رُؤية القُفّة العِنْدها فواكِه
1 دَاهُو الشَّيّءْ الْاللّٰهْ الرَّبّ وَصَّفَهْ لَيِّ أَنَا عَمُوسْ فِي الرُّؤْيَةْ. أَنَا شِفْت قُفَّةْ مَلَانَةْ بِفَوَاكِهْ نَجِيضِينْ. 2 وَ اللّٰهْ قَالْ: «شِفْت شُنُو، يَا عَمُوسْ؟» وَ أَنَا قُلْت: «شِفْت قُفَّةْ مَلَانَةْ فَوَاكِهْ نَجِيضِينْ.» وَ اللّٰهْ قَالْ لَيِّ:
«مِثِلْ الْفَوَاكِهْ النِّجْضَوْا،
شَعَبِي بَنِي إِسْرَائِيلْ كُلَ
وَكِتْهُمْ تَمَّ لِلْعِقَابْ
وَ أَنَا بَتَّانْ مَا نَغْفِرْ لَيْهُمْ.
3 وَ فِي الْيَوْم دَا،
غِنَيْ فِي قَصِرْ الْمَلِكْ يِغَيِّرْ يَبْقَى نُوَاحْ.
وَ فِي أَيِّ بَكَانْ، جَنَازَاتْ مُدَفِّقِينْ
بَلَا حَرَكَةْ.»
وَ دَا كَلَامْ اللّٰهْ الرَّبّ.
ظُلُم التُجّار
4 أَسْمَعَوْا، يَا إِنْتُو التَّظُلْمُوا الْمَسَاكِينْ
وَ مِنْ الْبَلَدْ، تَطُرْدُوا التَّعْبَانِينْ.
5 إِنْتُو تُقُولُوا فِي نُفُوسْكُو:
«لِمَتَى يِكَمِّلْ الْعِيدْ
هَنَا أَوَّلْ يَوْم فِي الشَّهَرْ
أَشَانْ نِبِيعُوا قَمَحْنَا؟
وَ مَتَى يِكَمِّلْ يَوْم السَّبْت
أَشَانْ نُفُكُّوا دَبَنْقَاتْنَا
وَ نِبِيعُوا خُمَامْنَا؟
نِكِيلُوا بِمِكْيَالْ صَغَيَّرْ
وَ نِزِيدُوا تَمَنَهْ
وَ نُغُشُّوا بِمِيزَانْ الْمَا عَدِيلْ.
6 وَ نَشْرُوا الْمِسْكِينْ بِسِلَيَّاتْ
وَ الْفَقْرَانْ بِنِعَيْلَاتْ
وَ نِبِيعُوا كَنْفُوتْ الْقَمَحْ.»
7 وَ اللّٰهْ حَلَفْ بِالْبَلَدْ
الْفَرْحَانِينْ بَيْهَا ذُرِّيَّةْ يَعْقُوبْ وَ قَالْ:
«أَنَا أَبَداً مَا نَنْسَى عَمَلْكُو الشَّيْن
الْقَاعِدِينْ تِسَوُّوهْ.
8 وَ بِسَبَبْ دَا،
الْبَلَدْ مَا تَرْجِفْ وَلَّا؟
وَ كُلَّ سُكَّانْهَا
مَا يَبْقَوْا حَزْنَانِينْ وَلَّا؟
الْبَلَدْ تَطْلَعْ كُلَّهَا
مِثِلْ بَحَرْ هَنَا مَصِرْ
وَ تَطْمِي وَ تَنْزِلْ
مِثِلْ سَيْل النِّيلْ.»
يوم اللّه هو يوم مَوْت و حِزِن
9 وَ دَا كَلَامْ اللّٰهْ الرَّبّ:
«فِي الْيَوْم دَا بِضُهُرْ،
الْوَطَاةْ تَبْقَى ضَلْمَةْ
وَ بِنَهَارْ بَسْ،
الْوَطَاةْ تَبْقَى لَيْل فِي كُلَّ الْبَلَدْ.
10 وَ أَيِّ عِيدْ التِّعَيُّدُوهْ،
نِبَدِّلَهْ بِحِزِنْ
وَ كُلَّ غِنَيْكُو يَبْقَى نُوَاحْ.
وَ كُلُّكُو تَلْبَسَوْا خُلْقَانْ الْحِزِنْ
وَ تِزَيُّنُوا رُوسَيْكُو.
دَا يَبْقَى مِثِلْ حِزِنْ
هَنَا مَوْت الْوِلَيْد الْوَحِيدْ
وَ فِي الأَخِيرْ،
يَبْقَى يَوْم هَنَا حِزِنْ شَدِيدْ.»
11 وَ دَاهُو كَلَامْ اللّٰهْ الرَّبّ:
«يَجِي يَوْم وَاحِدْ الْفَوْقَهْ
نِجِيبْ الْجُوعْ فِي كُلَّ الْبَلَدْ.
وَ دَا مَا جُوعْ هَنَا أَكِلْ
وَ لَا عَطَشْ لِلْأَلْمِي
لَاكِنْ دَا جُوعْ وَ عَطَشْ
لِكَلَامِي أَنَا اللّٰهْ.
12 وَ إِنْتُو تِعِيرُوا مِنْ بَحَرْ لِآخَرْ
وَ مِنْ مُنْشَاقْ لِصَبَاحْ
وَ تِفَتُّشُوا كَلَامْ اللّٰهْ
وَ لَاكِنْ بَيْدَا كُلَ، مَا تَلْقَوْه.
13 فِي الْيَوْم دَا، الْبَنَاتْ وَ الصُّبْيَانْ
يُمُوتُوا مِنْ الْعَطَشْ.
14 نَاسْ وَاحِدِينْ يَحَلْفُوا
بِصَنَمْ مَدِينَةْ السَّامِرَةْ وَ يُقُولُوا:
‹يِعِيشْ إِلٰـهْكِ، يَا حِلَّةْ دَانْ!
وَ يِعِيشْ إِلٰـهْكِ، يَا حِلَّةْ بِيرْ سَبْعَةْ!›
وَ النَّاسْ دَوْل يَهْلَكَوْا مَرَّةْ وَاحِدْ
وَ بَتَّانْ مَا يُقُمُّوا.»
© La Bible en arabe tchadien © Alliance biblique du Tchad, 2019
