1 وَ اللّٰهْ قَالْ لِمُوسَى: «هَسَّعْ دَا، إِنْتَ تِشِيفْ الشَّيّءْ النِّسَوِّيهْ لِلْمَلِكْ! بِإِيدِي الشَّدِيدَةْ، نَجْبُرَهْ وَ يِخَلِّي بَنِي إِسْرَائِيلْ يَمُرْقُوا. وَ بِقُدُرْتِي الشَّدِيدَةْ، نَجْبُرَهْ وَ يَطْرُدْهُمْ مِنْ دَارَهْ.»
اللّه قال ينجّي بني إسرائيل
2 وَ بَعَدْ دَا، الرَّبّ قَالْ بَتَّانْ لِمُوسَى: «أَنَا بَسْ اللّٰهْ. 3 أَنَا بَيَّنْت نَفْسِي لِإِبْرَاهِيمْ وَ إِسْحَاقْ وَ يَعْقُوبْ وَ قُلْت لَيْهُمْ أُسْمِي اللّٰهْ الْقَادِرْ. لَاكِنْ مَا أَوْرَيْتهُمْ كَدَرْ أَنَا أُسْمِي اللّٰهْ الْحَيّ. 4 وَ أَنَا سَوَّيْت مَعَاهُمْ مُعَاهَدَتِي وَ قُلْت نَنْطِيهُمْ بَلَدْ كَنْعَانْ الْهُمَّنْ قَاعِدِينْ فَوْقهَا أَجَانِبْ. 5 وَ هَسَّعْ، أَنَا سِمِعْت قَنِيتْ بَنِي إِسْرَائِيلْ الْقَاعِدِينْ يِعَبُّدُوهُمْ الْمَصْرِيِّينْ وَ أَنَا فَكَّرْت فِي مُعَاهَدَتِي السَّوَّيْتهَا مَعَاهُمْ. 6 فِي شَانْ دَا، قُولْ لِبَنِي إِسْرَائِيلْ: ‹أَنَا اللّٰهْ. نَمْرُقْكُو مِنْ الْعُبُودِيَّةْ وَ نِنَجِّيكُو مِنْ الْخِدْمَةْ الْقَاسِيَةْ هَنَا الْمَصْرِيِّينْ. وَ نَفْدَاكُو بِدُرَاعْ قَوِي وَ بِعِقَابْ عَجِيبْ. 7 وَ تَبْقَوْا شَعَبِي وَ أَنَا نَبْقَى إِلٰـهْكُو. وَ فِي الْوَكِتْ دَا، تَعَرْفُوا كَدَرْ أَنَا بَسْ اللّٰهْ إِلٰـهْكُو الْمَرَقْتُكُو مِنْ الْعُبُودِيَّةْ هَنَا الْمَصْرِيِّينْ 8 وَ وَدَّيْتكُو فِي الْبَلَدْ الْحَلَفْت نَنْطِيهَا لِإِبْرَاهِيمْ وَ إِسْحَاقْ وَ يَعْقُوبْ وَ نَنْطِيهَا لَيْكُو إِنْتُو وَرَثَةْ. أَنَا بَسْ اللّٰهْ.›» 9 وَ مُوسَى كَلَّمْ الْكَلَامْ دَا لِبَنِي إِسْرَائِيلْ. لَاكِنْ هُمَّنْ مَا سِمْعَوْا كَلَامَهْ أَشَانْ أَيَّسَوْا مِنْ شِدَّةْ الْخِدْمَةْ الْقَاسِيَةْ.
10 وَ بَتَّانْ اللّٰهْ حَجَّى لِمُوسَى وَ قَالْ: 11 «أَمْشِي لِفِرْعَوْن مَلِكْ مَصِرْ وَ قُولْ لَيَّهْ: ‹خَلِّي بَنِي إِسْرَائِيلْ يَمُرْقُوا مِنْ بَلَدَكْ!›» 12 وَ مُوسَى قَالْ لِلّٰهْ: «بَنِي إِسْرَائِيلْ أَبَوْا مَا يَسْمَعَوْا كَلَامِي. كِكَّيْف الْمَلِكْ يَقْدَرْ يَسْمَعْ كَلَامِي، أَنَا الْخَشْمِي تَقِيلْ؟»
13 وَ خَلَاصْ، اللّٰهْ حَجَّى لِمُوسَى وَ هَارُونْ وَ قَالْ لَيْهُمْ يَمْشُوا لِبَنِي إِسْرَائِيلْ وَ فِرْعَوْن مَلِكْ مَصِرْ وَ يَامُرُوهُمْ أَشَانْ بَنِي إِسْرَائِيلْ يَمُرْقُوا مِنْ مَصِرْ.
خُشوم بُيوت عيال يَعْقُوب
14 دَاهُو أَسَامَيْ هَنَا كُبَارَاتْ قَبَايِلْ بَنِي إِسْرَائِيلْ.
