَوْم وَ وَدَّاهْ فِي مَدِينَةْ دَاوُدْ بِفَرَحْ. 13 وَ وَكِتْ النَّاسْ الشَّالَوْا صَنْدُوقْ اللّٰهْ يِسَوُّوا سِتَّةْ خَطْوَةْ، دَاوُدْ يَدْبَحْ تَوْر وَ عِجِلْ سَمِينْ. 14 وَ دَاوُدْ قَاعِدْ يَلْعَبْ بِكُلَّ قُدُرْتَهْ قِدَّامْ اللّٰهْ وَ لَابِسْ خَلَقْ قِصَيِّرْ مِثِلْ رُجَالْ الدِّينْ. 15 دَاوُدْ وَ كُلَّ بَنِي إِسْرَائِيلْ وَدَّوْا صَنْدُوقْ اللّٰهْ فِي أُورُشَلِيمْ بِزَغْرَاطْ وَ ضَرِبِينْ بُوقْ. 16 وَ وَكِتْ جَابَوْا صَنْدُوقْ اللّٰهْ فِي مَدِينَةْ دَاوُدْ، مِكَالْ بِنَيَّةْ شَاوُولْ قَاعِدَةْ تِشِيفْ مِنْ الشُّبَّاكْ وَ هِي شَافَتْ الْمَلِكْ دَاوُدْ قَاعِدْ يَلْعَبْ وَ يِنَطِّطْ قِدَّامْ اللّٰهْ. وَ خَلَاصْ، هِي أَبَتَهْ مِنْ دَاخِلْ قَلِبْهَا.
17 وَ هُمَّنْ جَابَوْا صَنْدُوقْ اللّٰهْ وَ خَطَّوْه فِي بَكَانَهْ فِي لُبّ الْخَيْمَةْ الدَّاوُدْ جَهَّزَاهَا لَيَّهْ. وَ بَعَدْ دَا، دَاوُدْ قَدَّمْ لِلّٰهْ ضَحَايَا مُحَرَّقِينْ وَ ضَحَايَا سَلَامَةْ. 18 وَ وَكِتْ دَاوُدْ قَدَّمْ الضَّحَايَا الْمُحَرَّقِينْ وَ ضَحَايَا السَّلَامَةْ دَوْل خَلَاصْ، هُو بَارَكْ بَنِي إِسْرَائِيلْ بِأُسُمْ اللّٰهْ الْقَادِرْ. 19 وَ بَعَدْ دَا، دَاوُدْ قَسَّمْ أَكِلْ لِكُلَّ شَعَبْ بَنِي إِسْرَائِيلْ، مَرَةْ وَ رَاجِلْ. لِأَيِّ وَاحِدْ، أَنْطَاهْ خُبْزَةْ وَ عَبُّودْ هَنَا تَمُرْ وَ عَبُّودْ هَنَا عِنَبْ. وَ خَلَاصْ، كُلَّ الشَّعَبْ شَتَّوْا وَ أَيِّ وَاحِدْ قَبَّلْ بَيْتَهْ.
20 وَ دَاوُدْ قَبَّلْ بَيْتَهْ لِيِبَارِكْ عَايِلْتَهْ. وَ مِكَالْ بِنَيَّةْ شَاوُولْ مَرَقَتْ تِلَاقِيهْ وَ قَالَتْ: «دَا مَا عَيْب لَيْك إِنْتَ مَلِكْ بَنِي إِسْرَائِيلْ؟ الْيَوْم خَلَّيْت جِلْدَكْ عَرْيَانْ قِدَّامْ خَدَّامَاتْ نَاسَكْ مِثِلْ نَادُمْ الْمَا يَنْفَعْ يِسَوِّيهْ!» 21 وَ دَاوُدْ قَالْ لِمِكَالْ: «أَنَا سَوَّيْت الشَّيّءْ دَا قِدَّامْ اللّٰهْ الْعَزَلَانِي أَنَا أَخَيْر مِنْ أَبُوكِ وَ عَايِلْتَهْ. وَ سَوَّانِي كَبِيرْ هَنَا شَعَبَهْ بَنِي إِسْرَائِيلْ. وَ أَنَا نَفْرَحْ بَتَّانْ زِيَادَةْ قِدَّامْ اللّٰهْ. 22 أَيْوَى! كَنْ تِعَيِّرِينِي وَ تِعَيِّبِينِي كُلَ، نَفْرَحْ. وَ لَاكِنْ الْخَدَّامَاتْ دَيْل يِشَرِّفَنِّي.»
23 وَ مِكَالْ بِنَيَّةْ شَاوُولْ مَا لِقَتْ صَغِيرْ لَحَدِّي مَاتَتْ.
© La Bible en arabe tchadien © Alliance biblique du Tchad, 2019
