الملك عزل مرة لتبْقى ملِكة
1 وَ بَعَدْ دَا، زَعَلْ الْمَلِكْ أَشَوِرُوشْ دَلَّى وَ فَكَّرْ فِي الْمَلِكَةْ وَشْتِي وَ فِي الشَّيّءْ السَّوَّتَهْ وَ الْقَرَارْ الْهُو شَالَهْ ضِدَّهَا. 2 وَ الصُّبْيَانْ الْقَاعِدِينْ يَخْدُمُوا لَيَّهْ قَالَوْا: «خَلِّي نِفَتُّشُوا لِلْمَلِكْ بَنَاتْ عُدْرِيَّاتْ وَ جَمِيلَاتْ. 3 وَ خَلِّي الْمَلِكْ يُخُطّ مُكَلَّفِينْ فِي كُلَّ الْوُلَايَاتْ هَنَا مَمْلَكَتَهْ أَشَانْ يِجِيبُوا كُلَّ الْبَنَاتْ الْعُدْرِيَّاتْ وَ جَمِيلَاتْ فِي بَيْت الْعَوِينْ فِي مَدِينَةْ شُوشَةْ الْقَوِيَّةْ. وَ يَقْعُدَنْ تِحِتْ مَسْؤُولِيَّةْ هِقَايْ خَدَّامْ الْمَلِكْ الْمُكَلَّفْ بِالْعَوِينْ. وَ هُو يَنْطِيهِنْ الدِّهِنْ الْوَاجِبْ يِلْجَمَّلَنْ بَيَّهْ. 4 وَ الْبِنَيَّةْ التَّعَجِبْ الْمَلِكْ، هِي بَسْ تَبْقَى مَلِكَةْ فِي بَدَلْ وَشْتِي.» وَ الْكَلَامْ دَا عَجَبْ الْمَلِكْ وَ خَلَاصْ بِقِي مِثِلْ قَالَوْه.
5 وَ فِي مَدِينَةْ شُوشَةْ الْقَوِيَّةْ، فِيَّهْ رَاجِلْ وَاحِدْ يَهُودِي أُسْمَهْ مَرْدَكَايْ وِلَيْد يَيِيرْ وِلَيْد شِمْعِي وِلَيْد قِيشْ. وَ هُو مِنْ قَبِيلَةْ بَنْيَامِينْ. 6 وَ الرَّاجِلْ دَا، هُو مِنْ نَاسْ مَدِينَةْ الْقُدُسْ الشَّالَاهُمْ نَبُوخَدْنَصَرْ مَلِكْ بَابِلْ وَ وَدَّاهُمْ فِي الْغُرْبَةْ مَعَ يُيَكِينْ مَلِكْ مَمْلَكَةْ يَهُوذَا. 7 وَ مَرْدَكَايْ، هُو كَلِيفْ هَدَسَّةْ الْبِنَادُوهَا أَسْتِيرْ أَشَانْ وَ لَا عِنْدَهَا أَمّ وَ لَا أَبُو. وَ هِي جَمِيلَةْ وَ دَقَّهَا سَمَحْ. وَ هِي بِنَيَّةْ عِمَّهْ وَ مِنْ مَوْت أَمَّهَا وَ أَبُوهَا، مَرْدَكَايْ بَسْ شَالَاهَا مِثِلْ بِنَيِّتَهْ وَ رَبَّاهَا.
