أسْتِير مشت بكان الملك
1 وَ وَكِتْ التَّلَاتَةْ يَوْم كَمَّلَوْا خَلَاصْ، أَسْتِيرْ لِبْسَتْ خُلْقَانْهَا هَنَا الْمَمْلَكَةْ وَ مَشَتْ وَقَفَتْ فِي الْفَضَايْ الدَّخْلَانِيَّةْ هَنَا قَصِرْ الْمَلِكْ الْمُقَابِلْ الْبَيْت. وَ الْمَلِكْ قَاعِدْ فِي كُرْسِيهْ هَنَا الْمُلُكْ فِي الْقَصِرْ مُقَابِلْ مَدَخَلْ الْبَيْت. 2 وَ وَكِتْ الْمَلِكْ شَافْ أَسْتِيرْ الْمَلِكَةْ وَاقْفَةْ فِي الْفَضَايْ، هِي لِقَتْ رِضَايَهْ. وَ هُو مَدَّ لِأَسْتِيرْ عَصَاتَهْ الدَّهْبِيَّةْ الْفِي إِيدَهْ وَ أَسْتِيرْ قَرَّبَتْ وَ لِمْسَتْ رَاسْ الْعَصَاةْ.
3 وَ الْمَلِكْ قَالْ لَيْهَا: «مَالْكِ، يَا أَسْتِيرْ الْمَلِكَةْ؟ شُنُو مُنَاكِ؟ لَحَدِّي كَنْ نُصّ مَمْلَكَتِي كُلَ، نَنْطِيهْ لَيْكِ.» 4 وَ أَسْتِيرْ قَالَتْ لَيَّهْ: «كَنْ بِقِي لَيْك عَدِيلْ، يَا الْمَلِكْ، خَلِّي تَجِي مَعَ هَمَانْ فِي الْعَازُومَةْ الْأَنَا جَهَّزْتَهَا لَيَّهْ الْيَوْم.» 5 وَ خَلَاصْ، الْمَلِكْ قَالْ: «أَمْشُوا عَجَلَةْ خَبُّرُوا هَمَانْ كَدَرْ نَمْشُوا نَحْضَرَوْا فِي عَازُومَةْ أَسْتِيرْ.»
وَ الْمَلِكْ مَشَى مَعَ هَمَانْ لِلْعَازُومَةْ السَّوَّتْهَا أَسْتِيرْ. 6 وَ فِي الْعَازُومَةْ، الْمَلِكْ قَالْ لِأَسْتِيرْ: «شُنُو طَلَبْكِ؟ نَنْطِيهْ لَيْكِ. وَ شُنُو مُنَاكِ؟ لَحَدِّي كَنْ نُصّ مَمْلَكَتِي كُلَ، نَنْطِيهْ لَيْكِ.» 7 وَ أَسْتِيرْ رَدَّتْ وَ قَالَتْ: «طَلَبِي وَ مُنَايِ، 8 يَا الْمَلِكْ، دَاهُو. كَنْ نَلْقَى مِنَّكْ الرِّضَى وَ كَنْ بِقِي لَيْك عَدِيلْ، أَقْبَلْ طَلَبِي وَ حَقِّقْ مُنَايِ. خَلِّي تَجِي مَعَ هَمَانْ أَمْبَاكِرْ فِي الْعَازُومَةْ النِّسَوِّيهَا لَيْكُو. وَ بَيْدَا، أَمْبَاكِرْ نِسَوِّي حَسَبْ كَلَامَكْ، يَا الْمَلِكْ، وَ نُرُدّ لِسُؤَالَكْ.»
هَمَان جهّز ليكْتُل مَرْدَكَاي
9 وَ فِي الْيَوْم دَا، هَمَانْ مَرَقْ مَبْسُوطْ وَ فَرْحَانْ. وَ لَاكِنْ وَكِتْ هُو شَافْ فِي خَشُمْ بَابْ قَصِرْ الْمَلِكْ كَدَرْ مَرْدَكَايْ مَا يُقُمّ وَ لَا يَرْجِفْ قِدَّامَهْ، خَلَاصْ هَمَانْ زِعِلْ زَعَلْ شَدِيدْ ضِدّ مَرْدَكَايْ. 10 وَ هَمَانْ ثَبَّتْ نَفْسَهْ وَ مَشَى بَيْتَهْ.
وَ رَسَّلْ نَادَاهُمْ لِرُفْقَانَهْ وَ مَرْتَهْ زَرَشْ. 11 وَ هَمَانْ حَجَّى لَيْهُمْ بِغُنَايَهْ الْكَتِيرْ وَ كَتَرَةْ أَوْلَادَهْ وَ بِكِكَّيْف الْمَلِكْ شَرَّفَهْ وَ دَرَّجَهْ كَبِيرْ فِي رَاسْ كُلَّ مَسَائِيلَهْ وَ خَدَّامِينَهْ. 12 وَ هَمَانْ قَالْ بَتَّانْ: «وَ زِيَادَةْ مِنْ دَا، أَسْتِيرْ الْمَلِكَةْ نَادَتْنِي إِلَّا أَنَا مَعَ الْمَلِكْ فِي الْعَازُومَةْ الْهِي جَهَّزَتْهَا. وَ بَتَّانْ أَمْبَاكِرْ كُلَ، أَنَا بَسْ الْمَعْزُومْ مَعَ الْمَلِكْ. 13 وَ لَاكِنْ كُلَّ الشَّيّءْ دَا مَا يِتِمّ لَيِّ وَكِتْ دَايْماً نِشِيفْ مَرْدَكَايْ الْيَهُودِي قَاعِدْ فِي خَشُمْ بَابْ قَصِرْ الْمَلِكْ!»
14 وَ خَلَاصْ، مَرْتَهْ زَرَشْ وَ كُلَّ رُفْقَانَهْ قَالَوْا لَيَّهْ: «سَوِّي لَيْك عُودْ طُولَهْ 50 دُرَاعْ وَ أَمْبَاكِرْ فَجُرْ، أَطْلُبْ مِنْ الْمَلِكْ خَلِّي يِعَلُّقُوا فَوْقَهْ مَرْدَكَايْ. وَ بَعَدْ دَا، إِنْتَ تَمْشِي فَرْحَانْ فِي الْعَازُومَةْ مَعَ الْمَلِكْ.» وَ الْكَلَامْ دَا بِقِي حَلُو لِهَمَانْ وَ قَمَّ جَهَّزْ لَيَّهْ الْعُودْ.
© La Bible en arabe tchadien © Alliance biblique du Tchad, 2019
