1 خَلَاصْ، اللّٰهْ قَالْ لِمُوسَى: «أَسْمَعْ عَدِيلْ. أَنَا نِسَوِّي كَلَامَكْ مِثِلْ كَلَامْ إِلٰـهْ قِدَّامْ الْمَلِكْ وَ هَارُونْ أَخُوكْ يَبْقَى لَيْك مِثِلْ رَسُولَكْ. 2 إِنْتَ تِحَجِّي لِهَارُونْ بِكُلَّ شَيّءْ الْأَنَا أَمَرْتَكْ بَيَّهْ. وَ هَارُونْ كَمَانْ يِحَجِّي لِلْمَلِكْ لِيِخَلِّي بَنِي إِسْرَائِيلْ يَمُرْقُوا مِنْ بَلَدَهْ. 3 وَ أَنَا نِقَوِّي رَاسْ الْمَلِكْ وَ نِكَتِّرْ عَلَامَاتِي وَ عَجَايْبِي فِي بَلَدْ مَصِرْ. 4 وَ لَاكِنْ الْمَلِكْ يَابَى مَا يَسْمَعْكُو. وَ بِإِيدِي أَنَا، نِنَزِّلْ غَضَبِي فِي مَصِرْ. وَ بِعِقَابِي الْعَجِيبْ، نَمْرُقْ شَعَبِي بَنِي إِسْرَائِيلْ مِنْ مَصِرْ حَسَبْ مَجْمُوعَاتْهُمْ. 5 وَ وَكِتْ أَنَا نِمِدّ إِيدِي وَ نَضْرُبْ مَصِرْ وَ نَمْرُقْ بَنِي إِسْرَائِيلْ مِنْهَا، خَلَاصْ الْمَصْرِيِّينْ يَعَرْفُوا كَدَرْ أَنَا بَسْ اللّٰهْ.»
6 وَ خَلَاصْ، مُوسَى وَ هَارُونْ سَوَّوْا كُلَّ شَيّءْ مِثِلْ اللّٰهْ أَمَرَاهُمْ بَيَّهْ. 7 مُوسَى عُمْرَهْ 80 سَنَةْ وَ هَارُونْ عُمْرَهْ 83 سَنَةْ وَكِتْ مَشَوْا حَجَّوْا لِمَلِكْ مَصِرْ.
الملك راسه بِقي قوي
8 وَ اللّٰهْ قَالْ لِمُوسَى وَ هَارُونْ: 9 «أَكُونْ الْمَلِكْ يُقُولْ لَيْكُو: ‹سَوُّوا قِدَّامِي شَيّءْ وَاحِدْ عَجِيبْ.› خَلَاصْ، إِنْتَ تُقُولْ لِهَارُونْ: ‹شِيلْ عَصَاتَكْ وَ أَزْقُلْهَا قِدَّامْ الْمَلِكْ.› وَ الْعَصَاةْ تَبْقَى دَابِي.»
10 وَ خَلَاصْ مُوسَى وَ هَارُونْ مَشَوْا لِلْمَلِكْ وَ سَوَّوْا مِثِلْ اللّٰهْ أَمَرَاهُمْ بَيَّهْ. هَارُونْ زَقَلْ عَصَاتَهْ قِدَّامْ الْمَلِكْ مَعَ خَدَّامِينَهْ وَ الْعَصَاةْ بِقَتْ دَابِي. 11 وَ الْمَلِكْ نَادَى الْعُلَمَاءْ وَ السَّحَّارِينْ هَنَا مَصِرْ. هُمَّنْ كُلَ بِسِحِرْهُمْ سَوَّوْا نَفْس الشَّيّءْ 12 وَ أَيِّ وَاحِدْ مِنْهُمْ زَقَلْ عَصَاتَهْ وَ عِصَيْهُمْ بِقَوْا دَبِيبْ. وَ لَاكِنْ عَصَاةْ هَارُونْ زَرَطَتْ عِصَيْهُمْ. 13 وَ بَيْدَا كُلَ، الْمَلِكْ رَاسَهْ بِقِي قَوِي وَ أَبَى مَا سِمِعْ كَلَامْ مُوسَى وَ هَارُونْ مِثِلْ اللّٰهْ قَالَهْ.
