مُوسَى أمر يطبُّقوا القانون
1 وَكِتْ مُوسَى قَاعِدْ مَعَ كُلَّ شُيُوخْ بَنِي إِسْرَائِيلْ، أَنْطَى الْأَمُرْ دَا لِلشَّعَبْ وَ قَالْ: «أَحْفَضَوْا الْوَصَايَا النَّامُرْكُو بَيْهُمْ الْيَوْم. 2 وَ فِي الْيَوْم التَّقْطَعَوْا فَوْقَهْ بَحَرْ الْأُرْدُنْ لِتَدْخُلُوا فِي الْبَلَدْ الْيَنْطِيهَا لَيْكُو اللّٰهْ إِلٰـهْكُو، غُزُّوا حُجَارْ كُبَارْ وَ أَمْسَحَوْهُمْ بِبُهْيَةْ بَيْضَةْ. 3 وَ وَكِتْ تَقْطَعَوْا لِتَدْخُلُوا فِي الْبَلَدْ الْمَلَانَةْ بِاللَّبَنْ وَ الْعَسَلْ الْيَنْطِيهَا لَيْكُو اللّٰهْ إِلٰـهْكُو، أَكْتُبُوا فِي الْحُجَارْ دَوْل كُلَّ الْوَصَايَا مِثِلْ قَالَهْ لَيْكُو اللّٰهْ رَبّ جُدُودْكُو. 4 وَ وَكِتْ تَقْطَعَوْا بَحَرْ الْأُرْدُنْ غُزُّوا الْحُجَارْ دَوْل فِي جَبَلْ عِبَالْ حَسَبْ الْأَمُرْ النَّنْطِيهْ لَيْكُو الْيَوْم وَ أَمْسَحَوْهُمْ بِبُهْيَةْ بَيْضَةْ.
5 «وَ فِي الْبَكَانْ دَا، أَبْنُوا مَدْبَحْ لِلّٰهْ إِلٰـهْكُو بِحَجَرْ وَ مَا تَقْطَعَوْه بِحَدِيدْ. 6 وَ أَبْنُوا مَدْبَحْ لِلّٰهْ إِلٰـهْكُو بِحُجَارْ كَامِلِينْ. وَ فِي الْمَدْبَحْ دَا، قَدُّمُوا ضَحَايَا مُحَرَّقِينْ لِلّٰهْ إِلٰـهْكُو. 7 وَ قَدُّمُوا ضَحَايَا السَّلَامَةْ وَ آكُلُوا فِي الْبَكَانْ دَا وَ أَفْرَحَوْا قِدَّامْ اللّٰهْ إِلٰـهْكُو. 8 وَ أَكْتُبُوا فِي الْحُجَارْ دَوْل كُلَّ كَلَامْ الْوَصَايَا بِكَتِبْ وَاضِحْ.»
9 وَ مُوسَى وَ رُجَالْ الدِّينْ اللَّاوِيِّينْ كَلَّمَوْا لِكُلَّ بَنِي إِسْرَائِيلْ وَ قَالَوْا: «أَسْكُتُوا وَ أَسْمَعَوْا يَا بَنِي إِسْرَائِيلْ! الْيَوْم إِنْتُو بِقِيتُوا شَعَبْ اللّٰهْ إِلٰـهْكُو. 10 وَ أَسْمَعَوْا كَلَامْ اللّٰهْ إِلٰـهْكُو وَ طَبُّقُوا وَصِيَّاتَهْ وَ شُرُوطَهْ النَّامُرْكُو بَيْهُمْ الْيَوْم.»
11 وَ فِي الْيَوْم دَا، مُوسَى أَنْطَى الْأَمُرْ دَا لِلشَّعَبْ وَ قَالْ: 12 «وَ وَكِتْ تَقْطَعَوْا بَحَرْ الْأُرْدُنْ، قَبِيلَةْ شِمْعُونْ وَ قَبِيلَةْ لَاوِي وَ قَبِيلَةْ يَهُوذَا وَ قَبِيلَةْ يَسَّاكَرْ وَ قَبِيلَةْ يُوسُفْ وَ قَبِيلَةْ بَنْيَامِينْ يَقِيفُوا فِي جَبَلْ قَرِزِيمْ لِيِبَارُكُوا الشَّعَبْ. 13 وَ لَاكِنْ قَبِيلَةْ رَأُوبِينْ وَ قَبِيلَةْ قَادْ وَ قَبِيلَةْ أَشِيرْ وَ قَبِيلَةْ زَبُلُونْ وَ قَبِيلَةْ دَانْ وَ قَبِيلَةْ نَفْتَالِي يَقِيفُوا فِي جَبَلْ عِبَالْ لِيَلْعَنَوْا الشَّعَبْ.»