أسْتِير في قصِر الملك
8 وَ بَعَدْ سِمْعَوْا قَرَارْ الْمَلِكْ وَ قَانُونَهْ، جَابَوْا بَنَاتْ كَتِيرِينْ فِي مَدِينَةْ شُوشَةْ الْقَوِيَّةْ تِحِتْ مَسْؤُولِيَّةْ هِقَايْ. وَ أَسْتِيرْ كُلَّ وَدَّوْهَا فِي الْقَصِرْ تِحِتْ مَسْؤُولِيَّةْ هِقَايْ الْمُكَلَّفْ بِالْعَوِينْ. 9 وَ الْبِنَيَّةْ دِي عَجَبَتَهْ وَ لِقَتْ رِضَايَهْ. وَ طَوَّالِي، أَنْطَاهَا قِسِمْهَا مِنْ الْأَكِلْ وَ مِنْ الدِّهِنْ الْيِلْجَمَّلَوْا بَيَّهْ. وَ بَتَّانْ أَنْطَاهَا سَبْعَةْ بَنَاتْ خَدَّامَاتْ مِنْ الْخَدَّامَاتْ الْأَحْسَنْ هَنَا قَصِرْ الْمَلِكْ. وَ بَعَدْ دَا، وَدَّاهَا هِي وَ الْخَدَّامَاتْ دَيْل فِي الْبَكَانْ الْعَدِيلْ فِي بَيْت الْعَوِينْ.
10 وَ أَسْتِيرْ مَا أَوْرَتْهُمْ وَ لَا بِأَهَلْهَا وَ لَا كَدَرْ هِي يَهُودِيَّةْ أَشَانْ مَرْدَكَايْ دَحَرْهَا مَا تِأَوْرِيهُمْ. 11 وَ كُلَّ يَوْم، مَرْدَكَايْ يَمْشِي قِدَّامْ فَضَايَةْ بَيْت الْعَوِينْ أَشَانْ يَلْقَى عَافِيَةْ أَسْتِيرْ وَ يَعَرِفْ كِكَّيْف قَاعِدِينْ يِعَامُلُوهَا.
12 وَ لِأَيِّ وَاحِدَةْ مِنْ الْبَنَاتْ دَيْل، بَعَدْ 12 شَهَرْ، دَوْرهَا يَجِي وَ الْبِنَيَّةْ تَمْشِي بَكَانْ الْمَلِكْ أَشَوِرُوشْ. وَ حَسَبْ النِّظَامْ هَنَا الْعَوِينْ دَيْل، يِلْمَسَّحَنْ بِدِهِنْ الصِّبِرْ لِمُدَّةْ 6 شَهَرْ وَ بِعِطِرْ وَ دِهِنْ الْعَوِينْ لِمُدَّةْ 6 شَهَرْ. 13 وَ دَاهُو كِكَّيْف الْبِنَيَّةْ تَمْشِي بَكَانْ الْمَلِكْ. يَنْطُوهَا كُلَّ شَيّءْ الْهِي تِدَوْر تِشِيلَهْ مَعَاهَا مِنْ بَيْت الْعَوِينْ لِقَصِرْ الْمَلِكْ. 14 وَ بِعَشِيَّةْ، هِي تَمْشِي. وَ بِفَجُرْ، تِقَبِّلْ فِي بَيْت الْعَوِينْ التَّانِي تِحِتْ مَسْؤُولِيَّةْ شَعَشْقَازْ خَدَّامْ الْمَلِكْ الْمُكَلَّفْ بِالسِّرِّيَّاتْ. وَ هِي بَتَّانْ مَا تَمْشِي بَكَانْ الْمَلِكْ إِلَّا كَنْ الْمَلِكْ دَوَّرْهَا وَ نَادَاهَا بِأُسُمْهَا.
أسْتِير بِقت ملِكة
15 وَ جَاءْ دَوْرهَا لِأَسْتِيرْ بِنَيَّةْ أَبِحَايِلْ عِمَّهْ لِمَرْدَكَايْ، هِي الْمَرْدَكَايْ رَبَّاهَا. وَ وَكِتْ جَاءْ دَوْرهَا لِتَمْشِي بَكَانْ الْمَلِكْ، أَسْتِيرْ مَا طَلَبَتْ شَيّءْ زِيَادَةْ إِلَّا الْوَصَّفَهْ لَيْهَا هِقَايْ خَدَّامْ الْمَلِكْ الْمُكَلَّفْ بِالْعَوِينْ. وَ أَسْتِيرْ لِقَتْ رِضَى مِنْ كُلَّ النَّاسْ الْيِشِيفُوهَا. 16 وَ جَوْا وَدَّوْا أَسْتِيرْ فِي قَصِرْ الْمَلِكْ أَشَوِرُوشْ فِي السَّنَةْ السَّابْعَةْ هَنَا حُكْمَهْ، فِي الشَّهَرْ الْأُسْمَهْ طِبِتْ.
