بني إسرائيل بِقوا عبيد في مَصِر
1 دَاهُو أَسَامَيْ أَوْلَادْ يَعْقُوبْ الْمَعْرُوفْ بِإِسْرَائِيلْ الْمَشَوْا مَعَ أَبُوهُمْ فِي مَصِرْ. وَ أَيِّ وَاحِدْ مِنْهُمْ مَشَى مَعَ عَايِلْتَهْ. 2 وَ هُمَّنْ رَأُوبِينْ وَ شِمْعُونْ وَ لَاوِي وَ يَهُوذَا 3 وَ يَسَّاكَرْ وَ زَبُلُونْ وَ بَنْيَامِينْ 4 وَ دَانْ وَ نَفْتَالِي وَ قَادْ وَ أَشِيرْ. 5 وَ ذُرِّيَّةْ يَعْقُوبْ، كُلُّهُمْ عَدَدْهُمْ 70. وَ فِي الْوَكِتْ دَاكْ، وِلَيْدَهْ يُوسُفْ كَمَانْ قَاعِدْ فِي مَصِرْ خَلَاصْ. 6 وَ بَعَدَيْن، يُوسُفْ مَاتْ. وَ كُلَّ أَخْوَانَهْ وَ نَاسْ زَمَنْهُمْ مَاتَوْا. 7 وَ بَنِي إِسْرَائِيلْ وِلْدَوْا وَ زَادَوْا وَ بِقَوْا كَتِيرِينْ وَ شُدَادْ مَرَّةْ وَاحِدْ وَ مَلَوْا الْبَلَدْ.
8 وَ بَعَدَيْن، مَلِكْ جَدِيدْ رِكِبْ فِي مَصِرْ وَ هُو مَا عِرِفْ شَيّءْ فِي يُوسُفْ. 9 الْمَلِكْ دَا قَمَّ قَالْ لِنَاسَهْ: «شِيفُوا، بَنِي إِسْرَائِيلْ دَوْل هَسَّعْ بِقَوْا كَتِيرِينْ وَ شُدَادْ مِنِّنَا. 10 هَسَّعْ دَا، خَلِّي نَلْقَوْا حَلَلْ لِنَدْحَرَوْا عَدَدْهُمْ مَا يِزِيدْ. كَنْ مَا كَيْ دَا، يَوْم وَاحِدْ كَنْ الْحَرِبْ قَمَّتْ، هُمَّنْ يِنْضَمَّوْا لِعُدْوَانَّا وَ يِحَارُبُونَا وَ يَمُرْقُوا مِنْ بَلَدْنَا وَ يِخَلُّونَا.»
11 وَ خَلَاصْ، الْمَصْرِيِّينْ قَمَّوْا خَطَّوْا كُبَارَاتْ الْمُكَلَّفِينْ بِخِدْمَةْ الْعُبُودِيَّةْ أَشَانْ يِتَعُّبُوا بَنِي إِسْرَائِيلْ بِالْخِدْمَةْ الْقَاسِيَةْ. بِمِثِلْ دَا بَسْ، بَنِي إِسْرَائِيلْ بَنَوْا مُدُنْ فِتُومْ وَ رَعَمْسِيس أَشَانْ يَبْقَوْا مَخَازِنْ لِفِرْعَوْن مَلِكْ مَصِرْ. 12 وَ الْمَصْرِيِّينْ قَاعِدِينْ يِتَعُّبُوهُمْ بِلْحَيْن. وَ لَاكِنْ بَيْدَا كُلَ، بَنِي إِسْرَائِيلْ بِقَوْا كَتِيرِينْ وَ شَتَّوْا فِي الْأَرْض. أَشَانْ دَا، الْمَصْرِيِّينْ خَافَوْا بِلْحَيْن مِنْ بَنِي إِسْرَائِيلْ 13 وَ خَلَاصْ قَمَّوْا يِعَبُّدُوهُمْ بِقُوءْ. 14 وَ مَرَّرَوْا لَيْهُمْ الْحَيَاةْ بِالْخِدْمَةْ الْقَاسِيَةْ مِثِلْ عَجِّنِينْ الطِّينَةْ وَ سَلِّلِينْ الدِّرِنْقَيْل وَ حِرَاتَةْ الزِّرَاعَةْ. وَ الْمَصْرِيِّينْ قَاعِدِينْ يَجْبُرُوهُمْ فِي الْخِدْمَةْ دِي بِقُوءْ.
الملك يكْتُل الأوْلاد
15 فِيَّهْ عَوِينْ وَلَّادَاتْ إِتْنَيْن هَنَا الْعِبْرَانِيِّينْ. الْوَاحِدَةْ أُسُمْهَا شِفْرَةْ وَ الْآخَرَةْ أُسُمْهَا فُوعَةْ. وَ مَلِكْ مَصِرْ نَادَاهِنْ 16 وَ قَالْ لَيْهِنْ: «أَسْمَعَنْ زَيْن. كَنْ تِوَلِّدَنْ عَوِينْ الْعِبْرَانِيِّينْ، فَكِّرَنْ فِي مَرِقِينْ الصَّغِيرْ. كَنْ وِلَيْد، أَكْتُلَنَهْ. وَ كَنْ بِنَيَّةْ كَمَانْ، خَلَّنْهَا تِعِيشْ.» 17 وَ لَاكِنْ الْعَوِينْ الْوَلَّادَاتْ دَيْل خَايْفَاتْ مِنْ اللّٰهْ. وَ مَا طَبَّقَنْ كَلَامْ الْمَلِكْ وَ لَاكِنْ خَلَّنْ الْأَوْلَادْ. 18 وَ خَلَاصْ، الْمَلِكْ نَادَاهِنْ بَتَّانْ وَ قَالْ: «مَالَا خَلَّيْتَنْ الْأَوْلَادْ مَا كَتَلْتَنْهُمْ؟ مَالَا سَوَّيْتَنْ مِثِلْ دَا؟» 19 وَ هِنَّ قَالَنْ لَيَّهْ: «يَا الْمَلِكْ، عَوِينْ الْعِبْرَانِيِّينْ مَا مِثِلْ عَوِينْ الْمَصْرِيِّينْ. هِنَّ عِنْدِهِنْ قُدْرَةْ وَ يَلْدَنْ قُبَّالْ الْوَلَّادَةْ مَا تَجِي.»
20 وَ بِمِثِلْ دَا بَسْ، بَنِي إِسْرَائِيلْ بِقَوْا كَتِيرِينْ وَ شُدَادْ. وَ الرَّبّ أَنْطَى رَحْمَةْ لِلْعَوِينْ الْوَلَّادَاتْ دَيْل 21 أَشَانْ هِنَّ خَايْفَاتْ مِنْ اللّٰهْ وَ هُو أَنْطَاهِنْ ذُرِّيَّةْ.
22 وَ خَلَاصْ، الْمَلِكْ قَمَّ أَنْطَى أَمُرْ لِشَعَبَهْ وَ قَالْ لَيْهُمْ: «أَزْقُلُوا فِي الْبَحَرْ أَيِّ وِلَيْد عِبْرَانِي الدَّهَابَهْ وِلْدَوْه. إِلَّا الْبَنَاتْ بَسْ خَلُّوهِنْ.»
© La Bible en arabe tchadien © Alliance biblique du Tchad, 2019