الوباء هنا ألْمي البِقي دمّ
14 وَ اللّٰهْ قَالْ لِمُوسَى: «الْمَلِكْ هُو رَاسَهْ قَوِي مَا يِدَوْر يِخَلِّي بَنِي إِسْرَائِيلْ يَمُرْقُوا. 15 قُمّ أَمْشِي لَيَّهْ بِفَجُرْ وَ تَلْقَاهْ مَارِقْ مَاشِي عَلَيْ بَحَرْ النِّيلْ. وَ إِنْتَ أَمْشِي قَابِلَهْ فِي خَشُمْ الْبَحَرْ. وَ شِيلْ فِي إِيدَكْ الْعَصَاةْ الْأَوَّلْ بِقَتْ دَابِي. 16 وَ قُولْ لِلْمَلِكْ: ‹اللّٰهْ رَبّ الْعِبْرَانِيِّينْ رَسَّلَانِي وَ هُو يُقُولْ لَيْك: ”خَلِّي شَعَبِي يَمُرْقُوا مِنْ بَلَدَكْ لِيَعَبُدُونِي فِي الصَّحَرَاء. لَاكِنْ دَاهُو يَا هَسَّعْ كُلَ، إِنْتَ أَبَيْت.“ 17 خَلَاصْ، دَاهُو اللّٰهْ قَالْ: ”بِمِثِلْ دَا، إِنْتَ تَعَرِفْ كَدَرْ أَنَا بَسْ اللّٰهْ.“ وَ دَا، وَكِتْ أَنَا مُوسَى نَضْرُبْ أَلْمِي بَحَرْ النِّيلْ بِالْعَصَاةْ الْفِي إِيدِي وَ الْأَلْمِي يَبْقَى دَمّ. 18 وَ حُوتْ الْبَحَرْ يُمُوتُوا وَ الْبَحَرْ يَبْقَى عَفِنْ وَ الْمَصْرِيِّينْ مَا يَقْدَرَوْا يَشَرْبَوْا الْأَلْمِي دَا.›»
19 وَ بَتَّانْ اللّٰهْ قَالْ لِمُوسَى: «قُولْ لِهَارُونْ يِشِيلْ عَصَاتَهْ وَ يِمِدَّهَا عَلَيْ كُلَّ الْأَلْمِي هَنَا مَصِرْ، أَلْمِي الْفِي الْبُحُورْ وَ الرُّجُولْ وَ الرُّهُودْ وَ فِي كُلَّ بَكَانْ الْعِنْدَهْ أَلْمِي. وَ كُلَّ الْأَلْمِي دَا يَبْقَى دَمّ. وَ الدَّمّ يُكُونْ فِي كُلَّ بَلَدْ مَصِرْ لَحَدِّي الْأَلْمِي الْقَاعِدْ فِي مَوَاعِينْ هَنَا حَطَبْ وَ حَجَرْ.»
20 وَ خَلَاصْ، مُوسَى وَ هَارُونْ سَوَّوْا كُلَّ شَيّءْ مِثِلْ اللّٰهْ أَمَرَاهُمْ بَيَّهْ. وَ هَارُونْ رَفَعْ الْعَصَاةْ وَ ضَرَبْ أَلْمِي بَحَرْ النِّيلْ قِدَّامْ الْمَلِكْ وَ خَدَّامِينَهْ. وَ كُلَّ أَلْمِي الْبَحَرْ بِقِي دَمّ. 21 وَ حُوتْ الْبَحَرْ مَاتَوْا وَ الْبَحَرْ بِقِي عَفِنْ. وَ الْمَصْرِيِّينْ مَا قِدْرَوْا شِرْبَوْا الْأَلْمِي دَا. وَ أَلْمِي فِي كُلَّ بَلَدْ مَصِرْ بِقِي دَمّ. 22 وَ لَاكِنْ السَّحَّارِينْ هَنَا مَصِرْ سَوَّوْا نَفْس الشَّيّءْ بِسِحِرْهُمْ. وَ رَاسْ الْمَلِكْ بِقِي قَوِي وَ أَبَى مَا سِمِعْ كَلَامْ مُوسَى وَ هَارُونْ مِثِلْ اللّٰهْ قَالَهْ.
23 وَ الْمَلِكْ قَبَّلْ مَشَى بَيْتَهْ وَ مَا هَمَّ بِالشَّيّءْ دَا. 24 وَ كُلَّ الْمَصْرِيِّينْ نَكَتَوْا نُقَارْ جَنْب الْبَحَرْ لِيَلْقَوْا أَلْمِي يَشَرْبَوْه أَشَانْ أَلْمِي الْبَحَرْ مَا بِنْشَرِبْ. 25 وَ تَمَّ سَبْعَةْ يَوْم مِنْ اللّٰهْ ضَرَبْ الْبَحَرْ بِالْوَبَاءْ دَا.
© La Bible en arabe tchadien © Alliance biblique du Tchad, 2019