17 وَ الْمَلِكْ حَبَّاهَا لِأَسْتِيرْ زِيَادَةْ مِنْ كُلَّ الْعَوِينْ. وَ هِي لِقَتْ رِضَايَهْ وَ خَيْرَهْ زِيَادَةْ مِنْ كُلَّ الْبَنَاتْ الْعُدْرِيَّاتْ. وَ هُو دَسَّ لَيْهَا فِي رَاسْهَا تَاجْ الْمَمْلَكَةْ وَ سَوَّاهَا مَلِكَةْ فِي بَدَلْ وَشْتِي. 18 وَ الْمَلِكْ سَوَّى عَازُومَةْ كَبِيرَةْ لِكُلَّ مَسَائِيلَهْ وَ خَدَّامِينَهْ وَ الْعَازُومَةْ دِي تُخُصّ أَسْتِيرْ. وَ أَمَرْ مَا يِشِيلُوا مِيرِي مِنْ سُكَّانْ الْوُلَايَاتْ وَ قَسَّمْ هَدَايَا بِجُودْ الْمَمْلَكَةْ.
مَرْدَكَاي نجّى حياة الملك
19 وَ وَكِتْ لَمَّوْا الْبَنَاتْ الْعُدْرِيَّاتْ لِتَانِي مَرَّةْ، مَرْدَكَايْ قَاعِدْ فِي خَشُمْ بَابْ قَصِرْ الْمَلِكْ. 20 وَ أَسْتِيرْ مَا أَوْرَتْهُمْ وَ لَا بِأَهَلْهَا وَ لَا كَدَرْ هِي يَهُودِيَّةْ أَشَانْ مَرْدَكَايْ دَحَرْهَا مَا تِأَوْرِيهُمْ. وَ أَسْتِيرْ قَاعِدَةْ تِطَبِّقْ كَلَامَهْ مِثِلْ أَوَّلْ وَكِتْ هِي قَاعِدَةْ تِحْتَهْ.
21 وَ فِي الْوَكِتْ دَا، وَكِتْ مَرْدَكَايْ قَاعِدْ فِي خَشُمْ بَابْ قَصِرْ الْمَلِكْ، خَدَّامِينْ إِتْنَيْن حُرَّاسْ هَنَا مَدَخَلْ قَصِرْ الْمَلِكْ هُمَّنْ بِقْتَانْ وَ تَرَشْ زِعِلَوْا ضِدّ الْمَلِكْ أَشَوِرُوشْ وَ قَاعِدِينْ يِفَتُّشُوا طَرِيقَةْ لِيَكْتُلُوهْ. 22 وَكِتْ مَرْدَكَايْ سِمِعْ بِالْخِطَّةْ دِي، هُو خَبَّرْهَا لِلْمَلِكَةْ أَسْتِيرْ. وَ أَسْتِيرْ أَوْرَتَهْ لِلْمَلِكْ وَ قَالَتْ كَدَرْ الْخَبَرْ دَا جَايِ مِنْ مَرْدَكَايْ. 23 وَ فَتَّشَوْا قَعَرْ الْكَلَامْ دَا وَ لِقَوْه صَحِيحْ. وَ خَلَاصْ، شَنَقَوْا الْخَدَّامِينْ الْإِتْنَيْن دَوْل. وَ الشَّيّءْ دَا، كَتَبَوْه قِدَّامْ الْمَلِكْ فِي كِتَابْ التَّارِيخْ هَنَا الْمَمْلَكَةْ.
© La Bible en arabe tchadien © Alliance biblique du Tchad, 2019
