مَوْت مُوسَى
1 وَ مِنْ كَدَادَةْ مُوَابْ، مُوسَى طَلَعْ فِي جَبَلْ نَبُو فِي رَاسْ الْفِسْقَةْ الْمُقَابِلَةْ حِلَّةْ أَرِيحَا. وَ مِنْ الْبَكَانْ دَا، اللّٰهْ وَصَّفَهْ كُلَّ بَلَدْ قِلْعَادْ لَحَدِّي دَانْ 2 وَ كُلَّ أَرْض نَفْتَالِي وَ بَلَدْ أَفْرَايِمْ وَ مَنَسَّى وَ كُلَّ بَلَدْ يَهُوذَا لَحَدِّي الْبَحَرْ الْأَبْيَضْ 3 وَ صَحَرَاء نَقَبْ وَ وَادِي أَرِيحَا مَدِينَةْ النَّخَلْ لَحَدِّي صُوغَرْ. 4 وَ اللّٰهْ قَالْ لَيَّهْ: «دِي الْبَلَدْ الْأَنَا حَلَفْت لِإِبْرَاهِيمْ وَ إِسْحَاقْ وَ يَعْقُوبْ وَ قُلْت: ‹نَنْطِيهَا لِذُرِّيّتَكْ.› وَ أَنَا شَوَّفْتَكْ الْأَرْض دِي وَ لَاكِنْ إِنْتَ مَا تَدْخُلْ فَوْقهَا.»
5 وَ مُوسَى عَبْد اللّٰهْ مَاتْ فِي الْبَكَانْ دَا، فِي بَلَدْ مُوَابْ وَ دَا حَسَبْ أَمُرْ اللّٰهْ. 6 وَ اللّٰهْ سَتَرَهْ فِي الْوَادِي فِي بَلَدْ مُوَابْ مُقَابِلْ بَيْت فَعُورْ. وَ لَحَدِّي الْيَوْم دَا، نَادُمْ مَا يَعَرِفْ بَكَانْ قَبُرَهْ. 7 وَ وَكِتْ مُوسَى مَاتْ، عُمْرَهْ 120 سَنَةْ وَ لَاكِنْ شَوْفَهْ مَا نَقَصْ وَ قُدُرْتَهْ كُلَ مَا كَمَّلَتْ. 8 وَ بَنِي إِسْرَائِيلْ حِزْنَوْا لِمُوسَى لِمُدَّةْ 30 يَوْم فِي كَدَادَةْ مُوَابْ وَ بَعَدْ دَا، أَيَّامْ حِزِنْهُمْ كَمَّلَوْا.
9 وَ يَشُوعْ وِلَيْد نُونْ مَلَانْ بِرُوحْ الْحِكْمَةْ أَشَانْ مُوسَى خَطَّ فَوْقَهْ إِيدَهْ. وَ بَنِي إِسْرَائِيلْ يَسْمَعَوْا كَلَامَهْ وَ يِسَوُّوا كُلَّ شَيّءْ مِثِلْ اللّٰهْ أَمَرْ بَيَّهْ مُوسَى.
10 وَ أَبَداً مَا مَرَقْ نَبِي فِي بَنِي إِسْرَائِيلْ مِثِلْ مُوسَى، هُو الْكَلَّمْ مَعَ اللّٰهْ خَشُمْ بِخَشُمْ. 11 وَ هُو بَسْ اللّٰهْ رَسَّلَهْ يِسَوِّي عَلَامَاتْ وَ عَجَايِبْ فِي بَلَدْ مَصِرْ قِدَّامْ فِرْعَوْن وَ خَدَّامِينَهْ وَ كُلَّ بَلَدَهْ. 12 وَ بِإِيدَهْ، مُوسَى بَسْ السَّوَّى عَمَلْ شَدِيدْ وَ مُخِيفْ قِدَّامْ كُلَّ بَنِي إِسْرَائِيلْ.
© La Bible en arabe tchadien © Alliance biblique du Tchad, 2019