رَأُوبِينْ هُو بِكِرْ يَعْقُوبْ. وَ أَوْلَادْ رَأُوبِينْ هُمَّنْ حَنُوكْ وَ فَلُّو وَ حَصْرُونْ وَ كَرْمِي. وَ هُمَّنْ دَوْل بِقَوْا خُشُومْ بُيُوتْ رَأُوبِينْ.15 وَ أَوْلَادْ شِمْعُونْ هُمَّنْ يَمُوِيلْ وَ يَامِينْ وَ أُهَدْ وَ يَاكِينْ وَ صُوحَرْ وَ شَاوُولْ، هُو الْأَمَّهْ مِنْ بَلَدْ كَنْعَانْ. وَ هُمَّنْ دَوْل بِقَوْا خُشُومْ بُيُوتْ شِمْعُونْ.16 وَ دَاهُو ذُرِّيَّةْ لَاوِي. لَاوِي عِنْدَهْ تَلَاتَةْ أَوْلَادْ. وَ هُمَّنْ قِرْشُونْ وَ قَهَاتْ وَ مَرَارِي. وَ لَاوِي عَاشْ 137 سَنَةْ.17 وَ أَوْلَادْ قِرْشُونْ هُمَّنْ لِبْنِي وَ شِمْعِي مَعَ عَايِلَاتْهُمْ.18 وَ أَوْلَادْ قَهَاتْ هُمَّنْ عَمْرَامْ وَ يِصْهَارْ وَ حَبْرُونْ وَ عُزِّيِيلْ. وَ قَهَاتْ عَاشْ 133 سَنَةْ.19 وَ أَوْلَادْ مَرَارِي هُمَّنْ مَحْلِي وَ مُوشِي.وَ هُمَّنْ دَوْل كُلُّهُمْ بِقَوْا خُشُومْ بُيُوتْ لَاوِي حَسَبْ ذُرِّيِّتْهُمْ.20 وَ عَمْرَامْ أَخَدْ يُوكَابَدْ عِمِّتَهْ وَ جَابَتْ لَيَّهْ أَوْلَادْ إِتْنَيْن وَ هُمَّنْ هَارُونْ وَ مُوسَى. وَ عَمْرَامْ عَاشْ 137 سَنَةْ.21 وَ أَوْلَادْ يِصْهَارْ هُمَّنْ قُورَحْ وَ نَفَقْ وَ زِكْرِي.22 وَ أَوْلَادْ عُزِّيِيلْ هُمَّنْ مِشَيِيلْ وَ أَلِصَافَنْ وَ سِتْرِي.23 وَ هَارُونْ أَخَدْ أَلِشَبَعْ هِي أَخُتْ نَحْشُونْ وَ بِنَيَّةْ عَمِنَدَابْ. وَ هِي جَابَتْ لَيَّهْ نَدَابْ وَ أَبِيهُو وَ أَلِعَازَرْ وَ إِتَمَارْ.24 وَ أَوْلَادْ قُورَحْ هُمَّنْ أَسِّيرْ وَ أَلِقَانَى وَ أَبِيَاسَفْ. وَ هُمَّنْ دَوْل بِقَوْا خُشُومْ بُيُوتْ الْقُورَحِيِّينْ.25 وَ أَلِعَازَرْ وِلَيْد هَارُونْ أَخَدْ وَاحِدَةْ مِنْ بَنَاتْ فُوطِيِيلْ وَ هِي وِلْدَتْ لَيَّهْ فِينْحَاسْ.وَ دَوْل كُبَارَاتْ الْعَايِلَاتْ هَنَا خُشُومْ بُيُوتْ لَاوِي.26 وَ هَارُونْ وَ مُوسَى هُمَّنْ بَسْ النَّاسَيْن الْاللّٰهْ قَالْ لَيْهُمْ: «أَمُرْقُوا بَنِي إِسْرَائِيلْ مِنْ مَصِرْ حَسَبْ مَجْمُوعَاتْهُمْ.» 27 وَ مُوسَى وَ هَارُونْ هُمَّنْ بَسْ الْمَشَوْا وَ حَجَّوْا لِفِرْعَوْن مَلِكْ مَصِرْ لِيِخَلِّي بَنِي إِسْرَائِيلْ يَمُرْقُوا مِنْ مَصِرْ.
اللّه كلّف هَارُون يساعِد مُوسَى
28 وَكِتْ اللّٰهْ حَجَّى لِمُوسَى فِي مَصِرْ، 29 هُو قَالْ لَيَّهْ: «أَنَا بَسْ اللّٰهْ. أَمْشِي قُولْ لِفِرْعَوْن مَلِكْ مَصِرْ كُلَّ الْكَلَامْ النُّقُولَهْ لَيْك.» 30 وَ مُوسَى قَالْ لَيَّهْ: «أَنَا خَشْمِي تَقِيلْ. كِكَّيْف الْمَلِكْ يَقْدَرْ يَسْمَعْ كَلَامِي؟»
© La Bible en arabe tchadien © Alliance biblique du Tchad, 2019