الأتنا عشر لعنة
14 وَ اللَّاوِيِّينْ يِشِيلُوا الْكَلَامْ وَ بِحِسّ عَالِي، يُقُولُوا لِكُلَّ بَنِي إِسْرَائِيلْ:
15 «مَلْعُونْ الْيِسَوِّي صَنَمْ هَنَا حَدِيدْ أَوْ صُورَةْ وَ يِلَبِّدْهَا فِي بَكَانْ سِرِّي. وَ اللّٰهْ حَرَّمْ الصَّنَمْ خِدْمَةْ إِيدْ الصِّنَاعِي.»
وَ كُلَّ الشَّعَبْ يُقُولُوا: «آمِينْ!»
16 «وَ مَلْعُونْ الْمَا يِكَرِّمْ أَمَّهْ وَ أَبُوهْ.»
وَ كُلَّ الشَّعَبْ يُقُولُوا: «آمِينْ!»
17 «وَ مَلْعُونْ الْيِحَوِّلْ حَجَرْ هَنَا الْحُدُودْ مَعَ جَارَهْ.»
وَ كُلَّ الشَّعَبْ يُقُولُوا: «آمِينْ!»
18 «وَ مَلْعُونْ الْيِوَدِّرْ الْعَمْيَانْ مِنْ الدَّرِبْ.»
وَ كُلَّ الشَّعَبْ يُقُولُوا: «آمِينْ!»
19 «وَ مَلْعُونْ الْيِدَنْقِسْ الشَّرِيعَةْ لِيَظْلُمْ الْأَجْنَبِي وَ الْأَتِيمْ وَ الْأَرْمَلَةْ.»
وَ كُلَّ الشَّعَبْ يُقُولُوا: «آمِينْ!»
20 «وَ مَلْعُونْ الْيَرْقُدْ مَعَ مَرِةْ أَبُوهْ أَشَانْ هُو كَشَفْ عَوْرَةْ أَبُوهْ.»
وَ كُلَّ الشَّعَبْ يُقُولُوا: «آمِينْ!»
21 «وَ مَلْعُونْ الْيَرْقُدْ مَعَ الْبَهِيمَةْ.»
وَ كُلَّ الشَّعَبْ يُقُولُوا: «آمِينْ!»
22 «وَ مَلْعُونْ الْيَرْقُدْ مَعَ أَخْتَهْ بِنْت أَمَّهْ أَوْ بِنْت أَبُوهْ.»
وَ كُلَّ الشَّعَبْ يُقُولُوا: «آمِينْ!»
23 «وَ مَلْعُونْ الْيَرْقُدْ مَعَ نَسِيبْتَهْ أَمّ مَرْتَهْ.»
وَ كُلَّ الشَّعَبْ يُقُولُوا: «آمِينْ!»
24 «وَ مَلْعُونْ الْيَكْتُلْ أَخُوهْ بِسِرّ.»
وَ كُلَّ الشَّعَبْ يُقُولُوا: «آمِينْ!»
25 «وَ مَلْعُونْ الْيِشِيلْ أُجْرَةْ لِيِدَفِّقْ دَمّ الْبَرِي.»
وَ كُلَّ الشَّعَبْ يُقُولُوا: «آمِينْ!»
26 «وَ مَلْعُونْ الْمَا يِشِيلْ كَلَامْ الْوَصَايَا دَوْل وَ يِطَبِّقْهُمْ.»
وَ كُلَّ الشَّعَبْ يُقُولُوا: «آمِينْ!»
© La Bible en arabe tchadien © Alliance biblique du Tchad, 2019
