دَاوُد أنّصر في جيرانه
1 وَ بَعَدْ دَا، دَاوُدْ حَارَبْ الْفِلِسْطِيِّينْ وَ أَنَّصَرْ فَوْقهُمْ. وَ قَلَعْ سُلْطَةْ حُكُمْهُمْ. 2 هُو أَنَّصَرْ فِي نَاسْ مُوَابْ وَ رَقَّدَاهُمْ فِي الْأَرْض وَ قَاوَسَاهُمْ بِحَبِلْ. وَ خَطَّاهُمْ بِمَجْمُوعَاتْ وَ فِي أَيِّ تَلَاتَةْ مَجْمُوعَةْ، يَكْتُلْ مَجْمُوعْتَيْن. وَ نَاسْ بَلَدْ مُوَابْ قَعَدَوْا تِحِتْ حُكُمْ دَاوُدْ وَ يِكَفُّوا مِيرِي.
3 وَ دَاوُدْ أَنَّصَرْ فِي هَدَدْعَازَرْ وِلَيْد رَحُوبْ مَلِكْ صُوبَةْ. وَ دَا فِي الْوَكِتْ الْهَدَدْعَازَرْ دَوَّرْ يِشِيلْ بَتَّانْ مَنْطَقَةْ بَحَرْ الْفُرَاتْ. 4 وَ دَاوُدْ كَرَبْ مِنْ هَدَدْعَازَرْ 1 700 مَسَاجِينْ مِنْ سِيَادْ الْخَيْل وَ 20 000 عَسْكَرْ مَاشِينْ بِرِجْلَيْهُمْ. وَ هُو قَطَّعْ عَرَاقِيبْ هَنَا الْخَيْل الْيُكُرُّوا عَرَبَاتْ الْحَرِبْ وَ خَلَّى مِنْهُمْ إِلَّا 100 خَيْل. 5 وَ نَاسْ بَلَدْ أَرَامْ جَوْا مِنْ دِمَشْق لِيَفْزَعَوْا لِهَدَدْعَازَرْ مَلِكْ صُوبَةْ. وَ لَاكِنْ دَاوُدْ كَتَلْ مِنْ نَاسْ أَرَامْ 22 000 رَاجِلْ. 6 وَ دَاوُدْ خَطَّ مُحَافِظِينْ فِي الْأَرَامِيَّيْن الْقَاعِدِينْ تِحِتْ حُكُمْ مَدِينَةْ دِمَشْق. وَ الْأَرَامِيَّيْن قَعَدَوْا تِحِتْ حُكُمْ دَاوُدْ وَ قَاعِدِينْ يِكَفُّوا مِيرِي. وَ اللّٰهْ أَنْطَى النَّصُرْ لِدَاوُدْ فِي أَيِّ بَكَانْ الْيَمْشِي فَوْقَهْ. 7 وَ دَاوُدْ قَلَعْ دَرَقْ هَنَا دَهَبْ مِنْ حُرَّاسْ هَدَدْعَازَرْ وَ وَدَّاهُمْ أُورُشَلِيمْ. 8 وَ مِنْ بَاطَحْ وَ بِيرُوتَايْ حِلَّالْ هَدَدْعَازَرْ، الْمَلِكْ دَاوُدْ قَلَعْ نَحَاسْ كَتِيرْ.
9 وَ تُوعِي مَلِكْ بَلَدْ حَمَاتْ سِمِعْ كَدَرْ دَاوُدْ أَنَّصَرْ فِي كُلَّ عَسْكَرْ هَدَدْعَازَرْ. 10 خَلَاصْ، رَسَّلْ وِلَيْدَهْ يُورَامْ لِيِسَلِّمَهْ وَ يَشْكُرَهْ أَشَانْ دَاوُدْ حَارَبْ هَدَدْعَازَرْ وَ أَنَّصَرْ فَوْقَهْ. وَ قُبَّالْ دَا، تُوعِي وَ هَدَدْعَازَرْ هُمَّنْ عُدْوَانْ. وَ يُورَامْ وِلَيْد تُوعِي جَابْ لِدَاوُدْ مُعِدَّاتْ كَتِيرِينْ هَنَا فُضَّةْ وَ دَهَبْ وَ نَحَاسْ.
11 وَ الْمُعِدَّاتْ الْجَابَاهُمْ لَيَّهْ دَوْل، دَاوُدْ خَصَّصَاهُمْ لِلّٰهْ. وَ دَا مِثِلْ أَوَّلْ كُلَ، هُو خَصَّصْ لِلّٰهْ الْفُضَّةْ وَ الدَّهَبْ الشَّالَاهُمْ مِنْ الْأُمَمْ الْأَنَّصَرْ فَوْقهُمْ. 12 وَ الْأُمَمْ دَوْل هُمَّنْ الْأَدَوْمِيِّينْ وَ الْمُوَابِيِّينْ وَ بَنِي عَمُّونْ وَ الْفِلِسْطِيِّينْ وَ الْعَمَالِقْ. وَ كُلَّ الْغَنِيمَةْ الشَّالَاهَا مِنْ هَدَدْعَازَرْ وِلَيْد رَحُوبْ مَلِكْ حِلَّةْ صُوبَةْ، دِي كُلَ هُو خَصَّصَاهَا لِلّٰهْ.
13 وَ دَاوُدْ أَنَّصَرْ فِي الْأَرَامِيَّيْن فِي وَادِي الْمِلِحْ وَ كَتَلْ مِنْهُمْ 18 000 رَاجِلْ وَ أُسْمَهْ بِقِي طَالِعْ بِزِيَادَةْ. 14 وَ دَاوُدْ خَطَّ مُحَافِظِينْ فِي أَيِّ بَكَانْ فِي بَلَدْ أَدَوْم وَ كُلَّ الْأَدَوْمِيِّينْ قَعَدَوْا تِحِتْ حُكْمَهْ. وَ اللّٰهْ أَنْطَى النَّصُرْ لِدَاوُدْ فِي أَيِّ بَكَانْ الْيَمْشِي فَوْقَهْ.
أسامَي مسائيل دَاوُد
15 وَ دَاوُدْ مَلَكْ فِي كُلَّ بَلَدْ إِسْرَائِيلْ. وَ حَكَمْ فِي كُلَّ شَعَبَهْ بِالْحَقّ وَ الْعَدَالَةْ. 16 وَ يُوَابْ وِلَيْدهَا لِصَرُويَةْ، هُو قَايِدْ الدَّيْش وَ يَهُوشَفَطْ وِلَيْد أَخِلُودْ، هُو كَاتِبْ الْيِذَكِّرْ الْمَلِكْ 17 وَ صَدُوقْ وِلَيْد أَخِطُوبْ وَ أَخِيمَلِكْ وِلَيْد أَبِيَاتَرْ، هُمَّنْ دَوْل رُجَالْ دِينْ وَ سَرَايَا، هُو كَاتِبْ هَنَا الْمَلِكْ. 18 وَ بَنَايَا وِلَيْد يَهُويَدَعْ، هُو مَسْؤُولْ فِي الْكِرِتِيِّينْ وَ فِي الْفِلْتِيِّينْ وَ هُمَّنْ دَوْل حُرَّاسْ الْمَلِكْ. وَ أَوْلَادْ دَاوُدْ، هُمَّنْ رُجَالْ دِينْ.
© La Bible en arabe tchadien © Alliance biblique du Tchad, 2019
